Jéhovah protege nou pou nou gagne la vie sauve
“Puissance Bondié pé protege zot, grace a la foi, pou enn delivrance ki’nn paré pou devoilé dan dernier periode.”—1 PIERRE 1:4, 5.
COUMA OU POU REPONN?
Couma Jéhovah ti attire nou vers vrai l’adoration?
Couma nou kapav laisse Jéhovah guide nou par so conseil?
Couma Jéhovah donne nou l’encouragement?
1, 2. (a) Ki l’assurance nou ena ki Jéhovah pou aide nou garde nou l’integrité? (b) Ki quantité Jéhovah konn sakenn parmi nou?
“SEKI enduré ziska la fin, li-mem ki pou sapé.” (Mat. 24:13) Par sa bann parole-la, Jésus ti montré dan enn fason clair ki si nou envie ki Bondié protege nou kan Li pou execute so jugement lor le monde Satan, nou bizin garde nou l’integrité ziska la fin. Mais sa pa vedir ki Jéhovah attann ki nou compte lor nou prop sagesse ou-soit nou prop la force pou enduré. La Bible donne nou sa l’assurance-la: “Bondié Li fidele, ek Li pa pou laisse zot gagne enn tentation ki zot pa kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav endure sa.” (1 Cor. 10:13) Ki nou aprann ar sa bann parole-la?
2 Jéhovah faire sur ki nou pa gagne enn tentation ki nou pa kapav supporté. Pou Li kapav faire sa, Jéhovah bizin konn tou lor nou, parmi ena bann difficulté ki nou faire face, ki qualité dimoune nou été, ek ki quantité nou kapav supporté. Eski vrai-mem Bondié konn nou bien sa quantité-la? Oui. La Bible montré ki Jéhovah konn sakenn parmi nou bien. Li konn bien seki nou faire dan nou la vie toulé-jour ek nou bann l’habitude. Li kapav mem trouve nou bann pensée ek bann l’intention ki nou ena dan nou leker.—Lire Psaume 139:1-6.
3, 4. (a) Couma l’experience ki David inn faire montré ki Jéhovah interessé ar bann dimoune? (b) Ki kitsoz extraordinaire Jéhovah pé accompli zordi?
3 Eski li parette impossible pou croire ki Bondié interesse-Li sa quantité-la avek bann ti-dimoune couma nou? Psalmiste David ti reflechi lor sa question-la ek li ti dire Jéhovah: “Kan mo guette le ciel ek bann travail ki to finn faire avek to la main, la lune ek bann zetoile ki to finn preparé, ki été enn dimoune mortel, pou ki to pense li?” (Ps. 8:3, 4) Kitfois David ti pose sa question-la parski li ti trouvé couma Jéhovah ti interessé ar li. David ti pli jeune parmi bann garson Jessé. Pourtant, Jéhovah ti considere li couma “enn zom ki so leker apprecié” ek ti tire li “derriere bann troupeau, pou vinn chef” lor Israël. (1 Sam. 13:14; 2 Sam. 7:8) Maziné ki David ti ressenti kan li ti rann-li compte ki Createur l’univers ti remark so bann meditation ek so bann sentiment, alors ki li ti zis enn jeune berger!
4 Azordi aussi, nou trouve sa extraordinaire ki Jéhovah interessé personnellement ar nou. Li pé rassemblé “bann kitsoz desirable dan tou bann nation” dan vrai l’adoration, ek Li pé aide so bann serviteur pou garde zot l’integrité. (Hag. 2:7) Pou comprend pli bien couma Jéhovah aide nou pou garde nou l’integrité, anou reflechi lor fason ki Li attire bann dimoune vers vrai l’adoration.
BONDIÉ ATTIRE NOU
5. Couma Jéhovah attire bann dimoune vers so Garson? Donne enn l’exemple.
5 Jésus ti dire: “Personne pa kapav vinn vers moi si le Père, ki finn envoye moi, pa attire li.” (Jean 6:44) Dapré sa bann parole-la, pou nou vinn enn disciple Jésus, nou bizin gagne l’aide Bondié. Couma Jéhovah attire bann dimoune ki humble vers so Garson? A travers predication la bonne nouvelle ek so l’esprit saint. Par exemple, kan Paul ek so bann compagnon missionnaire ti dan la ville Philippes, zot ti zwenn enn madame ki ti appel Lydie ek zot ti commence partage la bonne nouvelle avek li. La Bible dire: “Jéhovah ti ouvert so leker bien grand pou li prend compte bann kitsoz ki Paul ti pé dire.” Oui, Bondié ti envoye so l’esprit pou aide li comprend message ki Paul ti preché. Resultat ki sa ti ena: Lydie ek so famille ti prend bapteme.—Actes 16:13-15.
