Eski Jéhovah konn ou?
“Jéhovah konn bann dimoune ki pou Li.”—2 TIM. 2:19.
1, 2. (a) Ki kitsoz ti ena beaucoup l’importance pou Jésus? (b) Ki bann question nou bizin pose nou-mem?
ENN jour enn Pharisien ti demann Jésus: “Ki pli grand commandement dan la Loi?” Jésus ti reponn li: “To bizin content Jéhovah to Bondié avek tou to leker ek avek tou to nâme ek avek tou to l’esprit.” (Mat. 22:35-37) Jésus ti ena enn grand l’amour pou Jéhovah ek li ti vive dapré sa bann parole-la. Pou Jésus, seki Jéhovah ti pensé lor li ti ena beaucoup l’importance, ek li ti montré sa kan li ti reste fidele toute longue so la vie. Ala kifer, enn tigit avant so la mort, Jésus ti kapav dire ki Bondié ti konn li, parski li ti enn kikenn ki ti obeir So bann commandement avek fidelité. Alors, nou kapav dire ki Jésus ti reste dan l’amour Bondié.—Jean 15:10.
2 Zordi, beaucoup dimoune dire ki zot content Bondié. Pena doute ki nou aussi nou dire mem zaffaire. Mais selman, li bon nou reflechi lor sa bann question bien important-la: ’Eski Jéhovah konn moi? Couma Jéhovah considere moi? Eski Jéhovah konn moi couma so dimoune?’ (2 Tim. 2:19) C’est vrai-mem enn privilege extraordinaire kan nou reflechi ki nou kapav vinn bien proche avek Souverain l’univers!
3. (a) Kifer certain trouve sa difficile pou croire ki zot kapav vinn pou Jéhovah? (b) Ki kapav aide nou pou change sa fason pensée-la?
3 Pourtant, parmi bann ki content Jéhovah, ena trouve sa difficile pou croire ki zot kapav vinn so camarade. Zot croire ki zot enn nanyin ditou ek a cause sa zot pensé ki jamais zot pou vinn pou Jéhovah. Mais heureusement ki Jéhovah pa trouve nou coumsa! (1 Sam. 16:7) L’apotre Paul ti dire so bann compagnon chretien: “Si enn dimoune content Bondié, Bondié konn sa dimoune-la.” (1 Cor. 8:3) Pou ki Bondié konn ou, avant tou li important ki ou, ou ena l’amour pou Li. Anou reflechi enn coute: Kifer ou pé lire sa magazine-la? Kifer eski ou pé faire zeffort pou servi Jéhovah avek tou ou leker, tou ou nâme, tou ou l’esprit, ek tou ou la force? Si ou finn voué ou la vie ar Jéhovah ek ou finn baptisé, ki finn amenn ou pou prend sa decision-la? Jéhovah examine leker bann dimoune ek la Bible explik nou ki Li attire bann dimoune ki “desirable.” (Lire Haggaï 2:7; Jean 6:44.) En realité, conclusion ki ou kapav tiré c’est ki, si ou pé servi Jéhovah c’est parski Li finn attire ou. Alors, jamais Li pou quitte sa bann qualité dimoune-la si zot reste fidele. Devant lizié Bondié zot ena beaucoup valeur ek Li bien content zot.—Ps. 94:14.
4. Kifer nou bizin pa blié ki nou relation avek Jéhovah li important?
4 Enn fois ki Jéhovah finn attire nou, nou bizin faire tou pou reste dan so l’amour. (Lire Jude 20, 21.) Pa blié, pareil couma la Bible montré, ena enn possibilité ki tigit par tigit nou eloigne-nou ar Bondié, ou-soit nou tourne lé-dos ar Li. (Héb. 2:1; 3:12, 13) Par exemple, zis avant ki li dire bann parole ki trouve dan 2 Timothée 2:19, l’apotre Paul ki koz lor Hyménée ek Philète. Pena doute, ki enn certain lepok sa deux dimoune-la ti bien fidele mais apré zot finn quitte la verité. (2 Tim. 2:16-18) Dan region Galatie ti ena plusieurs congregation. Rappel ki dan sa bann congregation-la, certain ki Jéhovah ti koné pa finn reste dan la verité. (Gal. 4:9) Fodé jamais nou prend nou relation avek Jéhovah pou enn badinage.
5. (a) Ki bann qualité ki ena valeur pou Jéhovah? (b) Ki bann l’exemple nou pou examiné?
