Jéhovah, Li “enn Kikenn ki faire konn bann secret”

“Vrai-mem zot Bondié Li enn Bondié tou bann bondié, enn Seigneur tou bann le roi ek enn Kikenn ki faire konn bann secret.”​—DAN. 2:47.

COUMA OU POU REPONN?

Ki bann detail lor l’avenir Jéhovah inn faire nou koné?

Ki six premier la tête la bête sauvage representé?

Ki lien ena entre la bête sauvage ek statue ki Neboukadnetsar ti revé?

1, 2. Ki Jéhovah finn revele nou, ek kifer Li finn faire sa?

KI BANN gouvernement ki pou dirige la terre kan Royaume Bondié pou detruire bann gouvernement humain? Nou konn reponse sa question-la, parski Jéhovah, sa “Kikenn ki faire konn bann secret-[la]” finn revele sa. Li faire nou konn l’identité sa bann gouvernement-la a travers seki prophete Daniel ek l’apotre Jean ti ecrire.

² Jéhovah ti donne sa bann zom-la bann vision kot ti ena plusieurs bete sauvage ki ti apparette enn apré lot. Li ti aussi donne Daniel signification enn rêve kot ti ena enn grand statue en metal. Jéhovah ti faire ecrire sa bann recit-la dan la Bible ek Li ti faire garde zot bien, pou nou profit. (Rom. 15:4) Li ti faire sa pou fortifié nou l’esperance ki bientot so Royaume pou crase tou bann gouvernement humain.​—Dan. 2:44.

3. Pou nou kapav comprend bien bann prophetie, ki kitsoz nou bizin comprend avant, ek kifer?

³ Bann recit Daniel ek Jean pa zis identifié huit le roi, mais zot montré aussi dan ki l’ordre sa bann puissance-la pou apparette. Mais selman, nou pou kapav comprend bien sa bann prophetie-la a condition ki nou comprend signification premier prophetie ki ena dan la Bible. Kifer? Parski realisation sa prophetie-la, c’est sa-mem theme la Bible. Dan enn certain fason, sa premier prophetie-la li couma enn la corde, ek tou bann lezot prophetie attaché ar sa.

DESCENDANCE SERPENT EK LA BÊTE SAUVAGE

4. Kisannla forme partie dan descendance la femme, ek ki sa descendance-la pou faire?

⁴ Pa trop longtemps apré rebellion dan jardin Éden, Jéhovah ti promette ki enn “femme” ti pou produire enn “descendance.”a (Lire Genèse 3:15.) Finalement, sa descendance-la ti pou crase la tête sa serpent-la, setadir Satan. Plitar, Jéhovah ti revelé ki sa descendance-la ti pou vini a travers Abraham, dan nation Israël, dan tribu Juda, ek li ti pou enn descendant le roi David. (Gen. 22:15-18; 49:10; Ps. 89:3, 4; Luc 1:30-33) Partie principal sa descendance-la c’est Christ Jésus. (Gal. 3:16) Partie secondaire sa descendance-la, c’est bann chretien oint. (Gal. 3:26-29) Jésus ek sa bann chretien oint-la, ensam zot forme Royaume Bondié, moyen ki Bondié pou servi pou crase Satan.​—Luc 12:32; Rom. 16:20.

5, 6. (a) Comié grand puissance eski Daniel ek Jean mentionné? (b) Ki bann la tête sa bête sauvage ki mentionné dan Révélation-la representé?

⁵ Sa premier prophetie ki Bondié ti donné en Éden-la ti aussi dire ki Satan ti pou produire enn “descendance.” So descendance ti pou ena la haine pou descendance la femme. Kisannla ki forme partie dan descendance serpent? Tou bann ki ena la haine pou Bondié pareil couma Satan ek ki opposé ar peuple Bondié. Toute longue l’Histoire, Satan finn organise so descendance en different mouvement politik, ou-soit royaume. (Luc 4:5, 6) Mais selman, pa beaucoup gouvernement humain ki finn ena enn grand l’influence lor peuple Bondié, ki li lor nation Israël ou-soit lor congregation bann chretien oint. Kifer li important nou konn sa? Parski sa aide nou pou comprend kifer dan vision Daniel ek Jean ena zis huit grand puissance.

