Ki nou bizin faire pou rappel la mort Jésus?

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Ki nou bizin faire pou rappel la mort Jésus?

Jésus ti demann so bann disciple pou rappel so la mort par enn repas symbolik. Pendant sa repas-la zot bizin servi di-pain ek di-vin. Di-pain represente lekor Jésus, ek di-vin represente so di-sang.​—Lire Luc 22:19, 20.

Di-pain ki Jésus ti servi ti sans levain. Dan la Bible, levain souvent represente peché. Alors, sa di-pain-la ti enn symbol approprié pou represente lekor Jésus ki ti parfait. Li ti offert so lekor en sacrifice ek sa ti aboli sacrifice bann zanimo ki ti faire enba la Loi mosaïk. (Hébreux 10:5, 9, 10) Di-vin ti represente so di-sang ki ena enn grand valeur ek ki li ti versé couma enn sacrifice pou nou peché.​—Lire 1 Pierre 1:19; 2:24; 3:18.

2. Kan eski nou bizin faire sa?

Jésus ti mort le 14 Nisan, jour Pâque. Pou bann Juif, enn jour ti commence avek coucher soleil. Dan la soirée avant so la mort, Jésus ti mange repas pou celebré Pâque avek so bann zapotre, ek apré, li ti etabli enn nouveau repas, enn memorial ki pou aide nou rappel so la mort.​—Lire Luc 22:14, 15.

Zordi, bann serviteur Bondié commemore seki Bondié ti faire a travers Jésus pou delivré le monde entier ar peché ek la mort. (Exode 12:5-7, 13, 17) Pareil couma bann Juif ti celebré Pâque enn fois par an, nou aussi nou faire Mémorial la mort Jésus enn fois par an, apré coucher soleil, le 14 Nisan, dapré calendrier biblik ki basé lor la lune.​—Lire Jean 1:29.

3. Kisannla bizin mange di-pain ek boire di-vin?

Kan Jésus ti donne enn coupe di-vin so bann disciple, li ti dire: “Sa coupe-la represente nouveau l’alliance.” (1 Corinthiens 11:25) Nouveau l’alliance ti remplace l’alliance la Loi mosaïk. Kan Bondié ti faire l’alliance la Loi mosaïk avek bann Israélite, Li ti promette zot ki, si zot ti obeir tou seki Li ti dire zot, zot ti pou vinn so peuple. (Exode 19:5, 6) Selman, bann Israélite pa ti obeir Bondié. Alors Jéhovah ti etabli enn nouveau l’alliance.​—Lire Jérémie 31:31.

A travers sa nouveau l’alliance-la, Jéhovah permette beaucoup dimoune gagne bann benediction par moyen enn tigit dimoune. Bann ki dan nouveau l’alliance zot tigit, zis 144,000. Par zot moyen, plusieurs million dimoune dan tou nation pou beni kan zot pou gagne la vie eternel dan Paradis lor la terre. Certain ki dan sa nouveau l’alliance-la pé servi Jéhovah lor la terre zordi. Zot tousel ki bizin mange di-pain ek boire di-vin parski sa coupe-la “represente nouveau l’alliance.”​—Lire Luc 12:32; Révélation 14:1, 3.

4. Ki bienfait Mémorial faire nou gagné?

Mémorial la mort Jésus ki nou faire chaque l’année, faire nou ena plus reconnaissance pou l’amour extraordinaire ki Jéhovah inn manifesté envers nou. Li ti envoye so Garson pou mort pou nou bann peché. Alors, kan nou assisté Mémorial, nou bizin reflechi lor seki la mort Jésus representé pou nou. Nou bizin guetté couma nou kapav montré nou reconnaissance pou seki Jéhovah ek Jésus inn faire pou nou.​—Lire Jean 3:16; 2 Corinthiens 5:14, 15.

Pou gagne plus renseignement, guette page 206-208 dan livre Ki la Bible enseigné vrai-mem?, publié par bann Témoins de Jéhovah.