REPONS POU BANN KESTION BIBLIK
Kifer nou bizin rapel lamor Zezi?
Gras-a lamor zezi, ki pe atann nou dan lavenir?—Izai 25:8; 33:24
Lamor Zezi ti levennman pli inportan dan listwar—li ti mor pou ki bann dimounn enn zour kapav viv kouma Bondie ti anvi. Bondie pa ti kree dimounn avek tandans pou fer bann move kitsoz, pou malad, ouswa pou mor. (Zenez 1:31) Me pese finn rant dan lemond akoz premie zom, Adan. Alor, Zezi finn donn so lavi pou sov nou ar pese ek lamor.—Lir Matie 20:28; Romin 6:23.
Bondie finn montre enn gran lamour kan Li’nn avoy so Garson lor later pou mor pou nou. (1 Zan 4:9, 10) Zezi ti demann so bann disip pou rapel so lamor atraver enn selebrasion bien sinp kot ena dipin ek divin. Kan nou fer sa toule lane, se enn fason nou montre nou rekonesans pou lamour ki Bondie ek Zezi finn montre.—Lir Lik 22:19, 20.
Kisannla bizin manz dipin ek bwar divin?
Kan premie fwa Zezi ti dir so bann disip rapel so lamor, li ti koz lor enn lalians, ouswa enn lakor. (Matie 26:26-28) Gras-a sa lalians-la, sa bann disip-la ek enn ti group dimounn ankor pou vinn lerwa ek pret ansam avek li dan lesiel. Mem si ena bann milyon dimounn ki selebre lamor Zezi, zis bann ki dan sa lalians-la ki manz sa dipin-la ek bwar sa divin-la.—Lir Revelasion 5:10.
Pandan apepre 2,000 an, Zeova pe swazir bann ki pou vinn lerwa. (Lik 12:32) Zot bien tigit konpare ar bann ki pou viv pou touletan lor later.—Lir Revelasion 7:4, 9, 17.