Abraham—Enn zom ki ti ena la foi

Abraham pé deboute dehors, li pé profite trankilité ki ena a-soir. Pendant ki li pé guette enn le ciel bien clair, kot ena beaucoup zetoile, li pa pé kapav empeche-li pense promesse ki Bondié ti faire li concernant so descendance ki pou vinn beaucoup, pareil couma sa bann zetoile-la. (Genèse 15:5) Sa bann zetoile-la faire Abraham rappel promesse Jéhovah. Zot aussi enn garantie pou li. Apré tou, si Jéhovah ena pouvoir pou crée sa grand l’univers-la ek tou seki ena ladan, eski Li pa pou kapav faire Abraham ek Sara gagne enn zenfant? C’est sa qualité la foi-la ki Abraham ti ena!

KI SA VEDIR LA FOI? Dan la Bible, “la foi” vedir croire dan enn kitsoz ki nou pa trouvé. Sa croyance-la basé lor bann preuve solide. Enn dimoune ki ena la foi en Bondié, fixé so l’esprit lor realisation bann promesse Jéhovah; li ena tellement confiance ladan, ki pou li, coumadir sa bann promesse-la inn fini realisé.

COUMA ABRAHAM TI MONTRÉ KI LI ENA LA FOI? Abraham ti montré ki li ti croire dan bann promesse Bondié. Avek la foi, li ti quitte pays kot li ti né, li ti ena confiance ki Jéhovah pou garde So promesse pou montré li enn lot pays. Avek la foi, Abraham ti traverse Canaan, li ti sur ki dan l’avenir, so bann descendant ti pou gagne sa pays-la. Ek avek la foi, Abraham ti obeir kan Bondié ti demann li pou offert Isaac en sacrifice. Li ti ena confiance ki, si necessaire, Jéhovah ti pou ressuscite Isaac.​—Hébreux 11:8, 9, 17-19.

Abraham ti fixé so l’esprit lor l’avenir, pa lor le passé. Mem si kitfois Abraham ek Sara ti ena enn la vie pli confortable dan Our ki dan Canaan, “zot pa ti contigne pense sa pays ki zot ti quitté-la.” (Hébreux 11:15, Today’s English Version) Zot ti plutot fixé zot l’esprit lor fason ki Bondié ti pou beni zot ek zot bann descendant, dan l’avenir.​—Hébreux 11:16.

Eski Abraham ti ena bann bon raison pou ena enn la foi coumsa? Nou pena okenn doute lor la. Jéhovah ti tini tou so bann promesse. Finalement, bann descendant Abraham ti vinn enn grand nation, nation Israël. Avek le temps, bann Israélite ti vinn reste Canaan, sa pays ki Jéhovah ti promette Abraham-la.​—Josué 11:23.

KI BANN LESON NOU KAPAV TIRÉ? Nou kapav sur ki Jéhovah pou realise so bann promesse. Mem si pou bann dimoune, certain parmi sa bann promesse-la parette impossible pou realisé, nou ena confiance ki “pou Bondié tou kitsoz possible.”​—Matthieu 19:26.

L’exemple Abraham montré nou aussi ki fodé pa nou fixé nou l’esprit lor le passé, mais lor seki nou pou kapav profité dan l’avenir. C’est seki enn missié ki appel Jason ti aprann pou faire. Jason ena enn maladie ki’nn faire li paralysé net. Li dire: “Mo bizin reconette ki parfois mo ré-pense le passé. Ena bann ti kitsoz ki mank moi plus, bann ti kitsoz couma par exemple serre mo madame Amanda dan mo lé-bras.”

Mais selman, Jason ena enn grand la foi ki Jéhovah pou realise so bann promesse. Parmi, ena promesse ki bientot nou la terre pou vinn enn paradis ek ki bann dimoune fidele pou gagne la vie eternel avek enn la santé parfait.a (Psaume 37:10, 11, 29; Isaïe 35:5, 6; Révélation 21:3, 4) Jason dire: “Mo essaye rappel mo-mem ki bann pli bon moment pé vini devant. Dan enn tigit le temps encore, tousala pou fini​—stress, tracas, chagrin, bann remords​—ek zot pou disparette pou touletan.” Li ena enn la foi extraordinaire pareil couma Abraham, pa vrai?

[Note]