Enn Leritaz ki Finn Transmet Atraver Set Zenerasion

Mo anset Thomas (1)a Williams ti ne le 20 Zanvie 1815 dan lavil Horncastle (Angleterre). De-z-an plitar so mama ti mor. Alor se so papa, John Williams ki ti elve li, avek so de frer ek so ser. John ti form Thomas pou vinn enn sarpantie, me Thomas ti anvi fer enn lot travay.

Sa lepok-la bann dimounn ti rekoumans interes zot ar larelizion an Angleterre. Predikater John Wesley ti kit legliz Anglikan pou fond relizion Metodist. Sa group-la ti met laksan lor letid Labib individiel ek lor predikasion. Bann lansegnman Wesley ti fane bien vit ek lafami Williams ti aksepte sa bann lansegnman-la avek enn gran konviksion. Thomas ti vinn enn predikater Metodist ek li pa ti tarde pou port li volonter pou vinn misioner dan sid losean Pacifique. An Ziliet 1840, li avek so madam, Mary, (2) ti ariv lor lil Lakeba,b ki trouv dan Fidji. Lakeba se enn lil volkanik kot ti ena bann kanibal.

VIV PARMI BANN KANIBAL

Thomas ek Mary ti bizin fer fas ar boukou difikilte pandan zot bann premie lane dan Fidji. Zot ti pas boukou letan pou travay dan bann kondision difisil ek ti fer enn saler insiportab. Zot ti osi fer fas ar bann kitsoz orib kouma par exanp: lager ant bann tribi, trangle bann vev, touy bann zanfan, ek fer fas ar bann kanibal. Anplis, bann dimounn lor sa lil-la pa ti aksepte zot mesaz. Mary ek so premie garson John ti tom malad ek zot ti pre pou mor. An 1843, Thomas ti ekrir: “Mo ti bien akable. . . . Mo ti nepli kone ki pou fer.” Pourtan, li ek so madam ti persevere ek zot ti gagn lafors gras-a zot lafwa dan zot Bondie Zeova.

Antretan Thomas, ti servi so talan sarpantie pou ranz premie lakaz dan stil Eropeen dan Fidji. Sa lakaz-la ti fer lor bann piloti, alor so sali ti pli ot ek ler ti kapav pase. Thomas ti fer osi bann nouvo kitsoz dan fason ki li ti konstrir sa lakaz-la ek sa ti fer bann abitan bien kirye. Zis avan ki konstriksion lakaz-la fini, Mary ti gagn so deziem garson, mo anset Thomas Whitton (3) Williams.

An 1843, Thomas Williams ti ede pou tradir Levanzil Zan an Fidien. Li ti trouv sa travay la ase difisil.c Me li ti bien doue pou remark bann detay dan natir bann dimounn. Li ti ekrir tou so bann resers dan so liv: Fidji ek bann Fidien (1858) (an Angle). Sa liv-la ti rakonte kouma lavi bann Fidien ti ete dan 19^em siek.

Pandan 13 an, Thomas ti travay bien dir dan Fidji, ek sa ti afekte so lasante. Alor, li ek so fami ti al l’Australie. Thomas ti fer enn long karyer antan ki enn paster ek li ti ena enn gran pozision. Li ti mor an 1891 dan Ballarat (Victoria).

“LOR” DAN LWES

An 1883, Thomas Whitton Williams, so madam Phoebe, (4) ek so bann zanfan ti al res Perth, dan lwes l’Australie. Zot deziem zanfan, Arthur Bakewell (5) Williams, mo anset, ti ena nef an sa lepok-la.

Kan Arthur ti ena 22 an, li ti al Kalgoorlie ki trouv apepre 600 kilomet dan les Perth, pou al rod lor. Kalgoorlie ti enn lavil ki ti pe bien prospere gras-a bann laminn lor. Laba li ti lir sertin piblikasion bann Étudiants internationaux de la Bible, kouma ti apel bann Temwin Zeova avan. Li ti osi abone ar Phare de la Tour de Sion (Latour Degard). Arthur ti bien inpresione par seki li ti pe lir ek li ti partaz sa avek lezot. Li ti mem fer bann renion pou etidie Labib. Se apartir sa ti group-la ki laktivite bann Temwin Zeova inn koumanse dan lwes l’Australie.

Arthur ti osi partaz seki li ti pe aprann avek so fami. So papa ti dakor ki li vinn enn Etidian Labib, me enn tipe apre, so papa ti mor. So mama, Phoebe, ek so bann ser, Violet ek Mary ti vinn bann Etidian Labib zot osi. Violet ti vinn enn evanzelizater aplintan setadir enn pionie. Arthur ti dir ki Violet ti “meyer pionie, pli zele ek pli sinser ki ti ena dan lwes l’Australie.” Kitfwa Arthur ti pe exazere, me Violet ti bien zele ek sa ti ena enn gran linflians lor bann zenerasion Williams ki ti pou vini apre.

