Servis Aplintan—Kot Sa Finn Amenn Mwa

LE 7 Septam 1950, mo ti vinn enn manb fami Béthel dan Brooklyn. Sa lepok-la, dan fami Béthel ti ena 355 frer ek ser. Zot ti vinn depi diferan pei, ek zot ti ena ant 19 ek 80 an. Boukou parmi zot ti ena lesperans pou al viv dan lesiel.

MO KOUMANS SERVI JÉHOVAH

Se mo mama ki’nn aprann mwa servi nou “Bondie ere.” (1 Tim. 1:11) Li ti koumans servi Jéhovah kan mo ti ankor tipti. Le 1^e Ziliet 1939, kan mo ti ena di-z-an, mo ti batize dan enn lasanble zonn (ki asterla nou apel lasanble sirkonskripsion) ki ti ena Columbus dan Nebraska, l’États-Unis. Anviron enn santenn parmi nou ti zwenn dan enn lasal ki nou ti lwe pou ekout enn lanrezistreman lor “Fasism Ouswa Liberte,” ki ti fer par Joseph Rutherford. Omilie diskour, enn lafoul ankoler ti forme andeor sa ti lasal-la. Par fors, zot ti rant dan lasal, ti aret nou renion ek ti fer nou kit lavil. Nou ti zwenn dan laferm enn frer, pa lwin ar lavil ek nou ti ekout leres program. Sirman ou kapav mazine kifer zame mo’nn bliye dat ki mo ti pran batem!

Mo mama ti fer tou pou elve mwa dan laverite. Malgre ki mo papa ti enn bon dimounn ek enn bon papa, li pa ti tro interese ar relizion ouswa ar mo spiritialite. Mo mama avek bann lezot Temwin dan Kongregasion Omaha ti donn mwa bann lankourazman ki mo ti bien bizin.

SEKI TI ED MWA DESIDE KI MO POU FER AR MO LAVI

Kan mo ti pre pou kit kolez, mo ti bizin deside ki mo ti pou fer ar mo lavi. Sak lete, kan ti ena konze lekol, mo ti fer pionnier de vacances (ki asterla nou apel pionie tanporer) ansam avek lezot zenn ki ti ena mem laz ar mwa.

De zenn frer selibater​—John Chimiklis ek Ted Jaracz​—ki ti asiste setiem klas Lekol Guiléad ek ki ti fek gagn zot diplom, ti vinn servi kouma sirveyan sirkonskripsion dan nou rezion. Mo ti etone pou aprann ki zot ti ena zis enn tipe plis ki 20 an. Mo ti ena 18 an lerla, ek mo ti pre pou kit kolez. Mo ankor rapel kan Frer Chimiklis ti demann mwa ki mo ti pou fer ar mo lavi. Kan mo ti dir li ki mo pou fer, li ti ankouraz mwa par sa bann parol-la: “Wi, rant dan servis aplintan. To pa kone kot sa kapav amenn twa.” Sa konsey-la, ek osi lexanp sa de frer-la, ti bien tous mwa. Alor, apre ki mo’nn gagn mo diplom, mo’nn koumans servis pionie an 1948.

MO RANT BÉTHEL

An Ziliet 1950, mo bann paran ek mwa ti vwayaze pou al asiste lasanble internasional ki ti ena dan Yankee Stadium, New York. Kan mo ti laba, mo ti asiste enn renion pou bann ki ti interese ar servis Béthel. Mo ti avoy enn let pou dir ki mo ti pou bien kontan servi laba.

Mem si mo papa pa ti opoze ki mo fer servis pionie ek ki mo res kot li, li ti atann ki mo pey enn sertenn som pou mo lozman ek mo manze. Alor enn zour dan koumansman Out, kan mo ti pe al rod enn travay, mo ti aret kot nou bwat-o-let ek ti ena enn let pou mwa ki ti sorti Brooklyn. Let-la ti signe par Nathan H. Knorr, ki ti ekrir: “Nou’nn bien gagn to aplikasion pou Béthel. Mo konpran ki to dakor pou res Béthel toutlong to lavi. Alor, mo ti pou bien kontan si le 7 Septam 1950 to ti kapav rant Béthel, ki trouv 124 Columbia Heights, Brooklyn, New York.”

Kan mo papa ti sorti travay sa zour-la, mo ti dir li ki mo ti trouv enn travay. Li ti dir mwa: “Bien bon. Me kot to pou travay?” Mo ti dir li: “Dan Béthel Brooklyn ek mo pou gagn 10 dolar (enn tipe plis ki 300 roupi) par mwa.” Sa ti enn sok pou li, me li ti dir ki si mo’nn swazir pou fer sa, mo ti pou bizin fer tou pou ki sa reisi. Enn tipe apre, li ti batize an 1953 dan enn lasanble ki ti fer dan Yankee Stadium!

