Repons Pou Bann Kestion Biblik
Ki pous boukou dimounn pou krwar dan enn Kreater?
Eski lavi pa enn kitsoz extraordiner?
Inn gagn anviron 3,000 an, enn poet ti ekrir: “Finn fer mwa dan enn fason vremem extraordiner.” (Psom 139:14) Kan ou get fason ki enn sel selil devlope pou vinn enn tibaba, eski ou pa vremem inpresione? Boukou dimounn rekonet ki se Bondie ki’nn kree tou kitsoz.—Lir Psom 139:13-17; Ebre 3:4.
Sa Kikenn ki’nn kree liniver ek later-la finn osi kree lavi. (Psom 36:9) Li’nn kominik avek bann dimounn ek Li’nn dir nou bann kitsoz lor Li.—Lir Izai 45:18.
Eski Bondie inn kree nou apartir bann zanimo?
Dan boukou fason, nou lekor resanble lekor bann zanimo parski nou Kreater finn kree bann dimounn ek bann zanimo toule-de pou viv lor later. Selman, Li pa ti kree premie imin apartir enn zanimo, me avek lapousier later.—Lir Zenez 1:24; 2:7.
Bann imin zot diferan ar bann zanimo dan de domenn inportan. Premierman, bann imin ena kapasite pou aprann konn zot Kreater, pou kontan Li ek respekte Li. Deziemman, bann zanimo pa finn kree pou viv pou touletan, me bann dimounn wi. Me azordi, tou dimounn inn erit lamor parski premie zom ti dezobeir lord nou Kreater.—Lir Zenez 1:27; 2:15-17.