Agir couma bann citoyen Royaume Bondié!

“Agir couma bann citoyen.”​—PHIL. 1:27, note.

COUMA OU POU REPONN?

Kisannla kapav vinn bann citoyen Royaume Bondié?

Ki nou bizin faire concernant la langue, zistoire, ek bann la loi Royaume Bondié?

Couma bann citoyen Royaume Bondié montré ki zot content bann principe Bondié?

1, 2. Kifer conseil ki Paul ti donne congregation Philippes ti ena enn signification special?

L’APOTRE Paul ti encourage bann membre congregation dan la ville Philippes pou “comporte-zot dan enn fason ki en accord avek la bonne nouvelle.” (Lire Philippiens 1:27.) L’expression grec ki Paul ti servi dan sa verset-la par “comporte-zot” kapav aussi vedir “agir couma bann citoyen.” Sa phrase-la ti ena enn signification special pou bann membre congregation Philippes. Kifer? Parski li parette ki la ville Philippes ti forme partie dan enn groupe la ville kot bann habitant ti’nn gagne nationalité romain. Bann citoyen romain ki ti vive dan Philippes ek dan tou l’Empire romain ti fiere ki zot ti ena sa nationalité-la ek la loi romain ti donne zot enn protection special.

² Bann membre congregation Philippes ti ena enn pli bon raison pou zot fiere. Paul ti rappel zot ki, en tant ki bann chretien oint, zot bann citoyen ki ena droit pou reste “dan le ciel.” (Phil. 3:20) Zot pa ti bann citoyen enn simple gouvernement humain, mais bann citoyen Royaume Bondié. Alors, zot ti gagne enn protection special ek bann bienfait ki okenn lot gouvernement pa ti pou kapav donne zot.​—Éph. 2:19-22.

3. (a) Kisannla ki gagne privilege pou vinn citoyen Royaume Bondié? (b) Ki nou pou examiné dan sa lartik-la?

³ Kan Paul ti dire “agir couma bann citoyen,” sa conseil-la applik surtout ar bann ki pou al regne avek Christ dan le ciel. (Phil. 3:20) Mais, kapav applik sa aussi ar bann ki pou vive lor la terre kan Royaume Bondié pou dirigé. Kifer? Parski tou bann chretien baptisé, servi mem le Roi, Jéhovah, ek zot bizin vive dapré mem principe. (Éph. 4:4-6) Zordi, bann dimoune faire tou seki zot kapav pou vinn citoyen enn pays riche. Alors, eski nou pa pou considere sa couma enn pli grand privilege encore pou vinn citoyen Royaume Bondié? Pou ki nou apprecié encore plus sa privilege-la, anou examine certain point commun ki ena entre bann condition pou vinn citoyen enn gouvernement humain, ek citoyen Royaume Bondié. Apré, nou pou examine trois kitsoz ki nou bizin faire si nou envie contigne reste bann citoyen Royaume Bondié.

BANN CONDITION POU VINN ENN CITOYEN

4. Ki été la langue pur, ek couma nou “koz” sa langue-la?

⁴ Aprann enn langue. Certain gouvernement humain demann bann ki faire application pou gagne nationalité zot pays, pou koz langue sa pays-la. Mem kan zot inn fini gagne zot nationalité, sa bann dimoune-la kitfois bizin faire bann grand zeffort pendant plusieurs l’année pou koz pli bien sa nouveau langue-la. Li possible ki zot aprann bann regle grammaire bien vite, mais kitfois zot pou prend plus le temps pou aprann prononce bann mot couma bizin. Li pareil aussi pou Royaume Bondié, sa Royaume-la attann ki so bann citoyen aprann seki la Bible appel la “langue pur.” (Lire Tsephania 3:9.) Ki sa langue-la sa? C’est la verité lor Bondié ek lor so bann projet ki trouve dan la Bible. Nou “koz” sa langue pur-la kan nou conduite en accord avek bann la loi ek bann principe Bondié. Kitfois bann citoyen Royaume Bondié aprann vite bann verité de base ki trouve dan la Bible ek zot prend bapteme. Selman, mem apré zot bapteme, zot bizin contigne faire bann grand zeffort pou ki pli allé zot “koz” la langue pur pli bien. Dan ki fason? Sakenn parmi nou bizin faire zeffort pou mette en pratik bann principe biblik, ek pa zis konn sa bann principe-la.

