Obeir Bondié ek gagne bann bienfait ar so bann serment

1. Ki difference ena entre seki Jéhovah promette ek seki bann dimoune imparfait promette?

JÉHOVAH enn “Bondié la verité.” (Ps. 31:5) Pa kapav touletan faire confiance bann dimoune imparfait. Par kont “li impossible pou Bondié koz menti.” (Héb. 6:18; lire Nombres 23:19.) Bondié touletan realise seki Li promette pou faire pou l’humanité. Par exemple, tou seki Bondié ti dire Li pou faire dan commencement chaque periode creation, tou sa “ti arrivé.” A cause sa, a la fin sixieme jour creation, “Bondié ti trouve tou seki Li ti faire, ek guetté, tou ti bien bon.”​—Gen. 1:6, 7, 30, 31.

2. Ki été jour repos Bondié, ek kifer Li’nn ‘faire sa jour-la vinn sacré’?

² Apré ki Jéhovah ti examine bann kitsoz ki Li ti crée, Li ti annonce commencement enn septieme jour​—pa enn jour 24 heure, mais enn longue periode le temps kot Jéhovah ti reposé en rapport avek creation bann kitsoz lor la terre. (Gen. 2:2) Jour repos Bondié pankor fini. (Héb. 4:9, 10) La Bible pa dire exactement kan sa jour-la ti commencé. Kitfois, sa ti arrivé enn tipé apré creation Ève, femme Adam, ena apepré 6,000 an. Seki pé attann nou dan l’avenir c’est Regne mille an Jésus Christ ki pou garanti realisation projet ki Bondié ti ena kan Li ti crée la terre. Bondié ti envie ki la terre vinn enn paradis rempli avek bann dimoune parfait. (Gen. 1:27, 28; Rév. 20:6) Eski ou kapav sur ki ou pou ena enn l’avenir heureux coumsa? Oui, ou kapav sur! Parski “Bondié ti beni septieme jour ek ti faire li vinn sacré.” Sa ti enn garantie ki n’importe ki probleme ki kapav arrivé, pena doute ki Bondié pou realise so projet a la fin so jour repos.​—Gen. 2:3.

3. (a) Apré ki jour repos Bondié ti’nn commencé, ki rebellion ti ena? (b) Ki Jéhovah ti dire pou montré so l’intention pou tire sa rebellion-la?

³ Mais, apré ki jour repos Bondié ti commencé, enn grand malheur ti arrivé. Satan, ki ti enn ange dan le ciel, ti envie gagne l’adoration pareil couma Bondié. Li-mem ki ti koz menti premier fois ek ti embete Ève pou li desobeir Bondié. (1 Tim. 2:14) Apré sa, Ève ti gagne so mari ensam avek li dan sa rebellion-la. (Gen. 3:1-6) Mem kan Satan ti rebellé ek ti pretann ki Bondié pa dire la verité, Jéhovah pa ti trouve necessaire pou faire enn serment pou confirme so projet concernant la terre. Au contraire, par bann parole ki bann dimoune ti pou comprend plitar, Bondié ti zis dire couma sa rebellion-la pou fini: “Mo pou mette la haine entre toi [Satan] ek la femme ek entre to descendance ek so descendance. Li [Descendance ki Bondié promette] pou crase to la tête ek to pou blesse so talon.”​—Gen. 3:15; Rév. 12:9.

SERMENT​—ENN MOYEN LEGAL

4, 5. Ki moyen legal parfois Abraham ti servi?

⁴ Bien boner dan l’histoire l’humanité, surement li pa ti necessaire pou faire serment. Bann creature parfait ki content Bondié ek ki imite Li, pa bizin faire serment; zot touletan dire la verité ek ena confiance sakenn dan so camarade. Mais bann kitsoz finn changé kan peché ek l’imperfection finn rente dan le monde. Avek le temps, kan bann dimoune inn commence koz menti ek embete zot camarade, li ti necessaire pou faire bann serment pou confirmé ki enn kitsoz vrai.

