LARTIK KOUVERTIR | KOUMA OU KAPAV KONTAN OU TRAVAY?
Kouma Nou Kapav Kontan pou Travay Dir?
“Ki sakenn manze ek bwar ek gagn satisfaksion pou tou sa travay dir ki li’nn fer la. Sa se enn don Bondie.” (Ekleziast 3:13) Si Bondie anvi ki nou gagn satisfaksion ar nou travay, eski li pa lozik ki Li montre nou kouma nou bizin fer pou gagn sa satisfaksion-la? (Izai 48:17) Li fer sa atraver so Parol, Labib. Gete kouma sertin konsey Labib kapav fer ou gagn satisfaksion dan ou travay.
DEVLOP ENN LATITID POZITIF LOR TRAVAY
Ki ou travay li fizik ouswa li mantal, ouswa mem toule-de alafwa, rekonet ki “kan enn dimounn travay dir, sa fer li gagn profi.” (Proverb 14:23) Ki kalite profi? Dabor, kan nou travay dir sa kapav ed nou pou gagn seki nou bizin lor plan materyel. Li vre ki Bondie promet ki Li pou donn nou seki nou bizin si nou ador li sinserman. (Matie 6:31, 32) Me Li atann osi ki nou travay dir pou nou gagn nou lavi dan enn fason onet.—2 Tesalonisien 3:10.
Alor nou kapav konsider nou travay kouma enn fason pou realiz enn lobzektif. Travay se enn bon mwayin pou asim nou bann responsabilite. Joshua, ki ena 25 an, dir: “Se enn gran lazwa kan ou reisi gagn seki ou bizin. Kan ou kapav aste seki ou bizin pou viv, savedir ki ou travay ranpli so rol.”
Anplis, kan ou travay dir ou ena respe pou oumem. Ofet, kouma lexpresion-la mem dir, enn travay dir—li dir! Kan nou fer zefor pou fer nou travay bien, nou gagn satisfaksion parski nou santi nou dign, mem si travay-la paret monotonn ouswa difisil. Lerla nou gagn viktwar lor tandans pou rod semin fasil. (Proverb 26:14) Se koumsa ki enn travay kapav donn nou enn gran satisfaksion. Aaron, ki’nn mansione dan lartik avan, dir: “Mo kontan sa santiman ki mo ena apre enn long lazourne travay la. Mo kapav extra fatige ek li posib ki lezot pa’nn remark mo travay. Selman mo kone ki mo’nn reisi fer enn kitsoz.”
FER ZEFOR DAN OU TRAVAY
Labib koz an bien lor enn zom ki “abil dan so travay.” Li koz osi lor enn fam ki “kontan travay avek so de lame.” (Proverb 22:29; 31:13) Biensir, enn dimounn pa vinn abil enn sel kout. Bien tigit dimounn kontan fer enn travay ki zot pa konn fer bien. Kitfwa, se pou sa rezon-la kifer boukou dimounn pa kontan zot travay. Se zis ki zot pa fer ase zefor pou vinn bon dan zot travay.
Ofet, enn dimounn kapav kontan preske tou sort kalite travay si li ena enn bon latitid, setadir si li konsantre pou fer so travay bien. William, ki ena 24 an, rekonet: “Ou bien satisfe kan ou fer tou seki ou kapav dan enn travay ek kan ou trouv so rezilta. Zame ou pa pou ena santiman ki ou’nn pran enn semin koupe ouswa ki ou pa’nn donn ou a-fon.”
REFLESI KOUMA OU TRAVAY FER LEZOT GAGN BANN BIENFE
Evite pans zis lor lapey ki ou gagne. Plito, demann oumem: ‘Kifer sa travay-la li neseser? Ki pou arive si mo pa fer li, ouswa si mo pa fer li bien? Kouma lezot kapav gagn bann bienfe ar mo travay?’
Li bon ki ou reflesi lor sa dernie kestion-la, parski ou pou gagn plis satisfaksion ar ou travay kan ou kone ki lezot osi pou gagn bann bienfe. Zezi ti dir: “Ena plis benediksion kan done, ki kan resevwar.” (Zistwar Bann Apot 20:35) Kisannla ki gagn bann bienfe avek nou travay? Par exanp, ena bann klian ek bann anplwayer. Me ena osi nou fami ek bann ki bizin led.
