Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w02 1/8 p. 22-27
  • Kontiyn Sumet ar Lotorite Bondye

Pena video ki disponib pou seki ou finn swazir.

Sori, enn erer inn anpes sa video-la zwe.

  • Kontiyn Sumet ar Lotorite Bondye
  • La Tour de Garde pé annonce Royaume Jéhovah—2002
  • Soutit
  • Lor Mem Size
  • Kuma Bondye Ti Diriz Ansyin Izrael
  • “Eski Servis Pret Usi Zot Pe Rode Aster?”
  • Ziz Izrael Regle Zot Kont
  • Par Ki Mwayin Zeova Pe Diriz Nu Zordi?
  • Zot Rebel Kont Zeova
    Bann leson to kapav aprann dan Labib
  • Bann Fler Pouse lor Baton Aaron
    Mo Liv Zistwar Labib
  • Eski Jéhovah konn ou?
    La Tour de Garde pé annonce Royaume Jéhovah—2011
  • Question bann lecteur
    La Tour de Garde pé annonce Royaume Jéhovah—2010
La Tour de Garde pé annonce Royaume Jéhovah—2002
w02 1/8 p. 22-27

Kontiyn Sumet ar Lotorite Bondye

“Zeova Li nu Ziz, Li nu Lerwa ek Limem ki donn nu Lalwa.”—IZAI 33:22.

1. Ki ti rann ansyin nasyon Izrael diferan ar bann lezot nasyon?

DAN lane 1513 A.N.L., nasyon Izrael ti forme. Sa lepok la, li pa ti ena ni enn kapital, ni enn peyi pu li, ek ni enn lerwa lor later pu diriz li. Lepep ti bann ansyin esklav. Me selman, ti ena enn kitsoz ki ti rann sa nuvo nasyon la diferan ar lezot nasyon. Zeova ti zot Ziz ek Lerwa invizib; Limem ki ti pe donn zot Lalwa. (Egzod 19:5, 6; Izai 33:22) Wi, sa ti enn gran loner ki lezot nasyon pa ti gayne!

2. Ki kestyon nu kapav poze konsernan fason ki Izrael ti organize? Kifer eski repons la li inportan pu nu?

2 Pwiski Zeova Li enn Bondye ki kontan lord, enn Bondye lape, nu kapav atann ki ninport ki nasyon ki Li dirize, pu byin organize. (1 Korintyin 14:33) Sirman, Izrael ti kumsa. Me, kuma eski enn lorganizasyon ki lor later kapav dirize par enn Bondye invizib? Li bon ki nu egzaminn fason ki Zeova ti diriz so nasyon dan lepase. Les nu gete usi sirtu kuma fason ki Li ti diriz Izrael montre nu ki nu bizin kontiyn sumet ar lotorite Bondye.

Kuma Bondye Ti Diriz Ansyin Izrael

3. Ki bann laranzman pratik Zeova ti fer pu gid so pep?

3 Malgre ki Zeova ti zot Lerwa invizib, Li ti swazir bann zom fidel parmi so nasyon, ek Li ti etabli zot kuma so bann reprezantan. Zot ti bann sef dan zot tribi ek bann ansyin. Zot ti pu bann ziz ek konseye pu lepep. (Egzod 18:25, 26; Deteronom 1:15) Me asterla, fode pa nu panse ki san direksyon Zeova, sa bann zom responsab la ti pu kapav ziz bann zafer kuma bizin, san fer erer. Non, zot pa ti parfe, ek zot pa ti kapav lir dan leker bann lezot adorater kuma zot. Selman, zot ti ena lakrint pu Bondye ek zot bann konsey ti sorti dan Lalwa Zeova. Alor, lepep ti gayn bann bon konsey.—Deteronom 19:15; Psom 119:97-100.

