Anou aprann ar Parole Bondié
Eski Bondié pou etabli enn gouvernement mondial?
Sa lartik-la examine bann question ki kitfois ou finn deja posé ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.
1. Kifer l’humanité bizin enn gouvernement mondial?
Zordi, probleme l’humanité zot souvent bann probleme mondial. Dan certain pays, la plupart dimoune misere, ek lezot faire dominere ar zot. Dan lezot pays, beaucoup dimoune parette ena plus ki seki zot bizin. Zis enn administration mondial ki pou kapav distribué bann ressource ki ena lor la terre dan enn fason juste.—Lire Ecclésiaste 4:1; 8:9.
2. Kisannla nou kapav faire confiance pou dirige enn gouvernement mondial?
Pa tou dimoune ki accepté ki enn sel dirigeant dirige le monde entier, parski okenn zom ni okenn femme pa pou kapav faire sa bien. Pena personne ki pou kapav gagne faveur tou dimoune. Ek aussi, kisannla ena capacité pou empeche pouvoir faire li vinn malhonnete? L’idée ki enn sel dictateur dirige l’humanité, faire peur.—Lire Proverbes 29:2; Jérémie 10:23.
Jéhovah inn choisir so Garson, Jésus, pou dirige l’humanité pou touletan. (Luc 1:32, 33) Jésus finn faire l’experience couma la vie été lor la terre. Kan li ti lor la terre, li ti gueri bann dimoune malade, enseigne bann dimoune humble, ek passe le temps avek bann zenfant. (Marc 1:40-42; 6:34; 10:13-16) Alors, Jésus li-mem sa Dirigeant ki l’humanité bizin-la.—Lire Jean 1:14.
3. Eski kapav vrai-mem ena enn gouvernement mondial?
Bondié inn etabli so Garson dan le ciel pou dirige la terre. (Daniel 7:13, 14) Pareil couma li pa necessaire ki enn dirigeant present dan chaque la ville pou li dirige so pays, li pa necessaire ki Jésus present lor la terre pou li dirige l’humanité.—Lire Matthieu 8:5-9, 13.
Eski tou dimoune pou accepté Jésus couma enn Dirigeant? Non. Zis bann dimoune ki content seki bon ki pou accepté li. Jéhovah pou nettoye la terre ek pou tire tou bann ki pa pou accepté sa Dirigeant ki Li’nn etabli-la, enn Dirigeant ki ena l’amour ek ki juste.—Lire Matthieu 25:31-33, 46.
4. Ki sa Dirigeant mondial-la pou faire?
Pareil couma enn berger rassemblé so bann mouton, Jésus inn deja commence rassemblé bann dimoune humble ki sorti dan tou nation ek li pé enseigne zot l’amour ki Bondié ena. (Jean 10:16; 13:34) Sa bann dimoune-la bien decidé pou soutenir Jésus ek so domination. (Psaume 72:8; Matthieu 4:19, 20) Partout lor la terre, sa bann sujet fidele-la, dan l’unité pé annoncé ki Jésus inn vinn le Roi.—Lire Matthieu 24:14.
Bientot Jésus pou servi so pouvoir pou tire bann gouvernement malhonnete ek sa pou soulage l’humanité. Li finn choisir certain parmi so bann disciple fidele pou vinn bann le roi avek li dan le ciel ek pou dirige la terre. (Daniel 2:44; 7:27) Royaume ki Jésus pou dirigé pou rempli la terre avek connaissance Jéhovah ek pou etabli enn paradis, pareil couma sa ti été au commencement l’histoire l’humanité.—Lire Isaïe 11:3, 9; Matthieu 19:28.