Nou fami. Enn sef fami ki travay dir pou okip so fami fer zot gagn bann bienfe dan omwin de fason. Premierman, sef fami-la fer sir ki so fami ena seki bizin lor plan materyel: manze, linz ek lakaz. Lerla li ranpli mision ki Bondie finn donn li pou “pran swin so fami.” (1 Timote 5:8) Deziemman, enn sef fami ki asim so responsabilite, montre par so lexanp linportans pou travay dir. Shane, ki’nn mansione dan lartik avan, dir: “Mo papa donn enn bon lexanp parski li ena bann bon prinsip travay. Li onet ek toutlong so lavi, li’nn travay dir antan ki enn menizie. Gras-a so bon lexanp, mo’nn aprann valer travay maniel ek pou fer bann kitsoz itil ki lezot dimounn kapav servi.”
Bann ki bizin led. Lapot Pol ti konsey bann Kretien pou “travay dir . . . pou ki [zot] ena kitsoz pou partaz avek enn kikenn ki bizin led.” (Efezien 4:28, NW) Ofet, kan nou travay dir pou donn noumem ek nou fami seki bizin, nou ena osi posibilite pou ed bann defavorize. (Proverb 3:27) Alor, kan nou travay dir, nou konn sa gran lazwa pou done la.
FER PLIS KI SEKI FINN DEMANN OU
Dan so seleb Sermon lor montagn, Zezi ti dir: “Si kikenn fors twa pou fer enn kilomet ar li, fer de kilomet.” (Matie 5:41) Kouma eski ou kapav aplik sa prinsip-la dan ou travay? Olie ki ou fer zis seki finn demann ou, rod bann fason pou fer plis ki sa. Fixe bann lobzektif personel ek motiv oumem pou fer ou travay pli bien ouswa pou fer li pli vit. Kontan ou travay mem dan bann ti detay.
Kan ou fer plis ki seki finn demann ou, ou pou pli kontan ou travay. Kifer? Parski se ou ki kontrol ou bann aksion. Ou fer plis parski se ou ki anvi fer sa, pa parski enn lot dimounn ki’nn fors ou pou fer sa. (Filemon 14) Lerla nou kapav rapel sa prinsip ki ena dan Proverb 12:24: “Lame enn dimounn ki travay dir pou dirize, me pou fors enn lame ki pares pou travay.” Li vre ki bien tigit parmi nou pou vinn bann esklav ouswa pou fer enn travay forse. Selman, enn dimounn ki fer zis seki demann li pou fer kapav santi-li esklav, ki touletan oblize fer seki lezot demann li. Me enn dimounn ki swazir pou fer plis ki seki finn demann li, ena santiman ki li kontrol so lavi ek so bann aksion.
LES TRAVAY DAN PLAS KI BIZIN
Li bon nou travay dir, me nou bizin rapel osi ki ena lezot kitsoz ki pli inportan dan lavi. Se vre ki Labib ankouraz nou pou travay dir. (Proverb 13:4) Me li pa dir nou vinn enn droge ar travay. Ekleziast 4:6 dir ki ‘vomie nou gagn enn tigit repo, ki nou touy nou lekor dan travay ek nou galoup deryer divan.’ Ki sa verse-la pe rod dir? Enn droge ar travay zame pou apresie bann bienfe so travay si travay-la pran tou so letan ek so lenerzi. Ofet so travay pou dan vid koumadir li pe “galoup deryer divan.”
Labib kapav ed nou pou ena enn latitid ekilibre an rapor avek travay. Mem si li ankouraz nou pou vinn serye dan nou travay, li rapel nou osi pou “verifie bien bann kitsoz ki pli inportan.” (Filipien 1:10, NW) Ki ete sa bann kitsoz ki pli inportan-la? Parmi ena letan ki nou pase avek nou fami ek nou bann kamarad. Bann laktivite spiritiel kouma lir Parol Bondie ek medit lor la, se bann kitsoz ki pli inportan ankor.
Bann dimounn ki ena enn lavi bien ekilibre kapav gagn plis lazwa dan zot travay. William, ki nou ti site avan, azoute: “Enn parmi mo bann ansien anplwayer donn enn bon lexanp parski li ena enn bon latitid lor travay. Li travay dir ek gras-a so bon travay, li gard bann bon relasion avek so bann klian. Me alafin lazourne kan li’nn fini fer so travay, li kone kouma pou les travay-la enn kote ek pou konsantre lor so fami ek so ladorasion. Ek ou kone, se enn parmi bann dimounn pli ere ki mo kone!”