Eski kapav ena mirak?—Trois objection ki souvent nou tendé

PREMIER OBJECTION: Li impossible ki ena bann mirak parski zot al kont bann la loi ki ena dan la nature. Connaissance ki nou ena lor bann la loi ki ena dan la nature li basé lor seki bann scientifik finn observé dan le monde naturel tout autour nou. Mais selman, sa bann la loi-la pareil couma bann regle ki ena dan enn langue​—ena certain exception kot regle-la pa appliké. En realité, connaissance ki nou ena lor bann la loi ki ena dan la nature, kapav bien limité. (Job 38:4) Enn scientifik ki bien content so travail kapav inn consacré so la vie pou etudié enn certain la loi dan la nature. Mais si li trouve zis enn sel “exception,” li pou bizin ré-guette tou seki li koné lor sa la loi-la. Enn kozé dire: “Zis enn sel cygne noir prouvé ki tou bann cygne pa blanc.”

Enn zistoire comik montré ki li bien facile pou nou faire enn jugement sans ki nou ena tou bann detail. John Locke (1632-1704) raconte sa zistoire-la lor l’ambassadeur Hollande ek le roi Siam: kan l’ambassadeur Hollande ti pé decrire so pays ar le roi, li ti mentionné ki parfois li ti possible pou enn l’elephant marche lor de l’eau. Le roi-la pa ti croire sa ek li ti pensé ki ambassadeur-la ti pé koz menti ar li. Mais selman, l’ambassadeur-la ti pé zis decrire enn kitsoz ki sa le roi-la jamais inn faire l’experience. Le roi-la pa ti realisé ki, kan de l’eau congelé ek vinn glason, li kapav tini poids enn l’elephant. Sa ti parette impossible pou sa le roi-la parski li pa ti konn tou bann detail.

Anou guette certain kitsoz ki bann dimoune inn faire dan nou lepok ki ti kapav parette impossible pou realisé ena zis deux-trois dizaine l’année:

● Enn avion kapav transporte plus ki 800 passager depuis New York ziska Singapour sans ki li arreté, avek enn vitesse 900 kilometre a ler.

● Bann conference par video kapav faire bann dimoune ki lor different continent gagne bann conversation face a face.

● Kapav garde plusieurs millier chanté lor enn l’appareil pli tipti ki enn boite zallumette.

● Bann docteur kapav faire bann transplantation leker ek lezot partie lekor enn dimoune.

Ki conclusion nou kapav tiré kan nou guette tou sa bann kitsoz ki bann dimoune inn faire-la? Sa conclusion-la: si bann dimoune finn kapav faire bann kitsoz extraordinaire ki ti parette impossible pa trop longtemps, alors sa Bondié ki finn crée l’univers ek tou seki ena ladan-la kapav faire bann kitsoz extraordinaire ki nou pa kapav comprend ek ki nou pa pou kapav ré-faire.a​—Genèse 18:14; Matthieu 19:26.

DEUXIEME OBJECTION: La Bible raconte bann mirak pou faire bann dimoune pou croire. La Bible pa dire nou croire dan tou bann mirak. En realité, c’est le contraire. La Bible averti nou pou faire bien attention avant ki nou croire bann mirak ek bann signe extraordinaire. Guette sa l’avertissement bien clair-la: “Sa kikenn ki meprise la loi-la pou vini grace a travail Satan, avek tou sorte qualité fausse mirak, signe ek [bann kitsoz] extraordinaire ek tou sorte qualité kitsoz ki embete bann dimoune.”​—2 Thessaloniciens 2:9, 10, New International Version.

Jésus Christ ti aussi averti nou ki beaucoup pou pretann suive li mais zot pa pou so bann vrai disciple. Certain pou mem dire li: “Seigneur, Seigneur, eski c’est pa par to nom ki nou’nn prophetisé, ek par to nom ki nou’nn tire bann demon, ek par to nom ki nou’nn faire bann mirak?” (Matthieu 7:22) Mais Jésus ti dire ki li pa ti pou accepté zot couma so bann disciple. (Matthieu 7:23) Alors, li clair ki Jésus pa ti enseigné ki c’est Bondié ki faire tou bann mirak.

Bondié pa dire so bann adorateur base zot la foi zis lor bann mirak. Au contraire, zot la foi bizin basé lor bann preuve ki’nn bien etabli.​—Hébreux 11:1.