5. Kifer nou bizin aprann tou seki nou kapav lor zistoire l’organisation Jéhovah?

⁵ Etudié so zistoire. Enn dimoune ki envie vinn citoyen enn pays, bizin aprann zistoire gouvernement sa pays-la. Li pareil aussi pou bann ki envie vinn citoyen Royaume Bondié, zot bizin aprann tou seki zot kapav lor Royaume Bondié. Anou examine l’exemple bann garson Qorah, ki ti servi en Israël, dan le passé. Zot ti bien content Jérusalem ek place kot ti adore Jéhovah ek zot ti content raconte zistoire sa la ville-la. C’est pa beauté Jérusalem ki ti plus impressionne zot, mais seki sa la ville-la ek sa place kot ti adore Jéhovah-la ti representé. Jérusalem ti “la ville Grand le Roi,” Jéhovah, parski li ti centre vrai l’adoration. C’est la-bas ki ti enseigne la Loi Jéhovah. C’est envers sa peuple ki le Roi Jérusalem ti dirigé-la ki Jéhovah ti manifesté so l’amour fidele. (Lire Psaume 48:1, 2, 9, 12, 13.) Pareil couma bann garson Qorah, eski ou aussi ou ena enn grand desir pou etudié ek pou koz lor zistoire l’organisation Jéhovah ki lor la terre? Plus ou aprann lor l’organisation Bondié ek aprann couma Jéhovah soutenir so peuple, plus Royaume Bondié pou vinn réel pou ou. Ou desir pou preche la bonne nouvelle lor Royaume Bondié pou plus augmenté.​—Jér. 9:24; Luc 4:43.

6. Kifer li raisonnable ki Jéhovah demann nou pou aprann ek pou obeir bann la loi ek bann principe so Royaume?

⁶ Konn bann la loi. Bann gouvernement attann ki bann dimoune dan zot pays aprann ek obeir bann la loi sa pays-la. Alors, li raisonnable ki Jéhovah attann ki tou bann citoyen so Royaume aprann ek obeir so bann la loi ek so bann principe. (Is. 2:3; Jean 15:10; 1 Jean 5:3) Souvent, bann la loi humain zot imparfait ek injuste. Parkont, “la loi Jéhovah li parfait.” (Ps. 19:7) Eski nou trouve plaisir dan la loi Bondié ek nou lire so Parole toulé-jour? (Ps. 1:1, 2) Sel moyen ki nou kapav aprann la loi Bondié c’est kan nou etudié sa loi-la nou-mem. Personne pa pou kapav faire sa pou nou.

BANN CITOYEN ROYAUME BONDIÉ CONTENT SO BANN PRINCIPE

7. Kifer bann citoyen Royaume Bondié obeir bann la loi Bondié?

⁷ Pou nou reste bann citoyen Royaume Bondié, nou bizin content bann principe Bondié, ek pa zis konn zot. Beaucoup citoyen bann gouvernement dire ki zot d’accord avek bann la loi ek bann principe ki ena dan pays kot zot pé vive. Selman, kan zot pa content enn certain la loi, ek zot pensé ki personne pa pé guette zot, zot desobeir sa la loi-la. Souvent zot obeir bann la loi zis pou “faire plaisir bann dimoune.” (Col. 3:22) Mais bann citoyen Royaume Bondié obeir bann la loi Bondié pou enn raison different. Nou content pou obeir sa bann la loi-la, mem kan pena personne ki pé guette nou. Kifer? Parski nou content sa Kikenn ki’nn faire sa bann la loi-la.​—Is. 33:22; lire Luc 10:27.

8, 9. Couma ou kapav koné si ou vrai-mem content bann la loi Bondié?

⁸ Couma ou kapav koné si ou vrai-mem content bann la loi Bondié? Reflechi lor fason ki ou reagir kan ou gagne enn conseil lor enn kitsoz ki ou pensé c’est enn choix personnel​—par exemple, lor l’habillement ek coiffure. Avant ki ou vinn enn citoyen Royaume Bondié, kitfois ou ti content habille dan enn fason debraillé ou-soit provokan. Pli allé, ou l’amour pou Bondié finn augmenté, lerla ou finn aprann pou habille dan enn fason ki donne Li l’honneur. (1 Tim. 2:9, 10; 1 Pierre 3:3, 4) Ou kapav pensé ki asterla ou pé habille dan enn fason modeste. Mais couma ou pou reagir si enn ancien dire ou ki fason ki ou choisir pou habillé sok beaucoup dimoune dan congregation? Eski ou pou rod defann ou-mem, eski ou pou en colere, ou-soit ou pou teti? Enn parmi bann la loi ki pli important dan Royaume Bondié, c’est ki tou bann citoyen obeir Christ. (1 Pierre 2:21) En rapport avek l’exemple Jésus, l’apotre Paul ti ecrire: “Fodé ki sakenn parmi nou faire so prochain plaisir dan seki bon pou fortifié li. Parski mem Christ pa finn faire li-mem plaisir.” (Rom. 15:2, 3) Pou preserve la paix dan congregation, enn chretien mur pou cedé volontairement pou ki li pa blesse conscience lezot.​—Rom. 14:19-21.

