Jéhovah Li mo part

“Mo-mem ki to part ek to l’heritage au milieu bann garson Israël.”​—NOMB. 18:20.

1, 2. (a) Ki ti arrive bann Lévite kan Josué ti partage la Terre promise ar bann lezot tribu? (b) Ki l’assurance Jéhovah ti donne bann Lévite?

APRÉ ki enn grand partie la Terre promise ti vinn pou bann Israélite, Josué ti commence partage ar chaque tribu, zot part la terre. Pou faire sa, li ti travail ensam avek grand pretre Éléazar ek chef bann tribu. (Nomb. 34:13-29) Mais bann Lévite pa ti gagne enn part la terre en heritage pareil couma bann lezot tribu ti gagné. (Jos. 14:1-5) Kifer tribu Lévi pa ti gagne enn territoire, ou-soit enn part dan la Terre promise? Eski ti’nn blié zot?

² Nou gagne enn reponse dan seki Jéhovah ti dire bann Lévite. Pou montré ki Li pa ti abandonne zot, Jéhovah ti dire zot: “Mo-mem ki to part ek to l’heritage au milieu bann garson Israël.” (Nomb. 18:20) C’est vrai-mem enn grand l’assurance ki Jéhovah ti donne zot kan Li ti dire: “Mo-mem ki to part”! Ki sentiment ou ti pou ena si Jéhovah ti dire ou sa? Kitfois ou premier reaction ti pou: ’Eski enn dimoune couma moi merité ki Bondié Tout-Puissant, donne moi enn l’assurance coumsa?’ Kitfois ou kapav demandé aussi: ’Eski zordi, Jéhovah kapav vrai-mem vinn part enn chretien ki imparfait?’ Sa bann question-la implik ou ek bann dimoune ki ou content. Alors, anou guetté ki Jéhovah ti pé rod dire. Sa pou aide nou comprend couma Jéhovah kapav vinn part bann chretien zordi. Surtout, Li kapav vinn ou part, ki ou ena l’esperance pou al vive dan le ciel ou-soit pou vive dan enn paradis lor la terre.

Jéhovah prend soin bann Lévite

3. Ki ti faire Bondié choisir bann Lévite pou so service?

³ Avant ki Jéhovah ti donne bann Israélite la Loi, bann chef famille ti servi couma pretre pou zot prop famille. Kan Bondié ti donne la Loi, Li ti etabli enn groupe pretre ek zot assistant ki ti sorti dan tribu Lévi ek ki ti pou servi a plein temps. Couma Jéhovah ti faire sa? Kan Bondié ti touye bann premier-né égyptien, Li ti faire premier-né bann Israélite vinn saint, Li ti mette zot a part, coumadir zot ti pou Li. Apré sa, Jéhovah ti faire sa changement important-la: “Moi, mo vrai-mem prend bann Lévite . . . dan place tou bann premier-né parmi bann garson Israël.” Enn recensement ti montré ki bann garson premier-né bann lezot tribu en Israël ti pli beaucoup ki bann Lévite, alors ti paye enn prix pou sa difference-la. (Nomb. 3:11-13, 41, 46, 47) C’est coumsa ki bann Lévite ti kapav rempli zot role pou servi Bondié Israël.

4, 5. (a) Ki sa ti representé pou bann Lévite pou ena Bondié couma zot part? (b) Couma Bondié ti prend soin bann Lévite?

⁴ Ki sa responsabilité-la ti representé pou bann Lévite? Jéhovah ti dire ki Li ti pou vinn zot part. Dan ki sens? Au lieu ki zot ti gagne enn part la terre en heritage, Li ti donne zot privilege pou servi Li, ek sa ti ena enn grand valeur. L’heritage ki zot ti gagné c’est pou servi couma “bann pretre Jéhovah.” (Jos. 18:7) Contexte Nombres 18:20 montré ki sa pa ti faire zot vinn misere. (Lire Nombres 18:19, 21, 24.) Bann Lévite ti pou gagne “chaque dixieme part en Israël couma enn l’heritage, pou service ki zot [ti] faire.” Zot ti pou gagne 10 pour cent lor tou seki bann Israélite ti produire ek lor augmentation zot bann zanimo. En retour, bann Lévite ti bizin contribué enn dixieme “seki pli bon” dan seki zot ti gagné, pou soutenir bann pretre.a (Nomb. 18:25-29) Bann pretre ti aussi gagne “tou bann contribution ki sacré” ki bann Israélite ti amenn pou Bondié dan l’endroit kot ti adore Li. Alors, tou bann pretre ti ena bann bon raison pou croire ki Jéhovah ti pou prend zot soin.

