LARTIK COUVERTURE: SEKI NOU APRANN AR MOÏSE
Moïse, Kisannla Li Ti Été?
Kan ou tann sa nom Moïse-la, ki sa faire ou pensé? Eski ou pense . . .
enn tibaba ki so mama ti cachiette dan enn panier dan la Riviere Nil?
enn garson ki ti elevé par tifi Pharaon dan enn grand luxe en Égypte—ki pourtant jamais ti blié ki li ti enn Israélite?
enn zom ki ti vive couma enn berger pendant 40 an dan Madiân?
enn zom ki ti gagne enn conversation avek Jéhovaha devant enn ti pié ki ti pé prend difé?
enn zom ki ti al devant le roi l’Égypte, ek avek courage ti demann li pou libere bann Israélite ar l’esclavage?
enn zom ki, par l’ordre Bondié, ti annonce Dix Plaie lor l’Égypte kan so le roi ti defié vrai Bondié?
enn zom ki ti faire bann Israélite sorti dan l’Égypte?
enn zom ki Bondié ti servi pou ouvert la Mer Rouge?
enn zom ki ti donne bann Israélite bann Dix Commandement ki Bondié ti donné?
MOÏSE inn konn tousala ek plus encore. Alors, sa pa etonne nou ki beaucoup dimoune, ki li bann Chretien, bann Juif, ek bann Musulman bien respecté sa zom fidele-la!
Pena doute ki Moïse ti enn prophete ki ti montré “enn puissance extraordinaire.” (Deutéronome 34:10-12) Li’nn laisse Bondié servi li dan enn fason extraordinaire. Pourtant, Moïse ti enn dimoune ordinaire. Pareil couma prophete Éliya, ki ti apparette a coté Moïse dan enn vision pendant ministere Jésus lor la terre, Moïse ti enn zom “ki ti ena bann sentiment pareil couma nou.” (Jacques 5:17; Matthieu 17:1-9) Moïse ti faire face ar beaucoup probleme ki nou gagné zordi, ek li ti reussi surmonte zot.
Eski ou ti pou content koné couma li’nn faire sa? Anou examine trois parmi bann bon qualité ki Moïse ti manifesté ek guetté couma nou kapav aprann ar so l’exemple.
a La Bible faire nou koné ki nom Bondié c’est Jéhovah.