Faire attention ar bann piege Satan le Diable!

“Sorti dan piege Diable.”​—2 TIM. 2:26.

COUMA OU POU REPONN?

Ki analyse personnel nou bizin faire si nou ena tendance pou critik lezot touletan?

Ki nou aprann ar l’exemple Pilate ek Pierre lor fason ki fodé pa nou cedé devant la crainte ek pression lezot?

Couma ou kapav evite senti-ou trop coupable?

1, 2. Ki bann piege Satan nou pou examiné dan sa lartik-la?

SATAN LE DIABLE pé la chasse bann serviteur Jéhovah. So l’objectif c’est pa pou touye zot, pareil couma enn grand chasseur ki touye bann zanimo. Mais plutot, so l’objectif principal c’est pou maye enn dimoune vivant, ek faire seki li envie avek li.​—Lire 2 Timothée 2:24-26.

² Pou maye enn zanimo vivant, enn chasseur kapav servi different qualité piege. Li kapav essaye faire zanimo-la sorti dan place ki li pé cachiette ek servi enn la corde pou maye li. Ou-soit li kapav servi enn la trappe ki li’nn cachiette ek attrape enn zanimo par surprise. Satan le Diable servi aussi bann piege pou maye bann serviteur Bondié vivant. Si nou envie evité tombe dan so piege, nou bizin reste lor nou garde ek prend compte bann l’avertissement ki faire nou koné ki ena enn piege Satan ki pa loin. Sa lartik-la mette nou en garde kont trois piege ki le Diable finn servi pou maye certain serviteur Bondié. Sa bann piege-la c’est: (1) bann parole negatif ki nou pa controlé, (2) la peur ek pression, ek (3) enn sentiment ki nou trop coupable. Dan prochain lartik nou pou examine deux lezot piege Satan.

TEIGNE DIFÉ KI BANN PAROLE NEGATIF KAPAV METTÉ

3, 4. Ki kapav arrivé kan nou pa controle nou la langue? Donne enn l’exemple.

³ Pou faire bann zanimo sorti dan bann place kot zot cachiette, enn chasseur kapav mette difé dan enn partie sa l’endroit-la, ek lerla li maye bann zanimo-la kan zot pé essaye sauvé. Dan enn sens symbolik, Satan le Diable ti pou content mette difé dan congregation. Si li reussi, li pou kapav faire bann membre congregation quitte sa bann place kot zot en securité-la, ek al direct dan so filet. Couma nou kapav aide li sans ki nou realisé, ek lerla rente dan so piege?

⁴ Disciple Jacques ti compare la langue avek enn difé. (Lire Jacques 3:6-8.) Si nou pa controle nou la langue, nou kapav allume enn difé symbolik dan congregation. Couma sa kapav arrivé? Guette sa l’exemple-la: pendant enn reunion dan congregation, inn faire enn l’annonce ki enn certain soeur inn nommé pionnier permanent. Apré reunion, deux soeur pé discute lor sa l’annonce-la. Enn-la dire ki li bien content ek li souhaité ki sa nouveau pionnier-la pou reussi dan so service. Lot soeur-la li, li mette en doute mobile sa nouveau pionnier-la ek pensé ki li pé faire pionnier pou gagne grandeur dan congregation. Entre sa deux soeur-la, ar lekel ou ti pou content faire camarade? Li pa difficile pou trouvé kisannla entre zot deux riské mette difé dan congregation par so bann parole.

5. Pou teigne sa difé ki bann parole negatif kapav metté dan congregation-la, ki analyse personnel nou bizin faire?

⁵ Couma nou kapav teigne difé ki bann parole negatif kapav metté dan congregation? Jésus ti dire: “Seki nou ena en abondance dan nou leker, sa-mem ki nou la bouche dire.” (Mat. 12:34) Alors, premier pas ki nou bizin faire, c’est examine nou prop leker. Eski nou evite ena bann sentiment ki pou faire nou dire bann kitsoz ki pou blesse lezot? Par exemple, kan nou tann dire ki enn frere pé faire zeffort pou gagne enn privilege, eski nou pensé ki li pé faire sa avek bann bon mobile? Ou-soit eski nou ena bann doute ki li pé agir dan enn fason egoïste? Si nou ena enn tendance pou ena enn mauvais l’opinion lor lezot, li bon ki nou rappel ki Satan ti mette en doute bann mobile Job, enn serviteur fidele Bondié. (Job 1:9-11) Au lieu ki nou ena doute lor nou frere, li ti pou pli bon ki nou demann-nou-mem kifer nou pé critik li. Eski nou ena vrai-mem enn bon raison pou agir coumsa? Ou-soit eski nou leker finn empoisonné par sa l’attitude egoïste ki bien populaire dan sa bann dernier jour-la?​—2 Tim. 3:1-4.

