Kestion Bann Lekter

Ki Labib dir lor bann serman?

Enn serman se enn deklarasion ofisiel ouswa enn promes bien serye pou fer enn kitsoz. Bien souvan, kan bann dimounn fer enn serman, zot servi Bondie kouma zot temwin. Enn kikenn kapav fer enn serman swa an parol, swa an ekri.

Sertin dimounn panse ki li pa bon ki nou fer enn serman, parski Zezi ti dir: “Fode pa to fer enn serman. . . . Ki zot ‘Wi’ vedir wi, zot ‘Non,’ non, parski seki anplis sorti kot sa kikenn ki move la.” (Mat. 5:33-37, NW) Biensir, Zezi ti kone ki, dapre Lalwa Moiz, dan sertin sitiasion, bann Izraelit ti bizin fer bann serman, ek ki bann fidel serviter Zeova osi ti fer bann serman. (Zen. 14:22, 23; Ex. 22:10, 11) Zezi ti kone ki Zeova osi inn fer bann serman. (Ebre 6:13-17) Alor, Zezi pa ti pe rod dir ki fode zame ki nou fer enn serman. Okontrer, li ti pe explik bann dimounn ki fode pa zot fer bann serman pou bann kitsoz ki pa inportan ouswa ki pena sans. Nou bizin touletan fer seki nou’nn promet pou fer, parski Zeova anvi ki nou fer sa.

Alor, ki to bizin fer si enn kikenn demann twa pou fer enn serman? Premierman, to bizin sir ki to pou kapav fer seki to pou promet pou fer. Si to panse ki to pa pou kapav, vomie ki to pa fer serman-la. Labib dir: “Plito to pa fer okenn promes, ki to fer [enn promes] ek apre to pa respekte li.” (Ekle. 5:5) Deziemman, reflesi lor bann prinsip Biblik ki kapav ena enn lien avek sa serman-la, ek apre, pran enn desizion ki an-akor avek to konsians ki forme par Labib. Anou get sertin parmi sa bann prinsip-la.

Sertin serman pa kont volonte Bondie. Par exanp, kan bann Temwin Zeova marye, zot fer enn promes ar zot konzwin. Sa promes-la se enn serman. Devan Bondie ek tou bann invite, lemarye ek lamarye fer promes pou kontan ek respekte zot kamarad, “ziska ki lamor separ zot.” (Sertin koup kitfwa pa pou dir sa bann parol-la kan zot marye, selman, zot touzour pe fer enn promes devan Bondie.) Apre sa, zot vinn mari ek fam, ek zot bizin res ansam toutlong zot lavi. (Zen. 2:24; 1 Kor. 7:39) Promes ki enn koup fer kan zot marye, li an-akor avek volonte Bondie.

Sertin serman kont volonte Bondie. Enn vre Kretien pa pou fer bann serman, kouma par exanp, servi bann zarm pou defann so pei, ouswa abandonn so lafwa dan Bondie. Si li fer sa, li pou dezobeir bann lalwa Bondie. Bann Kretien ‘pa fer parti dan lemond,’ alor zot pa pou pran par dan bann diskision ouswa bann lager sa lemond-la.​—Zan 15:19; Iza. 2:4; Zak 1:27.

Sertin serman depann lor konsians sak Kretien. Parfwa, nou bizin reflesi bien lor konsey ki Zezi ti done, kan li ti dir: “Rann Sezar seki pou Sezar, e Bondie seki pou Bondie.”​—Lik 20:25.

Par exanp, fer koumadir enn Kretien inn fer enn aplikasion pou gagn enn paspor ouswa pou vinn sitwayen enn pei, ek li al aprann ki li bizin fer enn serman fidelite anver sa pei-la. Si dan sa pei-la, sa serman-la vedir ki li bizin azir dan enn fason ki kont bann lalwa Bondie, alor so konsians pa pou permet li pou fer sa serman-la. Selman, kitfwa gouvernman-la kapav permet li pou modifie sertin parol dan sa serman-la pou ki li an-akor avek so konsians.

Fer enn serman fidelite ki modifie, li kapav an-akor avek prinsip ki trouv dan Romin 13:1, ki dir: “Tou dimoun bizin obeir lotorite ki dirize.” Alor, enn Kretien kapav deside ki pena nanye demal pou fer enn kitsoz ki Bondie inn fini demann bann Kretien pou fer.

Li inportan osi ki sak Kretien ekout so konsians ki forme par Labib, si demann li pou servi enn lobze ouswa pou fer enn aksion pandan enn serman. Dan lepase, bann Romin ek bann Sit ti fer serman par zot lepe. Zot ti fer sa pou montre ki zot bondie lager ti zot temwin ek ki zot ti bann dimounn ki kapav fer konfians. Kan bann Grek ti fer bann serman, zot ti lev zot lame ver lesiel. Zot ti fer sa parski zot ti kone ki ena enn kikenn ki dan lesiel, ar ki zot bizin rann bann kont, ki bien pwisan, ek ki ti temwin seki zot inn dir ek seki zot inn fer.

Biensir, enn serviter Zeova pa pou fer enn serman lor enn lobze ki kapav ena enn lien ar fos relizion. Me ki to pou fer si, dan lakour, demann twa pou poz to lame lor enn Labib ek pou fer serman ki to pou koz laverite? Dan sa sitiasion-la, kitfwa to kapav desid pou fer sa serman-la, parski Labib koz lor bann fidel serviter Zeova ki ti fer enn aksion pandan ki zot ti pe fer enn serman. (Zen. 24:2, 3, 9; 47:29-31) Me li bien inportan ki to rapel ki, si to fer sa serman-la, to pe fer promes devan Bondie ki to pou koz laverite. Alor, to bizin prepar twa pou dir laverite lor ninport ki kestion ki bann-la kapav poz twa.

Nou lamitie avek Zeova ena boukou valer pou nou. Akoz samem, avan ki nou fer ninport ki serman, nou bizin priye Li, ek nou bizin sir ki nou pa pou dezobeir bann prinsip Biblik ouswa al kont nou konsians. Alor, si to desid pou fer enn serman, to bizin respekte li.​—1 Pier 2:12.