6. Couma Jéhovah finn attire sakenn parmi nou vers vrai l’adoration?
6 Eski zis Lydie ki’nn faire sa l’experience-la? Non. Si ou enn chretien baptisé, Jéhovah finn attire ou aussi vers vrai l’adoration. Pareil couma nou Papa ki dan le ciel ti trouve enn kitsoz ki ena valeur dan leker Lydie, Li ti trouve enn bon kitsoz dan ou aussi. Kan ou ti commence ecoute la bonne nouvelle, Jéhovah ti servi so l’esprit saint pou aide ou comprend so message ek accepté li. (1 Cor. 2:11, 12) Kan ou ti faire zeffort pou applik seki ou ti aprann, Li ti beni ou bann zeffort. Kan ou ti voué ou la vie ar Li, sa ti faire so leker content. En realité, depuis ki ou finn commence marche lor chemin ki amenn vers la vie, chaque pas ki ou ti faire, Jéhovah ti la pou soutenir ou.
7. Couma nou koné ki Bondié pou aide nou pou reste fidele?
7 Jéhovah ti aide nou pou commence marche avek Li, alors, asterla Li pa pou laisse nou debrouille-nou par nou-mem pou reste fidele envers Li. Li koné ki pareil couma nou pa finn vinn dan la verité par nou tousel, nou pa pou kapav reste dan la verité par nou tousel. Kan li ti ecrire bann chretien oint, l’apotre Pierre ti dire: “Puissance Bondié pé protege zot, grace a la foi, pou enn delivrance ki’nn paré pou devoilé dan dernier periode.” (1 Pierre 1:4, 5) En principe, sa bann parole-la applik ar tou bann chretien ek bizin interesse sakenn parmi nou zordi. Kifer? Parski nou tou nou bizin l’aide Bondié pou nou kapav reste fidele envers Li.
BONDIÉ KAPAV EMPECHE NOU FAIRE ENN ERREUR GRAVE
8. Kifer nou bizin conscient ki nou kapav faire enn erreur grave?
8 Bann pression ki ena dan nou la vie ek nou prop l’imperfection empeche nou pou trouve bann kitsoz dan enn fason spirituel ek lerla nou riské faire enn erreur grave sans mem ki nou realisé. (Lire Galates 6:1.) David ti retrouve-li dan enn situation coumsa.
9, 10. Couma Jéhovah ti empeche David commette enn erreur grave, ek ki Li faire pou nou zordi?
9 Kan le roi Saül ti poursuive David partout pou touye li, David ti montré ki li ti kapav controle-li-mem kan li pa ti essaye tire vengeance kont sa le roi jaloux-la. (1 Sam. 24:2-7) Mais zis apré sa, David ti laisse so bann sentiment controle li. Li ti bizin rod mangé pou so bann zom ek avek respé li ti demann l’aide enn lot Israélite ki ti appel Nabal. Mais Nabal ti insulté David. Sa ti faire David tellement en colere ki li ti rod tire vengeance ek touye Nabal ek tou bann zom ki ti reste kot li. Li pa ti reflechi ki si li touye bann dimoune innocent, li ti pou coupable devant Bondié. C’est zis kan Abigaïl, femme Nabal, ti koz ar David ki sa ti empeche li pou commette enn erreur bien grave. David ti reconette ki Jéhovah ti servi Abigaïl pou aide li, alors li ti dire Abigaïl: “Mo beni Jéhovah, Bondié Israël, ki finn envoye toi pou vinn zwenn moi zordi! Ek mo beni to bon sens, ek mo beni toi parski zordi to’nn empeche moi faire enn grand crime ek pou rod sauve mo-mem ar mo prop la main.”—1 Sam. 25:9-13, 21, 22, 32, 33.
10 Ki leson nou kapav tiré ar sa recit-la? Jéhovah ti servi Abigaïl pou empeche David faire enn erreur grave. Li faire pareil avek nou zordi. Bien sur, fodé pa nou attann ki a chaque fois ki nou pou al faire enn erreur, Bondié pou envoye enn kikenn pou empeche nou faire sa erreur-la. Fodé pa aussi ki nou pensé ki nou koné exactement couma Bondié pou agir dan enn certain situation. Nou pa koné aussi ki Jéhovah pou permette, pou realise so projet. (Eccl. 11:5) Mais kan-mem, nou kapav sur ki Jéhovah touletan koné dan ki situation nou été ek Li pou aide nou pou reste fidele envers Li. Li donne nou sa l’assurance-la: “Mo pou donne toi capacité pou comprend ek mo pou montré toi dan ki chemin to bizin marché. Mo pou donne toi conseil pendant ki mo garde enn lizié lor toi.” (Ps. 32:8) Couma Jéhovah conseil nou zordi? Couma nou kapav tire profit ar so conseil? Ek kifer nou kapav sur ki Jéhovah pé guide so peuple zordi? Remarké couma livre Révélation reponn sa bann question-la.
