C’est “l’esprit saint ki’nn pousse” zot

“Jamais bann prophetie finn annoncé par volonté bann dimoune, mais c’est l’esprit saint ki’nn pousse bann dimoune pou zot transmette message Bondié.”​—2 PIERRE 1:21.

BANN POINT LOR KI NOU BIZIN REFLECHI

Couma par moyen so l’esprit saint, Bondié ti transmette so message ar bann ecrivain la Bible?

Ki bann preuve ki montré ki la Bible inspiré par Bondié?

Ki ou kapav faire toulé-jour pou montré ki ou ena reconnaissance pou Parole Bondié?

1. Kifer nou bizin la Bible?

KOT-SA nou sorti? Kifer nou lor la terre? Ki pou arrive nou dan l’avenir? Kifer le monde li coumsa? Ki arrive nou kan nou mort? Partout lor la terre, bann dimoune pose sa bann question-la. Couma nou ti pou konn reponse sa bann question-la ek pou bann lezot question important si nou pa ti ena la Bible, Parole ki Bondié inn inspiré? Sans bann l’Ecriture Sacré, c’est nou prop l’experience ki ti pou nou principal enseignant. Ek si c’est nou prop l’experience ki ti enseigne nou, eski nou ti pou kapav ena mem sentiment ki enn psalmiste ti ena envers “la loi Jéhovah”?​—Lire Psaume 19:7.

2. Ki pou aide nou pou contigne ena reconnaissance pou la Bible ek considere li couma enn cadeau ki ena valeur ki Bondié inn donne nou?

² Mais malheureusement, certain finn laisse l’amour ki zot ti ena au commencement pou la verité ki ena dan la Bible, refroidi. (Compare avek Révélation 2:4.) Zot nepli vive dan enn fason ki faire Jéhovah plaisir. (Is. 30:21) Mais sa pa bizin arrive nou. Nou kapav ek nou bizin faire bann zeffort pou contigne ena reconnaissance pou la Bible ek so bann l’enseignement. La Bible c’est enn grand cadeau ki le Createur, ki content nou, inn donne nou. (Jacq. 1:17) Ki pou aide nou pou ena enn grand reconnaissance pou “parole Bondié”? Enn moyen c’est kan nou reflechi lor fason ki Bondié ti guide bann dimoune pou ecrire la Bible. Ena beaucoup preuve ki la Bible inspiré par Bondié. Kan nou rappel certain parmi sa bann preuve-la, sa pou motive nou pou lire la Bible chaque jour ek pou applik so bann conseil.​—Héb. 4:12.

C’EST “L’ESPRIT SAINT KI’NN POUSSE” ZOT​—COUMA?

3. Couma “l’esprit saint [ti] pousse” bann prophete ek bann ecrivain la Bible?

³ Pendant enn periode 1,610 an​—depuis 1513 avant nou lepok ziska 98 nou lepok​—apepré 40 zom finn ecrire la Bible. Certain ti bann prophete ki ti ‘poussé par l’esprit saint.’ (Lire 2 Pierre 1:20, 21.) L’expression grec ki’nn traduire par ‘poussé par’ vedir “prend ou-soit sarié depuis enn place ziska enn lot place,” ek “kapav traduire li dan lezot fason couma par exemple, deplacé par, conduire par, laisse-nou poussé par.”a Actes 27:15 servi sa l’expression-la pou decrire enn bateau ki finn poussé par di-vent dan enn certain direction. Bann prophete ek bann ecrivain la Bible ti ‘poussé par l’esprit saint,’ setadir Bondié ti communik avek zot, ti motive zot, ek ti guide zot par so la force actif. Alors, zot pa ti ecrire zot prop pensée, mais bann pensée Bondié. Parfois, bann prophete ek bann ecrivain ki ti inspiré par Bondié, pa ti mem konn signification seki zot ti annoncé ou-soit seki zot ti ecrire. (Dan. 12:8, 9) Oui, “tou l’Ecriture li inspiré par Bondié” ek pena okenn l’opinion bann dimoune ladan.​—2 Tim. 3:16.

