1921—San-t-an Inn Pase

“ALOR, ki travay spesial pe atann nou pou sa lane-la?” Latour Degard 1^e Zanvie 1921 ti poz bann Etidian Labib sa kestion-la. Pou reponn sa kestion-la, lartik-la ti sit Izai 61:1, 2, ki ti rapel zot lord pou pres bonn nouvel. Sa verse-la dir: “Zeova finn swazir mwa pou anons bann bon nouvel ar bann dimounn ki ena limilite . . . , pou anons lane kot Zeova montre so faver, ek zour vanzans nou Bondie.”

BANN PROKLAMATER KI ENA KOURAZ

Pou ki zot kapav prese, bann Etidian Labib ti bizin ena kouraz. Zot ti pou bizin pa zis pres “bon nouvel” ar bann dimounn ki ena limilite, me osi pres “zour vanzans” Bondie ar bann ki move.

Frer J. H. Hoskin, ki ti res Kanada, ti pres avek kouraz malgre lopozision. An 1921, li ti zwenn enn paster ek li ti koumans enn konversasion avek li. Li ti dir li: “Nou kapav ena enn konversasion interesan lor Labib. Mem si nou pa dakor lor sertin pwin, nou kapav aret nou konversasion ek res touzour kamarad.” Me sa pa ti pas koumsa! Frer Hoskin rakonte: “Nou ti koz zis pandan de-trwa minit, kan paster-la ti donn enn gro kout pwin dan laport. Mo ti panse ki so vit laport ti pou kraze.”

Paster-la ti kriye: “Kifer ou pa al pres ar bann dimounn ki pa Kretien?” Frer Hoskin pa ti reponn, me kan li ti pe ale, li ti pe dir ar limem, ‘Mo ti panse ki mo ti pe koz avek enn dimounn ki pa Kretien!’

So landemin, kan paster-la ti pe fer so sermon dan so legliz, li ti dir bann move kitsoz lor Frer Hoskin. Frer Hoskin dir: “Li ti dir bann dimounn ki mo ti pli gran manter ki ena dan sa lavil-la ek ki ti bizin touy mwa.” Frer Hoskin pa ti dekouraze. Li ti kontign prese ek boukou dimounn ti ekout li. Li dir: “Mo ti bien kontan pres dan sa lavil-la. Sertin dimounn ti mem dir mwa, ‘Mo kone ki to pe fer travay Bondie!’ ek zot ti osi donn mwa bann kitsoz ki mo ti bizin.”

MO LETID PERSONEL EK MO LADORASION AN FAMI

Pou ed bann dimounn konpran Labib pli bien, bann Etidian Labib ti pibliye regilierman bann kestion Biblik ek zot bann repons dan magazinn ki azordi nou apel Leve!a Dan sa magazinn-la, ti ena bann kestion Biblik ek bann paran ti kapav servi sa bann kestion-la pou ansegn zot zanfan. Bann paran ti poz zot zanfan sa bann kestion-la, ek zot ti ed zot zanfan pou trouv repons sa bann kestion-la dan Labib. Ti ena bann kestion ki ti ansegn bann kitsoz sinp lor Labib, kouma par exanp, “Komie liv ena dan Labib?” Ek ti ena lezot kestion ki ti prepar bann zenn pou prese avek kouraz, kouma par exanp, “Eski sak vre Kretien pou gagn persekision?”

Ti ena osi bann kestion Biblik ek zot repons, pou bann ki ti ena plis konesans lor Labib. Repons sa bann kestion-la ti trouv dan premie liv Études des Écritures. Bann milye lekter ti aprann boukou kitsoz ar sa bann kestion-la, me apre ti fer enn lanons ki ti pou nepli pibliye sa bann kestion-la. Kifer ti ena sa sanzman-la?

ENN NOUVO LIV!

Liv *La Harpe de Dieu*

Enn kart avek nimero bann paz lor la

Bann kart avek bann kestion lor la

Bann frer, ki ti pran latet dan lorganizasion sa lepok-la, ti trouve ki bann dimounn ti bizin aprann seki ena dan Labib dan enn fason pli organize. Akoz sa, an Novam 1921, zot ti pibliye liv La Harpe de Dieu. Bann dimounn ki ti aksepte sa liv-la, ti kapav osi swiv enn kour Labib par zotmem. Sa liv-la ti ed bann dimounn pou konn proze Bondie, setadir posibilite pou bann imin pou gagn lavi eternel. Kouma sa kour-la ti deroule?

Kan enn dimounn ti aksepte enn liv, li ti gagne enn ti-kart ki ti explik li bann paz ki li ti bizin lir. So semenn apre, li ti gagn enn lot kart par lapost, avek bann kestion lor seki li ti lir. Lor sa kart-la, ti osi ekrir bann paz ki li ti bizin lir pou semenn apre.

Enn fwa par semenn, pandan 12 semenn, etidian-la ti gagn enn nouvo kart. Se lasanble ki ti pli pre ar li ki ti poste li sa bann kart-la. Souvan, se bann frer ek ser aze, ouswa bann ki pa kapav prese lakaz-lakaz, ki ti avoy sa bann kart-la. Par exanp, Anna K. Gardner, ki res Millvale, Pennsylvanie, dan Letazini, dir: “Kan liv La Harpe de Dieu ti sorti, mo ser Thayle, ki pa kapav marse, ti gagn plis travay pou fer. Sak semenn, li ti bizin avoy bann kart kot ti ena sa bann kestion-la.” Kan enn etidian ti fini so kour, enn kikenn dan lasanble ti vizit li, pou ed li aprann plis lor Labib.