⁹ Asterla, anou examine deux lezot sujet ki bien important: nou l’attitude en rapport avek sexualité, ek fason ki nou considere mariage. Bann dimoune ki pankor vinn bann citoyen Royaume Bondié, kitfois tolere l’homosexualité, considere pornographie couma enn l’amusement ki pa dangereux, ek pensé ki l’adultere ek divorce c’est zis bann choix personnel. Bann citoyen Royaume Bondié finn aprann pou reflechi lor consequence zot bann action ek ki l’effet sa pou ena lor lezot. Mem si beaucoup chretien ti ena enn la vie immoral avant, zordi zot considere sexualité ek mariage couma bann don ki Bondié inn donné. Zot accorde beaucoup valeur ar bann principe Jéhovah ki ena enn niveau bien haute, ek zot bien d’accord ki, bann ki contigne ena enn conduite sexuel immoral, pa merité vinn bann citoyen Royaume Bondié. (1 Cor. 6:9-11) Selman, zot reconette aussi ki leker traite. (Jér. 17:9) Alors, zot content pou gagne bann l’avertissement precis ki pou aide zot garde bann principe moral ki ena enn niveau bien haute.

BANN CITOYEN ROYAUME BONDIÉ CONTENT BANN L’AVERTISSEMENT

10, 11. Ki bann l’avertissement Royaume Bondié donne nou dan ler ki bizin, ek ki ou pensé lor sa bann l’avertissement-la?

¹⁰ Bann gouvernement kapav averti bann citoyen concernant danger ki ena dan certain mangé ek dan certain medecine. Bien sur, pa tou mangé ek pa tou medecine ki dangereux. Mais si ena enn produit ki dangereux, gouvernement kapav donne bann l’avertissement pou protege so bann citoyen. Si gouvernement-la pa faire sa, li pou coupable pou so negligence. Royaume Bondié aussi donne so bann citoyen bann l’avertissement precis dan ler ki bizin concernant bann danger moral ek spirituel. Par exemple, Internet inn vinn enn moyen bien utile pou communiké, pou aprann ek pou diverti. L’organisation Bondié servi Internet ek faire beaucoup bon kitsoz avek sa. Mais, ena beaucoup site Internet ki dangereux lor plan moral ek spirituel. Bann site pornographik zot bien dangereux pou la santé spirituel bann citoyen Royaume Bondié. Depuis plusieurs dizaine l’année l’esclave fidele pé averti nou kont danger sa bann site-la. Nou vrai-mem reconnaissant pou sa bann l’avertissement ki protege nou la santé spirituel-la!

¹¹ Sa bann dernier l’année-la, ena enn lot qualité site Internet ki finn vinn bien populaire: c’est bann reseau social. Sa bann site-la kapav bien utile si servi zot avek precaution. Mais zot kapav aussi faire bann degat bien grave. Zot kapav mette bann dimoune en contact ar bann mauvais frequentation. (1 Cor. 15:33) Alors, nou pa etonné ki l’organisation Bondié finn donne nou bann l’avertissement bien equilibré lor fason ki nou bizin servi sa bann site-la. Eski ou finn lire tou seki l’esclave fidele finn fek publié lor bann reseau social? Li pou vrai-mem dangereux ki nou servi sa bann site-la sans ki nou lire sa bann lartik-la avant!a C’est coumadir nou pé prend enn medecine extra fort sans ki nou lire bann l’avertissement ki ena lor so boite.