6, 7. (a) Ki bann raison kitfois pousse nou pou critik lezot? (b) Couma nou bizin reagir si dimoune insulté nou?

⁶ Reflechi lor lezot raison ki kitfois pousse nou pou critik lezot. Li possible ki nou envie impressionne bann dimoune par seki nou pé faire. Kan nou critik lezot, kitfois nou pé essaye montré ki nou pli bon ki tou dimoune. Ou-soit nou rod bann excuse pou nou pa faire seki nou ti bizin faire. Si nou ena l’orgueil, nou jaloux, ou-soit nou pena confiance en nou-mem, so consequence pou bien grave.

⁷ Kitfois nou pensé ki nou ena bann bon raison pou critik enn dimoune. Li possible ki nou finn blessé par seki sa dimoune-la inn dire lor nou. Dan sa cas-la, rann la pareil pa pou enn bon reaction. Si nou faire sa, coumadir nou pé jette de l’huile lor difé ek nou pou agir dan fason ki Satan envie, ek pa dapré seki Bondié envie. (2 Tim. 2:26) Nou bizin plutot imite Jésus. Kan dimoune ti insulté li, “li pa ti insulté zot pareil.” Au contraire, “li ti contigne mette tou dan la main celui ki juge avek justice.” (1 Pierre 2:21-23) Jésus ti ena confiance ki Jéhovah ti pou occupe sa situation-la dan fason ek dan ler ki Li envie. Nou bizin ena mem confiance dan Bondié. Kan nou dire bann kitsoz ki pou encourage lezot, sa aide nou pou preserve ‘la paix ki soude nou ensam’ dan congregation.​—Lire Éphésiens 4:1-3.

PA LAISSE LA PEUR EK PRESSION VINN ENN PIEGE POU OU

8, 9. Kifer Pilate ti condamne Jésus?

⁸ Enn zanimo ki’nn tombe dan enn piege, pa kapav bougé. Li pareil aussi pou enn dimoune ki cedé devant la peur ek pression, li perdi enn certain controle lor so la vie. (Lire Proverbes 29:25.) Anou prend l’exemple deux zom ki ti bien different ek ki ti cedé devant pression ek la peur. Ek anou guetté ki nou kapav aprann ar zot l’experience.

⁹ Gouverneur romain Ponce Pilate ti koné ki Jésus ti innocent ek li parette ki li pa ti envie faire Jésus okenn di-tort. En realité, Pilate ti dire ki Jésus pa ti faire “nanyé ki merite la mort.” Pourtant, Pilate ti condamne Jésus a mort. Kifer? Parski Pilate ti cedé devant pression la foule. (Luc 23:15, 21-25) Bann l’ennemi Jésus ti criyé: “Si to largue sa zom-la, to pa enn camarade César.” C’est coumsa ki zot ti mette pression lor Pilate pou gagne seki zot ti envie. (Jean 19:12) Kitfois, Pilate ti peur pangar li perdi so position, ou-soit-mem so la vie, si li ti prend part Jésus. Alors, li ti cedé ek li ti faire seki Satan le Diable ti envie.

10. Ki ti pousse Pierre pou dire ki li pa ti konn Jésus?

¹⁰ L’apotre Pierre ti enn parmi bann camarade ki ti pli proche ar Jésus. Li ti dire en publik ki Jésus ti le Messie. (Mat. 16:16) Pierre ti reste fidele mem kan lezot disciple pa ti comprend seki Jésus ti dire ek kan zot ti abandonne Li. (Jean 6:66-69) Ek kan bann l’ennemi ti vinn arrete Jésus, Pierre ti servi enn l’epée pou defann so Maitre. (Jean 18:10, 11) Selman plitar, Pierre ti cedé parski li ti peur, ek li ti mem dire ki li pa ti konn Jésus Christ. Kan nou peur dimoune, sa li couma enn piege, ek pendant enn ti moment, Pierre ti tombe dan sa piege-la. Sa ti empeche li montré so courage ek faire seki bon.​—Mat. 26:74, 75.

11. Kont ki qualité mauvais l’influence kitfois nou bizin resisté?

¹¹ En tant ki chretien, nou bizin resisté ar pression pou faire bann kitsoz ki Bondié pa content. Li possible ki nou patron ou-soit lezot dimoune essaye oblige nou pou montré-nou malhonnete ou-soit influence nou pou commette l’immoralité sexuel. Kitfois bann ki al lekol bizin faire face ar zot bann camarade ki essaye mette pression lor zot pou triké ek goré dan bann l’examen, pou guette pornographie, pou fumé, pou prend la drogue, pou boire ziska sou ou-soit pou commette l’immoralité sexuel. Alors, ki kapav aide nou pou pa laisse la peur ek bann pression vinn enn piege pou nou ek faire seki Jéhovah pa content?

