Kisannla ki vrai-mem pé dirige le monde?
KITFOIS jamais ou pa finn joinde okenn chef bann crime organisé. Eski sa vedir ki zot pa existé? Bann chef criminel bien koné couma pou faire pou cachiette zot l’identité, ou-soit zot mem faire zot travail dan prison. Mais la gazette, souvent koz lor bann la guerre ki ena a cause la drogue, lor prostitution, ek lor bann ki vann bann dimoune, zis pou cite certain l’exemple. Tousala rappel nou ki sa bann chef criminel-la zot existé ek ki zot bann l’activité ena enn mauvais l’influence ek amenn bann mauvais consequence. Par l’effet ki zot laissé lor bann dimoune, nou koné ki sa bann chef criminel-la zot existé.
La Bible, Parole Bondié, faire nou koné ki Satan existé vrai-mem ek ki li couma enn chef criminel ki ena beaucoup pouvoir. Li faire tou pou realise so volonté a travers bann ’signe ki fausse’ ek “tou sorte trik ki pa juste pou trompe” bann dimoune. En realité, la Bible dire ki Satan “pé contigne transforme-li couma enn ange la lumiere.” (2 Thessaloniciens 2:9, 10; 2 Corinthiens 11:14). Pareil couma sa bann chef criminel-la, nou kapav sur ki Satan le Diable aussi existé par l’effet ki li ena lor bann dimoune. Pourtant, la plupart dimoune trouve sa difficile pou croire ki enn mauvais l’esprit invisible existé. Avant ki nou examine en profondeur seki la Bible dire lor Satan le Diable, anou guetté ki certain l’obstacle ek ki bann fausse croyance ki empeche beaucoup dimoune pou croire ki li existé vrai-mem.
◼ “Couma enn Bondié ki ena l’amour inn kapav crée Satan le Diable?” La Bible dire ki Bondié bon ek parfait. Alors li parette contradictoire pou pensé ki Bondié inn crée enn l’esprit ki mauvais ek ki faire di-tort. En realité, la Bible pa dire ki Bondié inn crée enn l’esprit coumsa. Au contraire la Bible dire lor Bondié: “Li stable couma enn grand roche ek seki Li faire, parfait, parski dan tou seki Li faire ena la justice. Li enn Bondié fidele ki pa faire okenn l’injustice, Li enn Bondié ki juste ek ki droite.”—Deutéronome 32:4; Psaume 5:4.
Seki nou bizin examiné c’est, eski enn kikenn parfait ki Bondié inn crée kapav faire enn mauvais kitsoz. Bondié pa finn faire so bann creature couma bann robot, mais Li finn donne zot liberté pou choisir, setadir capacité pou faire zot prop choix. Sa vedir ki enn creature intelligent ek parfait kapav choisir pou faire le bien ou-soit le mal. En realité, c’est zis si enn creature intelligent ena liberté pou choisir ki so bann action pou vrai-mem ena enn valeur moral.
Alors, nou comprend ki Bondié pa ti pou donne so bann creature liberté pou choisir pou faire le bien ou-soit le mal ek en mem temps empeche zot pou faire le mal si zot ti envie. Jésus ti koz lor Satan le Diable ki ti mal servi so liberté pou choisir. Jésus ti dire lor li: “Li pa’nn tini ferme dan la verité.” (Jean 8:44) Sa bann parole-la montré dan enn fason clair ki sa kikenn ki’nn vinn Satan le Diable-la, ti enn ange parfait au commencement ek enn lepok, li ti “tini ferme dan la verité.”a Jéhovah ti crée so bann creature avek liberté pou choisir parski Li content zot ek Li faire zot confiance.—Guette l’encadré “Eski enn creature parfait kapav vinn imparfait?” lor page 6.
◼ “Satan le Diable, li enn serviteur Bondié” Pou certain, coumadir la Bible pé donne sa l’idée-la dan livre Job. Dapré enn commentaire ki’nn faire lor la Bible, l’expression ki Satan le Diable ti pé “allé-vini partout lor la terre” faire reference ar seki bann espion perse ti pé faire dan le passé. Zot ti voyagé ek zot ti vinn dire le roi tou seki ti pé passé. (Job 1:7) Selman, si Satan le Diable ti vrai-mem espion Bondié, pou ki raison li ti bizin explik Bondié ki li ti pé “allé-vini partout lor la terre”? Livre Job jamais pa decrire Satan couma enn kikenn ki travail ensam avek Bondié. Au contraire, li appel sa l’esprit-la Satan, ki vedir “Opposant.” Sa montré bien ki c’est li-mem ki pli grand l’ennemi Bondié. (Job 1:6) Alors, couma certain inn arrivé croire ki Satan le Diable li enn serviteur Bondié?