TRAVAY KI TI PE ATANN ZOT

Lafin sa lane-la, Frer J. F. Rutherford ti avoy enn let dan tou bann lasanble. Li ti dir ki predikasion Rwayom Bondie ti tous ek ed pli boukou dimounn ki bann lane avan. Li ti dir osi: “Ena ankor boukou travay pou fer. Ankouraz lezot pou zwenn nou dan sa travay extraordiner-la.” Li kler ki bann Etidian Labib ti ekout so konsey. Pandan lane 1922, avek kouraz, bann Etidian Labib ti pres mesaz Rwayom Bondie plis ki bann lane avan.

Bann Kamarad Ki Ena Kouraz

Bann Etidian Labib ti montre ki zot kontan zot bann frer ek ser kan zot ti ed zot kamarad. Zot ti montre ki zot ti bann kamarad ki ena kouraz ek “ki’nn ne pou bann moman difisil,” parey kouma sa zistwar-la montre.—Prov. 17:17.

Mardi le 31 Me 1921, lapolis ti aret enn zom nwar ki ti res dan lavil Tulsa, dan Oklahoma, ek zot ti met li dan prizon. Zot ti akiz li ki li ti atak enn fam blan. Apre sa, plis ki 1,000 zom blan ti lager avek enn ti group zom nwar. Bien vit, sa lager-la ti fane dan enn landrwa ki ti apel Greewood, kot laplipar bann dimounn nwar ti reste. Bann dimounn ti kokin dan plis ki 1,400 lakaz ek komers, ek apre zot ti bril sa bann batiman-la. Dapre bann rapor, 36 dimounn ti mor. Me an realite, kitfwa ti ena bann santenn dimounn ki ti perdi lavi. Plitar, ti apel sa manifestasion violan la, Tulsa Race Massacre.

Enn frer nwar, ki ti apel Richard J. Hill, rakonte: “Lanwit ki ti ena sa manifestasion-la, nou ti ena nou renion kouma sak semenn. Apre renion, nou ti tann pe tir kout bal dan sant lavil Tulsa. Sa ti kontigne ziska bien tar aswar.” Merkredi gramatin, le 1^e Zin, sitiasion-la ti vinn pli pir. “Sertin dimounn ti dir nou ki, si nou ti anvi kasiet, nou ti bizin al Lasal Minisipalite deswit.” Alor Frer Hill, so madam ek zot sink zanfan, ti degaze pou al Lasal Minisipalite dan Tulsa. Dan sa batiman-la, ti ena anviron 3,000 zom ek fam nwar, ek bann militer ki gouvernman ti avoye pou aret sa lager-la, ti pe protez bann-la.

Dan sa moman-la, enn frer blan, ki ti apel Arthur Claus, ti pran enn desizion ki ti montre ki li ti ena boukou kouraz. Li explike: “Kan mo’nn tann dir ki bann dimounn ti pe kokin ek bril bann lakaz dan Greenwood, mo ti deside pou al laba pou pran nouvel mo bon kamarad, Frer Hill.”

Frer Arthur Claus ti servi liv La Harpe de Dieu pou ansegn enn klas 14 zanfan

Kan li ti ariv kot Frer Hill, Arthur ti trouv enn zom blan avek enn fizi dan so lame. Misie-la ti enn vwazin Frer Hill ek li ti osi so kamarad. Li ti panse ki Arthur ti enn parmi bann manifestan, ek li ti kriye: “Ki to pe fer la?”

Arthur dir: “Si mo ti donn li enn move repons dan sa ler-la, li ti pou touy mwa. Mo ti rasir li ki mo ti kamarad Frer Hill ek ki mo’nn deza vinn kot li plizir fwa.” Arthur ek vwazin-la ti reisi protez lakaz Frer Hill kont bann voler.

Plitar, Arthur ti aprann ki Frer Hill ek so fami ti dan Lasal Minisipalite. Bann dimounn ti dir Arthur ki bann nwar pa ti kapav kit sa lasal-la san permision Zeneral Barrett, ki ti an-sarz sa mision-la. Arthur rakonte: “Sa ti bien difisil pou zwenn zeneral-la pou koz avek li. Kan mo’nn dir li ki mo’nn vinn sers fami Frer Hill, li ti demann mwa: ‘Eski to pou okip sa fami-la ek donn zot tou seki zot bizin?’ Avek enn gran sourir, mo ti dir li wi.”

Kan li ti gagn enn papie signe par Zeneral Barrett, deswit Arthur ti al Lasal Minisipalite. Li ti prezant sa papie-la enn ofisie, ki ti dir: “Sa papie-la inn signe par Zeneral Barrett! Eski ou kone ki oumem premie dimounn ki’nn vinn sers enn kikenn isi azordi?” Inpe apre, Arthur ek ofisie-la ti reisi trouv Frer Hill ek so fami. Zot tou ti rant dan loto Arthur ek zot ti retourn lakaz.

Frer Claus ti fer sir ki Frer Hill ek so fami an sekirite. Kan bann dimounn ti trouv lamour ek kouraz ki Frer Claus ti ena, zot ti inpresione! Arthur dir: “Sa vwazin ki ti ed mwa pou protez lakaz Frer Hill la, ti ena plis respe pou bann Temwin Zeova. Ek boukou dimounn ti koumans interese ar laverite, parski zot ti trouve ki, parmi pep Bondie, personn pa ti rasis ek personn pa ti panse ki li meyer ki so kamarad.”

a L’Âge d’Or ti vinn Consolation an 1937 ek Réveillez-vous ! an 1946. (Leve! an Kreol Morisien depi 2018.)