Mo ti bien kontan ki mo konpagnon servis, Alfred Nussrallah, ti invite pou rant Béthel anmemtan ki mwa, ek nou ti vwayaz ansam pou al laba. Plitar li ti marye, ek li ek so madam Joan, ti al Guiléad, ti al fer misioner dan Liban, ek apre li ti fer sirveyan sirkonskripsion kan zot ti retourn l’États-Unis.

MO SERVIS DAN BÉTHEL

Mo premie travay dan Béthel ti dan departman kot fer relir, kot mo ti relie bann liv ansam. Premie piblikasion lor ki mo ti travay ti apel La religion a-t-elle servi l’humanité ? Apre ki mo ti fer anviron wit mwa dan departman kot fer relir, ti avoy mwa dan Biro Servis, ek mo responsab ti Frer Thomas J. Sullivan. Mo ti bien kontan travay ar li ek profit so sazes ek so bon zizman lor plan spiritiel ki li ti’nn gagne avek bann lane ki li’nn pase dan lorganizasion.

Apre ki mo ti’nn pas pre trwa-z-an dan Biro Servis, Max Larson, sirveyan linprimri, ti dir mwa ki Frer Knorr ti anvi zwenn mwa. Mo ti pe demann momem si mo ti’nn fer enn kitsoz pa bon. Me mo ti soulaze kan Frer Knorr ti demann mwa si mo ti ena lintansion pou kit Béthel dan lavenir. Li ti bizin kikenn pou travay ar li pou inpe letan ek li ti anvi kone si mo ti pou kapav fer sa travay-la. Mo ti dir li ki mo pa ti ena lintansion pou kit Béthel. Ek finalman, mo ti gagn privilez pou travay dan so biro pandan 20 an.

Souvan mo’nn dir ki zame mo ti pou kapav pey formasion ki mo ti gagne kan mo ti travay avek Frer Sullivan ek Frer Knorr, ek osi avek bann lezot dan Béthel kouma Milton Henschel, Klaus Jensen, Max Larson, Hugo Riemer, ek Grant Suiter.a

Bann frer avek ki mo ti travay ti bien organize dan travay ki zot ti fer pou lorganizasion. Frer Knorr ti travay dir parski li ti anvi trouv laktivite an rapor avek Rwayom Bondie progrese otan ki posib. Bann ki ti pe travay ar li ti trouv li abordab. Mem si nou ti ena diferan lopinion lor enn size, nou ti santi nou lib pou exprim noumem ek li ti pou touzour fer nou konfians.

Enn fwa, Frer Knorr ti koz ar mwa lor linportans pou donn mo latansion mem bann ti kitsoz. Pou ed mwa konpran sa, li ti pran enn lexanp. Li ti dir mwa ki kan li ti sirveyan linprimri, Frer Rutherford ti telefonn li ek ti dir li: “Frer Knorr, kan to sorti linprimri pou vinn dezene, amenn de-trwa gom pou mwa. Met zot lor mo latab biro.” Frer Knorr ti dir ki premie kitsoz ki li ti fer se al dan stor, pran bann gom-la, ek met zot dan so pos. Lerla, midi li ti kit zot dan biro Frer Rutherford. Sa ti enn ti kitsoz, me sa ti bien itil pou Frer Rutherford. Apre sa Frer Knorr ti dir mwa: “Mo kontan ena bann kreyon bien fite lor mo latab biro. Alor silteple, to kapav met zot lor mo latab toule gramatin.” Pandan boukou lane, mo ti fer an-sort ki so bann kreyon ti fite.

Frer Knorr souvan ti koz lor linportans pou ekout bien kan ti demann nou pou fer enn sertin travay. Enn zour li ti donn mwa bann linstriksion bien detaye lor kouma pou regle enn sertin problem, me mo pa ti ekout bien. Akoz sa, mo ti fer li santi li bien zene. Mo ti santi mwa bien malalez, alor mo ti ekrir li enn ti let. Mo ti dir ki mo ti bien sagrin pou seki mo ti fer ek mo panse ki li ti pou pli bon transfer mwa dan enn lot biro. Inpe plitar sa gramatin-la, Frer Knorr ti vinn kot mo latab. Li ti dir: “Robert, mo’nn gagn to let. To’nn fer enn erer. Mo ti koz ar twa lor la, ek mo sir ki to pou fer bien atansion dan lavenir. Asterla, anou kontign travay.” Mo ti bien apresie konsiderasion ki li ti ena anver mwa.

