“Personne pa pou rappel bann kitsoz avant”

BANN souvenir kapav enn bon kitsoz. Kan nou reflechi lor bann bon moment ki nou finn passé avek bann dimoune ki nou content, sa kapav faire nou leker content. Mais parfois, bann souvenir kapav couma enn malediction. Eski ena bann mauvais souvenir ou-soit bann mauvais l’experience ki ou’nn faire dan le passé ki pé fatigue ou? Si oui, kitfois ou demann-ou-mem: ‘Eski enn jour sa bann mauvais souvenir-la pou effacé dan mo l’esprit?’ Nou trouve enn reponse ki bien reconforte nou kan nou lire bann parole ki prophete Isaïe ti ecrire.​—Lire Isaïe 65:17.

Jéhovah dire ki Li pou tire bann kitsoz ki responsable sa bann mauvais souvenir-la. Couma Li pou faire sa? Li pou detruire sa mauvais le monde-la avek tou so bann souffrance ek Li pou remplace li par enn kitsoz ki pou beaucoup pli bon. A travers prophete Isaïe, Jéhovah faire sa promesse-la: “Guetté mo pé crée enn nouveau le ciel ek enn nouveau la terre.” Kan nou comprend sa promesse-la, sa kapav donne nou l’espoir.

Ki nouveau le ciel representé? La Bible mentionne deux kitsoz ki kapav aide nou pou konn sa. Premierement, deux lezot ecrivain la Bible mentionne l’expression nouveau le ciel. Ek dan toulé-deux cas, sa bann mot-la associé ar bann grand changement ki pou ena lor la terre. (2 Pierre 3:13; Révélation 21:1-4) Deuxiemement, dan la Bible “le ciel” kapav represente bann domination ou-soit bann gouvernement. (Isaïe 14:4, 12; Daniel 4:25, 26) Alors, sa nouveau le ciel-la, c’est enn nouveau gouvernement ki pou etabli bann condition kot pou ena la justice lor la terre. Ena zis enn sel gouvernement ki pou kapav faire tousala​—Royaume Bondié, sa gouvernement dan le ciel pou ki Jésus ti montré nou prié-la. Grace a sa Royaume-la, volonté Bondié pou faire partout lor la terre.​—Matthieu 6:9, 10.

Ki nouveau la terre representé? Anou examine deux point ki basé lor la Bible ki pou aide nou pou tire enn bon conclusion. Premierement, parfois dan la Bible “la terre” faire reference ar bann dimoune, pa ar planete la terre. (Psaume 96:1) Deuxiemement, la Bible ti annoncé ki kan gouvernement Bondié pou dirigé, bann dimoune fidele pou aprann la justice, enn qualité ki pou ena partout lor la terre. (Isaïe 26:9) Alors, nouveau la terre represente enn societé kot pou ena bann dimoune ki pou soumette ar domination Bondié ek pou vive en accord avek so bann principe ki juste.

Eski ou comprend couma Jéhovah pou tire bann kitsoz ki responsable bann mauvais souvenir? Bientot, Jéhovah pou realise completement so promesse concernant enn nouveau le ciel ek enn nouveau la terre, kan Li pou etabli le monde nouveau.a Dan sa le monde nouveau-la, tou bann kitsoz ki responsable nou bann mauvais souvenir​—lor plan physik, mental ek affectif​—pou disparette. Bann dimoune fidele pou bien profite zot la vie, ek zot pou garde bann bon souvenir lor chaque jour ki pou passé.

Mais ki nou kapav dire lor bann la peine ki nou gagné lor plan mental ek affectif zordi? Kan Jéhovah ti faire sa promesse-la a travers Isaïe, Li ti dire aussi: “Personne pa pou rappel bann kitsoz avant, ek sa pa pou vinn dan zot leker.” N’importe ki souffrance ki nou finn gagné dan sa mauvais le monde-la pou disparette tigit par tigit. Eski sa possibilité-la attire ou? Si oui, kifer ou pa aprann couma ou kapav vinn proche ar sa Bondié ki promette sa joli l’avenir-la?

[Note]

[L’encadré page 12]

Jéhovah ena l’intention pou tire bann kitsoz ki responsable bann mauvais souvenir