⁵ Abraham ti servi bann serment couma enn moyen legal dan au moins trois different l’occasion. (Gen. 21:22-24; 24:2-4, 9) Par exemple, sa ti arrivé apré ki li ti gagne la victoire lor le roi Élam ek bann lezot le roi ki ti avek li. Le roi Salem ek le roi Sodome ti vinn zwenn Abraham. Melkisédec, le roi Salem ti aussi “pretre Pli Grand Bondié.” En tant ki pretre, li ti beni Abraham ek li ti loué Bondié pou victoire ki Li ti faire Abraham gagné. (Gen. 14:17-20) Apré, kan le roi Sodome ti envie recompense Abraham parski li ti sauve peuple sa le roi-la kan bann l’armée ti attak zot, Abraham ti faire serment: “Mo leve mo la main la-haut pou faire serment ar Jéhovah Pli Grand Bondié ki’nn crée le ciel ek la terre, ki, depuis enn di-fil ziska enn lasé sandalette, non, mo pa pou prend nanyé dan tou seki to ena, pou ki to pa dire: ‘C’est moi ki finn faire Abram vinn riche.’”​—Gen. 14:21-23.

SERMENT KI JÉHOVAH TI FAIRE AVEK ABRAHAM

6. (a) Ki l’exemple Abraham inn donne nou? (b) Couma nou pou gagne bann bienfait grace a l’obeissance Abraham?

⁶ Jéhovah ti aussi faire bann serment pou ki bann dimoune imparfait gagne bann bienfait. Li ti servi bann expression couma: “‘Aussi vrai ki mo vivant,’ c’est seki Souverain Seigneur Jéhovah dire.” (Ézék. 17:16) Dan la Bible, ena plus ki 40 different l’occasion kot Jéhovah ti faire bann serment. Kitfois, l’exemple ki nou pli koné c’est avek Abraham. Pendant plusieurs l’année, Jéhovah ti faire different promesse ki ti ena enn lien avek l’alliance ki Li ti faire avek Abraham. Tou sa bann promesse-la ensam montré ki Descendance ki Jéhovah ti promette, ti pou enn descendant Abraham, par so garson Isaac. (Gen. 12:1-3, 7; 13:14-17; 15:5, 18; 21:12) Apré sa, Jéhovah ti faire Abraham passe par enn test bien difficile, Li ti donne li l’ordre pou offert so garson ki li ti bien content en sacrifice. Sans hesité, Abraham ti obeir Jéhovah ek li ti pé al sacrifié Isaac kan enn ange ti arrete li. Lerla, Bondié ti faire sa serment-la: “Oui, mo faire serment lor mo-mem, . . . ki, parski to’nn faire sa kitsoz-la ek ki to pa finn refuse pou donne moi to garson, to sel garson, vrai-mem mo pou beni toi ek vrai-mem mo pou faire to descendance vinn beaucoup, pareil couma bann zetoile ki dan le ciel ek couma bann la grain di-sable ki dan bord la mer. Ek par moyen to descendance, tou bann nation lor la terre pou vrai-mem attire benediction lor zot, parski to finn ecoute seki mo’nn dire toi.”​—Gen. 22:1-3, 9-12, 15-18.

7, 8. (a) Pou ki raison Bondié ti faire serment avek Abraham? (b) Couma bann “lezot brebis” pou gagne bann bienfait ar serment ki Bondié ti faire avek Abraham?

⁷ Kifer Bondié ti faire serment avek Abraham ki So bann promesse pou realisé? C’est pou encourage ek pou fortifié la foi bann ki ti pou vinn coheritier avek Christ, ki ti pou forme partie secondaire sa “descendance” ki Bondié ti promette-la. (Lire Hébreux 6:13-18; Gal. 3:29) Pareil couma l’apotre Paul ti expliké, Jéhovah ti “agir par enn serment pou ki, par deux kitsoz ki pa kapav changé [so promesse ek so serment], ek kot li impossible pou Bondié koz menti, nou . . . kapav gagne enn grand l’encouragement pou tini bien ferme l’esperance ki finn mette devant nou.”

⁸ Pa zis bann chretien oint ki gagne bann bienfait ar serment ki Bondié ti faire avek Abraham. Grace a “descendance” Abraham, Jéhovah ti faire serment ki bann dimoune dan “tou bann nation lor la terre [ti] pou . . . attire benediction lor zot.” (Gen. 22:18) Parmi sa bann dimoune-la, ena bann membre “lezot brebis” ki obeir Christ ek ki ena l’esperance pou vive pou touletan dan Paradis lor la terre. (Jean 10:16) Ki ou ena l’esperance pou vive dan le ciel ou-soit lor la terre, “tini bien ferme” sa l’esperance-la ek en mem temps, contigne amenn enn la vie ki montré ou l’obeissance pou Bondié.​—Lire Hébreux 6:11, 12.