12. Ki bann leson nou kapav aprann ar l’exemple Pilate ek Pierre?

¹² Anou guetté seki nou kapav aprann ar l’exemple Pilate ek Pierre. Pilate pa ti ena enn grand connaissance lor Jésus Christ. Mais kan-mem, li ti koné ki Jésus ti innocent ek li pa ti enn zom ordinaire. Mais Pilate pa ti ena l’humilité ek l’amour pou vrai Bondié. Li ti bien facile pou Satan le Diable maye Pilate vivant dan so piege ek faire li faire seki li ti envie. Pierre li, li ti ena enn connaissance exact ek l’amour pou Bondié, toulé-deux. Mais parfois, li pa ti reconette so bann limite, li ti peur ek li ti cedé devant pression. Avant ki bann l’ennemi ti vinn arrete Jésus, Pierre ti faire vantard ek li ti dire: “Mem si tou lezot tombé, mais moi, mo pa pou tombé.” (Marc 14:29) Si Pierre ti mette so confiance en Bondié, pareil couma enn psalmiste ti faire, li ti pou pli bien preparé pou traverse bann l’epreuve ki ti devant li. Sa psalmiste-la ti chanté: “Jéhovah avek moi; mo pa pou peur. Ki enn dimoune ki’nn faire ar la poussiere kapav faire moi?” (Ps. 118:6) Dernier la nuit ki Jésus ti passé lor la terre, li ti prend Pierre ek deux lezot zapotre avek li pou al pli loin dan jardin Gethsémané. Mais au lieu ki zot ti veillé, Pierre ek so bann compagnon ti gagne sommeil. Jésus ti leve zot ek ti dire zot: “Contigne veillé ek prié, pou ki zot pa tombe dan tentation.” (Marc 14:38) Mais Pierre ti ré-gagne sommeil ek plitar li ti cedé devant la peur ek pression.

13. Couma nou kapav resisté kont bann pression pou faire seki mauvais?

¹³ L’exemple Pilate ek Pierre kapav enseigne nou enn lot leson bien important: pou nou kapav resisté kont bann pression, nou bizin enn connaissance exact, l’humilité, reconette nou limite, ena l’amour pou Bondié, ek la crainte pou Jéhovah, pa pou bann zom. Si nou la foi basé lor enn connaissance exact, nou pou koz avek courage ek l’assurance lor nou bann croyance. Sa pou aide nou pou resisté kont bann pression ek pa cedé devant la peur bann zom. Bien sur, fodé jamais nou pensé ki nou pli fort ki seki nou été vrai-mem. Au contraire, avek humilité, nou bizin reconette ki nou bizin la force Bondié pou nou kapav resisté kont bann pression. Nou bizin prié pou gagne l’esprit saint Jéhovah, ek laisse l’amour ki nou ena pou Li pousse nou pou obeir so bann principe ek pa faire nanyé ki pou sali so nom. En plus, nou bizin prepare-nou pou faire face ar bann pression avant ki nou passe par enn l’epreuve. Par exemple, si nou prepare nou bann zenfant bien en avance ek nou prié avek zot, sa kapav aide zot pou koné couma pou reponn kan zot bann camarade mette pression lor zot pou faire seki mauvais.​—2 Cor. 13:7.a

EVITE PIEGE POU SENTI-OU TROP COUPABLE

14. Ki Satan envie nou pensé lor bann erreur ki nou finn faire dan le passé?

¹⁴ Parfois certain faire enn piege avek tronc enn pié bien lourd ou-soit avek enn roche. Zot mette li apendan avek enn la corde dan l’endroit kot souvent bann zanimo passé, ek dan lot boute la corde-la, zot faire enn lak. Enn zanimo ki pa faire attention kapav maye dan sa lak-la ek lerla roche-la ou-soit sa tronc-la tombe lor li ek crase-li. Kan nou senti-nou trop coupable, c’est coumadir enn tronc ou-soit enn roche ki pé crase nou. Kan nou pense lor enn erreur ki nou finn faire dan le passé, kitfois nou senti-nou “crasé ziska dernier degré.” (Lire Psaume 38:3-5, 8.) Satan pou bien content si nou pensé ki nou pa digne pou gagne pardon Jéhovah ek ki nou pa kapav faire seki Jéhovah demann nou.

15, 16. Couma ou kapav evite piege pou senti-ou trop coupable?