BANN CONSEIL PROTEGE NOU
11. Ziska ki point Jéhovah konn seki pé passé dan bann congregation?
11 Dan vision ki trouve dan Révélation chapitre 2 ek 3, Jésus Christ ki’nn gagne la gloire, ti inspecté sept congregation ki ti trouve dan l’ouest l’Asie. Sa vision-la montré ki Jésus Christ pa ti zis trouve bann tendance general ki ti ena dan sa bann congregation-la, mais aussi bann kitsoz bien precis. Dan certain cas, li ti mem mentionne certain dimoune. Ek chaque congregation ti gagne bann felicitation ou-soit bann conseil approprié. Ki sa montré nou? Dan realisation sa vision-la, sa sept congregation-la represente bann chretien oint apré 1914. Mem si sa bann conseil-la applik avant tou ar bann chretien oint, sa concerne aussi tou bann congregation peuple Bondié ki lor la terre zordi. Alors, nou kapav dire ki Jéhovah a travers so Garson, pé guide so peuple zordi. Couma eski nou kapav laisse Jéhovah guide nou?
12. Couma nou kapav laisse Jéhovah guide nou bann pas?
12 Enn fason ki nou kapav tire profit ar direction Jéhovah c’est a travers nou l’etude personnel. Jéhovah donne nou beaucoup conseil ki basé lor la Bible dan bann publication ki nou gagné ar l’esclave fidele et avisé. (Mat. 24:45) Mais pou nou kapav gagne bann bienfait, nou bizin prend le temps pou etudié zot ek applik seki nou aprann. L’etude personnel c’est enn moyen ki Jéhovah servi pou protege nou ek “empeche [nou] tombé” lor plan spirituel. (Jude 24) Eski ou finn deja etudié enn kitsoz dan nou bann publication ek ou ti ena l’impression ki sa finn ecrire zis pou ou? Li bon ki ou accepté sa couma enn fason ki Jéhovah pé corrige ou. Pareil couma enn camarade kapav tape ou zepaule pou attire ou l’attention lor enn kitsoz, Jéhovah aussi kapav servi so l’esprit saint pou attire ou l’attention lor enn kitsoz dan ou conduite ou-soit ou personnalité ki ou bizin amelioré. Si nou accepté direction l’esprit saint, nou pou laisse Jéhovah guide nou bann pas. (Lire Psaume 139:23, 24.) En rapport avek sa, li bon ki nou examine bann l’habitude ki nou ena pou etudié.
13. Kifer li pou sage ki nou examine l’habitude ki nou ena pou etudié?
13 Si nou passe trop beaucoup le temps dan bann detente, sa kapav kokin le temps ki nou bizin consacré pou faire nou l’etude personnel. Enn frere faire sa remark-la: “Li tellement facile pou neglige nou l’etude personnel. Zordi, li beaucoup pli facile pou bann dimoune gagne bann divertissement, ek zot moins cher ki avant. Ena bann divertissement dan television, lor computer, ek lor telephone. Nou entouré ar sa.” Si nou pa faire attention, le temps ki nou bizin pou etudié en profondeur kapav diminué tigit par tigit ziska ki nou nepli trouve le temps ditou. (Éph. 5:15-17) Li bon ki sakenn parmi nou demann li-mem: ‘Eski souvent mo prend le temps pou etudié la Bible plus en profondeur? Ou-soit c’est zis kan mo bizin prepare enn devoir ou-soit kan mo ena enn participation dan reunion ki mo faire sa?’ Si ou reponn oui, sa vedir ki kitfois ou bizin servi pli bien la soirée ki finn reservé pou l’adoration en famille ou-soit pou l’etude personnel pou montré ki ou accorde enn grand l’importance ar sagesse ki Jéhovah donné. Sa sagesse-la pou protege ou ek pou faire ou gagne la vie sauve.—Prov. 2:1-5.
BANN L’ENCOURAGEMENT AIDE NOU POU ENDURÉ
14. Couma la Bible montré ki Jéhovah prend compte nou bann sentiment?
14 David ti faire face ar beaucoup situation difficile dan so la vie. (1 Sam. 30:3-6) So bann parole inspiré montré ki Jéhovah ti konn so bann sentiment. (Lire Psaume 34:18; 56:8.) Bondié konn nou bann sentiment aussi. Kan nou ena “enn grand chagrin dan [nou] leker” ou-soit kan nou “demoralisé,” Li vinn proche ar nou. Sa pensée-la assez pou reconforte nou pareil couma sa ti reconforte David, ki ti chanté: “Mo pou heureux ek mo pou trouve la joie dan to l’amour fidele, parski to finn trouve mo souffrance; to finn konn bann malheur ki mo nâme finn gagné.” (Ps. 31:7) Mais Jéhovah pa zis remark nou bann malheur, Li faire plus ki sa. Li soutenir nou kan Li reconforte nou ek encourage nou. Enn fason ki Li faire sa, c’est par bann reunion.