BANN LEZOT SERMENT

9. Ki serment Jéhovah ti faire pendant ki bann descendant Abraham ti esclave en Égypte?

⁹ Plusieurs siecle apré, encore enn fois, Jéhovah ti faire serment ki Li pou tini bann promesse ki Li ti faire avek Abraham, couma nou ti examiné avant. Sa ti arrivé kan Li ti envoye Moïse pou koz avek bann descendant Abraham, ki ti esclave en Égypte. (Ex. 6:6-8) Concernant sa l’occasion-la, Bondié ti dire: “Jour kot mo ti choisir Israël, . . . mo ti leve mo la main, mo ti faire enn serment ar zot ki mo pou faire zot sorti dan pays l’Égypte pou al dan enn pays ki mo finn rodé pou zot, enn pays kot di-lait ek di-miel coulé.”​—Ézék. 20:5, 6.

10. Ki promesse Bondié ti faire avek Israël apré ki Li ti delivré zot dan l’Égypte?

¹⁰ Apré sa, kan Israël ti delivré en Égypte, Jéhovah ti faire enn lot serment ar zot: “Si zot obeir tou seki mo dire zot, ek zot garde mo l’alliance, lerla vrai-mem zot pou vinn mo di-bien special parmi tou bann lezot peuple, parski la terre entier pou moi. Ek zot, zot pou vinn enn royaume bann pretre ek enn nation saint pou moi.” (Ex. 19:5, 6) Bondié ti donne nation Israël enn grand privilege, pa vrai? Sa vedir ki si zot ti obeir Jéhovah, bann membre sa nation-la ti pou kapav vinn enn royaume bann pretre pou Bondié, pou beni le reste l’humanité. Plitar, Jéhovah ti expliké seki Li ti faire pou sa nation-la, Li ti dire: “Mo ti faire enn serment avek toi ek mo ti faire enn l’alliance avek toi.”​—Ézék. 16:8.

11. Ki reaction bann Israélite ti ena kan Bondié ti invite zot pou rente dan enn l’alliance avek Li?

¹¹ Sa lepok-la, Jéhovah pa ti oblige bann Israélite pou faire serment pou obeir Li, ni Li ti force zot pou ena bann relation special avek Li. Au contraire, par zot-mem zot ti dire: “Nou d’accord pou faire tou seki Jéhovah inn dire.” (Ex. 19:8) Trois jour apré, Jéhovah ti faire nation Israël konn bann condition ki zot ti bizin rempli en tant ki so nation. D’abord, zot ti ecoute Dix Commandement, ek apré, Moïse ti faire zot konn lezot commandement ki nou trouve dan Exode 20:22 ziska Exode 23:33. Ki reaction bann Israélite ti ena kan zot ti tann sa bann commandement-la? “Le peuple en entier ti reponn avek enn sel la voix ek ti dire: ‘Nou disposé pou faire tou bann parole ki Jéhovah inn dire.’” (Ex. 24:3) Apré sa, Moïse ti ecrire sa bann la loi-la dan “livre l’alliance” ek ti lire sa fort pou ki tou le peuple kapav tann sa encore. Apré sa, pou enn troisieme fois, le peuple ti faire sa promesse-la: “Tou seki Jéhovah inn dire, nou disposé pou faire ek pou obeir.”​—Ex. 24:4, 7, 8.

12. Couma Jéhovah ek bann Israélite ti reagir apré ki finn ena enn l’alliance entre zot?

¹² Jéhovah desuite ti commence faire so part en rapport avek l’alliance ki Li ti faire avek bann Israélite. Li ti prend bann disposition pou ena enn tabernacle kot zot ti pou adore Li ek Li ti etabli bann pretre ki ti pou aide zot, bann dimoune imparfait, pou approche Li. Mais bann Israélite zot, bien vite zot ti blié promesse ki zot ti faire pou servi Jéhovah ek zot “ti faire Saint Israël la peine.” (Ps. 78:41) Par exemple, pendant ki Moïse ti pé gagne bann lezot instruction ar Jéhovah lor montagne Sinaï, bann Israélite ti perdi patience ek ti commence perdi la foi en Bondié. Zot ti pensé ki Moïse ti’nn abandonne zot. Alors, zot ti faire statue enn veau en or, ek ti dire le peuple: “Sa-mem to Bondié, o Israël, ki finn tire toi dan pays l’Égypte.” (Ex. 32:1, 4) Lerla, zot ti faire seki zot ti appel “enn fête pou Jéhovah” ek zot ti prosterne devant sa statue-la ek ti faire bann sacrifice pou li. Kan Jéhovah ti trouve sa, Li ti dire Moïse: “Zot finn detourne bien vite ar chemin ki mo ti donne zot l’ordre pou suive.” (Ex. 32:5, 6, 8) Malheureusement, depuis sa lepok-la, sa ti vinn enn l’habitude pou nation Israël faire bann promesse ar Bondié, mais ki apré zot pa ti respecté.​—Nomb. 30:2.

