Lapriyer—Kouma Li Kapav Ed Ou?

Avan ki nou koumans fer enn kitsoz, li normal ki nou demann noumem: ‘Kouma sa pou ed mwa?’ Me, eski li pou egois si nou demann sa pou lapriyer? Non, pa vremem. Li normal ki nou anvi kone si sa pou fer nou dibien. Mem Zob, enn bon dimounn ti demande: “Si mo apel Li, eski Li pou reponn mwa?”​—Zob 9:16.

Dan bann lartik avan, nou finn examinn bann prev ki lapriyer li plis ki enn pratik relizie ouswa enn form terapi. Vre Bondie vremem ekout lapriyer. Si nou priye kouma bizin ek pou bann kitsoz ki bizin, Li pou ekout nou. Ofet, Li ankouraz nou pou vinn pros ar Li. (Zak 4:8) Alor, ki nou kapav espere gagne si nou priye regilierman? Anou gete kouma lapriyer kapav ed nou.

Nou gagn lape lespri.

Kan ou gagn bann problem ek bann difikilte, eski sa trakas ou boukou? Dan bann moman koumsa, Labib ankouraz nou pou “priye toultan” ek pou “demann Bondie seki [nou] bizin.” (1 Tesalonisien 5:17; Filipien 4:6, NW.) Labib rasir nou ki si nou priye Bondie, “lape Bondie ki depas tou konesans, pou protez [nou] leker ek [nou] lespri.” (Filipien 4:7, NW.) Nou kapav gagn enn sertin lape lespri si nou devid nou bann traka lor nou Papa ki dan lesiel. An realite, Li ankouraz nou pou fer sa. Psom 55:22 dir: “Depoz to fardo lor LESEGNER [“Zeova,” NW] e li pou rekonfort twa.”

Dan lemond antie, boukou dimounn inn konn sa lape-la. Hee Ran, ki res Corée, dir: “Mem si mo ena bann gro problem, kan mo priye, mo santi mwa soulaze ek mo santi ki mo ena lafors pou andire.” Cecilia, ki res Philippines, rakonte: “Antan ki enn mama, mo gagn boukou traka pou mo bann tifi ek osi pou mo mama ki nepli rapel mwa aster. Me gras-a lapriyer, mo ena mwins traka. Mo kone ki Zeova pou ed mwa okip zot.”

Nou gagn rekonfor ek lafors kan nou fer fas ar bann leprev.

Eski ou pe fer fas ar bann gran traka, kitfwa mem ou dan enn sitiasion kot ou lavi an danze? Si ou priye Bondie ki “toultan konsol [ou],” sa kapav donn ou enn gran soulazman. Labib dir ki ‘Li rekonfort nou dan tou nou detres.’ (2 Korintien 1:3, 4) Par exanp, enn zour kan Zezi ti bien trakase, “li [ti] tom azenou e li [ti] koumans priye.” Ki’nn arive apre? “Enn anz [ti] paret devan li pou donn li lafors.” (Lik 22:41, 43) Neemia, enn lot zom fidel, ti gagn bann menas ar bann move dimounn ki ti esey anpes li fer travay Bondie. Lerla li ti priye Bondie: “Mo demann twa, fortifie mo lame.” Seki’nn arive apre, montre ki Bondie inn vremem ed li pou sirmont so laper ek pou reisi dan so travay. (Neemia 6:9-16) Reginald ki res Ghana, dir: “Kan mo priye, sirtou kan mo pe gagn bann gran difikilte, mo ena linpresion ki mo’nn dir mo problem ar enn kikenn ki kapav ed mwa ek ki rasir mwa ki mo pa bizin trakase.” Wi, Bondie rekonfort nou kan nou priye Li.

Nou gagn sazes Bondie.

Sertin desizion ki nou pran kapav ena enn lefe pou touletan lor nou ek lor nou bann pros. Kouma nou kapav pran bann desizion ki montre nou ena sazes? Labib dir: “Si kikenn parmi zot mank lasazes [sirtou kan li pe fer fas ar bann difikilte], ki li demande, Bondie pou donn li. Bondie zenere e li donn tou dimounn avek enn gran leker.” (Zak 1:5) Si nou priye pou gagn sazes, Bondie pou gid nou par so lespri sin pou pran bann bon desizion. Nou kapav demann lespri sin parski an realite, Zezi rasir nou ki nou “Papa dan lesiel pou fer kado Lespri Sin seki dimann li!”​—Lik 11:13.

Mem Zezi ti demann so Papa led kan li ti ena pou pran bann desizion inportan. Par exanp, kan li ti bizin swazir 12 zom pou vinn so bann zapot, Labib dir: “Li [ti] pas lanwit priye Bondie.”​—Lik 6:12.

Zordi, parey kouma Zezi, boukou finn rasire kan zot inn trouve ki Bondie reponn zot lapriyer ek inn ed zot pran bann bon desizion. Regina, ki res Philippines, rakonte ki kantite difikilte li’nn bizin fer fas. Li’nn bizin pran limem ek so fami swin parski so misie ti mor ek li ti perdi so travay. Li ti osi gagn difikilte pou elve so bann zanfan. Ki finn ed li pou pran bann bon desizion? Li dir: “Mo priye Zeova pou mo gagn led.” Kwabena, ki res Ghana, dir kifer li’nn demann Bondie ed li: “Mo ti travay dan konstriksion, me mo ti perdi mo travay bien peye.” Kan li ti get bann diferan swa travay ki li ti ena, li dir: “A-sak fwa mo ti priye Zeova pou Li ed mwa pran enn bon desizion.” Li azoute: “Mo santi ki vremem Zeova inn ed mwa pou swazir enn karyer ki pe permet mwa kontign gard bann bon relasion avek Li ek pou pran momem swin.” Si ou priye pou bann sitiasion ki kapav afekte ou relasion avek Bondie, ou’si ou pou trouve kouma Li pou ed ou.

Nou finn mansionn zis de-trwa fason kouma lapriyer kapav ed ou. (Ou pou trouv lezot lexanp dan lankadre “Kouma Lapriyer Ed Nou?”) Pou ki lapriyer kapav ed ou, avan tou ou bizin aprann konn Bondie ek konn so volonte. Si samem ki ou swete, nou ankouraz ou pou demann bann Temwin Zeova enn kour Labib.a Se premie kitsoz ki pou permet ou vinn pros ar Bondie ki “ekzos nou lapriyer.”​—Psom 65:2.