⁵ Li parette ki dan la Loi mosaïk ti ena enn disposition pou enn deuxieme la dime. Bann Israélite ti mette sa la dime-la enn coté pou soutenir zot famille ek pou faire zot plaisir pendant zot bann l’assemblée ki ti sacré ek ki zot ti faire chaque l’année. (Deut. 14:22-27) Bann Israélite ti considere septieme l’année dan enn periode sept an, couma enn sabbat. Mais la fin troisieme ek sixieme l’année dan sa periode-la, zot ti depose sa la dime-la devant la porte, pou aide bann pauvre ek bann Lévite. Kifer bann Lévite ti forme partie parmi bann ki ti gagne sa la dime-la? Parski zot pa ti ena “ni part ni l’heritage” en Israël.​—Deut. 14:28, 29.

6. Mem si tribu Lévi pa ti gagne okenn part la terre en Israël, kot-sa zot ti resté?

⁶ Kitfois ou kapav demandé: ’Si pa ti donne bann Lévite okenn la terre en heritage, kot-sa zot ti resté?’ Bondié ti donne zot seki zot ti bizin. Li ti donne zot 48 la ville ek bann terrain ki ti tout autour pou zot bann zanimo. Parmi ti ena six la ville refuge. (Nomb. 35:6-8) Sa vedir ki bann Lévite ti ena enn place pou zot resté kan zot pa ti travail dan tabernacle Bondié. Jéhovah ti prend bien soin bann dimoune ki ti consacré zot la vie dan so service. Li clair ki bann Lévite ti kapav montré ki Jéhovah ti zot part. Couma? Kan zot ti montré ki zot ti ena confiance ki Bondié ti envie ek ti kapav prend zot soin.

7. Ki bann Lévite ti bizin ena pou ki Jéhovah vinn zot part?

⁷ La Loi pa ti puni enn Israélite ki pa ti donne la dime. Kan le peuple pa ti obeir Jéhovah concernant la dime, sa ti ena enn l’effet lor bann pretre ek bann Lévite. Sa ti arrivé dan lepok Nehémia. A cause sa, bann Lévite ti bizin al travail dan zot karo, ek zot ti neglige zot service. (Lire Nehémia 13:10.) Li clair ki tribu Lévi ti pou gagne seki zot ti bizin zis kan le peuple ti obeir la Loi Jéhovah. En plus, bann pretre ek bann Lévite zot-mem zot ti bizin ena la foi en Jéhovah ek dan disposition ki Li ti prend pou donne zot seki zot ti bizin.

Bann Lévite ki ti ena Jéhovah couma zot part

8. Ki ti troublé enn Lévite ki ti appel Asaph?

⁸ Bann Lévite en tant ki enn tribu ti ena Jéhovah couma zot part. Mais, nou remarké ki certain Lévite personnellement ti dire ki “Jéhovah Li mo part” pou montré zot l’attachement pou Bondié ek zot confiance en Li. (Lam. 3:24) Enn parmi sa bann Lévite-la ti enn chanteur ek enn compositeur. Nou pou appel li Asaph, mem si li ti kapav enn membre la famille Asaph, sa Lévite ki ti dirige bann chanteur dan lepok le roi David-la. (1 Chron. 6:31-43) Dan Psaume 73, nou lire ki Asaph, (ou-soit enn parmi so bann descendant) pa ti comprend kifer bann mauvais dimoune ti dan bien. Li ti commence envié zot ek li ti mem dire: “Oui, c’est pou nanyin ki mo finn purifié mo leker, ek ki mo pé lave mo la main dan l’innocence.” Li parette ki li pa ti trouve valeur sa privilege ki li ti ena pou servi Jéhovah-la; Li ti blié ki Jéhovah ti so part. Li ti troublé lor plan spirituel mais kan li “ti rente dan temple Bondié ki ti extra joli ek impressionnant” so l’attitude ti changé.​—Ps. 73:2, 3, 12, 13, 17.

9, 10. Kifer Asaph ti kapav dire ki Bondié ti so “part pou touletan”?