5 Ena certain qualité ki ena valeur pou Jéhovah. (Ps. 15:1-5; 1 Pierre 3:4) Certain ti gagne faveur Bondié parski zot ti ena la foi ek l’humilité. Anou examine l’exemple deux zom ki Jéhovah ti content parski zot ti ena sa bann qualité-la. Nou pou guette aussi l’exemple enn zom ki ti croire ki Bondié ti konn li. Mais parski li ti developpe l’orgueil, Jéhovah ti rejette li. Nou kapav aprann beaucoup ar sa bann l’exemple-la.
Papa tou bann ki ena la foi
6. (a) Ki qualité la foi Abraham ti ena dan bann promesse Jéhovah? (b) Couma eski Jéhovah ti considere Abraham?
6 Abraham ti enn zom ki ti “ena la foi dan Jéhovah.” Avredir, appel li “papa tou bann ki ena la foi.” (Gen. 15:6; Rom. 4:11) Abraham ti quitte so lakaz, so bann camarade, ek so bann di-bien pou al dan enn pays bien loin parski li ti ena la foi. (Gen. 12:1-4; Héb. 11:8-10) Mem apré plusieurs l’année, Abraham so la foi ti encore solide. Ki kitsoz ki montré nou sa? Li ti disposé pou “coumadir offert Isaac,” so garson, pareil couma Jéhovah ti demann li. (Héb. 11:17-19) Jéhovah ti considere Abraham couma enn kikenn ki special parski li ti ena la foi dan So bann promesse. Alors nou kapav dire ki Bondié ti vrai-mem konn Abraham. (Lire Genèse 18:19.) Pou Jéhovah, Abraham pa ti zis enn kikenn ki Li ti koné coumsa, mais Li ti content li couma enn camarade.—Jacq. 2:22, 23.
7. Ki kitsoz interessant nou remarké concernant bann promesse Jéhovah, ek ki l’effet sa ti ena lor Abraham?
7 Li interessant pou remarké ki Abraham pa ti herite la terre ki Jéhovah ti promette li alors ki li ti encore vivant. En plus, li pa ti trouve so descendance vinn pareil “couma bann la grain di-sable ki dan bord la mer.” (Gen. 22:17, 18) Mem si li pa ti trouve sa bann promesse-la realisé, li ti garde enn la foi solide en Jéhovah. Li ti koné ki si Bondié ti donne So parole, c’est coumadir sa ti fini realisé. Pena doute ki Abraham ti montré sa qualité la foi-la par fason ki li ti vive. (Lire Hébreux 11:13.) Eski Jéhovah konn nou couma enn dimoune ki ena enn la foi pareil couma Abraham?
Montré ou la foi kan ou attann ki Jéhovah agir
8. Cite certain desir ki beaucoup ena.
8 Kitfois nou ena bann desir ek nou ti pou bien content ki sa realisé. Li normal ki nou envie marié, gagne zenfant, ek ena enn bon la santé. Pena nanyin de mal ladan. Mais, pou beaucoup dimoune li kapav arrivé ki zot desir pa realisé. Si nou trouve-nou dan sa cas-la, fason ki nou faire face ar sa situation-la pou montré ki qualité la foi nou ena.
9, 10. (a) Couma certain finn essaye realise zot bann desir? (b) Ki ou pensé lor realisation bann promesse Bondié?
9 Li pa pou bon si nou essaye realise sa bann desir-la dan enn fason ki pa en accord avek bann principe Bondié. Sa pou faire nou-mem di-tort lor plan spirituel. Par exemple, certain finn choisir bann traitement medical ki al kont bann principe Jéhovah. Lezot finn accepté enn travail ki mange tou zot le temps, resultat: zot nepli ena le temps pou zot famille ou-soit pou assisté bann reunion. Ena certain ki finn commence ena bann sentiment pou enn kikenn ki pa Témoin. Si enn chretien prend sa qualité chemin-la, eski li pé envie vrai-mem ki Jéhovah konn li? Ki Jéhovah ti pou ressenti si Abraham ti perdi patience ek ki li ti envie ki bann promesse Jéhovah realisé desuite? Ki ti pou arrivé si Abraham ti decide pou faire bann kitsoz par so prop la tête, li arrete vive enba enn la tente, ek acheté enn lakaz? Ki ti pou arrivé si li ti decide pou vinn enn grand dimoune au lieu ki li ti attann ki Jéhovah agir? (Compare avek Genèse 11:4.) Eski Jéhovah ti pou toujours considere li couma so camarade?
10 Eski ena kitsoz ki ou pé bien envie gagné? Eski ou la foi assez solide pou attann ki Jéhovah donne ou sa bann kitsoz-la? Jéhovah Li-mem promette ki Li pou satisfaire “desir tou seki vivant.” (Ps. 145:16) Pareil couma sa ti passé dan cas Abraham, li possible ki certain promesse Jéhovah pa realisé vite-vite couma nou, nou envie. Mais kan-mem sa, si nou ena enn la foi pareil couma Abraham ek nou montré sa par fason ki nou amenn nou la vie, sa pou ena valeur devant lizié Jéhovah. Si nou faire sa, pena doute ki Jéhovah pou beni nou.—Héb. 11:6.