15. Ki nou aprann ar l’experience ki Asaph ti faire?
15 L’experience ki psalmiste Asaph ti faire aide nou pou comprend enn bienfait ki nou gagné kan nou assisté reunion. Kan li ti pé contigne pense lor bann injustice, Asaph ti demann-li-mem si li vaut la peine pou servi Jéhovah. Sa ti faire li decouragé. Li ti decrire so bann sentiment coumsa: “Mo leker ti vinn amer ek dan mo lé-rein mo ti senti enn douleur ki ti pé pique moi.” A cause sa, li ti preské arrete servi Jéhovah. Ki ti aide li pou corrige so fason pensé? Li ti dire: “Mo ti rente dan temple Bondié ki ti extra joli ek impressionnant.” La-bas, parmi bann adorateur Jéhovah, li ti kapav ré-gagne enn bon l’attitude. Li ti realisé ki succès bann mauvais dimoune ti zis pou enn tigit le temps, ek ki Jéhovah pa pou manké pou remette bann kitsoz en ordre. (Ps. 73:2, 13-22) Li pareil pou nou aussi. Bann injustice ki nou bizin faire face dan le monde Satan kapav faire nou stressé ek decouragé. Kan nou zwenn nou bann frere ek soeur dan reunion, sa ré-donne nou courage ek aide nou pou contigne servi Jéhovah avek la joie.
16. Couma l’exemple Hanna kapav aide nou?
16 Ki ou pou faire si a cause enn situation, ou trouve sa difficile pou assisté reunion? Kitfois ou finn bizin rann ou privilege ek ou senti-ou embarrassé, ou-soit ou finn gagne probleme ar enn frere ou-soit enn soeur. Si ou dan enn sa bann situation-la, l’exemple Hanna kapav aide ou. (Lire 1 Samuel 1:4-8.) Nou rappel ki Hanna ti bien affecté par enn probleme familial ki ti ena enn rapport avek Peninna, lot madame so missié. Sa situation-la ti vinn pli pire chaque l’année kan la famille ti al Shilo pou offert Jéhovah bann sacrifice. Sa ti tellement difficile pou Hanna ki li ti “ploré ek li pa ti mangé.” Pourtant, li pa ti laisse sa situation-la empeche li pou al adore Jéhovah. Jéhovah ti remark so fidelité ek ti beni li.—1 Sam. 1:11, 20.
17, 18. (a) Dan ki fason nou gagne l’encouragement dan reunion? (b) Ki sentiment ou ena kan ou pense lor tendresse ki Jéhovah manifesté envers ou?
17 Zordi, bann chretien ena bann bon raison pou imite l’exemple Hanna. Nou bizin assisté reunion regulierement. Nou tou inn faire l’experience ki bann reunion donne nou l’encouragement ki nou bizin. (Héb. 10:24, 25) L’amour ek l’affection nou bann frere ek soeur reconforte nou. Enn simple ti parole dan enn discours ou-soit dan enn commentaire kapav touche nou leker. Dan enn conversation avant ou-soit apré reunion, kitfois enn frere ou-soit enn soeur kapav prend le temps pou ecoute nou ou-soit partage avek nou bann parole ki reconforte nou. (Prov. 15:23; 17:17) Kan nou chante bann cantik pou Jéhovah, sa remonte nou moral. C’est surtout kan nou ena bann ‘pensée ki pé tracasse’ nou ki nou bizin bann l’encouragement ki nou gagné dan reunion. La-bas, Jéhovah soutenir nou avek so “bann consolation” ek Li aide nou pou nou garde nou fidelité.—Ps. 94:18, 19.
18 Nou bien reconnaissant ki Jéhovah protege nou pou nou gagne la vie sauve, pa vrai? Tendresse ki Jéhovah manifesté envers nou faire nou senti-nou en securité, pareil couma psalmiste Asaph. Li ti chante pou Jéhovah: “To finn trap mo la main droite. To pou guide moi avek to conseil.” (Ps. 73:23, 24) Nou vrai-mem bien reconnaissant ki Jéhovah protege nou pou nou gagne la vie sauve.
[Zimage page 29]
Ou aussi Jéhovah finn attire ou
[Zimage page 30]
Nou pou gagne protection kan nou applik bann conseil ki Bondié donné
[Zimage page 31]
Bann l’encouragement ki nou gagné aide nou pou enduré