4. Kont ki defo bann ziz fidel an Izrael ti bizin fer byin atansyon? Kifer?

4 Me bann ziz pa ti bizin zis konn lalwa. Pwiski zot ti inparfe, sa bann ansyin la ti bizin kontrol bann move defo ki zot ti kapav ena. Zot ti bizin fer atansyon pu pa vinn gurman, pu pa rod zis zot lintere personel, ek pu pa fer preferans. Sinon, zot bann zizman ti pu traver. Moiz ti dir zot sa: “Zot bizin pa fer preferans kan zot zize. Zot bizin ekut gran ek tipti, tulede parey. Zot bizin pa per bann zom, parski se zizman Bondye ki zot pe rande.” Wi, bann ziz Izrael ti pe ziz pu Bondye. Sa ti vremem enn gran loner ek enn privilez pu zot.—Deteronom 1:16, 17.

5. Apart bann ziz, ki bann lezot laranzman Zeova ti fer pu so pep?

5 Zeova ti fer bann lezot laranzman pu so pep ador Li. Mem avan zot rant dan Peyi ki Li ti promet zot, Li ti donn zot lord pu ranz enn tabernak. Ladan mem ki zot ti pu pratik vre ladorasyon. Li ti etabli usi bann pret pu anseyn Lalwa, pu fer bann sakrifis zanimo, ek pu bril lansan gramatin ek aswar. Bondye ti etabli Aaron, gran frer Moiz, kuma premye gran pret an Izrael. Li ti usi etabli bann garson Aaron kuma bann pret pu ed zot papa dan seki li ti ena pu fer.—Egzod 28:1; Nonm 3:10; 2 Kronik 13:10, 11.

6, 7. (a) Ki relasyon ti ena ant bann pret ek bann Levit ki pa ti pret? (b) Bann Levit ti fer tu sort kalite travay. Ki sa aprann nu? (Kolosyin 3:23)

6 Bann pret ti pran lepep swin dan zot ladorasyon pu Bondye. Sa ti enn gro travay parski lepep la ti par milyon, ek anplis pa ti ena buku pret. Alor, Zeova ti fer enn laranzman pu ki bann lezot manb tribi Levi ed zot. Zeova ti dir Moiz: “To bizin donn Aaron ek so bann garson, bann Levit. Mo pe donn zot sa bannla, parmi bann garson Izrael.”—Nonm 3:9, 39.

7 Bann Levit ti byin organize. Zot ti divize an trwa fami: bann Gersonit, bann Keatit, ek bann Merarit. Sakenn ti ena so travay pu fer. (Nonm 3:14-17, 23-37) Mem si sertin responsabilite ti kapav paret pli inportan ki lezot, tu ti neseser. Travay bann Levit Keatit ti fer zot vinn pli pre ar lars lalyans sakre ek bann meb ki ti dan tabernak. Me, sak Levit, ki li enn Keatit u non, ti ena bann privilez extraordiner. (Nonm 1:51, 53) Malerezman, sertin pa ti konn apresye zot bann privilez. Olye zot kontiyn sumet ar lotorite Bondye, zot ti kumans les zot afekte par lorgey, lanbisyon ek zaluzi. Zot ti nepli satisfe ar seki zot ti pe fer. Parmi, ti ena enn Levit ki ti apel Kora.

“Eski Servis Pret Usi Zot Pe Rode Aster?”

8. (a) Ki Labib aprann nu lor Kora? (b) Kifer eski Kora ti nepli truv servis bann pret kuma Zeova Li, Li ti truv sa?