Deux l’exemple ki montré difference entre l’humilité ek l’orgueil
11. Ki privilege kitfois Qorah ti ena pendant beaucoup l’année, ek ki sa montré nou concernant so l’attitude envers Bondié?
11 Anou prend l’exemple deux zom, Moïse ek Qorah. Moïse ti enn kikenn ki ti montré respé pou bann disposition ki Jéhovah ti etabli ek So bann decision. Mais Qorah li, li ti faire tou le contraire. Seki zot ti faire ti ena enn l’effet lor fason ki Jéhovah ti considere zot. Qorah ti enn Lévite ki ti sorti dan famille Qehath, ek li ti ena beaucoup privilege. Kitfois li ti gagne l’occasion pou trouve Jéhovah delivré nation Israël dan la mer Rouge. Kan bann Israélite ti desobeir lor montagne Sinaï, kitfois Qorah ti parmi bann ki ti soutenir jugement ki Jéhovah ti envoyé kont zot. Ek surement li ti aussi parmi bann ki ti aidé pou sarié l’arche l’alliance. (Ex. 32:26-29; Nomb. 3:30, 31) Pena doute ki li ti reste fidele envers Jéhovah pendant beaucoup l’année, ek a cause sa beaucoup dan camp Israël ti respecté li.
12. Couma nou trouvé lor page 31, Qorah ti ena l’orgueil. Ki l’effet sa ti ena lor so relation avek Jéhovah?
12 Mais, alors ki nation Israël ti pé al vers la terre Promise, Qorah ti pensé ki ti ena enn probleme dan fason ki Jéhovah ti pé dirige nation Israël. Li finn essaye faire bann changement ek 250 chef dan nation Israël finn suive li. Qorah ek sa bann chef-la ti cent pour cent sur ki zot ti ena faveur Jéhovah. Zot ti dire Moïse: “Nou’nn plein ar [toi], parski tou dimoune ki dan l’assemblée, zot saint ek Jéhovah au millieu zot.” (Nomb. 16:1-3) Guette sa l’orgueil ek sa grand confiance ki zot ti ena en zot-mem-la! Moïse ti dire zot: “Jéhovah pou faire koné kisannla ki pou Li.” (Lire Nombres 16:5.) Lendemain vers la fin la journée, Qorah ek tou bann ki ti suive li ti mort.—Nomb. 16:31-35.
13, 14. Couma eski Moïse ti montré so l’humilité?
13 Mais Moïse li, li “ti beaucoup pli humble ki tou bann dimoune ki ti ena lor la terre.” (Nomb. 12:3) Couma li ti montré so l’humilité? C’est kan li ti faire exactement tou seki Jéhovah ti demann li faire. (Ex. 7:6; 40:16) Okenn part nou pa trouvé ki Moïse ti mette en doute fason ki Jéhovah ti faire bann kitsoz, ou-soit li ti bouilli parski li ti bizin suive bann l’instruction ki Jéhovah ti donné. Par exemple, Jéhovah ti donne li bann l’ordre bien precis concernant construction tabernacle. Li ti dire li ki couleur di-fil ek ki quantité crochet bizin servi pou faire la toile tabernacle. (Ex. 26:1-6) Ki ou pou faire si enn surveillant dan l’organisation Jéhovah donne ou bann instruction avek enn tas detail? Kitfois sa kapav agace ou. Mais Jéhovah Li, Li enn surveillant ki parfait. Avek enn leker content Li donne so bann serviteur bann responsabilité ek Li faire zot confiance. Si Li donne bann detail c’est parski ena enn bon raison derriere sa. Mais remarké ki Moïse pa ti grince lé-dent parski Jéhovah ti donne li sa quantité detail-la. Li pa ti pensé ki Jéhovah ti pé abaisse li ou-soit empeche li servi so liberté. Au contraire, Moïse ti faire sur ki bann travailleur “ti faire exactement” couma Jéhovah ti dire zot faire. (Ex. 39:32) Enn grand l’humilité, pa vrai? Moïse ti reconette ki sa c’est travail Jéhovah sa ek ki li, li ti zis enn zouti ki Jéhovah ti pé servi.
