Kuma pu Konvink Lezot
1 Dan so minister, lapot Pol ti gayn repitasyon enn kikenn ki konvink bann dimunn. (Akt 19:26) Mem Lerwa Agripa ti dir li: “Dan enn tigit letan ankor, to pu konvink mwa pu vinn enn Kretyin.” (Akt 26:28) Ki finn fer minister Pol vinn konvinkan? Ebyin, li ti pe rezonn lor bann Lekritir, ek li ti adapte so rezonnman ar bann dimunn ki ti pe ekut li.—Akt 28:23.
2 Parey kuma Pol, nu’si nu bizin kapav konvink bann dimunn dan nu minister. Ki manyer? Kan nu servi nu lintelizans letan nu pe koze ek ekut bann dimunn. (Proverb 16:23) Trwa letap inportan pu ed nu fer sa.
3 Ekut Avek Buku Latansyon: Kan dimunn la koze, ekut li, kumsa u kapav truv enn baz kot zot tulede dakor; apre sa kontiyn u konversasyon lor la. Si li pa dakor avek enn kitsoz, sey konpran kifer li pans kumsa. Sa pu ed u pu konn egzakteman so krwayans, kifer li krwar ladan, ek ki finn konvink li pu krwar ladan. (Proverb 18:13) Avek buku prekosyon, sey tir li ladan.
4 Poz Bann Kestyon: Si enn dimunn krwar dan Trinite, u kapav demann li: “Eski tuletan u finn krwar dan Trinite?” Kontinye: “Eski u finn deza etidye an detay seki Labib dir lor la?” U kapav usi demann li: “Si Bondye ti enn Trinite, eski u pa panse ki Labib ti pu dir sa klerman?” Bann repons ki u pu gayne pu permet u rezonn avek dimunn la lor seki bann Lekritir dir.
5 Servi enn Bon Rezonnman: Enn Temwin ti demann enn madam ki ti krwar ki Zezi Bondye: ‘Si u bizin pran enn legzanp dan enn fami pu montre ki de dimunn parey, ki lyin parante u ti pu pran?’ Li finn reponn: “Mo ti pu pran legzanp de frer.” Temwin la finn azute: “Kitfwa mem legzanp de frer zimo ki parey-parey, pa vre? Me, kan Zezi finn anseyn nu ki Bondye Li Papa ek ki li, li Garson, ki li ti pe rod montre nu?” Lerla, madam la finn konpran ki enn parmi sa de la pli gran ek ena plis lotorite. (Matye 20:23; Zan 14:28; 20:17) Temwin la finn servi so kapasite pu konvink, pu tus lespri ek leker sa madam la.
6 Byinsir, mem ki kantite nu prezantasyon li lozik ek egzak, pa tu dimunn ki pu aksepte laverite. Me, parey kuma Pol, anu fer zefor pu rod, dan nu teritwar, bann dimunn ki ena leker onet, pu konvink zot pu aksepte mesaz Rwayom.—Akt 19:8.