Par exemple, anou examine enn parmi bann mirak ki’nn ecrire dan la Bible, resurrection Jésus Christ. Plusieurs l’année apré sa l’evenement-la, certain chretien dan Corinthe ti commence ena bann doute concernant resurrection Jésus. Couma l’apotre Paul ti aide sa bann chretien-la? Eski li ti zis dire zot: “Ena plus la foi”? Non. Remarké couma li ti faire zot rappel bann verité ki ti bien etabli. Li ti dire ki Jésus “ti enterré, oui, . . . li finn relevé troisieme jour, couma bann Ecriture finn dire; ek li ti apparette ar Céphas, apré ar toulé-douze. Apré sa, li ti apparette ar plus ki cinq cent frere en mem temps, la plupart encore vivant ziska zordi.”​—1 Corinthiens 15:4-8.

Eski li ti important ki sa bann chretien-la croire dan sa mirak-la? Paul ti contigne dire: “Si Christ pa finn relevé, pou nanyé ki nou pé preché, ek pou nanyé ki nou ena la foi.” (1 Corinthiens 15:14) Paul pa ti considere sa couma enn kitsoz banal. Soit mirak concernant resurrection Jésus ti vrai, ou-soit non! Paul ti koné ki sa resurrection-la ti vrai parski plusieurs centaine dimoune ki ti temoin sa l’evenement-la ti encore vivant dan sa lepok-la. En realité, sa bann temoin-la ti disposé pou mort plutot ki renié seki zot ti’nn trouvé.​—1 Corinthiens 15:17-19.

TROISIEME OBJECTION: Bann mirak c’est zis bann evenement naturel ki bann dimoune ki pena l’education, mal comprend. Certain bibliste essaye expliké ki bann mirak ki mentionné dan la Bible, zot zis bann evenement naturel ki’nn arrivé, sans ki Bondié inn faire kitsoz. Zot pensé ki lerla, li pli facile pou bann dimoune croire seki la Bible raconté. Li vrai ki bann evenement naturel parfois finn ena enn lien avek certain mirak, couma par exemple, bann tremblement de terre, bann l’epidemie, ek bann glissement terrain, mais, sa bann explication-la ena enn kitsoz en commun. Zot pa prend en consideration moment exact ki sa bann mirak-la ti arrivé, couma la Bible expliké.

Par exemple, certain finn dire ki premier plaie ki ti ena dan l’Égypte​—kot la riviere Nil ti vinn di-sang​—ti arrivé parski enn la terre rouge ti desann dan la riviere Nil ensam avek bann bacterie rouge ki appel bann flagellés. Selman, la Bible dire ki la riviere-la ti vinn di-sang, pa enn la boue rouge. Kan nou lire Exode 7:14-21 bien, nou trouvé ki sa mirak-la ti arrivé kan Aaron ti tape la riviere Nil avek so baton kan Moïse ti demann li pou faire sa. Mem si la riviere-la ti transformé par enn kitsoz naturel, sa moment precis kot Aaron ti tape la riviere-la avek so baton, sa-mem ti enn mirak!

Moment ki enn mirak arrivé ena so l’importance. Enn lot l’exemple montré sa, c’est kan nation Israël ti pré pou rente dan la Terre promise. Zot chemin ti bloké par la riviere Jourdain ki ti debordé. La Bible dire nou seki ti arrivé apré: “Kan bann ki ti pé sarié l’Arche ti arrive pré kot Jourdain, ek bann pretre ki ti pé sarié l’Arche ti mette zot lipié dan de l’eau . . . , lerla bann de l’eau ki ti sorti dan la montée, ti arrete en place. Zot ti monté pou vinn enn la digue, bien loin ziska Adam.” (Josué 3:15, 16) Eski sa ti arrivé a cause enn tremblement de terre ou-soit enn glissement terrain? La Bible pa dire nanyé lor la. Mais moment ki sa ti arrivé, ti enn mirak. Sa ti arrivé exactement dan moment ki Jéhovah ti annoncé.​—Josué 3:7, 8, 13.

Alors, eski ena bann mirak? Dapré la Bible, oui. La Bible dire ki c’est pa zis bann l’evenement naturel. En realité, eski li logik pou dire ki li impossible pou bann mirak arrivé zis parski zot pa arrivé toulé-jour?

[Note]