14 Moïse ti montré l’humilité mem si li ti bizin faire face ar bann situation bien difficile ki ti affecté li personnellement. Par exemple, kan le peuple ti pé plaigné parski zot pa ti pé gagne de l’eau Moïse ti sap lor cale ek li pa ti donne Jéhovah la gloire. Consequence: Jéhovah ti dire Moïse ki li pa ti pou gagne privilege pou amenn nation Israël dan la Terre promise. (Nomb. 20:2-12) Pendant plusieurs l’année Moïse ek so frere, Aaron, finn bizin supporte sa bann Israélite ki touletan ti pé plaigné-la. Mais asterla, a cause enn sel erreur, Moïse pa ti pou gagne seki li ti pé attann depuis bien longtemps. Couma li’nn reagir? Mem si so leker ti gros, li ti accepté decision Jéhovah avek humilité. Li ti koné ki Jéhovah enn Bondié la justice ek Li pa kapav faire okenn l’injustice. (Deut. 3:25-27; 32:4) Kan ou pense lor Moïse, eski ou pa dire, oui, sa c’est enn dimoune ki Jéhovah ti koné sa!—Lire Exode 33:12, 13.
Nou bizin l’humilité pou soumette ar Jéhovah
15. Ki nou kapav aprann ar mauvais l’exemple Qorah?
15 Kan ena bann changement dan l’organisation Jéhovah ek kan bann ancien prend bann decision, couma nou reagir? Nou pou gagne faveur Jéhovah si nou accepté sa bann kitsoz-la. Qorah ek so bann camarade ti eloigne-zot ar Bondié parski zot ti ena enn trop grand confiance en zot-mem, zot ti ena l’orgueil ek zot pa ti ena assez la foi. Qorah ti pensé ki Moïse ti zis enn vié bonhomme ki ti pé prend so bann prop decision. Mais li ti blié ki en realité c’est Jéhovah ki ti pé dirige nation Israël. A cause sa, li pa finn montré so fidelité envers bann zom ki Jéhovah ti etabli. Li ti pou pli bon si Qorah ti attann ki Jéhovah aide li pou comprend certain kitsoz ou-soit faire bann changement, si vrai-mem sa ti necessaire. Finalement, ar so prop la main Qorah finn detruire tou seki li’nn faire pou servi Jéhovah parski li ti ena trop beaucoup l’orgueil!
16. Couma eski l’exemple Moïse kapav aide nou?
16 Sa l’exemple-la li enn l’avertissement pou bann ancien ek pou nou tou dan congregation zordi. Nou bizin ena l’humilité pou attann ki Jéhovah agir ek pou suive direction bann frere responsable. Eski nou manifesté l’humilité pareil couma Moïse? Eski nou reconette ek accepté ki Jéhovah servi bann ancien dan congregation? Kan zot donne nou bann instruction, eski nou obeir? Kan bann kitsoz pa passe couma nou ti pé attann, eski nou kapav controle nou bann sentiment? Si nou faire sa, nou pou gagne faveur Jéhovah. Kan nou ena l’humilité ek nou soumette, sa pou faire nou ena plus valeur devant lizié Jéhovah.
Jéhovah konn bann dimoune ki pou Li
17, 18. Ki kapav aide nou pou contigne gagne faveur Jéhovah?
17 Nou pou gagne bann bienfait si nou reflechi lor l’exemple bann dimoune ki Jéhovah ti content ek ki ti ena so faveur. Abraham ek Moïse ti imparfait ek ti ena bann defaut pareil couma nou. Pourtant, Jéhovah ti konn zot, ek zot ti bann dimoune ki ti pou Li. Parkont, l’exemple Qorah montré nou ki li kapav arrivé ki nou eloigne-nou ar Jéhovah ek lerla nou perdi So faveur. Sakenn parmi nou bizin demann li-mem: ’Couma eski Jéhovah trouve moi? Ki mo kapav aprann ar sa bann l’exemple biblik-la?’
18 Kan nou koné ki Jéhovah considere so bann serviteur fidele ki Li’nn attiré couma so bann dimoune, sa vrai-mem encourage nou. Alors, contigne faire ou la foi vinn pli solide, ek developpe l’humilité ek lezot qualité ki pou faire ou ena plus valeur devant lizié Jéhovah. C’est vrai-mem enn grand privilege ki Jéhovah konn nou. Grace a sa nou pou gagne satisfaction dan nou la vie asterla-mem ek bann grand benediction dan l’avenir.—Ps. 37:18.
Eski ou rappel?
• Ki sa impliké ki Jéhovah konn ou?
• Couma ou kapav ena enn la foi pareil couma Abraham?
• Ki nou kapav aprann ar l’exemple Qorah ek Moïse?
[Zimage page 29]
Eski pareil couma Abraham ou ena la foi ki Jéhovah pou accompli tou So bann promesse?
[Zimage page 31]
Qorah pa ti ena l’humilité ek li pa ti disposé pou soumette
[Zimage page 32]
Eski Jéhovah konn ou couma enn kikenn ki ena l’humilité ek ki soumette?