⁹ Dan tabernacle, Asaph ti commence trouve bann kitsoz pareil couma Jéhovah trouvé. Kitfois ou aussi ou finn passe par la. Li possible ki enn moment dan ou la vie, ou ti nepli trouve valeur ou bann privilege spirituel ek ou ti commence pense zis bann kitsoz materiel ki ou ti kapav gagné. Mais kan ou finn etudié Parole Bondié ek ou finn assisté bann reunion, ou finn trouve bann kitsoz pareil couma Jéhovah trouvé. Asaph ti comprend seki finalement ti pou arrive bann mauvais dimoune. Li ti reflechi lor so la vie en tant ki enn serviteur Bondié, ek li ti realisé ki Jéhovah ti pou trappe so la main droite ek ti pou guide li. Alors, Asaph ti kapav dire Jéhovah: “A part toi mo pena okenn plaisir lor la terre.” (Ps. 73:23, 25) Lerla, li ti dire ki Jéhovah ti so part. (Lire Psaume 73:26.) Mem si ’lekor ek leker sa psalmiste-la ti kitfois fatigué,’ Bondié ti so “part pou touletan.” Sa psalmiste-la ti ena confiance ki Jéhovah ti pou considere li couma so camarade. Jéhovah pa ti pou blié so service fidele. (Eccl. 7:1) Surement sa ti bien encourage Asaph! Li ti chanté: “Mais pou moi, vinn pré ar Bondié, sa li bon pou moi. Mo finn mette mo refuge dan Souverain Seigneur Jéhovah.”​—Ps. 73:28.

¹⁰ Asaph ti ena Jéhovah couma so part ek pou li, sa ti ena plus valeur ki bann kitsoz materiel ki li ti gagné couma enn Lévite. Li ti pé surtout koz lor privilege ki li ti ena pou servi Jéhovah ek bann bon relation ki li ti ena avek Li, l’amitié ki li developpé avek Bondié Tout-Puissant. (Jacq. 2:21-23) Pou garde sa bon relation-la, Asaph ti bizin contigne ena la foi en Jéhovah ek faire Li confiance. Li ti bizin ena l’assurance ki finalement Jéhovah ti pou recompense li si li ti vive en accord avek So bann principe. Ou aussi ou kapav ena mem l’assurance dan Bondié Tout-Puissant.

11. Ki question Jérémie ti posé, ek couma Jéhovah ti reponn li?

¹¹ Prophete Jérémie ti enn lot Lévite ki ti dire ki Jéhovah ti so part. Anou guetté ki li ti pé rod dire kan li ti servi sa l’expression-la. Jérémie ti vive dan la ville Anathoth, ki ti pré ar Jérusalem ek ki ti pou bann Lévite. (Jér. 1:1) Ti arrive enn moment dan so la vie kot Jérémie pa ti comprend kifer bann mauvais dimoune ti pé prosperé alors ki bann bon dimoune ti pé souffert. (Jér. 12:1) Kan li ti trouve seki ti pé passé dan Jérusalem ek dan Juda, sa ti pousse-li pou dire Jéhovah seki ti pé bouleverse li. Jérémie ti koné ki Jéhovah Li juste. Seki Jéhovah ti inspire Jérémie pou prophetisé apré ek fason ki Li ti realise sa prophetie-la ti reponn bien question ki Jérémie ti posé. En accord avek bann prophetie biblik, bann dimoune ki ti obeir Jéhovah, ’ti gagne la vie’ sauve, alors ki bann mauvais ki ti pé prosperé ek ki pa ti prend compte l’avertissement Bondié, ti detruire.​—Jér. 21:9.

12, 13. (a) Ki ti pousse Jérémie pou dire: “Jéhovah Li mo part,” ek ki l’attitude li ti ena? (b) Kifer tou bann tribu en Israël ti bizin contigne attann pareil couma Jérémie?

¹² Kan plitar Jérémie ti guette so pays ki ti’nn detruire, li ti ena l’impression ki li ti pé marche dan noir. C’est coumadir Jéhovah ti’nn faire li “assizé couma bann ki’nn mort depuis longtemps.” (Lam. 1:1, 16; 3:6) Jérémie ti dire sa nation rebelle-la retourne vers Jéhovah, zot Papa ki dan le ciel. Mais zot ti tellement mauvais ki Bondié ti bizin detruire Jérusalem ek Juda. Sa ti faire Jérémie bien chagrin, mem si li pa ti en tort. Dan so la peine, Jérémie ti rappel misericorde Bondié. Li ti dire: “Nou pa finn detruire net.” Oui, toulé-gramatin bann misericorde Jéhovah zot nouveau! C’est lerla ki Jérémie ti dire: “Jéhovah Li mo part.” Li ti contigne ena privilege pou servi Jéhovah couma enn prophete.​—Lire Lamentations 3:22-24.

¹³ Pendant 70 an, bann Israélite pa ti pou vive dan zot pays. Zot pays ti pou reste abandonné. (Jér. 25:11) Mais kan Jérémie ti dire ki “Jéhovah Li [so] part,” sa ti montré ki li ti ena confiance dan misericorde Bondié, ek sa ti donne li enn raison pou “contigne attann.” Tou bann tribu en Israël ti’nn perdi zot l’heritage, alors zot ti bizin developpe mem l’attitude ki Jérémie. Jéhovah ti zot sel l’espoir. Apré 70 an, peuple Bondié ti retourne dan zot pays, ek zot ti ena privilege pou servi Li la-bas.​—2 Chron. 36:20-23.