4-6. Dan ki different fason Jéhovah ti transmette so bann pensée ar bann ecrivain la Bible? Donne enn l’exemple.

⁴ Mais couma Bondié ti servi l’esprit saint pou faire bann ecrivain la Bible koné ki pou ecrire? Eski Bondié ti dire zot exactement chaque mot ki zot ti bizin ecrire ou-soit Li ti donne zis bann l’idée ki zot ti kapav exprime dan zot prop mot? Anou prend l’exemple enn directeur ki bizin ecrire enn lettre. Kan bizin servi bann mot precis, li ecrire lettre-la li-mem ou-soit li dicté lettre-la so secretaire, mot pou mot. Secretaire-la tape lettre-la ek directeur-la signé. Mais parfois, directeur-la zis dire bann l’idée principal ek so secretaire servi mot ek style ki li envie pou ecrire lettre-la. Directeur-la kitfois pou ré-lire lettre-la apré ek pou demande so secretaire faire bann changement necessaire. Kan inn fini ecrire lettre-la, directeur-la pou mette so signature ek bann dimoune pou considere sa couma enn lettre ki li finn ecrire.

⁵ Li pareil aussi pou la Bible, certain partie ti ecrire “par lé-doigt Bondié.” (Ex. 31:18) Jéhovah ti aussi dicté bann ecrivain kan Li ti envie servi bann mot exact. Par exemple, dan Exode 34:27, nou lire: “Jéhovah ti aussi dire Moïse: ‘Ecrire sa bann parole-la pou toi, parski c’est dapré sa bann parole-la ki mo pé faire vrai-mem enn l’alliance avek toi ek avek Israël.’” Avek prophete Jérémie aussi Jéhovah ti dire: “Ecrire pou toi dan enn livre tou bann parole ki mo pou dire toi.”​—Jér. 30:2.

⁶ Mais la plupart du temps, par enn mirak, Bondié ti faire bann ecrivain la Bible konn so bann pensée au lieu ki Li ti dire zot bann mot precis. Li ti mette sa bann pensée-la dan zot leker ek zot l’esprit ek zot ti kapav choisir zot prop mot pou exprime sa bann pensée-la. Ecclésiaste 12:10 dire: “Rassembleur ti faire zeffort pou rod bann parole ki faire plaisir ek pou ecrire bann parole la verité ki exact.” Luc, ki ti ecrire enn l’Evangile, ti “rod tou kitsoz exactement couma zot ti arrivé depuis commencement, pou ki [li] kapav ecrire zot dan enn l’ordre logik.” (Luc 1:3) L’esprit Bondié ti veillé ki l’imperfection bann dimoune pa change message Bondié.

7. Couma nou trouve bien sagesse Bondié kan Li ti servi bann dimoune pou ecrire la Bible?

⁷ Nou trouve bien ki Bondié ena enn grand sagesse kan Li ti servi bann dimoune pou ecrire la Bible. Bann mot pa donne zis bann renseignement mais zot transmette aussi bann l’emotion ek bann sentiment. Ki ti pou arrivé si Jéhovah ti servi bann ange pou ecrire la Bible? Eski zot ti pou kapav decrire bann sentiment ki bann dimoune bien koné couma la peur, tristesse, ek decouragement? Jéhovah ti permette bann dimoune imparfait choisir bann mot pou ecrire bann pensée ki zot ti gagné a travers l’esprit saint. Bann ecrivain ti exprime zot bann sentiment a travers different style. C’est a cause sa ki message Bondié touche nou leker.

BANN PREUVE KI LA BIBLE SORTI KOT BONDIÉ

8. Kifer nou kapav dire ki la Bible li pa pareil couma bann lezot livre ki bann religion ena?

⁸ Ena beaucoup preuve ki montré ki la Bible c’est enn livre ki’nn inspiré par Bondié. Contrairement ar bann lezot livre ki bann religion ena, la Bible aide nou pou konn vrai Bondié. Par exemple, parmi bann livre ki bann hindou servi ena Veda, kot ena bann chanté; ena enn livre kot ena bann commentaire religieux lor sa bann chanté-la; Upanishad, enn livre ki koz lor philosophie; Rāmāyaṇa ek Mahābhārata, bann zistoire ki’nn ecrire dan enn certain lepok. Ena aussi Bhagavad-Gītā, enn livre kot ena bann instruction lor plan moral ki forme partie dan Mahābhārata. Livre ki bann bouddhiste servi appel Tripitaka (Trois corbeilles); li divisé en trois volume, enn koz surtout lor bann regle ek bann principe ki bann moine ek bann religieuse bizin suive. Enn lot volume koz surtout lor doctrine bann bouddhiste. Ek troisieme volume-la koz lor l’enseignement oral ki Bouddha ti donné. Bouddha li-mem pa ti pretann ki li ti enn bondié, ek li ti dire bien tigit kitsoz lor Bondié. Livre bann confucianiste koz lor bann l’evenement ki finn ena dan le passé, bann principe moral, bann phrase magik, ek bann chanté. Livre sacré bann musulman enseigne bann dimoune pou croire dan enn sel Bondié ek decrire Li couma enn Bondié ki konn tou kitsoz, ki konn l’avenir, ek ki controle bann l’evenement. Mais selman, li pa mem faire nou konn nom Bondié, Jéhovah, ki parette plusieurs millier fois dan la Bible.

9, 10. Ki nou kapav aprann lor Bondié dan la Bible?

⁹ Alors ki la plupart bann grand livre ki bann religion servi dire tigit kitsoz lor Bondié, ou-soit pa dire nanyin lor Li, la Bible aide nou pou aprann konn Jéhovah ek bann kitsoz ki Li faire. Li aide nou pou trouve beaucoup l’aspect dan personnalité Bondié. La Bible pa zis faire nou koné ki Bondié Li tout-puissant, sage, ek juste, mais li aussi decrire Li couma enn Bondié ki content nou. (Lire Jean 3:16; 1 Jean 4:19.) En plus, la Bible dire nou: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.” (Actes 10:34, 35) Zordi, bann dimoune kapav lire la Bible dan different langue, alors, sa confirmé ki Bondié pa faire preference. Bann expert dan langue dire ki bann dimoune dan le monde koz environ 6,700 langue zordi. Quatre-vingt-dix pour cent population le monde koz environ 100 sa bann langue-la. Pourtant, finn traduire la Bible en entier ou-soit en partie dan plus ki 2,400 langue. Alors, preské tou dimoune dan le monde kapav lire au moins enn partie la Bible dan zot langue.

¹⁰ Jésus ti dire: “Mo Papa inn contigne travail ziska asterla, ek moi aussi mo pé contigne travail.” (Jean 5:17) ‘Depuis touletan ek pou touletan, Jéhovah Li Bondié.’ Alors, pense lor tou bann kitsoz ki Li finn accompli! (Ps. 90:2) Zis la Bible ki faire nou konn bann kitsoz ki Jéhovah inn faire dan le passé, seki Li pé faire asterla, ek seki Li pou faire dan l’avenir. La Bible enseigne nou aussi lor seki faire Bondié plaisir ek seki pa faire Li plaisir, ek montré nou couma nou kapav vinn proche ar Li. (Jacq. 4:8) Alors, fodé pa nou laisse nou bann l’objectif personnel ek nou bann tracas eloigne nou ar Bondié.

11. Ki grand sagesse ena dan la Bible?

¹¹ Dan la Bible ena enn grand sagesse lor ki nou kapav faire confiance. Sa montré aussi ki sa livre-la sorti kot enn personnage ki pli superieur ki bann dimoune. L’apotre Paul ti ecrire: “Kisannla finn arrivé konn pensée Jéhovah, pou ki li enseigne Li?” (1 Cor. 2:16) Sa verset-la basé lor seki prophete Isaïe ti demann bann dimoune dan so lepok: “Kisannla finn prend dimension l’esprit Jéhovah, ek kisannla, couma so conseillé, kapav faire Li konn kitsoz?” (Is. 40:13) Bien sur, reponse sa question-la c’est: personne. Pena doute, kan nou applik bann conseil biblik en rapport avek mariage, bann zenfant, bann divertissement, nou frequentation, travail, l’honneteté, ek moralité, nou gagne bann pli bon resultat! Jamais nou gagne bann mauvais conseil dan la Bible. De lot coté, bann dimoune pa assez sage pou donne bann conseil ki touletan reussi. (Jér. 10:23) Touletan zot faire bann changement dan zot bann conseil ek zot ajoute bann nouveau kitsoz ladan kan zot realisé ki sa bann conseil-la nepli bon. La Bible dire ki “pensée bann dimoune . . . zot couma la vapeur.”​—Ps. 94:11.

12. Couma bann dimoune finn essaye detruire la Bible?

¹² Nou trouve enn lot preuve ki c’est vrai Bondié ki finn faire ecrire la Bible par seki l’histoire faire nou koné lor zeffort ki bann dimoune inn faire pou detruire la Bible. En 168 avant nou lepok, Antiochus IV ki ti enn le roi syrien, ti rod bann livre la Loi ki ti inspiré pou brule zot. En 303 nou lepok, Dioclétien ki ti enn empereur romain, ti donne l’ordre pou detruire tou bann place kot bann chretien ti faire reunion ek pou brule zot livre sacré. Sa destruction-la ti contigné pendant enn dizaine l’année. Apré 11^eme siecle, bann le pape ti faire tou pou empeche traduire la Bible dan bann langue ki bann dimoune comprend pou ki zot pa gagne enn connaissance lor la Bible. Mem si Satan ek bann dimoune ki ti soutenir li ti rod detruire la Bible, nou encore ena la Bible zordi. Jéhovah pa finn laisse personne detruire cadeau ki Li finn donne bann dimoune.

BANN PREUVE KI FINN CONVAINK BEAUCOUP DIMOUNE

13. Ki preuve nou ena ki la Bible inspiré par Bondié?

¹³ Ena lezot preuve ki montré ki la Bible inspiré par Bondié: l’harmonie ki ena ladan, li exact lor plan scientifik, realisation so bann prophetie, so franchise, pouvoir ki li ena pou transforme la vie bann dimoune, li exact kan li koz lor l’histoire, ek bann bon reponse ki li donné pou bann question ki mentionné dan paragraphe 1. Anou guetté ki finn aide certain pou trouvé ki la Bible inspiré par Bondié.

14-16. (a) Ki ti convaink enn musulman, enn hindou, ek enn tifi ki ti ena bann doute lor Bondié, ki la Bible inspiré par Bondié? (b) Ki preuve ou content servi dan ou ministere pou montré ki la Bible inspiré par Bondié?

¹⁴ Anwarb ti grandi dan religion musulman, dan Moyen-Orient. Kan li ti pé reste en Amérique du Nord pendant enn temps, bann Témoins de Jéhovah ti tape so la porte. Anwar dire: “Sa lepok-la mo ti ena enn l’opinion negatif lor bann religion chretien.” Li dire sa a cause bann la guerre ki bann soi-disant chretien ti faire. Li ajouté: “Mais parski mo enn dimoune bien curieux, mo ti accepté pou etudié la Bible.” Enn tipé apré, Anwar ti retourne dan so pays ek li ti perdi contact avek bann Témoins. Plusieurs l’année apré, li ti al reste en Europe kot li ti recommence so l’etude la Bible ek li ti dire: “Realisation bann prophetie la Bible, l’harmonie ki ena dan bann l’Ecriture Sacré [kot] pena okenn contradiction, ek l’amour ki ena parmi bann adorateur Jéhovah ti convaink moi ki la Bible c’est Parole Bondié.” Anwar ti prend bapteme en 1998.

¹⁵ Asha, enn tifi 16 an, inn grandi dan enn famille hindou ki bien religieux. Li dire: “Mo ti faire la priere zis kan mo ti al dan temple ou-soit kan mo ti pé passe par bann moment difficile. Mais jamais mo ti pense Bondié kan tou ti pé marche bien dan mo la vie.” Li contigne raconté: “Selman kan bann Témoins de Jéhovah ti tape mo la porte, mo la vie finn changé net.” Asha ti etudié la Bible ek ti aprann pou considere Bondié couma so Camarade. Ki ti convaink li ki la Bible enn livre inspiré par Bondié? Li expliké: “La Bible ti reponn tou question ki mo ti kapav posé. Li ti aide moi pou ena la foi mem si mo pa ti trouve Bondié, setadir sans ki mo ti bizin al dan enn temple pou prosterne devant enn zidole.”

¹⁶ Paula inn grandi dan religion catholique, mais kan li ti enn jeune adulte, li ti ena bann doute ki Bondié existé. Apré sa, enn kitsoz ti arrivé. Li raconté: “Mo ti zwenn enn camarade ki mo pa ti’nn zwenn pendant plusieurs mois. Sa lepok-la ti ena mouvement hippie. Kan mo ti trouve changement ki li ti faire​—bien rasé, cheveux bien coupé, ek heureux​—mo ti demann li: ‘Ki finn arrive toi, kot to finn allé?’ Li ti dire moi ki li finn etudié la Bible avek bann Témoins de Jéhovah ek apré li ti commence rann moi temoignage.” Kan Paula ki ti ena bann doute lor Bondié, ti trouvé couma la verité ki ena dan la Bible kapav ena enn pouvoir coumsa, li ti attiré ar so message ek li ti accepté la Bible couma enn livre ki inspiré par Bondié.

“TO PAROLE LI ENN LA LAMPE POU MO LIPIÉ”

17. Kan ou lire Parole Bondié toulé-jour ek ou medite lor la, couma sa kapav aide ou?

¹⁷ La Bible c’est enn cadeau extraordinaire ki Bondié inn donne nou par moyen so l’esprit saint. Prend plaisir pou lire la Bible toulé-jour, ek lerla ou l’amour pou sa livre-la ek pou sa Kikenn ki finn faire ecrire li-la pou grandi. (Ps. 1:1, 2) Chaque fois, avant ki ou etudié la Bible, faire la priere, demann Bondié so l’esprit saint pou comprend seki ou pé lire. (Luc 11:13) Ena bann pensée Bondié dan la Bible, alors kan ou medite lor seki li dire, ou kapav faire pensée Bondié vinn ou pensée.

18. Kifer ou envie contigne aprann seki ena dan la Bible?

¹⁸ A mesure ki ou connaissance exact lor la verité pé augmenté, vive en accord avek seki ou pé aprann. (Lire Psaume 119:105.) Examine bann l’Ecriture en profondeur pareil couma ou ti pou guette ou dan enn la glace. Si ou trouvé ki ou bizin faire certain changement, faire li. (Jacq. 1:23-25) Servi Parole Bondié couma enn l’epée pou defann ou bann croyance ek pou tire bann fausse l’enseignement dan leker bann dimoune humble. (Éph. 6:17) Kan ou pé faire sa, ou kapav ena reconnaissance ki bann prophete ek bann zom ki Bondié ti servi pou ecrire la Bible ti ‘poussé par l’esprit saint.’

[Notes]

[L’encadré page 32]

Lire la Bible toulé-jour ek ou l’amour pou Bondié, ki’nn faire ecrire sa livre-la, pou grandi

[Zimage page 29]

Signature ki ena lor enn lettre montré kisannla ki’nn ecrire sa