Labib​—Enn Liv ki Kapav Fer Konfians ek ki Dir Laverite

Toutlong listwar, bann dimounn ki sorti dan diferan kiltir finn konsider Labib kouma enn liv ki kapav fer konfians ek ki dir laverite. Azordi, ena bann milyon dimounn ki swiv so lansegnman. Pourtan, sertin dimounn rezet Labib parski pou zot li pa itil ouswa ladan ena bann zistwar ki’nn invante. Ki ou panse ou? Eski ou kapav trouv laverite dan Labib?

BANN BON REZON POU FER LABIB KONFIANS

Kouma ou kapav kone si Labib merite ki ou fer li konfians? Anou pran enn lexanp: Si ou ena enn kamarad ki dir ou laverite depi plizir lane, sirman ou pou panse ki li merit ou konfians. Eski Labib finn touletan dir laverite, parey kouma sa kamarad ki ou kapav fer konfians la? Anou examinn de-trwa prev.

Bann Ekrivin Ki’nn Dir Laverite

Bann ekrivin Labib ti bien onet, souvan zot ti ekrir lor zot bann erer ek zot bann defo. Par exanp, profet Zonas ti ekrir kouma li ti dezobeir Bondie. (Zonas 1:1-3) Avredir, alafin liv ki li’nn ekrir dan Labib li rakonte kouma Bondie finn pini li. Me parkont, Zonas pa’nn atir latansion lor limem parski li pa’nn rakonte kouma li’nn sanz so latitid. (Zonas 4:1, 4, 10, 11) Bann ekrivin Labib ti onet ek sa montre ki laverite ti inportan pou zot.

Bann Konsey Itil ki Kapav Fer Konfians

Eski Labib finn touletan donn bann konsey ki itil? Biensir. Par exanp, gete ki konsey li donn nou pou nou ena bann bon relasion avek lezot: “Alor tou seki zot anvi ki lezot fer pou zot, fer parey pou lezot osi.” (Matie 7:12) “Enn repons, kan li dous, li fer lakoler disparet, me enn parol blesan fer lakoler monte.” (Proverb 15:1) Pena dout, bann verite ki ena dan Labib ankor itil azordi parey kouma lepok kan ti ekrir zot.

Dir Laverite lor Listwar

Dan bann lane ki’nn pase, bann arkeolog finn dekouver bann diferan kitsoz ki konfirm lexistans bann diferan pep ek landrwa, ek bann levennman ki mansione dan Labib. Anou examinn enn ti detay. Labib rakonte ki dan lepok Neemi, bann abitan Tir (bann Fenisien ki sorti Tir) ki ti res Zerizalem “ti amenn pwason ek tou sort kalite marsandiz.”​—Neemi 13:16.

Eski ena bann prev ki konfirm seki ena dan sa verse-la? Wi. Bann arkeolog finn dekouver bann marsandiz Fenisien dan Izrael, sa fer nou konpran ki kitfwa sa de pep-la ti pe fer biznes ansam. Anplis, finn deter bann pwason Méditerranée dan Zerizalem. Bann arkeolog panse ki se bann marsan ki sorti lor enn lakot ki ase lwin ki finn amenn sa bann pwason-la. Apre ki enn biblis finn examinn sa bann prev-la, li’nn tir sa konklizion-la: “Li posib ki seki’nn ekrir dan Neemi 13:16, lor bann abitan Tir ki ti vann pwason dan Zerizalem, li vre.”

Dir Laverite lor Lasians

Avan tou Labib li enn liv relizie ek ki koz lor listwar. Me kan li koz lor bann kitsoz ki konsern lasians li exakt. Anou pran enn lexanp.

Inn gagn anviron 3,500 an, Labib ti dir ki later ‘sispann dan vid.’ (Zob 26:7) Sa lansegnman-la bien diferan ar bann fos zistwar ki dir ki later flote lor delo ouswa ki li lor ledo enn torti zean. Anviron 1,100 an apre ki ti ekrir liv Zob, bann dimounn ti kontign krwar ki li inposib ki later tini dan ler, li bizin tini lor enn kitsoz. Inn gagn selman 300 an, setadir an 1687, ki Isaac Newton ti pibliy bann resers ki li ti fer lor gravite ek ti explike ki later swiv so trazektwar gras-a enn lafors ki pa kapav trouve. Sa gran dekouvert siantifik la finn konfirm seki Labib ti dir inn gagn 3,000 an!