Eski ou kapav croire dan bann mirak ki’nn ecrire dan la Bible?
SI ENN dimoune raconte ou enn zistoire extraordinaire, eski ou pou croire li? Tou depann si ou kapav croire sa dimoune-la ek si ou faire li confiance. Sa pa pou depann zis lor fason ki li raconte ou sa zistoire-la, mais aussi si li habitué dire ou la verité ou-soit non. Apré tou, si pendant plusieurs l’année, li finn habitué dire ou la verité ek jamais li pa finn koz menti ar ou, ou pou ena bann bon raison pou croire seki li pé raconté asterla.
Li pareil aussi pou bann mirak ki la Bible raconté. Personne parmi nou pa ti la kan sa bann l’evenement-la ti arrivé. Mais couma nou kapav koné si bann recit ki ena dan la Bible zot vrai ek si sa livre-la finn touletan dire la verité? Anou examine bann lezot raison ki permette nou pou croire dan bann mirak ki la Bible raconté:
Beaucoup mirak ti arrivé en publik. Parfois, c’est plusieurs millier dimoune ki ti trouve sa bann mirak-la, sinon plusieurs million. (Exode 14:21-31; 19:16-19) Sa bann mirak-la pa ti arrivé en secret, sans ki publik trouvé.
Bann mirak ti simple. Pa ti ena bann decor special, ou-soit bann manifestation extravagant, bann l’effet speciaux ek bann trik. La plupart mirak ki’nn ecrire dan la Bible finn arrivé sans okenn preparation a l’avance ek aussi ti ena bann mirak kan bann dimoune ti demandé pou faire kitsoz pou zot. (Marc 5:25-29; Luc 7:11-16) Dan sa bann cas-la, sa dimoune ki ti faire sa bann mirak-la pa ti’nn kapav fini prepare sa bann l’evenement-la avant.
Bann dimoune ki ti faire bann mirak pa ti faire sa pou vinn populaire, ni pou gagne la gloire ek richesse. Au contraire, zot ti faire sa pou donne la gloire Bondié. (Jean 11:1-4, 15, 40) Bondié ti condamne bann dimoune ki ti rod vinn riche grace a bann mirak.—2 Rois 5:15, 16, 20, 25-27; Actes 8:18-23.
Different qualité mirak ki ena dan la Bible montré ki zot pa ti kapav arrivé zis par pouvoir bann dimoune. Par exemple, la mer ek di-vent ti calmé, ti change de l’eau en di-vin, la pluie ti arrete tombé, la pluie ti ré-commence tombé, bann dimoune malade ti gueri, bann aveugle ti ré-trouve clair. Tou sa bann mirak-la ek beaucoup lezot encore, montré ki enn pouvoir surnaturel ki ena enn l’effet lor tou sorte qualité kitsoz, ti bizin derriere sa bann mirak-la.—1 Rois 17:1-7; 18:41-45; Matthieu 8:24-27; Luc 17:11-19; Jean 2:1-11; 9:1-7.
Mem bann opposant pa ti contesté bann mirak ki zot ti trouvé. Kan Jésus ti ressuscite so camarade Lazare, bann chef religieux, ki ti so bann l’ennemi, pa ti contesté ki Lazare ti’nn mort. Couma eski zot ti pou kapav faire sa? Lazare ti’nn enterré depuis quatre jour. (Jean 11:45-48; 12:9-11) Mem bann siecle apré la mort Jésus, bann ecrivain Talmud, bann Juif, ti contigne reconette ki Jésus ti ena pouvoir pou faire bann mirak. Zot ti zis demann-zot-mem kot-sa li ti gagne sa pouvoir-la. Li pareil aussi kan ti amenn bann disciple Jésus devant enn la cour juif, pa ti demann zot: “Eski zot ti faire enn mirak?” Mais ti demann zot: “Par ki pouvoir ou-soit lor nom kisannla zot ti faire sa?”—Actes 4:1-13.
Alors, eski ou kapav croire seki la Bible dire lor bann mirak? Kan nou reflechi lor seki nou’nn fek examiné, li clair ki nou kapav croire bann mirak ki ena dan la Bible. Ena lezot raison kifer nou kapav faire confiance sa bann recit-la. Par exemple, kan la Bible raconte enn l’evenement, souvent li mentionne lepok, place, ek nom bann dimoune ki impliké. Mem bann dimoune ki critik la Bible bien etonné kan zot trouvé ki la Bible donne bann detail exact lor seki finn arrivé dan le passé. Plusieurs centaine prophetie ki mentionné dan la Bible finn realisé, mem dan bann pli tipti detail. En plus, dan la Bible ena beaucoup conseil ki montré couma bann dimoune kapav ena bann bon relation entre zot—bann conseil ki’nn aide bann dimoune different l’age ek rang social. Pena okenn livre ki donne pli bon conseil ki la Bible concernant bann relation entre bann dimoune.
Si ou pankor ena enn grand confiance dan la Bible, kifer ou pa prend le temps pou examine li pli bien? Plus ou konn la Bible, plus ou pou ena confiance en li. (Jean 17:17) Ou pou realisé ki ou kapav faire li confiance kan li koz lor bann mirak ki ti ena dan le passé. Enn fois ki ou croire dan sa bann recit-la, ou pou ena enn bon raison pou ena confiance lor seki la Bible dire pou arrivé dan l’avenir.
[Zimage page 5]
Bann ki ti opposé ar Jésus pa ti contesté ki Lazare ti’nn mort