Enseigne dan enn fason ki convaink lezot
1. Servi Parole Bondié dan enn fason efficace, ki souvent sa impliké?
1 Bann ministre efficace, couma l’apotre Paul, comprend ki pou zot kapav “servi parole la verité couma bizin,” sa implik plus ki zis dire seki ena dan bann l’Ecriture sacré. (2 Tim. 2:15) Couma nou kapav enseigne avek conviction kan nou servi Parole Bondié?—Actes 28:23.
2. Couma nou kapav aide bann dimoune pou augmente zot respé pou Parole Bondié?
2 Laisse Parole Bondié kozé: Premierement, attire l’attention directement lor la Bible dan enn fason ki pou faire bann dimoune ena respé pou sagesse Bondié ki ena ladan. Nou confiance dan Parole Bondié kapav pousse enn dimoune pou ecoute bien kan nou lire enn verset. (Héb. 4:12) Nou kapav dire: “Mo finn tire beaucoup profit pou koné ki Bondié pensé lor sa point-la. Guette seki so Parole dire.” Chaque fois ki li possible, laisse Parole Bondié kozé kan nou lire ladan directement.
3. Apré ki ou finn lire enn verset, ki ou kapav faire pou aide enn dimoune pou comprend seki ou finn lire?
3 Deuxiemement, explik verset ki nou finn lire. Beaucoup dimoune pa trop comprend enn verset kan zot tann li premier fois. Souvent, nou bizin explik enn verset pou montré so l’importance. (Luc 24:26, 27) Kan nou lire enn verset, attire l’attention lor bann mot ki appuye point principal lor ki nou pé kozé. Si ou pose dimoune-la enn question, ou pou kapav koné si li finn bien comprend l’idée ki ena dan verset-la.—Prov. 20:5; Actes 8:30.
4. Ki dernier kitsoz important nou bizin faire pou enseigne avek conviction?
4 Raisonne lor bann l’Ecriture: Troisiemement, faire zeffort pou touche l’esprit ek leker enn dimoune. Aide li pou trouvé couma verset-la concerne li personnellement. Kan enn dimoune raisonne lor bann l’Ecriture, sa kapav convaink li pou change so fason pensé. (Actes 17:2-4; 19:8) Par exemple, apré ki ou’nn lire Psaume 83:18, ou kapav raisonne lor la kan ou montré enn dimoune couma enn nom li bien important pou kapav developpe enn relation personnel avek enn kikenn. Apré, kitfois ou kapav demann li: “Eski ou pensé ki si ou konn nom Bondié sa pou faire ou bann la priere ena plus sens?” Kan nou montré dimoune-la couma enn verset kapav touche so la vie personnel, nou pé montré li valeur pratik sa verset-la. Kan nou enseigne Parole Bondié avek conviction coumsa, sa pou attire bann ki ena leker sincere pou adore vrai Bondié ki vivant, Jéhovah.—Jér. 10:10.