ENCORE DEUX LEZOT SERMENT

13. Ki serment Bondié ti faire le roi David, ek ki rapport sa ena avek Descendance ki Bondié ti promette?

¹³ Kan le roi David ti regné, Jéhovah ti faire deux lezot serment ki ti faire tou bann dimoune ki obeir Li gagne bann bienfait. Premierement, Li ti faire serment ar David ki so bann descendant ti pou regné pou touletan. (Ps. 89:35, 36; 132:11, 12) Sa vedir ki Descendance ki Bondié ti promette, ti pou appel “Garson David.” (Mat. 1:1; 21:9) Avek humilité, David ti appel sa Descendance-la so “Seigneur” parski Christ ti pou ena enn pli grand position ki li.​—Mat. 22:42-44.

14. Ki serment Jéhovah ti faire concernant Descendance ki Li ti promette, ek ki bienfait nou gagné grace a sa serment-la?

¹⁴ Deuxiemement, Jéhovah ti inspire David pou annoncé ki sa Descendance-la pa ti pou zis enn le Roi, mais li ti pou servi aussi couma enn Grand Pretre pou l’humanité. En Israël, travail enn le roi ek travail enn pretre ti bien different. Bann pretre ti sorti dan tribu Lévi ek bann le roi ti sorti dan tribu Juda. Mais concernant sa grand heritier ki ti pou vini-la, David ti prophetisé: “Ala seki Jéhovah dire mo Seigneur: ‘Assize dan mo coté droite ziska ki mo mette to bann l’ennemi couma enn ti banc pou to lipié.’ Jéhovah ti faire serment (ek Li pa pou regretté): ‘To enn pretre pou touletan pareil couma Melkisédec!’” (Ps. 110:1, 4) Pou realise sa prophetie-la, Jésus Christ, Descendance ki Bondié ti promette, pé regné asterla dan le ciel. Li servi aussi en tant ki Grand Pretre pou l’humanité kan li aide bann dimoune ki repenti pou ena bann relation bien proche avek Bondié.​—Lire Hébreux 7:21, 25, 26.

NOUVEAU ISRAËL BONDIÉ

15, 16. (a) Ki deux Israël la Bible mentionné, ek lekel ladan Bondié donne so benediction zordi? (b) Ki commandement Jésus ti donne so bann disciple en rapport avek bann serment?

¹⁵ Parski zot ti rejette Jésus Christ, nation Israël ti perdi so position special devant Bondié ensam avek possibilité pou vinn “enn royaume bann pretre.” Pareil couma Jésus ti dire chef juif: “Pou rasse royaume Bondié ar zot, ek pou donne sa enn nation ki pou rapporte bann fruit.” (Mat. 21:43) Sa nouveau nation-la ti commence existé jour la Pentecôte l’an 33 nou lepok, kan environ 120 disciple Jésus ki ti rassemblé dan Jérusalem, ti gagne l’esprit saint Bondié. Plitar, sa bann chretien-la ti appel “Israël Bondié” ek zot pa ti tardé pou vinn plusieurs millier. Parmi zot, ti ena bann dimoune ki ti sorti dan tou nation ki ti ena lor la terre dan sa lepok-la.​—Gal. 6:16.

¹⁶ Sa nouveau nation spirituel Bondié-la pa pareil couma nation Israël. Israël Bondié pé rapporte bann bon fruit kan li contigne obeir Bondié. Enn parmi bann commandement ki bann membre sa nation spirituel-la obeir ena enn rapport avek bann serment. Kan Jésus ti lor la terre, bann dimoune ti faire serment lor bann kitsoz ki fausse ou-soit lor bann kitsoz banal. (Mat. 23:16-22) Jésus ti dire so bann disciple: “Pa faire serment ditou . . . Ki zot Oui vedir Oui, zot Non, Non; parski seki en plus sorti kot sa kikenn ki mauvais-la.”​—Mat. 5:34, 37.

17. Ki bann question nou pou examiné dan prochain lartik l’etude?

¹⁷ Eski sa vedir ki li touletan mauvais pou faire serment? Pli important encore, ki sa impliké ki nou Oui, vedir Oui? Nou pou examine sa bann question-la dan prochain lartik l’etude. Pendant ki nou contigne medite lor Parole Bondié, anou laisse sa motive nou pou obeir Jéhovah touletan. Lerla en retour, Li pou beni nou touletan, en accord avek bann serment ki Li finn faire.