8 Kora pa ti sef tribi Levi, ni li ti sef bann fami Keatit. (Nonm 3:30, 32) Me selman, li ti enn kikenn ki ti byin respekte dan Izrael. Par bann travay ki li ti fer, kitfwa Kora ti gayn plis kontak ar Aaron ek so bann garson. (Nonm 4:18, 19) Alor, pa bizin dir, sirman li finn truv byin defo sa bann zom la. Kapav, sa finn amenn li pu rezonn kumsa: ‘Sa bann pret la zot inparfe, ek mwa, mo pe bizin sumet ar zot! Eski Aaron pa ti fek fer enn ti vas an or? Ek sa ti fer lepep kit Bondye pu al ador zidol. Asterla, get enn ku! Aaron, frer Moiz, pe servi kuma gran pret! Ena preferans! Ek Nadab ek Abiu, bann garson Aaron, zot, zot ti telman mank enn gran respe pu zot bann privilez servis, ki Zeova ti tuy zot!’a (Egzod 32:1-5; Levitik 10:1, 2) Ala kuma kitfwa Kora ti rezone! Antuka, si vremem li ti rezonn kumsa, li kler ki li ti nepli truv servis bann pret kuma Zeova Li, Li ti truv sa. Ebyin ki’nn arive? Li finn revolte kont Moiz ek Aaron, ek byinsir, kont Zeova Limem.—1 Samyel 15:23; Zak 1:14, 15.

9, 10. Ki akizasyon Kora ek so bann partizan ti met lor Moiz? Kifer eski li paret drol ki zot pe revolte?

9 Kora ti ena linflyans lor sertin dimunn. Akoz sa, li ti fasil pu li gayn bann partizan dan so kote. Li, ansam avek Datann ek Abiram, ti reysi gayn 250 dimunn dan zot kote—tu bann sef dan lasanble. Ansam, zot ti vinn ver Moiz ek Aaron ek zot ti dir: “Tu dimunn ki dan lasanble, zot sin ek Zeova omilye zot. Be alor, kifer eski zot, zot bizin pran grander lor kongregasyon Zeova?”—Nonm 16:1-3.

10 Li paret drol ki sa bann dimunn la pe revolte kont lotorite Moiz parski zot ti kone ki ti’nn deza arive avan. Pa tro lontan, se seki Aaron ek Miryam ti fer. Avredir, zot’si zot ti rezonn inpe kuma Kora! Dapre Nonm 12:1, 2, zot ti demande: “Eski se zis par Moiz li tusel ki Zeova finn koze? Eski Li pa finn koze par nu’si?” Zeova ti pe ekut zot. Alor, Li ti dir Moiz, Aaron ek Miryam rasanble dan lantre latant reynion pu Li montre zot kisannla Li’nn swazir kuma So gid. Lerla, san ezite, Zeova dir zot: “Si parmi zot ti ena enn profet pu Zeova, mo ti pu fer li konn mwa dan enn vizyon. Mo ti pu koz ar li dan enn rev. Me, ar mo serviter Moiz, mo pa’nn fer kumsa! Limem finn res pli fidel dan mo lakaz.” Apre sa, Zeova finn fer Miryam gayn lalep pandan inpe letan.—Nonm 12:4-7, 10.

11. Kuma eski Moiz ti tret sa sityasyon konsernan Kora la?

11 Pena dut ki Kora ek so bann partizan ankor rapel byin seki ti pase avek Aaron ek Miryam. Akoz sa, pa pu kapav exkiz zot. Mem sa, avek pasyans, Moiz ti sey rezonn avek zot. Li ti ankuraz zot pu ena plis rekonesans pu zot bann privilez, kan li ti dir: “Eski li enn ti kitsoz pu zot ki Bondye finn separ zot avek bann zom dan lasanble Izrael pu prezant zot devan Li?” Non, li pa ti “enn ti kitsoz”! Avredir, bann Levit ti’nn gayn vremem plis ki sa. Be, ki zot ti’le ankor? Moiz devwal bann rezonnman ki zot ena dan zot leker kan li dir zot: “Eski servis pret usi zot pe rode aster?”b (Nonm 12:3; 16:9, 10) Me, kuma eski Zeova finn azir ar sa bann ki pe revolte kont so lotorite la?