MO DESID POU MARYE

Apre ki mo’nn servi dan Béthel pandan wit an, mo pa ti ena okenn proze apart kontign servi dan Béthel. Me sa ti sanze. Apepre mem lepok kot ti ena lasanble internasional dan Yankee Stadium ek dan Polo Grounds an 1958, mo ti zwenn Lorraine Brookes, ki mo ti’nn deza zwenn an 1955 kan li ti pe fer pionie dan Montréal, Canada. Mo ti inpresione par latitid ki li ti ena anver servis aplintan ek kouma li ti dispoze pou al servi ninport kot lorganizasion Jéhovah kapav avoy li. Lorraine ti ena lobzektif pou asiste Lekol Guiléad. Kan li ti ena 22 an, li ti gagn linvitasion pou asiste 27^em klas, an 1956. Apre ki li ti gagn so diplom, Lorraine ti al servi kouma misioner dan Brésil. Lorraine ek mwa nou ti repran kontak an 1958, ek li’nn aksepte mo demann an maryaz. Nou ti desid pou marye lane apre ek nou ti espere pou rant dan servis misioner ansam.

Kan mo ti koz ar Frer Knorr lor mo bann proze, li ti propoz nou pou atann trwa-z-an, ek apre, marye ek servi dan Béthel Brooklyn. Sa lepok-la, pou enn koup res dan Béthel apre ki zot marye, enn parmi zot ti’nn bizin servi dan Béthel pou di-z-an ou plis ek lot-la pou omwin trwa-z-an. Alor, Lorraine ti aksepte pou servi dan Béthel Brésil pandan de-z-an ek enn an dan Béthel Brooklyn, avan ki nou marye.

Pandan de premie lane nou fiansay, nou ti gard kontak selman par bann let. Li ti kout tro ser pou telefone ek sa lepok-la pa ti ena e-mail! Kan nou ti marye le 16 Septam 1961, Frer Knorr ti fer nou loner kan li ti fer nou diskour maryaz. Li vre ki sa bann lane ki nou ti pe atann la ti paret long. Me asterla, kan nou reflesi lor satisfaksion ek lazwa ki nou’nn gagne pandan plis ki 50 an maryaz, nou rekonet ki sa ti vo lapenn nou atann!

LEZOT PRIVILEZ DAN SERVIS JÉHOVAH

An 1964, mo ti gagn privilez pou vizit lezot pei antan ki sirveyan zonn. Sa lepok-la, bann madam pa ti gagn privilez pou akonpagn zot misie dan sa bann vwayaz-la. An 1977, ti ena bann sanzman, ek bann madam ti koumans vwayaz ansam avek zot misie. Sa lane-la, Lorraine ek mwa ti akonpagn Grant ek Edith Suiter pou vizit biro nasional bann Temwin Jéhovah dan l’Allemagne, l’Autriche, la Grèce, Chypre, Turquie, ek Israël. Antou, mo’nn vizit apepre 70 pei dan lemond.

An 1980, pandan enn sa bann vwayaz-la kan nou ti al Brésil, nou ti aret Belém, enn lavil ki trouv lor lekwater, kot Lorraine ti servi kouma misioner. Nou ti osi aret Manaus pou vizit bann frer ki laba. Kan mo ti al fer enn diskour dan enn stad, nou ti trouv enn group dimounn ki ti pe asize ansam ek zot pa ti swiv mem koutim ki bann Brezilien, kot bann madam anbras zot kamarad lor lazou ek bann misie donn lame. Kifer sa?

Zot ti nou bann konpagnon Temwin ki ti res dan enn lopital pou bann ki gagn lalep, ki ti trouv dan lafore Amazone. Pou pa kontaminn lezot, zot ti evit gagn kontak direk ar lezot dan lasistans. Me zot ti vremem tous nou leker, ek zame nou pa pou bliye lazwa ki ti ena lor zot figir! Li bien vre sa bann parol ki trouv dan profesi Isaïe la: “Mo bann serviter pou kriye dan lazwa parski zot leker pou kontan.”​—Is. 65:14.

ENN LAVI RANPLI AR SATISFAKSION EK KI ENA ENN SANS

Mwa ek Lorraine nou’nn pas plis ki 60 lane dan servis Jéhovah, ek souvan nou pans lor la. Nou bien kontan ar fason ki Jéhovah inn beni nou kan nou’nn les Li diriz nou atraver so lorganizasion. Malgre ki mo pa kapav vwayaze kouma avan, toulezour mo pe kapav ed Komite Santral kan mo pe travay avek Komite bann Kordinater ek Komite Servis. Mo bien apresie privilez ki mo ena pou kontribie enn tigit dan sa fason-la pou soutenir fami internasional bann frer. Sa kontign fer nou enn gran plezir pou trouv enn kantite bann zenn frer ek ser ki’nn rant dan servis aplintan ek ki ena mem latitid ki Isaïe, ki ti dir: “Ala mo la! Avoy mwa!” (Is. 6:8) Lexanp tou sa bann zenn-la montre ki zot osi zot pe swiv konsey ki mo sirveyan sirkonskripsion ti donn mwa bien lontan: “Rant dan servis aplintan. To pa kone kot sa kapav amenn twa.”