⁶ Vers la fin premier siecle nou lepok, Jésus ki ti’nn ressuscité, ti donne l’apotre Jean bann vision extraordinaire. (Rév. 1:1) Dan enn sa bann vision-la, Jean ti trouve Satan le Diable ki ti representé par enn dragon, ki ti pé debouté dan bord enn grand la mer. (Lire Révélation 13:1, 2.) Jean ti trouve aussi enn bête sauvage bizarre ki ti sorti dan sa la mer-la ek ki ti gagne enn grand l’autorité ar Satan le Diable. Plitar, enn ange ti dire Jean ki sept la tête la bête sauvage couleur rouge vif, ki enn zimage la bête sauvage ki mentionné dan Révélation 13:1, represente “sept le roi,” ou-soit sept gouvernement. (Rév. 13:14, 15; 17:3, 9, 10) Kan Jean ti pé ecrire livre Révélation, cinq parmi sa bann le roi-la ti’nn tombé, enn ti pé gouverné, ek enn ‘pa ti encore vini.’ Ki sa bann royaume ou-soit sa bann puissance mondial-la sa? Anou guette bann la tête sa bête sauvage ki mentionné dan Révélation-la, enn par enn. Nou pou aussi trouvé couma bann recit Daniel ti donne plus detail lor certain sa bann royaume-la, parfois plusieurs siecle avant ki zot ti existé.

L’ÉGYPTE EK L’ASSYRIE​—PREMIER EK DEUXIEME LA TÊTE

7. Ki premier la tête representé, ek kifer?

⁷ Premier la tête sa bête sauvage-la represente l’Égypte. Kifer? Parski l’Égypte ti premier grand puissance ki ti ena la haine pou peuple Bondié. Bann descendance Abraham​—kot descendance la femme ti pou sorti​—ti vinn beaucoup en Égypte. A cause sa, l’Égypte ti faire dominere ar Israël. Satan ti essaye detruire peuple Bondié net avant ki sa descendance-la vini. Couma li ti faire sa? Li ti pousse Pharaon pou faire touye tou bann garson Israélite ki ti fek né. Jéhovah ti empeche sa arrivé ek ti libere so peuple ar l’esclavage dan l’Égypte. (Ex. 1:15-20; 14:13) Plitar, Li ti faire bann Israélite al reste dan la Terre promise.

8. Deuxieme la tête represente kisannla, ek ki li ti essaye faire?

⁸ Deuxieme la tête sa bête sauvage-la represente l’Assyrie. Sa royaume bien puissant-la aussi ti essaye detruire peuple Bondié. Li vrai ki Jéhovah ti servi l’Assyrie couma enn moyen pou puni royaume dix tribu parski zot ti pé adore bann zidole ek zot ti rebellé. Selman, apré sa, l’Assyrie ti attak Jérusalem. Satan kitfois ti ena l’objectif pou detruire descendance royal kot finalement Jésus ti pou sorti. Sa l’attak-la pa ti forme partie dan projet Jéhovah. Par enn mirak, Li ti delivré so peuple ki ti fidele, ek Li ti detruire zot bann l’ennemi.​—2 Rois 19:32-35; Is. 10:5, 6, 12-15.

BABYLONE​—TROISIEME LA TÊTE

9, 10. (a) Ki Jéhovah ti permette bann Babylonien faire? (b) Pou ki certain prophetie realisé, ki ti bizin arrivé?

⁹ Troisieme la tête sa bête sauvage ki Jean ti trouvé-la represente enn royaume ki ti ena Babylone couma capital. Jéhovah ti permette ki bann Babylonien prend Jérusalem ek amenn so peuple en captivité. Mais avant ki Jéhovah ti permette bann Israélite gagne enn humiliation coumsa, Li ti averti bann Israélite ki ti rebellé, ki zot ti pou gagne sa bann malheur-la. (2 Rois 20:16-18) Li ti annoncé ki Li ti pou nepli laisse zot bann le roi assize lor so “trone” dan Jérusalem. (1 Chron. 29:23) Mais selman, Jéhovah ti promette aussi ki enn descendant le roi David, ki ti ena “droit legal” ti pou vini ek ti pou reclame sa droit-la.​—Ézék. 21:25-27.

¹⁰ Enn lot prophetie ti dire ki bann Juif ti pou encore pé adore Jéhovah dan temple Jérusalem kan Messie, ou-soit Oint ki Bondié ti promette, ti pou arrivé. (Dan. 9:24-27) Avant ki bann Israélite ti al en captivité dan Babylone, enn lot prophetie ti annoncé ki le Messie ti pou né dan Bethléhem. (Mika 5:2) Pou ki sa bann prophetie-la kapav realisé, bann Juif ti bizin liberé dan Babylone, retourne dan zot pays ek ré-construire temple. Mais sa pa ti dan l’habitude bann Babylonien pou largue zot bann prisonnier. Couma peuple Bondié ti pou kapav retourne dan zot pays? Jéhovah ti faire so bann prophete koné ki ti pou arrivé.​—Amos 3:7.

