Laverite lor Bondie ek Zezi Kris

Kisannla Bondie?

Kouma Bondie Apele? Bondie Limem dir: “Mwa mo Zeova. Samem mo nom.” (Izai 42:8) Nom personel Bondie aparet anviron 7,000 fwa dan Labib. Me selman, boukou tradiksion Labib finn fer enn erer kan zot finn ranplas nom Bondie par enn tit, kouma par exanp “Segner.” Bondie anvi ki ou vinn so kamarad, alor Li ankouraz ou pou “proklam so nom.”​—Psom 105:1.

Bann Tit ki Zeova Ena. Labib servi bann tit kouma “Bondie,” “Tou-Pwisan,” “Kreater,” “Papa,” ek “Segner,” pou fer referans ar Zeova. Dan Labib, ena boukou lapriyer kot apel Zeova par toulede: enn tit ki montre respe ek so nom personel, Zeova.​—Daniel 9:4.

Kouma Bondie Ete? Bondie Li enn lespri, alor pa kapav trouv Li. (Zan 4:24) Labib dir ki “zame personn finn trouv Bondie.” (Zan 1:18) Labib fer nou konn so bann santiman. Bann dimounn kapav swa fer Li lapenn, swa ‘fer so leker kontan.’​—Proverb 27:11; Psom 78:40, 41.

Bann Kalite Extraordiner Bondie. Bondie pa fer preferans, tou dimounn ena mem valer devan so lizie, ninport ki ras ouswa kiltir li ete. (Zistwar Bann Apot 10:34, 35) Li osi ‘ena mizerikord ek konpasion, Li pa ankoler vit ek Li ena lamour fidel ek laverite an-abondans.’ (Exod 34:6, 7) Me, Bondie ena kat kalite ki vremem bien atiran.

Pwisans. “Bondie Tou-Pwisan,” alor Li kapav akonpli tou seki Li’nn promet parski so pwisans pena okenn limit.​—Zenez 17:1.

Sazes. Labib dir ki “li tousel ena tou sazes.” Ki savedir? Ki Bondie so sazes bien pli siperyer ki ninport kisannla so sazes.​—Romin 16:27.

Lazistis. Bondie touletan fer seki drwat. “Seki Li fer parfe, . . . zame [Li] fer linzistis.”​—Deteronom 32:4.

Lamour. Labib dir ki “Bondie limem lamour.” (1 Zan 4:8) Bondie pa zis montre lamour, me Limem reprezant lamour. So lamour extraordiner ena enn linflians lor tou seki Li fer, ek gras-a sa nou gagn bann bienfe dan diferan fason.

Lamitie ki Bondie Ena Avek Bann Dimounn. Bondie Li nou Papa ki dan lesiel, ki bien kontan nou. (Matie 6:9) Si nou ena lafwa dan Li, nou kapav vinn so kamarad. (Psom 25:14) Ofet, Bondie invit ou pou apros ou ar Li par lapriyer ek pou ‘met tou ou traka lor Li, parski Li pran ou swin.’​—1 Pier 5:7; Zak 4:8.

Ki Diferans Ena ant Bondie ek Zezi Kris?

Zezi Li Pa Bondie. Zezi inik parski zis li tousel ki Bondie inn kree direk. Akoz samem ki Labib apel li Garson Bondie. (Zan 20:31) Apre ki Zeova ti kree Zezi, Li ti servi Zezi so premie-ne kouma “enn zouvriye kalifie” pou kree tou lezot kitsoz ek tou lezot dimounn.​—Proverb 8:30, 31; Kolosien 1:15, 16.

Zezi zame finn pretann ki li Bondie. Okontrer, li ti explike: “Mo so reprezantan, ek [Bondie] Limem ki finn avoy mwa.” (Zan 7:29, NW) Kan Zezi ti koz avek enn so bann disip, li ti apel Zeova “mo Papa ek zot Papa,” ek “mo Bondie ek zot Bondie.” (Zan 20:17) Apre ki Zezi ti mor, Zeova ti resisit li pou viv dan lesiel, ek ti plas li dan so kote drwat ek ti donn li enn gran lotorite.​—Matie 28:18; Zistwar Bann Apot 2:32, 33.

Zezi Kris Kapav Ed Ou pou Vinn Pros Ar Bondie

Zezi ti vinn lor later pou ansegn nou lor so Papa. Zeova Limem ti dir konsernan Zezi: “Samem mo Garson ki mo bien kontan, ekout li.” (Mark 9:7) Zezi konn Bondie plis ki ninport kisannla. Li dir: “Personn pa konn Papa la exsepte so Garson e dimoun ar ki Garson la anvi revel so Papa.”​—Lik 10:22.

Zezi manifeste bann kalite Bondie dan enn fason parfe. Zezi ti imit telman bien bann kalite so Papa ki li ti kapav dir: “Seki finn trouv mwa finn trouv mo Papa.” (Zan 14:9) Zezi ti fer bann dimounn vinn pros ar Bondie kan li ti manifeste lamour so Papa dan tou seki li ti dir ek fer. Li ti dir: “Momem sime, laverite, lavi; personn pa kapav al kot mo Papa si li pa pas par mwa.” (Zan 14:6) Li ti dir osi: “Bann vre adorater pou ador nou Papa avek lespri ek laverite, parski nou Papa pe rod sa bann kalite dimounn lamem pou ador Li.” (Zan 4:23, NW) Ou rann ou kont: Zeova pe rod bann dimounn kouma ou ki anvi konn laverite lor Li!