Eski Ena enn Lespwar pou Bann Ki’nn Mor?

Eski bann ki’nn mor pou reviv?

SEKI LABIB DIR: ‘Ler pe vini kot tou dimoun ki dan tom pou tann lavwa Zezi ek pou sorti.’​—Zan 5:28, 29.

Zezi ti anonse ki dan lavenir, kan so Rwayom pou dirize, bann dimounn ki dan Tom pou releve. Fernando, ki nou ti mansione dan lartik avan, dir: “Mo ti etone kan premie fwa mo ti lir Zan 5:28, 29. Sa ti donn mwa enn vre lespwar, ek mo ti koumans trouv lavenir dan enn fason pli pozitif.”

Dan lepase, Zob ki ti enn zom fidel, ti atann ki apre so lamor, enn zour Bondie pou relev li. Zob ti demande: “Si enn zom mor, eski li kapav reviv?” Apre sa li ti reponn san okenn dout: “Toulezour pandan mo travay forse [pandan letan ki li pase dan Tom], mo pou atann, ziska ki mo delivrans arive. To pou apel mwa, ek mwa mo pou reponn twa.”​—Zob 14:14, 15.

Rezireksion pa ti enn kitsoz nouvo pou Mart, ser Lazar. Apre lamor Lazar, Zezi ti dir li: “To frer pou resisite.” Mart ti reponn: “Mo kone ki li pou resisite kan pou ena rezireksion dan dernie zour.” Apre sa, Zezi ti dir li: “Momem larezireksion, momem lavi; dimounn ki krwar dan mwa pou viv mem si li finn mor.” (Zan 11:23-25) Lerla, deswit Zezi ti resisit Lazar! Sa pasaz extraordiner la donn nou enn avangou lor bann pli gran levennman ki pou ena dan lavenir. Mazine ou pe trouv bann dimounn pe resisite partou lor later!

Eski sertin pou resisite pou al dan lesiel?

SEKI LABIB DIR: Parol Bondie montre ki rezireksion Zezi ti diferan ar sa wit lezot rezireksion la. Sa wit dimounn-la ti resisite lor later. Me konsernan rezireksion Zezi, nou lir: “Zezi Kris . . . finn al dan lesiel e [li] dan kote drwat Bondie.” (1 Pier 3:21, 22) Eski zis Zezi tousel ti pou resisite pou al dan lesiel? Inpe avan, Zezi ti dir so bann zapot: “Si mo pe al prepar enn plas pou zot, mo pou retourne ek mo pou akeyir zot kot mwa, pou ki la kot mo ete zot osi zot la.”​—Zan 14:3, NW.

Zezi Kris ti al dan lesiel ek ti prepar enn plas pou sertin so bann disip. Pou ena 144,000 dimounn ki pou resisite pou al dan lesiel. (Revelasion 14:1, 3) Me ki sa bann disip pros ar Zezi la pou fer laba?

Zot pou bien okipe! Labib dir: “Tou bann ki gagn premie rezireksion zot ere ek sin, deziem lamor pena pouvwar lor zot, me zot pou vinn pret Bondie ek Kris, ek zot pou regne kouma bann lerwa avek li pandan 1,000 an.” (Revelasion 20:6, NW.) Bann ki pou al dan lesiel pou diriz later antan ki bann lerwa ek pret ansam avek Kris.

Kisannla pou resisite apre?

SEKI LABIB DIR: Bann Lekritir inspire koz lor enn diskour ki lapot Pol ti fer: “Mo ena lesperans an Bondie, lesperans ki sa bann zom-la ena zot osi, ki pou ena enn rezireksion bann dimounn ki zis ek bann dimounn inzis, toulede.”​—Zistwar Bann Apot 24:15, NW.

Kisannla pou form parti parmi bann ki Pol apel “bann dimounn ki zis”? Anou pran enn lexanp. Kan Daniel, enn zom fidel, ti pre pou mor, Bondie ti dir li: “To pou repoze, me to pou leve pou gagn to par kan lafin bann zour vini.” (Daniel 12:13) Kotsa eski Daniel pou resisite? “Bann ki swiv bon sime [“bann ki zis,” NW] pou posed later, ek zot pou res lor la pou touletan.” (Psom 37:29) Zezi osi ti anonse: “Bienere zot ki dou e ranpli avek imilite, zot pou erit later.” (Matie 5:5) Daniel ek lezot zom ek fam fidel pou resisite pou viv lor later ankor enn fwa. Zot pou mem viv pou touletan.

Kisannla pou form parti parmi bann ki Pol apel “bann dimounn inzis”? Zot reprezant bann plizir milyar dimounn ki’nn viv ek ki’nn mor. Ek boukou parmi zot pa’nn gagn lokazion konpran ek aplik seki ena dan Labib. Apre zot rezireksion, zot pou gagn lokazion aprann konn Zeovaa ek Zezi ek montre zot rekonesans. (Zan 17:3) Tou bann ki swazir pou servi Bondie pou ena posibilite viv tanki Zeova Limem viv, setadir pou leternite.

Kouma lavi pou ete lor later?

SEKI LABIB DIR: Bondie “pou souy tou zot larm. Pa pou ena ni lamor, ni dey, ni lamantasion, ni douler.” (Revelasion 21:4) “Zot pou ranz bann lakaz ek zot pou res ladan, zot pou plant bann karo rezin ek zot pou manz zot bann frwi.”​—Izai 65:21.

Mazine ou pe viv dan sa bann kondision-la ansam avek bann ki ou kontan ek ki’nn resisite! Me enn lot kestion ki nou kapav demann nou se: Kouma nou sir ki pou ena rezireksion?