Plitar, Arthur ti marye ek ti al res Donnybrook, enn lavil kot ti ena plantasion bann frwi dan sid-wes l’Australie. Laba zot ti apel li “Vie Fou 1914!” parski li ti proklam bann profesi Labib lor lane 1914, avek zel.d Kan ti ena Premie Lager Mondial, zot ti aret boufonn li. Arthur ti ena enn laboutik ek souvan li ti rann temwaniaz ar so bann klian. Li ti met bann piblikasion baze lor Labib dan so vitrinn pou ki bann dimounn kapav trouve. Li ti osi met enn lafis dan so vitrinn ki li pou donn 100 liv sterlin sa dimounn ki resi prouve ki Trinite vre​—enn doktrinn ki Arthur ti rezete parski sa pa ti baze lor Labib. Personn pa’nn resi gagn sa larzan-la.

Lakaz bann Williams ti vinn enn plas kot bann Etidian Labib ti zwenn ek ti fer bann renion dan Donnybrook. Plitar, Arthur ti ranz enn Lasal kot bann Temwin Zeova fer renion, dan lavil​—enn parmi bann premie lasal dan lwes l’Australie. Kan li ti pre pou gagn 80 an, li ti met so kostim ek so kravat, ek li ti mont lor so seval ki ti apel Doll, pou al prese partou dan distrik Donnybrook.

Arthur ti kalm ek dign, me li ti bien zele, ek li ti ena enn gran linflians lor so bann zanfan. So tifi Florence (6) ti servi kouma misioner dan l’Inde. So bann garson, Arthur Lindsay (7) ek Thomas, ti servi kouma ansien pandan lontan, parey kouma zot papa.

LADY WILLIAMS​—ENN DOUSER

Bann dimounn ti konn mo aryer granper, Arthur Lindsay Williams kouma enn kikenn ki bon anver lezot ek zot ti kontan li. Li ti touletan ena letan pou lezot ek li ti tret zot avek respe. Li ti osi enn sanpion dan koup dibwa avek lars: Dan 12 an li ti gagn 18 pri.

Me Arthur pa ti tro kontan kan so garson ki ti ena 2 an, Ronald (8) (mo granper), ti donn enn kout lars enn ti pie pom pre ar nou lakaz. Mama Ronald ti bien band sa pie-la ek finalman pie-la ti raport bann pom bien dou ki ti ena enn gou spesial. Alor ti apel sa pom-la Lady Williams. Plitar ti servi sa nouvo varyete pom-la pou prodir pom Cripps Pink, enn parmi bann varyete pom ki pli popiler dan lemond.

Ronald, ouswa Gramp, kouma mo ti apel mo granper, plitar ti fer bann kitsoz pli itil. Li avek mo granmer finn servi pandan plizir lane kouma volonter dan bann proze konstriksion bann Temwin Zeova an Australie ek dan bann Zil Salomon. Asterla Gramp ena apepre 80 an, li touzour enn ansien dan so kongregasion ek li ede dan konstriksion ek renovasion Lasal bann Temwin Zeova dan lwes l’Australie.

ENN LERITAZ KI ENA VALER POU MWA

Mo bann paran Geoffrey (9) ek Janice (10) Williams ti akord enn gran valer nou leritaz familial zot osi. Alor, zot ti fer bann gran zefor pou elve mwa (12) ek mo ser Katharine (11) pou ki nou ena lamour pou bann prinsip Labib. Kan mo ti ena 13 an, mo ti deside pou servi Zeova. Pandan enn lasanble, frer John Barr, enn manb Komite Santral bann Temwin Zeova, ti ankouraz bann zenn. Li ti dir: “Pa gaspiy kitsoz pli presie ki zot ena​—posibilite pou konn Zeova ek pou kontan Li.” Sa lanwit-la mo ti voue mo lavi ar Zeova. De-z-an plitar mo ti koumans fer pionie.

Zordi, mo bien kontan pou pres aplintan avek mo madam, Chloe, dan Tom Price, enn ti lavil retire kot ena bann minn. Sa lavil-la trouv dan nor-wes l’Australie. Nou travay part-time pou nou kapav gagn seki nou bizin pou viv. Mo bann paran, mo ser Katharine, ek so misie, Andrew, zot pionie dan Port Hedland ki trouv 420 kilomet dan lenor. Mo papa ek mwa, nou ansien dan nou kongregasion.

Sa fer bien lontan ki Thomas Williams ti bien determine pou servi Zeova. Apre set zenerasion, mo finn erit lafwa ek zel ki mo bann anset ti ena. Se vremem enn gran benediksion ki mo’nn gagn sa leritaz spiritiel-la.