¹⁵ Couma ou kapav evite sa piege ki crase ou-la? Si ou finn faire enn peché grave, desuite, faire tou seki ou kapav pou retabli ou l’amitié avek Jéhovah. Al guette bann ancien, ek demann zot l’aide. (Jacq. 5:14-16) Faire seki ou kapav pou repare di-tort ki ou finn faire. (2 Cor. 7:11) Si ou gagne enn discipline, pa decouragé. Discipline, c’est enn preuve ki Jéhovah content ou. (Héb. 12:6) Ou bizin bien decidé pou pa refaire sa peché-la encore, ek rejette tou bann kitsoz ki finn amenn ou commette sa peché-la. Apré ki ou finn repenti ek ki ou finn rejette sa peché-la, ou bizin ena la foi dan sacrifice Jésus Christ ki kapav vrai-mem couvert ou bann peché.​—1 Jean 4:9, 14.

¹⁶ Certain contigne senti-zot coupable mem si Jéhovah inn pardonne zot peché. Si ou ena sa sentiment-la, alors rappel ki Jéhovah ti pardonne Pierre ek lezot zapotre mem si zot ti abandonne So garson, Jésus, dan enn moment kot li ti bien bizin zot. Jéhovah ti pardonne enn zom dan congregation Corinthe ki ti exclu a cause li ti commette l’immoralité, mais ki apré ti repenti. (1 Cor. 5:1-5; 2 Cor. 2:6-8) Parole Bondié koz lor bann dimoune ki ti faire bann peché grave mais Bondié ti pardonne zot parski zot ti repenti.​—2 Chron. 33:2, 10-13; 1 Cor. 6:9-11.

17. Ki la ranson kapav faire pou nou?

¹⁷ Jéhovah pou pardonne ek pou blié bann erreur ki ou finn faire, si ou vrai-mem repenti ek croire ki Li pardonne bann peché. Fodé jamais ou pensé ki sacrifice Jésus pa kapav couvert ou bann peché. Si ou pense coumsa, ou pou tombe dan piege Satan. N’importe ki Satan envie faire ou croire, la ranson kapav couvert peché tou bann dimoune ki repenti. (Prov. 24:16) Si ou senti-ou trop coupable, sa kapav vinn couma enn poids lor ou zepaule. La foi dan la ranson kapav tire sa poids-la ek donne ou la force pou servi Jéhovah avek tou ou leker, ou l’esprit, ek ou nâme.​—Mat. 22:37.

NOU KONN BIEN BANN L’INTENTION SATAN

18. Couma nou kapav evite bann piege Satan?

¹⁸ Satan pa casse la tête dan ki piege nou tombé, pourvi ki li gagne nou. Mais nou kapav evite tombe dan so bann piege parski nou konn bien so bann l’intention. (2 Cor. 2:10, 11) Nou pa pou tombe dan so bann piege, si nou prié pou gagne la sagesse pou faire face ar nou bann l’epreuve. Jacques ti ecrire: “Si kikenn parmi zot mank sagesse, laisse li contigne demann Bondié, parski Bondié content pou donne tou dimoune, sans faire okenn reproche; ek li pou gagné.” (Jacq. 1:5) Si nou envie ki Bondié donne nou la sagesse, nou bizin ena enn l’etude personnel regulier ek suive bann principe la Bible. Bann publication biblik ki l’esclave fidele et avisé donne nou, faire nou koné ki bann piege Satan servi ek aide nou pou evite zot.

19, 20. Kifer nou bizin haïr seki mauvais?

¹⁹ La priere ek l’etude la Bible aide nou pou content seki bon. Mais li important aussi ki nou aprann ena la haine pou seki mauvais. (Ps. 97:10) Kan nou reflechi lor bann consequence ki nou gagné kan nou rod nou bann desir egoïste, sa kapav aide nou pou evite bann probleme. (Jacq. 1:14, 15) Kan nou aprann pou haïr seki mauvais ek pou vrai-mem content seki bon, seki Satan servi dan so piege pou tente nou, pa pou attire nou.

²⁰ Nou vrai-mem reconnaissant ki Bondié aide nou pou nou pa tombe dan piege Satan! Par moyen So l’esprit, So Parole ek So l’organisation, Jéhovah delivré nou “ar sa kikenn ki mauvais-la.” (Mat. 6:13) Dan prochain lartik, nou pou guetté couma nou kapav evite deux lezot piege ki Satan servi dan enn fason efficace pou maye bann serviteur Bondié, vivant.

[Note]

[Zimage page 24]

Nou kapav mette difé dan congregation si nou pa controle seki nou dire

[Zimage page 27]

Ou kapav tire sa poids ki ou trop coupable-la lor ou