Lezot ti kapav ena Jéhovah couma zot part

14, 15. A part bann Lévite, kisannla ki ti considere Jéhovah couma so part, ek kifer?

¹⁴ Asaph ek Jérémie toulé-deux ti dan tribu Lévi. Mais eski c’est zis bann Lévite ki ti ena privilege pou servi Jéhovah? Non! Dan so jeunesse, David, ki ti pou vinn le roi en Israël, ti appel Bondié so “part dan pays bann vivant.” (Lire Psaume 142:1, 5.) Kan David ti compose sa psaume-la, li pa ti ni dan enn palais, ni mem dan enn lakaz. Li ti dan enn caverne, li ti pé cachiette pou ki so bann l’ennemi pa trappe li. Au moins deux fois, David ti cachiette dan bann caverne​—enn fois pré ar Adoullam ek enn lot fois dan desert En-Guédi. Kitfois li ti compose Psaume 142 dan enn sa bann caverne-la.

¹⁵ Si David ti ecrire sa psaume-la dan enn caverne, c’est parski le roi Saül ti pé rod li partout pou touyé. David ti al cachiette dan enn caverne kot ti difficile pou allé. (1 Sam. 22:1, 4) Dan sa l’endroit ki ti bien loin-la, li possible ki David ti ena l’impression ki li pa ti ena okenn camarade avek li pou protege li. (Ps. 142:4) C’est lerla ki David ti demann Bondié so l’aide.

16, 17. (a) Ki bann raison David ti ena pou senti-li tousel? (b) Ar kisannla David ti kapav rod l’aide?

¹⁶ Avant ki David ti compose Psaume 142, kitfois li ti aprann seki ti’nn arrive grand pretre Ahimélek. Ahimélek ti aide David sans ki li ti koné ki David ti pé sauvé parski le roi Saül ti pé rod touye li. Le roi Saül ti jaloux David, ek li ti faire touye Ahimélek ek so famille. (1 Sam. 22:11, 18, 19) David ti senti-li responsable zot la mort. C’est coumadir li ti touye sa pretre ki ti aide li-la. Si ou ti dan situation David, eski ou ti pou senti-ou responsable? Seki ti faire David encore pli stressé c’est ki li pa ti kapav reposé parski Saül ti pé contigne rod li pou touyé.

¹⁷ Enn tipé le temps apré, prophete Samuel ki ti oint David pou vinn le roi, ti mort. (1 Sam. 25:1) Kitfois sa ti faire David senti-li encore plus tousel, coumadir li pa ti ena personne pou aide li. Pourtant, David ti koné ar kisannla li ti kapav demann l’aide: ar Jéhovah. David pa ti ena mem privilege ki bann Lévite, mais li, li ti’nn oint pou faire enn lot qualité service. Li ti pou vinn le roi lor peuple Bondié. (1 Sam. 16:1, 13) Alors, David ti dire Jéhovah tou seki ti ena dan so leker ek ti contigne rod So direction. Ou aussi ou kapav ek ou bizin considere Li couma ou part ek ena confiance dan so protection a mesure ki ou faire tou seki ou kapav dan so service.

18. Couma l’exemple bann dimoune ki nou finn examiné dan sa lartik-la ti montré ki zot ti faire Jéhovah vinn zot part?

¹⁸ L’exemple sa bann dimoune ki nou finn examiné-la, montré nou ki zot ti ena Jéhovah couma zot part. Dan ki sens? Zot ti gagne enn privilege special dan so service. Zot ti compte lor Bondié pou soutenir zot pendant ki zot ti pé servi Li. Bann Lévite ek bann Israélite ki ti dan lezot tribu en Israël, pareil couma David, ti kapav faire Bondié vinn zot part. Couma ou aussi ou kapav faire Jéhovah vinn ou part? C’est seki nou pou examiné dan prochain lartik.

[Note]

Couma ou pou reponn?

• Dan ki sens Jéhovah ti part bann Lévite?

• Ki Asaph, Jérémie ek David ti faire pou montré ki Jéhovah ti zot part?

• Ki qualité ou bizin ena si ou envie ki Bondié vinn ou part?

[L’encadré page 11]

Bann Lévite pa ti gagne enn part la terre en heritage. Au contraire, Jéhovah ti zot part, parski zot ti ena enn grand privilege pou servi Li

[Zimage page 10]

Couma Jéhovah ti part bann pretre ek bann Lévite?

[Zimage page 12]

Ki ti aide Asaph pou contigne considere Jéhovah couma so part?