Ziz Izrael Regle Zot Kont

12. Izrael ti pu kapav kontiyn ena bon relasyon avek Bondye. Me, lor ki kondisyon?

12 Kan Zeova ti donn Izrael Lalwa, Li ti dir zot ki si zot obeir, zot ti pu vinn “enn nasyon sin.” Ek tank ki zot respekte laranzman ki Li’nn fer, zot ti pu kontiyn res sin. (Egzod 19:5, 6) Me asterla, sa bann zom la pe prepar enn revolt devan lizye Zeova. Wi, Ziz Izrael pu bizin regle zot kont! Moiz ti dir Kora: “Twa ek tu to bann dimunn, vinn devan Zeova demin, twa, bannla ek Aaron. Sakenn pran so resipyan dife, desan-sinkant resipyan dife, ek zot bizin met lansan ladan ek prezant sa devan Zeova, twa ek Aaron, sakenn so resipyan dife.”—Nonm 16:16, 17.

13. (a) Kifer eski se lorgey ki ti pus sa bann zom ki ti pe revolte la pu bril lansan devan Zeova? (b) Kuma eski Zeova finn regle zot kont?

13 Dapre Lalwa Bondye, selman bann pret ki ti kapav bril lansan pu Zeova. Sa bann ki pe revolte la ti bizin sey mazinn enn Levit ki pa pret, pe bril lansan devan Zeova. Ebyin, samem ti pu ase pu fer zot reflesi! (Egzod 30:7; Nonm 4:16) Me, sa pa finn ena okenn lefe lor Kora ek so bann partizan! Landemin, Kora finn “fer tu so bann dimunn rasanble kont [Moiz ek Aaron] dan lantre latant reynion.” Anu lir seki’nn pase apre: “Alor Zeova dir Moiz ek Aaron: “Separ zot ar sa bann dimunn la, pu ki mo tuy bannla enn sel ku.” Me, Moiz ek Aaron ti pled pu lavi bann dimunn ki pa ti bizin mor. Zeova ti ekut zot. An seki konsern Kora ek so laful, “enn dife sorti kot Zeova ek bril desan-sinkant zom ki ti pe bril lansan.”—Nonm 16:19-22, 35.c

14. Kifer eski Zeova ti pini bann Izraelit?

14 Seki pli drol ladan, se ki mem apre ki bann Izraelit finn temwin kuma Zeova finn tuy sa bann ki ti pe revolte la, zot pa finn tir leson. “Landemin, tu bann garson Izrael kumans kritik Moiz ek Aaron. Zot dir: ‘Zot finn tuy lepep Zeova.’” Wi, bann Izraelit ti pe pran par sa bann ki ti revolte kont lotorite Bondye la! Me, alafin Zeova perdi pasyans. Personn pa kapav pled pu lepep asterla, pa mem Moiz uswa Aaron. Zeova avoy enn maler lor bann ki finn dezobeir, “ek katorz mil set san dimunn finn perdi lavi dan sa maler la, san kont bann ki ti mor akoz Kora.”—Nonm 16:41-49.

15. (a) Ki bann rezon bann Izraelit ti ena pu aksepte direksyon Moiz ek Aaron san ezite? (b) Ki sa zistwar la finn aprann u lor Zeova?

15 Tu sa bann dimunn la finn perdi zot lavi pu nanyin. Si selman zot ti reflesi inpe ek poz zotmem sa bann kestyon la: ‘Ki dimunn ki ti riske zot lavi pu paret devan Faraon? Ki dimunn ki ti al demann pu liber bann Izraelit? Apre delivrans Izrael, kisannla tusel ti invite pu mont lor Montayn Oreb pu koz fas-a-fas avek anz Bondye?’ Wi, tu seki Moiz ek Aaron ti fer, ti montre ki kantite zot ti fidel ar Zeova ek ki kantite zot ti kontan lepep. (Egzod 10:28; 19:24; 24:12-15) Eski Zeova ti pran plezir pu tuy sa bann ki ti revolte kont Li la? Non! Me, kan Li ti’nn truve ki lepep ti pu persiste dan zot revolt, Li finn oblize pini zot. (Ezekyel 33:11) Tusala ena enn gran linportans pu nu zordi. Kifer?

Par Ki Mwayin Zeova Pe Diriz Nu Zordi?

