Ou Lavenir, Ou Swa!
ESKI OU VREMEM ENA ENN SWA LOR KOUMA OU LAVENIR POU ETE? Sertin dimounn panse ki se destin ki kontrol zot lavi pa zot bann swa personel. Kan zot pa reisi realiz sertin lobzektif, zot panse ki pa ti kapav evit sa. Zot dir: “Ti fini ekrir dan destin ki mo pa ti pou reisi!”
Lezot dekouraze kan zot trouve ki pena okenn sime sorti dan sa lemond dominer ek inzis dan ki nou pe viv la. Kitfwa zot finn esey amelior zot lavi, me avek ki rezilta? Zis pou trouv lager, krim, bann katastrof natirel, ek maladi kas zot bann plan plizir fwa. Alor zot demann zotmem, ‘Kifer mo bizin fatig mwa?’
Li kapav arive ki sertin sitiasion dan lavi kas nou bann plan. (Ekleziast 9:11) Me selman, konsernan nou lavenir eternel, nou vremem ena enn swa pou fer. Avredir, Labib dir ki nou lavenir depann lor swa ki nou fer. Anou examinn seki li dir lor la.
Lor nom Zeova, Moiz, ki ti gid ansien nasion Izrael, ti dir bann Izraelit ki ti pre pou rant dan Later Promiz: “Mo finn met lavi ek lamor devan twa, benediksion ek malediksion; ek to bizin swazir lavi pou ki to kontign viv, twa ek to desandans, kan to kontan Zeova to Bondie, kan to ekout so lavwa, ek kan to res atase ar Li.”—Deteronom 30:15, 19, 20.
“Mo finn met lavi ek lamor devan twa, benediksion ek malediksion; ek to bizin swazir lavi.”—Deteronom 30:19
Wi! Bondie ti liber bann Izraelit ar lesklavaz depi Lezip ek ti donn zot posibilite pou gagn zot liberte ek viv ere dan Later Promiz. Me zot pa ti pou gagn tou sa bann kitsoz-la dan enn fason otomatik. Pou gagn sa bann benediksion-la, zot ti bizin “swazir lavi.” Kouma? ‘Kan zot kontan Bondie, ekout So lavwa, ek res atase ar Li.’
Azordi, ou osi ou ena mem swa devan ou, ek seki ou pou swazir pou ena enn lefe lor ou lavenir. Kan ou swazir pou kontan Bondie, ekout So lavwa, ek res atase ar Li, avredir ou pe swazir lavi, lavi pou touletan lor later ki pou vinn enn paradi. Me ki sa trwa letap-la inplike?
SWAZIR POU KONTAN BONDIE
Lamour se kalite prinsipal Bondie. Lapot Zan ti inspire pou ekrir ki “Bondie limem lamour.” (1 Zan 4:8) Se akoz sa, kan ti demann Zezi ki pli gran komannman, li ti dir: “To bizin kontan . . . , [“Zeova,” NW] to Bondie avek tou to leker, avek tou to nam e avek tou to lespri.” (Matie 22:37) Enn vre relasion avek Zeova pa baze lor laper ouswa obeir san konpran, me lor lamour. Me, kifer nou bizin swazir pou kontan Li?
Lamour ki Zeova ena pou bann dimounn li parey kouma lamour ki bann paran ena pou zot zanfan. Mem si zot inparfe, bann paran ki kontan zot zanfan pou ansegn, ankouraz, soutenir, ek disiplinn zot zanfan parski zot anvi ki zot ere ek reisi zot lavi. An retour, ki bann paran anvi? Zot anvi ki zot bann zanfan kontan zot ek pran kont seki finn ansegn zot pou zot profi. Alor, eski li pa rezonab ki nou Papa ki dan lesiel ek ki parfe, atann ki nou montre nou lamour ek nou rekonesans pou tou seki Li’nn fer pou nou?
EKOUT SO LAVWA
Dan bann lang orizinal ki’nn ekrir Labib, souvan mo “ekoute” inplik lide “obeir.” Eski se pa samem ki nou pe rod dir kan nou dir enn zanfan, “Ekout to bann paran”? Alor, ekout lavwa Bondie inplik aprann ek obeir seki Li dir. Parski nou pa kapav tann lavwa Bondie dan enn fason literal, nou ekout Li kan nou lir ek aplik seki ena dan so Parol, Labib.—1 Zan 5:3.
Pou montre linportans ki ena pou ekout lavwa Bondie, enn zour Zezi ti dir: “Dimoun pa viv zis ar dipin, me ar tou bann parol ki sorti dan labous Bondie [“Zeova,” NW].” (Matie 4:4) Parey kouma manze inportan pou nou, absorb konesans Bondie inportan, avredir li pli inportan ankor. Kifer? Lerwa Salomon ki ti saz ti dir: “Lasazes li enn proteksion parey kouma larzan li enn proteksion; me lavantaz konesans se sa: Lasazes prezerv lavi sa kikenn ki posed li la.” (Ekleziast 7:12) Konesans ek sazes ki sorti kot Bondie kapav protez nou azordi ek ed nou pou fer bann swa ki saz ki pou permet nou viv pou touletan dan lavenir.
RES ATASE AR LI
Dan lartik avan nou ti get enn lexanp ki Zezi ti done, li ti dir: “Laport ki sere ek semin ki tipti amenn ver lavi, ek zis enn tigit ki trouv li.” (Matie 7:13, 14) Kan nou vwayaz lor enn semin koumsa, li pou itil ki nou ena enn gid ki ena lexperyans ek res pre ar li, si nou anvi ariv dan nou destinasion, lavi pou touletan. Alor, nou ena bann bon rezon pou res pre ar Bondie. (Psom 16:8) Me, kouma nou pou fer sa?
Toulezour, ena boukou kitsoz ki nou bizin fer ek boukou kitsoz ki nou anvi fer. Nou kapav telman okipe ek distrer par sa bann kitsoz-la, ki nou ena tigit letan ouswa pena letan pou pans lor seki Bondie anvi nou fer. Se akoz sa ki Labib rapel nou: “Alor vey bien kouma zot pou viv zot lavi; pa viv kouma bann ignoran, me kouma bann saz. Servi bien tou bann lokazion ki prezant devan zot, akoz sa letan asterla li move.” (Efezien 5:15, 16) Nou res pros ar Bondie kan nou fer nou relasion avek Li vinn kitsoz ki pli inportan dan nou lavi.—Matie 6:33.
SWA-LA DAN OU LAME
Mem si ou pa kapav sanz lepase, ena bann kitsoz ki ou kapav fer pou ki ou ek bann dimounn ki ou kontan kapav ena enn zoli lavenir. Labib montre nou, ki nou Papa ki dan lesiel, Zeova, bien kontan nou, ek fer nou kone ki Li anvi trouv nou fer. Get seki profet Mishe ti ekrir:
“Twa zom, Li finn dir twa ki kitsoz ki bon. Ek ki Zeova pe demann twa, apart pou pratik lazistis, pou kontan fidelite ek pou mars avek to Bondie dan enn fason modes!”—Mishe 6:8.
Eski ou pou aksepte linvitasion Zeova pou mars avek Li ek gagn bann benediksion eternel ki Li’nn garde pou bann ki fer sa? Swa-la li dan ou lame!