Vinn bann croyant sincere ek bann citoyen responsable, couma?

KI DEUX kitsoz ki ti bien visible dan ministere Jésus? Premierement, Jésus ti rod change leker bann dimoune, pa bann gouvernement. Par exemple, remarké lor ki kitsoz Jésus ti mette l’accent dan so Sermon lor montagne. Zis avant li ti koz lor l’importance pou vinn pareil couma di-sel ek la lumiere, li ti dire bann dimoune ki ti pé ecoute li ki c’est bann dimoune ki “reconette ki zot pauvre lor plan spirituel” ki pou gagne vrai bonheur. Li ti ajouté: “Heureux bann dimoune ki ena enn caractere doux, . . . ki ena enn leker pur, . . . ki pacifik.” (Matthieu 5:1-11) Jésus ti aide so bann disciple pou trouve l’importance pou change zot bann pensée ek zot bann sentiment pou ki sa en accord avek bann principe Bondié lor seki bon ek mauvais. Li ti encourage zot aussi pou trouve l’importance pou servi Bondié avek tou zot leker.

Deuxiemement, kan Jésus ti trouve bann dimoune souffert, li ti ena pitié pou zot ek sa ti pousse li pou soulage zot. Selman, li pa ti ena l’objectif pou elimine tou souffrance. (Matthieu 20:30-34) Li ti gueri bann dimoune malade, mais maladie pa ti disparette. (Luc 6:17-19) Li ti soulage bann dimoune ki ti pé passe misere parski lezot ti faire dominere ar zot, mais l’injustice ti contigne faire bann dimoune souffert. Li ti donne bann dimoune ki ti faim, mangé, mais famine ti contigne faire bann ravage parmi bann dimoune.​—Marc 6:41-44.

Change bann leker ek soulage souffrance

Jésus ti ena priorité pou change leker bann dimoune ek pou soulage zot dan zot souffrance mais pa pou change bann gouvernement ou-soit pou elimine bann probleme. Kifer? Parski li ti koné ki dan l’avenir, Bondié ena l’intention pou servi So Royaume pou detruire tou bann gouvernement humain ek tou seki faire bann dimoune souffert. (Luc 4:43; 8:1) Alors, kan enn jour bann disciple ti suppliye Jésus pou passe plus le temps pou gueri bann malade, li ti dire zot: “Anou al enn lot place, dan bann grand village ki pré, pou ki mo kapav preché la-bas aussi, parski c’est pou sa raison-la ki mo finn sorti.” (Marc 1:32-38) Jésus ti soulage souffrance physik beaucoup dimoune, mais seki ti priorité pou li c’est pou preche ek enseigne parole Bondié.

Kan bann Témoins de Jéhovah preché zordi, zot faire tou pou imite Jésus. Zot soulage souffrance bann dimoune kan zot donne bann ki dan le besoin, enn l’aide pratik. Mais bann Témoin pa rod elimine l’injustice ki ena dan le monde. Zot croire ki Royaume Bondié pou tire tou bann kitsoz ki responsable la souffrance. (Matthieu 6:10) Pareil couma Jésus, zot faire zeffort pou change leker bann dimoune pa pou change bann gouvernement. Sa l’attitude-la li realiste parski probleme principal bann dimoune c’est pa politik mais moral.

Bann citoyen responsable

En mem temps, bann Témoins de Jéhovah croire ki zot responsabilité en tant ki chretien c’est pou vinn bann bon citoyen. Alors, zot honore ek zot respecté l’autorité bann gouvernement. A travers zot bann publication ek zot predication, zot encourage zot prochain pou obeir la loi. Selman, kan enn gouvernement demann zot pou faire enn kitsoz ki pa en accord avek bann la loi Bondié, bann Témoins pa faire seki zot demandé. Zot “obeir Bondié couma enn chef plutot ki bann zom.”​—Actes 5:29; Romains 13:1-7.

Bann Témoins de Jéhovah visite tou bann dimoune ki reste dan zot l’endroit pou offert enn l’etude la Bible gratuit. Grace a sa l’enseignement-la, plusieurs million dimoune finn change zot leker. Chaque l’année, plusieurs centaine millier dimoune gagne l’aide pou surmonte bann l’habitude ki faire zot di-tort couma par exemple, fumé, boire ziska sou, drogué, joué pou kass, ek commette l’immoralité sexuel. Zot finn vinn bann citoyen ki ena enn bon moralité ek ki responsable parski zot finn aprann pou applik bann principe biblik dan zot la vie.​—Guette lartik “ La Bible transforme des vies ” lor page 18, dan La Tour de Garde 1^er mai 2012, en français.

En plus, l’enseignement biblik aide bann famille pou ena plus respé sakenn pou so camarade ek pou ameliore communication dan zot famille​—entre bann conjoint ek aussi entre parent ek zenfant ek entre bann zenfant zot-mem. C’est sa bann kitsoz-la ki fortifié bann relation ki ena dan enn famille. Bann famille pli solide produire bann societé pli solide.

Apré ki ou finn examine bann point ki ena dan sa bann lartik-la, ki ou pensé: eski la Bible d’accord ki la religion mele-li avek politik? Reponse-la li clair; la Bible pa d’accord avek sa. Mais eski bann vrai chretien bizin vinn bann citoyen responsable? Oui. Couma zot kapav faire sa? Kan zot suive l’ordre ki Jésus ti donne zot pou vinn pareil couma di-sel ek couma la lumiere pou le monde.

Bann ki faire zeffort pou applik sa bann conseil pratik ki Jésus ti donné-la, pou gagne bann bienfait pou zot-mem ek pou zot famille​—ek aussi pou la societé. Bann Témoins de Jéhovah dan ou l’endroit pou content pou partage plus renseignement avek ou lor programme l’enseignement biblik ki zot pé deja faire dan ou l’endroit.a

[Note]

[L’encadré page 7]

Jésus ti rod change leker bann dimoune, pa bann gouvernement

[L’encadré page 8]

Bann Témoins de Jéhovah croire ki zot ena responsabilité pou vinn bann bon citoyen