Anou aprann ar Parole Bondié

Sa lartik-la examine bann question ki kitfois ou finn deja demann ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Ki été Royaume Bondié?

Royaume Bondié c’est enn gouvernement ki trouve dan le ciel. Li pou remplace tou bann lezot gouvernement ek grace a sa Royaume-la volonté Bondié pou faire dan le ciel ek lor la terre. Nou bizin enn bon gouvernement, alors solution c’est Royaume Bondié.​—Lire Daniel 2:44; Matthieu 6:9, 10.

Dan enn royaume bizin ena enn le roi. Jéhovah inn choisir so Garson, Jésus, pou vinn le Roi dan So Royaume.​—Lire Luc 1:30-33.

2. Kifer Jésus li-mem pli bon dirigeant ki kapav ena?

Garson Bondié li-mem pli bon le Roi ki kapav ena parski li enn kikenn ki bon, li montré li ferme pou seki droite, ek li ena pouvoir ki bizin pou aide bann dimoune. (Matthieu 11:28-30) Apré ki li ti ressuscité, Jésus ti monte dan le ciel, ek li ti attann dan coté droite Bondié. (Hébreux 10:12, 13) Finalement, Bondié ti donne li pouvoir pou ki li commence regné depuis dan le ciel.​—Lire Daniel 7:13, 14.

3. Kisannla encore pou regné avek Jésus?

Bondié finn choisir enn groupe dimoune ki appel “bann saint” pou regné avek Jésus dan le ciel. (Daniel 7:27) Bann zapotre fidele Jésus ti bann premier ki’nn choisir pou vinn bann saint. Mem ziska zordi Jéhovah finn contigne choisir bann zom ek bann femme fidele pou vinn bann saint. Pareil couma Jésus, zot ressuscité couma bann l’esprit.​—Lire Jean 14:1-3; 1 Corinthiens 15:42-45.

Comié dimoune al dan le ciel? Jésus appel zot enn “ti troupeau.” (Luc 12:32) Finalement pou ena 144,000. Zot pou regné ek zot pou dirige la terre ensam avek Jésus.​—Lire Révélation 5:9, 10; 14:1.

4. Kan eski Royaume Bondié ti commence regné?

Jésus ti vinn le Roi en 1914.a Enn tipé apré, li ti jette Satan ek so bann demon lor la terre. (Révélation 12:7-10, 12) Depuis sa, bann probleme ki affecté bann dimoune finn bien augmenté. Bann la guerre, tremblement de terre, la famine, l’epidemie, ek bann pratik ki kont la loi zot forme partie enn signe ki montré ki sa systeme-la dan so bann dernier jour. (2 Timothée 3:1-5) Tou bann dimoune ki envie gagne bann benediction grace a Royaume Bondié bizin aprann couma pou vinn bann disciple nou le Roi, Jésus.​—Lire Luc 21:7, 10, 11, 31, 34, 35.

5. Ki Royaume Bondié pé realisé ek pou realisé?

A travers enn travail predication ki pé faire dan le monde entier, Royaume Bondié pé deja aide bann million dimoune dan tou bann nation pou konn fason agir Bondié. (Matthieu 24:14) Li pou protege “enn grand la foule” ki soumette-zot ar Jésus kan li pou detruire sa mauvais systeme-la.​—Lire Révélation 7:9, 10, 13-17.

Pendant enn periode 1,000 an, tigit-tigit sa Royaume-la pou faire la terre vinn enn paradis. Finalement, Jésus pou remette sa Royaume-la so Papa. (1 Corinthiens 15:24-26) Eski ena enn kikenn avek ki ou ti pou content partage seki ou’nn aprann lor Royaume Bondié?​—Lire Psaume 37:10, 11, 29.

Pou gagne plus renseignement, guette chapitre 8 ek 9 dan livre Ki la Bible enseigné vrai-mem?, publié par bann Témoins de Jéhovah.

[Note]