11. Ki different symbole la Bible servi pou represente l’Empire babylonien? (Guette note.)

¹¹ Prophete Daniel ti parmi bann ki ti al couma prisonnier dan Babylone. (Dan. 1:1-6) Jéhovah ti servi li pou faire koné ki bann different royaume ki ti pou vini apré Babylone, ki li-mem ti enn puissance mondial dan sa lepok-la. Jéhovah ti servi plusieurs different symbole pou devoile sa secret-la. Par exemple, Li ti faire le roi babylonien, Neboukadnetsar, rêve enn grand statue ki ti faire avek plusieurs different metal. (Lire Daniel 2:1, 19, 31-38.) A travers Daniel, Jéhovah ti faire koné ki la tête en or sa statue-la ti represente l’Empire babylonien.b Poitrine ek lé-bras sa statue-la ti faire en argent ek sa ti represente enn lot puissance mondial ki ti pou vini apré Babylone. Kisannla ti pou sa puissance-la, ek couma li ti pou traite peuple Bondié?

L’EMPIRE MÉDO-PERSE ​—QUATRIEME LA TÊTE

12, 13. (a) Ki Jéhovah ti dire concernant puissance mondial ki ti pou gagne la victoire lor Babylone? (b) Kifer nou kapav dire ki l’Empire médo-perse ti quatrieme la tête la bête sauvage?

¹² Plus ki enn siecle avant lepok Daniel, a travers prophete Isaïe, Jéhovah ti donne bann detail lor puissance mondial ki ti pou gagne la victoire lor Babylone. Jéhovah pa ti zis faire koné couma Babylone ti pou renversé, mais Li ti aussi donne nom sa kikenn ki ti pou faire sa-la. Sa chef-la ti appel Cyrus, le roi perse. (Is. 44:28–45:2) Daniel ti gagne deux lezot vision concernant puissance mondial médo-perse. Dan enn sa bann vision-la, sa royaume-la ti decrire couma enn l’ours ki ti pé leve lor enn coté ek ki ti gagne l’ordre pou “mange beaucoup la chair.” (Dan. 7:5) Dan enn lot vision, Daniel ti trouvé ki sa double puissance mondial-la ti representé par enn belier ki ti ena deux corne.​—Dan. 8:3, 20.

¹³ Jéhovah ti servi l’Empire médo-perse pou renverse Babylone ek pou faire bann Israélite retourne dan zot pays, pareil couma Li ti annoncé. (2 Chron. 36:22, 23) Selman, sa mem puissance-la plitar ti essaye detruire peuple Bondié. Dan livre Esther nou lire ki Hamân, premier ministre perse, ti faire enn complot. Li ti prend bann disposition pou detruire tou bann Juif ki ti reste dan grand l’Empire perse ek li ti fixé enn date kot ti pou ena sa massacre-la. Mais Jéhovah ti agir. C’est zis grace a sa ki So peuple encore enn fois ti gagne protection kont la haine ki descendance Satan ti ena pou zot. (Esther 1:1-3; 3:8, 9; 8:3, 9-14) Alors, nou kapav dire ki l’Empire médo-perse ti quatrieme la tête la bête sauvage ki trouve dan Révélation.

LA GRÈCE​—CINQUIEME LA TÊTE

14, 15. Ki bann detail Jéhovah ti faire koné concernant ancien l’Empire grec?

¹⁴ Cinquieme la tête sa bête sauvage ki mentionné dan livre Révélation-la represente la Grèce. Avant sa, kan Daniel ti interprete rêve Neboukadnetsar, li ti annoncé ki sa mem puissance mondial-la ti representé par ventre ek la cuisse en cuivre sa statue ki Neboukadnetsar ti revé-la. Daniel ti aussi gagne deux vision ki ti donne bann detail extraordinaire lor sa l’empire-la ek lor so pli grand chef.

¹⁵ Dan enn vision, Daniel ti trouve la Grèce ki ti representé par enn leopard avek quatre lezel. Sa ti montré ki bien vite sa puissance mondial-la ti pou gagne la victoire lor lezot pays. (Dan. 7:6) Dan enn lot vision, Daniel ti trouvé couma enn bouc ki ena enn grand corne ti touye enn belier deux corne, avek enn grand rapidité; sa belier-la ti represente puissance médo-perse. Jéhovah ti dire Daniel ki sa bouc-la ti represente la Grèce ek ki so grand corne ti represente enn parmi so bann le roi. Pli loin, Daniel ti ecrire ki sa grand corne-la ti pou cassé ek ki quatre pli tipti corne ti pou levé dan so place. Mem si sa prophetie-la ti’nn ecrire environ deux siecle avant ki la Grèce ti vinn enn puissance mondial, tou bann detail ti realisé exactement couma ti annoncé. Alexandre le Grand, pli grand le roi la Grèce, ti attak l’Empire médo-perse. Selman, sa corne-la pa ti tardé pou cassé, parski Alexandre ki ti ena enn grand pouvoir ti mort, alors ki li ti ena zis 32 an. Apré so la mort, so royaume ti divisé parmi so quatre general.​—Lire Daniel 8:20-22.