12. Kifer li bete pou ignore bann l’avertissement?

¹² Pena okenn doute, bann ki pa ecoute bann l’avertissement ki l’esclave fidele donné, pou gagne probleme ek pou faire bann dimoune ki zot content gagne probleme. Certain finn vinn esclave pornographie ou-soit finn commette l’immoralité ek apré, zot embete-zot-mem kan zot croire ki Jéhovah pa trouve seki zot pé faire. Nou pou bien bete si nou croire ki nou kapav cachiette nou conduite devant Jéhovah! (Prov. 15:3; lire Hébreux 4:13.) Bondié envie aide sa bann dimoune-la ek Li servi so bann representant lor la terre pou essaye aide zot. (Gal. 6:1) Selman, pareil couma enn gouvernement kapav enleve nationalité enn dimoune ki faire bann kitsoz illegal, Jéhovah aussi pou enleve nationalité bann dimoune ki citoyen dan so Royaume, si zot desobeir so bann principe ek pa repenti.b (1 Cor. 5:11-13) Selman, Li enn Bondié ki ena misericorde. Bann ki repenti ek ki change zot fason agir kapav ré-gagne enn bon reputation devant Jéhovah ek reste bann citoyen dan so Royaume. (2 Cor. 2:5-8) C’est vrai-mem enn l’honneur pou servi enn le Roi ki content nou coumsa!

BANN CITOYEN ROYAUME BONDIÉ DONNE VALEUR L’EDUCATION

13. Couma bann citoyen Royaume Bondié montré ki l’education ena enn grand valeur pou zot?

¹³ Beaucoup gouvernement humain travail dur pou donne l’education zot bann citoyen. Zot faire bann lekol kot bann dimoune kapav aprann lire ek aprann enn metier. Bann citoyen Royaume Bondié bien apprecié sa bann lekol-la ek zot faire zeffort pou aprann lire, ecrire ek pou aprann enn metier ki pou soutenir-zot lor plan materiel. Mais l’education ki zot gagné en tant ki citoyen Royaume Bondié ena beaucoup plus valeur pou zot. A travers congregation chretien, Jéhovah encourage nou pou aprann lire. L’organisation Jéhovah encourage bann parent pou lire avek zot bann jeune zenfant. Toulé mois, l’esclave fidele publié La Tour de Garde ek Réveillez-vous ! ki basé lor la Bible. Si ou lire apepré deux-trois page par jour pendant enn mois, ou pou kapav contigne profite l’education ki Jéhovah donne nou.

14. (a) Ki formation nou gagné? (b) Ki bann suggestion pou l’adoration en famille ou finn bien content pou appliké?

¹⁴ Chaque semaine bann citoyen Royaume Bondié gagne enn formation dan bann reunion dan zot congregation. Par exemple, pendant preské 70 an, Lekol ministere theocratik finn aide tou so bann zeleve pou vinn bann enseignant Parole Bondié bien efficace. Eski ou participe dan sa lekol-la? Dan bann dernier l’année, l’esclave fidele finn surtout montré l’importance pou ena enn soirée reservé pou l’adoration en famille chaque semaine. Sa disposition-la faire bann famille vinn pli solide. Eski ou finn reussi applik bann suggestion ki finn donné dan nou bann publication lor la?c

15. Cite enn parmi bann grand privilege ki nou ena.

¹⁵ Citoyen bann gouvernement humain rassemblé bann dimoune pou soutenir zot parti politik, zot faire sa en publik ek zot mem al lakaz par lakaz. Dan enn pli grand fason, bann citoyen Royaume Bondié faire bann grand zeffort pou soutenir sa Royaume-la en publik ek lakaz par lakaz, toulé-deux. En realité, pareil couma nou ti mentionné dan lartik avant, publication ki plus distribué zordi lor la terre, c’est La Tour de Garde, ki pé annonce Royaume Jéhovah! Enn parmi bann pli grand privilege ki nou ena, c’est koz lor Royaume Bondié avek lezot dimoune. Eski ou pé participe avek zele dan sa l’activité predication-la?​—Mat. 28:19, 20.

16. Couma ou kapav montré ki ou enn bon citoyen Royaume Bondié?

¹⁶ Bientot Royaume Bondié pou sel gouvernement ki pou dirige la terre. Sa Royaume-la pou veillé ki tou passe bien dan la vie toulé-jour, pa selman dan domaine spirituel mais aussi dan lezot domaine. Eski ou pou enn bon citoyen Royaume Bondié kan sa pou arrivé? C’est asterla-mem ki ou bizin montré sa. Dan tou bann decision ki ou prend toulé-jour, faire tou pou la gloire Jéhovah ek lerla ou pou montré ki ou pé comporte-ou couma enn bon citoyen Royaume Bondié.​—1 Cor. 10:31.

[Notes]

[L’encadré page 21]

Eski ou prend compte bann l’avertissement biblik ki ou gagné en rapport avek Internet?

[Zimage page 19]

Pareil couma bann garson Qorah, eski ou content vrai l’adoration ek so zistoire?

[Zimage page 22]

Ou l’adoration en famille kapav aide ou ek bann ki ou content pou vinn bann bon citoyen Royaume Bondié