Resurrection Jésus Faire Bann Dimoune Gagne Lavi!
RESURRECTION Jésus li pa zis enn simple l’evenement a part ki’nn arrivé dan le passé ek ki ena enn tigit l’importance pou nou zordi. L’apotre Paul ti attire l’attention lor signification sa resurrection-la kan li ti ecrire: “Christ finn relevé parmi bann mor, li-mem premier parmi bann ki’nn dormi dan lamor. Parski pareil couma lamor vinn par enn zom, resurrection bann mor aussi vinn par enn zom. Alors pareil couma dan Adam tou dimoune mor, pareil aussi, dan Christ tou dimoune pou gagne lavi.”—1 Corinthiens 15:20-22.
Jésus ti ressuscité le 16 Nisan 33 Nou Lepok, jour kot bann Juif ti presente Jéhovah zot bann premier recolte cereale dan temple Jérusalem. Kan Paul ti appel Jésus premier, li ti pé rod dire ki ti pou ena lezot dimoune ki ti pou relevé parmi bann mor.
Bann parole ki Paul dire apré, montré seki resurrection Jésus kapav faire bann dimoune gagné. Paul ti dire: “Parski pareil couma lamor vinn par enn zom, resurrection bann mor aussi vinn par enn zom.” Parski nou’nn herite peché ek l’imperfection avek Adam, nou tou nou mor. Selman, kan Jésus inn donne so lavi humain ki ti parfait couma enn ranson, li’nn donne bann dimoune possibilité pou gagne resurrection ek coumsa delivré ar peché ek lamor. Pou faire enn joli resumé lor sa sujet-la, Paul ti ecrire dan Romains 6:23: “Salaire ki peché payé, c’est lamor. Mais don ki Bondié donné, c’est lavi eternel par Christ Jésus nou Seigneur.”
Jésus li-mem ti expliké couma so lamor ek so resurrection concerne nou. Alors ki li ti pé faire reference ar li-mem, li ti dire: “Pou bizin leve Fils de l’homme la-haut, pou ki tou dimoune ki croire en li gagne lavi eternel. Parski Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne lavi pou touletan.”—Jean 3:14-16.
Maziné—enn lavi pou touletan sans douleur, soufrans, ou-soit chagrin! (Révélation 21:3, 4) C’est enn l’esperance extraordinaire, pa vrai! Enn bibliste ti dire: “Alors ki bann cimetiere kitfois faire nou rappel ki lavi li bien courte, resurrection donne nou l’assurance ki lamor pa pou dure longtemps.” Oui, resurrection Jésus faire bann dimoune gagne lavi!