Depuis premier siecle nou lepok, bann livre apocryphe juif ti decrire Satan le Diable couma enn kikenn ki pé negocié ar Bondié ek ki pourtant soumette ar So volonté. Dan so livre Méphistophélès, historien Jeffrey B. Russell dire ki Martin Luther ki ti enn protestant, ti considere Satan le Diable couma enn zouti [dan la main] Bondié, “couma enn faucille ou-soit enn pioche ki Li servi pou nettoye so jardin.” Jeffrey Russell ajouté ki, “sa pioche-la prend plaisir pou detruire bann mauvais l’herbe,” mais li reste enba pouvoir Bondié, coumsa li realise volonté Bondié. Plitar, Jean Calvin, enn français ki ti enn specialiste dan domaine la religion, ti accepté sa l’enseignement Martin Luther-la. Mais beaucoup dimoune ki ti content la justice, pa ti kapav accepté enn l’enseignement coumsa. Couma enn Bondié ki ena l’amour ti kapav permette le mal ek en plus faire sa arrivé? (Jacques 1:13) Sa l’enseignement-la ensam avek bann kitsoz cruel ki finn ena dan 20eme siecle, empeche beaucoup dimoune pou croire ki Bondié ek Satan le Diable existé.
◼ “Satan le Diable li zis represente seki mauvais” Li pou bien difficile pou comprend certain verset la Bible si nou considere Satan le Diable zis couma enn kitsoz ki represente seki mauvais. Par exemple, avek kisannla Bondié ti pé kozé dan Job 2:3-6? Eski li possible ki Li ti pé koz ar mauvais coté ki ti ena dan Job, ou-soit eski Li ti pé koz avek Li-mem? En plus, eski Bondié enn coute ti pou flatte bann qualité ki Job ti ena, ek zis apré, laisse mauvais coté ki ti ena dan Job, testé li ek laisse li passe par bann l’epreuve? Si nou pensé ki Bondié agir coumsa, c’est coumadir nou pé considere Li couma enn Kikenn ki mauvais ek ki faire di-tort so bann creature par expré, pa couma enn Kikenn “ki pena okenn l’injustice.” (Psaume 92:15) Au contraire, Bondié ti refuse pou ’avance so la main’ pou faire Job di-tort. Li clair ki Satan le Diable, li pa represente seki mauvais ou-soit mauvais coté ki ena dan personnalité Bondié, mais enn l’esprit ki’nn faire li-mem vinn l’ennemi Bondié.
Kisannla ki vrai-mem pé dirige le monde?
Zordi, beaucoup pensé ki li nepli la mode pou croire ki Satan le Diable existé. Mais selman, nou pé vive dan enn le monde kot ena beaucoup mauvais kitsoz. Pa’nn ena okenn lezot l’explication kifer ena sa bann mauvais kitsoz-la, a part ki c’est Satan le Diable ki derriere tousala. En realité, parski bann dimoune pa croire ki Satan le Diable existé, sa inn amenn beaucoup pou rejette Bondié ek tou so bann principe moral.
Charles-Pierre Baudelaire, enn poete ki ti vive dan 19eme siecle, ti ecrire: “Pli grand piege ki Satan servi c’est convaink nou ki li pa existé.” Kan li’nn cachiette seki li été, Satan le Diable finn, en realité, pousse bann dimoune pou ena doute ki Bondié existé. Si Satan le Diable pa existé, eski sa pa pou pousse beaucoup dimoune pou pensé ki c’est Bondié ki derriere tou bann mauvais kitsoz ki ena zordi ek lerla perdi la foi en Li? Eski c’est pa sa-mem ki Satan le Diable envie bann dimoune croire?
Pareil couma enn chef criminel, Satan le Diable cachiette so l’identité pou li kapav realise so l’objectif? Ki so l’objectif? La Bible reponn: “Bondié sa systeme-la finn aveuglé l’esprit bann ki pa’lé croire, pou ki la lumiere la bonne nouvelle ki rempli ar la gloire concernant Christ, ki ressemblé Bondié, pa eclaire zot.”—2 Corinthiens 4:4.
Ena enn question important ki resté pou reponn. Ki Bondié pou faire ar sa specialiste ki derriere tou bann mauvais kitsoz ek bann souffrance ki existé zordi ek ki pa pé laisse koné ki li été? Nou pou examine sa dan prochain lartik.
[Note]
a Pou comprend kifer Bondié pa’nn detruire Satan le Diable desuite kan li ti rebellé, guette chapitre 11 dan livre Ki la Bible enseigné vrai-mem? publié par bann Témoins de Jéhovah.
[L’encadré page 5]
Eski Satan le Diable li enn serviteur Bondié ou-soit li l’ennemi Bondié?
[L’encadré/Zimage page 6]
Eski enn creature parfait kapav vinn imparfait?
Bondié ti crée so bann creature intelligent parfait, mais zot ti ena bann limite. Mem si Bondié ti crée Adam parfait, li ti bizin respecté bann limite ki so Createur ti etabli lor plan physik. Par exemple, li pa ti kapav mange la terre, roche ou-soit di-bois sans ki sa faire li di-tort. Si li pa ti prend compte la loi gravité, ek li ti jette so lekor enba depuis enn hauteur, li ti pou mort ou-soit li ti pou bien blessé.
Li pareil aussi pou tou bann creature parfait, ki li enn dimoune ou-soit enn ange. Personne pa kapav depasse bann limite ki Bondié inn fixé lor plan moral sans ki li gagne bann mauvais consequence. Alors, kan enn creature intelligent mal servi so liberté pou choisir, li bien facile ki li faire erreur ek faire peché.—Genèse 1:29; Matthieu 4:4.