16. Ki Antiochus IV ti faire?

¹⁶ Apré ki la Grèce ti gagne la victoire lor la Perse, li ti regne lor peuple Bondié. Sa lepok-la, bann Juif ti’nn fini retourne dan la Terre promise ek ti’nn ré-construire temple Jérusalem. Zot ti encore peuple ki Bondié ti’nn choisir, ek temple ki zot ti’nn ré-construire ti toujours centre vrai l’adoration. Mais, dan deuxieme siecle avant nou lepok, la Grèce, cinquieme la tête sa bête sauvage-la, ti attak peuple Bondié. Antiochus IV, enn parmi bann ki ti herite l’Empire Alexandre ki ti divisé, ti construire enn l’autel païen dan la cour temple Jéhovah, dan Jérusalem. Li ti condamne a mort tou bann dimoune ki ti pratik religion juif. C’est vrai-mem enn grand la haine ki enn partie sa descendance Satan-la ti ena pou peuple Bondié, pa vrai? Mais bientot, enn lot puissance mondial ti pou remplace la Grèce. Kisannla ti pou sixieme la tête sa bête sauvage-la?

ROME​—SIXIEME LA TÊTE, ‘TI FAIRE PEUR EK TI TERRIBLE’

17. Ki role principal sixieme la tête la bête sauvage ti joué dan realisation Genèse 3:15?

¹⁷ C’est Rome ki ti puissance mondial kan Jean ti gagne vision sa bête sauvage-la. (Rév. 17:10) Sa sixieme la tête-la ti joué enn role principal dan realisation prophetie ki’nn mentionné dan Genèse 3:15. Satan ti servi bann officier romain pou paralyse descendance la femme pou enn ti moment kan li ti “blesse [li dan] so talon.” Couma? Bann romain ti mette enn fausse l’accusation lor Jésus, zot ti pretann ki li ti pé rebelle kont gouvernement, alors, zot ti juge li ek ti faire touye li. (Mat. 27:26) Mais, sa blessure-la pa ti tardé pou gueri parski Jéhovah ti ressuscite Jésus.

18. (a) Ki nouveau nation Jéhovah ti choisir, ek kifer? (b) Couma descendance serpent ti contigne montré so la haine pou descendance la femme?

¹⁸ Bann chef religieux en Israël ti complote avek Rome kont Jésus, ek majorité bann Juif aussi ti rejette li. Alors, Jéhovah ti rejette nation Israël couma so peuple. (Mat. 23:38; Actes 2:22, 23) Li ti choisir enn nouveau nation: “Israël Bondié.” (Gal. 3:26-29; 6:16) Sa nation-la ti congregation bann chretien oint kot ti ena bann Juif ek bann non-Juif toulé-deux. (Éph. 2:11-18) Apré la mort ek resurrection Jésus, descendance serpent ti contigne montré so la haine pou descendance la femme. Dan plusieurs l’occasion, Rome ti rod detruire congregation chretien, partie secondaire descendance la femme.c

19. (a) Couma Daniel ti decrire sixieme puissance mondial? (b) Ki nou pou examiné dan enn lot lartik?

¹⁹ Dan rêve ki Daniel ti interpreté pou Neboukadnetsar, Rome ti representé par bann la jambe en ferraille. (Dan. 2:33) Daniel ti gagne aussi enn vision ki pa ti zis decrire Puissance romain, mais aussi ti decrire prochain puissance mondial ki ti pou sorti dan Rome. (Lire Daniel 7:7, 8.) Pendant plusieurs siecle, Rome ti parette couma enn puissance ki “ti faire peur, ki terrible, ek ki extra fort” pou so bann l’ennemi. Selman, sa prophetie-la ti aussi annoncé ki “dix corne” ti pou sorti dan sa puissance-la ek ki enn lot ti corne ti pou parette ek ti pou vinn pli puissant. Ki sa dix corne-la representé, ek ki sa ti corne-la representé? Dan ki fason sa ti corne-la corresponn avek description grand statue ki Neboukadnetsar ti trouvé? Nou pou reponn sa bann question-la dan lartik ki commence lor page 16.

[Notes]