16. (a) Ki prev ki ti’nn bizin fer bann Zwif premye syek aksepte Zezi kuma reprezantan Zeova? (b) Kifer Zeova ti rezet sa grup Levit lepok Zezi la? Ki grup ki finn ranplas zot?

16 Zordi, Zeova ena enn nuvo “nasyon.” Limem Ziz ek Lerwa invizib sa nasyon la ek Limem ki donn li lalwa. (Matye 21:43) Sa “nasyon” la ti forme dan premye syek N.L. Sa lepok la, ti nepli ena tabernak. Me ti ena enn zoli tanp dan Zerizalem, kot bann Levit ti pe tuzur fer zot servis. (Lik 1:5, 8, 9) Me, dan lane 29 N.L., enn lot tanp ti kumans egziste. Se pa enn vre tanp ki truv lor later. Se Zezi Kris ki Gran Pret ladan. (Ebre 9:9, 11) Ankor enn fwa, nu tom lor sa kestyon la: Par ki mwayin Zeova pu montre so lotorite lor so nuvo “nasyon”? Kisannla ki Li pu servi pu gid zot? Zezi Kris finn tuletan res fidel ar Bondye. Li ti kontan lepep ek Li ti fer usi buku siyn extraordiner. Me, parey kuma zot bann anset ki ti ena latet dir, mazorite bann Levit ti refiz aksepte Zezi. (Matye 26:63-68; Akt 4:5, 6, 18; 5:17) Alor, alafin Zeova ti ranplas sa grup bann pret Levit la par enn grup diferan—enn grup pret ki pu servi usi kuma lerwa. Sa grup pret la pe kontiyn fer zot servis ziska zordi.

17. (a) Ki bann ki form enn “grup pret” zordi? (b) Kuma eski Zeova servi sa “grup pret” la?

17 Kisannla ki fer parti dan sa nuvo grup pret la zordi? Lapot Pyer reponn sa kestyon la dan so premye let. Pyer ti ekrir bann ki ti’nn swazire pu al dan lesyel ansam avek Kris: “Zot ‘enn ras ki finn swazire, enn grup pret ek lerwa, enn nasyon sin, enn pep ki pu vinn enn propryete spesyal, pu ki zot anons bann bon kalite’ sa kikenn ki finn tir zot dan nwarte la pu met zot dan so lalimyer extraordiner.” (1 Pyer 2:9) Sa bann parol la montre byin ki se bann disip Zezi ki’nn swazire pu al dan lesyel, ki form sa “grup pret” la. Pyer apel zot usi “enn nasyon sin.” Se atraver zotmem ki Zeova pe anseyn so pep ek pe donn direksyon an rapor avek so ladorasyon.—Matye 24:45-47.

18. Ki relasyon ena ant bann ansyin ki nome dan bann kongregasyon ek sa grup pret la?

18 Bann ansyin ki okip bann responsabilite dan bann kongregasyon atraver later, zot reprezant sa grup pret la. Sa bann zom la merit nu respe. Nu bizin sutenir zot avek tu nu leker, ki zot enn manb sa grup pret la uswa non. Kifer? Parski, se atraver so lespri sin ki Zeova finn nom bann ansyin dan zot bann pozisyon. (Ebre 13:7, 17) Kuma sa?

19. Kuma eski bann ansyin zot nome par lespri sin?

19 Bann ansyin finn fer zefor pu ena bann kalite ek bann kapasite ki Bondye ti fer ekrir dan so Parol par mwayin so lespri. (1 Timote 3:1-7; Tit 1:5-9) Akoz sa, kapav dir ki se lespri sin ki finn nom zot. (Akt 20:28) Bann ansyin bizin byin konn Parol Bondye. Parey kuma zot Ziz Siprem ki finn nom zot, bann ansyin bizin veye ki zot pa fer okenn ti preferans kan zot zize.—Deteronom 10:17, 18.

