Couma Jésus ti considere politik?
BANN dimoune ki’nn ecrire bann l’Evangile decrire plusieurs l’evenement ki ti passé dan ministere Jésus kot li ti bizin faire face ar bann question politik. Par exemple, enn tigit le temps apré ki Jésus ti prend bapteme, kan li ti ena apepré 30 an, Satan le Diable ti propose li pou vinn chef sa le monde-la. Plitar dan so ministere, enn la foule ti envie faire li vinn zot le roi. Ek enn lot fois, bann dimoune ti mette pression lor li pou li engage-li dan politik. Couma Jésus ti reagir? Anou examine sa bann l’evenement-la.
Chef sa le monde-la. Bann l’Evangile dire ki Satan le Diable ti offert Jésus pouvoir pou dirige “tou bann royaume dan le monde.” Maziné ki quantité bon action Jésus ti pou kapav faire pou l’humanité ki pé souffert si li ti vinn chef sa le monde-la! Ki dimoune ki vrai-mem interessé ar bien-etre l’humanité ek pensé ki politik li enn moyen efficace pou reglé bann probleme, ti pou refuse vinn chef sa le monde-la? Mais Jésus ti refusé.—Matthieu 4:8-11.
Le roi. Beaucoup dimoune ki ti vive dan lepok Jésus ti bien envie gagne enn dirigeant ki ti pou kapav reglé zot bann probleme economik ek politik. Bann dimoune ti impressionné avek bann capacité Jésus, alors zot ti envie ki li rente dan politik. Couma li ti reagir? Jean, ki ti ecrire enn l’Evangile, dire: “Jésus, ki ti koné ki bannla ti pré pou vinn trappe li pou faire li vinn le roi, ti al dan montagne encore enn fois, li tousel.” (Jean 6:10-15) Li clair ki Jésus ti refuse pou implik-li dan politik.
Engage-li dan politik. Remark seki ti arrivé plusieurs jour avant ki ti touye Jésus. Disciple bann Pharisien, ki ti envie gagne l’independance ar l’Empire romain, ensam avek bann Hérodien, bann membre enn parti politik ki ti soutenir bann Romain, ti vinn koz ar Jésus. Zot ti envie force li pou prend part enn parti politik. Zot ti demann li si bann Juif ti bizin paye taxe gouvernement romain.
Marc ti ecrire seki Jésus ti reponn zot: “‘Kifer zot pé testé moi? Amenn enn denier, pou ki mo guetté.’ Zot ti amenn enn denier. Ek li ti dire zot: ‘Ki figure ena lor la ek kisannla ki finn faire ecrire seki ena lor la?’ Zot ti dire li: ‘César.’ Lerla Jésus ti dire: ‘Rann César bann kitsoz ki pou César, mais rann Bondié bann kitsoz ki pou Bondié.’” (Marc 12:13-17) Enn livre ki appel Church and State—The Story of Two Kingdoms ti dire kifer Jésus ti donne sa reponse-la. Livre-la tire sa conclusion-la: “Li ti refuse agir couma enn messie [ki faire] politik ek avek precaution li ti fixé enn limite entre César ek Bondié.”
Bann probleme couma pauvreté, corruption, ek l’injustice ti ena enn l’effet lor Jésus. En realité, la Bible montré ki li ti bien affecté kan li ti trouvé couma bann dimoune ki ti autour li ti dan sa bann mauvais condition-la. (Marc 6:33, 34) Malgré sa, Jésus pa ti commence faire enn campagne pou elimine bann l’injustice ki ena dan le monde, mem si certain ti faire tou seki zot kapav pou faire li donne so l’opinion lor bann sujet ki ti divise bann dimoune dan so lepok.
Sa bann l’exemple-la montré dan enn fason clair ki Jésus ti refuse implik-li dan politik. Mais ki nou kapav dire lor bann chretien zordi? Ki zot bizin faire?