Eski finn koz ou menti?

KAN ou koné ki enn dimoune ki ou faire confiance inn koz ou menti, sa blesse ou plus ki n’importe ki kitsoz. Ou ena sentiment ki li’nn faire traite ar ou ek ou senti-ou humilié ou-soit en colere. Bann mensonge casse bann l’amitié ek bann mariage. Bann dimoune inn perdi beaucoup kass parski bann escroc inn koz zot menti.

Alors, maziné couma ou pou senti-ou si ou decouvert ki finn koz ou menti lor Bondié. Si ou enn croyant, sa kapav bien affecté ou, pareil couma sa finn affecté sa bann dimoune ki souvent ti al l’eglise-la:

● “Mo ti ena sentiment ki l’Eglise inn trompe moi.”​—DEANNE.

● “Mo ti en colere. Mo ti ena l’impression ki zot finn embete moi​—mo bann l’espoir ek mo bann l’objectif ti tombe dan de l’eau.”​—LUIS.

Kitfois jamais ou’nn pensé ki kikenn kapav koz ou menti lor Bondié. Li possible ki tou seki ou koné, ou finn aprann sa ar bann dimoune ki ou faire confiance ek ki pena l’intention pou blesse ou, par exemple ou bann parent, enn pretre, enn pasteur, ou-soit enn camarade proche. Kitfois ou finn croire enn certain l’enseignement toute longue ou la vie. Mais eski ou pa d’accord ki mem si majorité dimoune croire enn kitsoz, sa kitsoz-la kapav fausse? Franklin D. Roosevelt, ancien president l’Amérique, ti reconette sa, parski li ti dire: “Koz enn menti plusieurs fois, pa faire li vinn enn la verité.”

Couma ou kapav koné si finn koz ou menti? Enn fois dan so la priere, Jésus ti dire Bondié: “To parole li la verité.” (Jean 17:17) Vrai-mem, dan la Bible, Parole Bondié, ena tou seki nou bizin pou nou kapav faire difference entre la verité ek bann mensonge.

Alors, anou laisse la Bible devoile cinq mensonge ki souvent bann dimoune dire lor Bondié. Ou pou trouvé couma la verité kapav change ou la vie ek ameliore li.