Moïse—Enn Zom Ki Ti Ena l’Humilité
KI ÉTÉ L’HUMILITÉ?
L’humilité implik pena l’orgueil ou-soit fierté. Enn dimoune humble pa considere lezot pli inferieur ki li. Enn dimoune ki humble rappel ki li imparfait ek li montré-li modeste, setadir li konn so bann limite.
COUMA MOÏSE TI MANIFESTÉ L’HUMILITÉ?
Moïse pa ti laisse pouvoir monte dan so la tête. Souvent, kan enn dimoune gagne enn tigit l’autorité, bien vite nou kapav trouvé si li humble ou-soit non. Robert G. Ingersoll, enn ecrivain ki ti vive dan 19eme siecle, ti ecrire: “La plupart dimoune kapav supporte bann difficulté. Mais si ou envie koné couma enn dimoune été vrai-mem, donne li pouvoir.” Dan sa domaine-la, Moïse inn laisse enn bon l’exemple lor l’humilité. Couma li’nn faire sa?
Moïse ti gagne enn grand l’autorité, parski Jéhovah ti demann li pou dirige Israël. Pourtant, mem si Moïse ti ena sa pouvoir-la jamais li ti vinn fiere. Par exemple, anou guetté couma dan enn fason bien modeste, Moïse ti reglé enn question difficile lor bann droit l’heritage. (Nombres 27:1-11) Sa question-la ti bien important, parski decision ki ti pou prend pa ti pou affecté zis sa generation-la mais aussi bann generation ki ti pou vini.
Couma Moïse ti pou reagir? Eski li ti pou pensé ki parski li ti chef en Israël, li ti qualifié pou prend enn decision lor sa sujet-la? Eski li ti pou compte lor so prop capacité, so bann l’année l’experience, ou-soit connaissance personnel ki li ti ena lor fason pensé Jéhovah?
Kitfois enn zom ki fiere ti pou faire sa. Mais pa Moïse. La Bible dire nou ki ‘Moïse ti presente sa cas-la devant Jéhovah.’ (Nombres 27:5) Pense enn coute! Mem si sa ti faire environ 40 an ki li ti pé dirige nation Israël, Moïse pa ti compte lor li-mem, mais lor Jéhovah. Nou trouve dan enn fason clair ki Moïse ti enn dimoune bien humble.
Moïse pa ti pensé ki zis li tousel ki ti bizin ena l’autorité. Li ti bien content kan Jéhovah ti permette lezot Israélite pou vinn prophete ensam avek li. (Nombres 11:24-29) Kan so beau-pere ti propose li pou partage avek lezot certain travail ki li pé faire, avek humilité Moïse ti suive so conseil. (Exode 18:13-24) Ek vers la fin so la vie, mem si li ti encore bien fort pou so l’age, Moïse ti demann Jéhovah pou etabli enn kikenn ki ti pou remplace li. Kan Jéhovah ti choisir Josué, Moïse ti soutenir sa jeune homme-la avek tou so leker ek ti encourage le peuple pou suive Josué ki ti pou guide zot dan la Terre Promise. (Nombres 27:15-18; Deutéronome 31:3-6; 34:7) Pena doute ki Moïse ti considere sa couma enn privilege pou dirige bann Israélite dan zot l’adoration. Mais li pa ti faire so l’autorité passe avant bien-etre lezot.
KI BANN LESON NOU TIRÉ?
Fodé jamais nou laisse pouvoir, l’autorité, ou-soit nou bann capacité faire nou vinn orgueilleux. Rappel: Pou ki Jéhovah servi nou, nou l’humilité bizin toujours ena plus l’importance ki nou capacité. (1 Samuel 15:17) Si nou vrai-mem humble, nou pou faire zeffort pou applik sa conseil sage ki ena dan la Bible-la: “Faire Jéhovah confiance avek tou to leker ek pa fié lor to prop l’intelligence.”—Proverbes 3:5, 6.
L’exemple Moïse enseigne nou pou pa donne trop l’importance nou position ou-soit l’autorité ki nou ena.
Eski nou gagne bann bienfait kan nou imite l’humilité Moïse? Pena doute lor la! Kan nou cultive vrai l’humilité, nou rann la vie bann ki autour nou pli facile, ek nou ena plus valeur pou zot. Seki pli important, c’est nou gagne plus valeur pou Jéhovah, ki manifesté sa joli qualité-la Li-mem. (Psaume 18:35) “Bondié kont bann ki ena l’orgueil, mais Li donne so faveur ki personne pa merité, bann ki ena l’humilité.” (1 Pierre 5:5) C’est vrai-mem enn bon raison pou imite l’humilité Moïse!