20. Ki u apresye avek bann ansyin ki travay dir?

20 Olye ki nu revolte kont lotorite bann ansyin, nu’le plito apresye zot pu travay dir ki zot fer! Se bann frer ki fidel ar Zeova, suvan depi buku-buku lane ek sa donn nu konfyans. Tuletan, zot byin prepare ek zot la pu diriz bann reynion. Zot travay ansam avek nu dan predikasyon ek zot donn nu bann konsey ki sorti dan Labib, kan nu bizin. (Matye 24:14; Ebre 10:23, 25; 1 Pyer 5:2) Zot vizit nu kan nu malad ek zot konsol nu kan nu dan tristes. Zot travay dan lintere Rwayom Bondye, san ki zot rod zot lintere personel. Zeova apruv zot ek so lespri li lor zot.—Galat 5:22, 23.

21. Ki kitsoz bann ansyin bizin gard dan zot lespri, ek kifer?

21 Byinsir, bann ansyin pa parfe. Parski zot konn zot bann febles, zot pa rod dominn lor “leritaz Bondye,” setadir so trupo. Plito, zot met zot lor mem ran ki zot bann frer ek zot travay ‘pu lazwa zot bann frer.’ (1 Pyer 5:3; 2 Korintyin 1:24) Bann ansyin ki rekonet zot limit ek ki travay dir, kontan Zeova. Zot kone ki plis zot imit Li, plis zot pu fer dibyin dan kongregasyon. Avek sa dan zot lespri, zot kontiyn fer zefor pu devlop bann kalite ki Bondye ena, kuma lamur ek pasyans.

22. Apre ki u finn egzaminn zistwar Kora, kuma eski sa fortifye u lafwa dan lorganizasyon ki Zeova ena lor later?

22 Wi, nu kontan ki nu ena Zeova kuma nu Lerwa invizib ek Zezi Kris kuma nu Gran Pret. Nu kontan u’si ki nu ena enn grup pret kuma nu bann anseynan ek bann fidel ansyin kuma nu bann konseye! Mem si okenn lorganizasyon lor later pa parfe, nu kontan ki nu pe kapav servi Bondye ansam avek nu bann frer ek ser fidel, ki pran plezir pu sumet ar lotorite Bondye!

[Not anba paz]

a Eleazar ek Itamar, de lezot garson Aaron, zot, zot ti donn bon legzanp dan zot servis pu Zeova.—Levitik 10:6.

b Datann ek Abiram, bann konplis Kora, ti bann desandan tribi Riben. Alor, li posib ki zot, se pa servis bann pret ki zot ti pe rode. Me plito, zot pa ti dakor ki Moiz li zot gid ek ki tu sa letan la, zot pa ti ankor rant dan Peyi ki Bondye ti promet zot.—Nonm 16:12-14.

c Dan lepok Noe, Abraam, Zob . . . , sak sef fami ti reprezant so fam ek so bann zanfan devan Bondye. Li ti pe mem fer bann sakrifis pu zot. (Zenez 8:20; 46:1; Zob 1:5) Me, kan Zeova ti donn Lalwa, Li ti swazir bann zom dan fami Aaron ek Li ti etabli zot kuma pret. Se zot ki ti pu fer sakrifis pu lepep. Alor, li posib ki sa 250 dimunn ki ti pe revolte la, pa ti dakor avek sa sanzman la.

Ki U Finn Aprann?

• Ki bann laranzman Zeova ti fer avek lamur pu pran swin bann Izraelit?

• Kora ti revolte kont Moiz ek Aaron. Kifer eski li ti merit pinisyon pu sa?

• Ki leson nu kapav tire dan fason ki Zeova ti azir avek bann ki ti’nn revolte kont Li?

• Kuma eski nu kapav montre ki nu ena rekonesans pu bann laranzman ki Zeova fer zordi?

[Zimaz lor paz 23]

Eski u konsider ninport ki responsabilite u gayne dan servis Zeova kuma enn privilez?

[Zimaz lor paz 24]

“Be alor, kifer eski zot, zot bizin pran grander lor kongregasyon Zeova?”

[Zimaz lor paz 26]

Bann ansyin nome, zot reprezant sa grup pret la

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze