Kouma Nou Kreater Fer Nou Konn So Bann Promes?

Depi ki nou Kreater finn kree bann dimounn, Li finn kominik avek zot atraver bann anz ek bann profet. Anplis, Li’nn swazir pou fer ekrir so mesaz ek so bann promes. Ek sa bann promes-la kapav ena enn lefe lor ou lavenir. Alor, kotsa ou kapav trouv bann promes Bondie azordi?

Dan bann Lekritir Sakre, nou trouv mesaz ki Bondie inn fer ekrir pou nou. (2 Timote 3:16) Kouma eski Bondie finn servi bann profet pou ekrir so mesaz? (2 Pier 1:21) Sa bann profet-la ti ekrir bann panse Bondie parski Bondie ti met so panse dan zot lespri. Pou konpran sa, anou get enn sitiasion ki ena azordi: Si enn biznesmenn servi enn sekreter pou ekrir enn mesaz pou li, nou pou rekonet ki mesaz-la se biznesmenn-la so mesaz. Dan mem fason, mem si Bondie finn servi bann zom pou ekrir so mesaz, se so bann panse ki ena dan bann Lekritir Sakre.

BOUKOU DIMOUNN KAPAV GAGN AKSE AR MESAZ BONDIE

Mesaz Bondie telman inportan ki Li anvi ki tou dimounn lir li ek konpran li. Azordi, so “Bonn Nouvel eternel” disponib pou ‘tou bann nasion, tribi, ek langaz.’ (Revelasion 14:6) Gras-a benediksion Bondie, bann Lekritir Sakre zot disponib an-antie ouswa an parti dan plis ki 3,000 lang, ek sa li bien plis ki ninport ki liv ki existe.