Manié “l’epée l’esprit” dan enn fason efficace

“Accepté . . . l’epée l’esprit, setadir, parole Bondié.”—ÉPH. 6:17.

1, 2. Couma nou bizin reagir kan nou trouvé ki bizin plus proclamateur pou preche Royaume Bondié?

KAN Jésus ti trouvé ki bann la foule ti pauvre lor plan spirituel, li ti dire so bann disciple: “Recolte-la grand, mais bann travailleur tigit. Alors, suppliyé Maitre recolte pou Li envoye bann travailleur dan so recolte.” Jésus pa ti zis dire sa sans faire nanyin. Apré ki li ti dire sa bann parole-la, “li ti faire so douze disciple vini,” ek li ti envoye zot preché, ou-soit couma la Bible dire, li ti envoye zot pou al faire “recolte.” (Mat. 9:35-38; 10:1, 5) Plitar, Jésus “ti choisir soixante-dix lezot disciple ek ti envoye zot deux par deux” pou faire mem travail.—Luc 10:1, 2.

² Zordi aussi bien bizin plus proclamateur pou preche Royaume Bondié. Pou l’année service 2009, ti ena 18,168,323 dimoune ki ti assisté Mémorial dan le monde. Sa chiffre-la ti depasse quantité bann Témoins de Jéhovah ki ena dan le monde par 10 million. Oui, bann karo vrai-mem inn paré pou recolte. (Jean 4:34, 35) Sa vedir ki nou bizin prié ek demann pou gagne plus travailleur. Mais couma nou kapav agir en accord avek sa demann-la? Nou kapav faire sa kan nou vinn bann proclamateur pli efficace a mesure ki nou preche avek zele Royaume Bondié ek faire bann disciple.—Mat. 28:19, 20; Marc 13:10.

3. Couma l’esprit saint Bondié joué enn role bien important pou aide nou vinn bann proclamateur pli efficace?

³ Dan lartik avant, nou ti examiné couma, kan nou laisse l’esprit saint Bondié dirige nou, c’est sa ki aide nou pou “koz parole Bondié avek courage.” (Actes 4:31) Sa l’esprit-la kapav aussi aide nou pou vinn bann proclamateur efficace. Enn fason couma nou kapav vinn encore pli efficace dan nou ministere c’est kan nou servi couma bizin sa bon zouti ki Jéhovah inn donne nou-la—so Parole ki Li’nn faire ecrire, la Bible. C’est enn livre ki’nn ecrire grace a l’esprit saint. (2 Tim. 3:16) So message inspiré par Bondié. Alors, kan dan nou ministere nou servi la Bible pou enseigné dan enn fason efficace, nou pé laisse l’esprit saint dirige nou. Avant ki nou guetté couma nou kapav faire sa, anou reflechi lor ki quantité pouvoir sa Parole-la ena.

‘Parole Bondié, li puissant’

4. Ki changement message Bondié ki trouve dan la Bible kapav pousse enn dimoune pou faire?

⁴ Parole Bondié, setadir so message, ena vrai-mem enn grand pouvoir! (Héb. 4:12) Dan enn sens symbolik, message ki sorti dan la Bible li pli fité ki n’importe ki l’epée ki bann dimoune inn kapav faire. Kifer? Parski, li percé ziska li separe bann lezo ar zot la moelle. La verité lor la Bible touche enn dimoune dan pli profond li-mem, ek touche so bann pensée ek so bann sentiment, ek faire koné ki li été vrai-mem au fond. Pouvoir ki la verité ena kapav transforme enn dimoune ek pousse li pou faire bann grand changement. (Lire Colossiens 3:10.) Oui, Parole Bondié kapav change la vie bann dimoune!

5. Dan ki fason la Bible kapav guide nou, ek avek ki resultat?

⁵ En plus, dan la Bible ena enn sagesse ki nou pa pou trouvé okenn part. Ladan ena bann renseignement bien utile ki kapav montré bann dimoune couma pou vive dan sa le monde compliké ek difficile-la. Parole Bondié pa zis eclaire bann pas ki nou faire asterla, mais li eclaire aussi nou chemin pli devant. (Ps. 119:105) Li enn grand l’aide kan nou bizin faire face ar bann probleme ou-soit kan nou bizin prend bann decision lor choix nou frequentation, nou divertissement, nou travail, nou l’habillement ek lezot kitsoz encore. (Ps. 37:25; Prov. 13:20; Jean 15:14; 1 Tim. 2:9) Kan nou applik bann principe ki trouve dan Parole Bondié, sa permette nou pou vive bien avek lezot. (Mat. 7:12; Phil. 2:3, 4) Kan nou chemin pli devant li bien eclairé, sa permette nou pou trouvé ki l’effet nou bann decision pou ena lor nou la vie dan l’avenir. (1 Tim. 6:9) La Bible annonce aussi projet ki Bondié ena pou l’avenir, ek sa aide nou pou amenn enn la vie ki en accord avek sa projet-la. (Mat. 6:33; 1 Jean 2:17, 18) Oui, enn dimoune kapav amenn enn la vie ki ena vrai-mem enn sens si li laisse bann principe biblik guide so la vie!

6. Couma la Bible li enn zarme bien puissant dan nou la guerre spirituel?

⁶ Mazinn aussi ki la Bible li enn zarme bien puissant dan nou la guerre spirituel. Paul ti appel Parole Bondié “l’epée l’esprit.” (Lire Éphésiens 6:12, 17.) Kan nou presente message ki ena dan la Bible dan enn fason efficace, li kapav delivré bann dimoune ek tire zot enba controle Satan. C’est enn l’epée ki pé sauve bann la vie au lieu ki li detruire zot. Alors, eski li pa vaut la peine ki nou faire zeffort pou manié li dan enn fason efficace?

Servi li couma bizin

7. Kifer li important ki nou aprann servi bien “l’epée l’esprit”?

⁷ Pou ki enn soldat kapav manié bien so bann zarme kan li al laguerre, fodé ki li’nn bien pratiké ek li’nn aprann couma pou servi zot bien. Li pareil aussi kan nou servi “l’epée l’esprit” dan nou la guerre spirituel. Paul ti ecrire: “Faire tou to possible pou presente-toi devant Bondié couma enn dimoune approuvé, enn zouvrier ki pena nanyin pou honté, ki konn servi parole la verité couma bizin.”—2 Tim. 2:15.

8, 9. Ki pou aide nou pou comprend seki la Bible dire? Donne enn l’exemple.

⁸ Ki pou aide nou pou “servi parole la verité couma bizin” dan nou ministere? Avant ki nou kapav partage avek lezot dan enn fason clair seki la Bible dire, nou bizin nou-mem comprend bien seki li dire. Sa vedir ki nou bizin prend compte seki contexte enn verset ou-soit enn passage dire. Dapré enn dictionnaire, “enn contexte c’est tou seki trouve avant ek apré enn mot, enn phrase, ou-soit enn passage, ek ki rann so signification pli clair.”

⁹ Pou nou comprend enn passage la Bible couma bizin, nou bizin examine bann verset ki ena avant ek apré sa passage-la. Seki Paul dire dan Galates 5:13 donne nou enn l’exemple kifer nou bizin faire sa. Li ti ecrire: “Bien sur, mo bann frere, finn appel zot pou zot vinn libre, selman, pa servi sa liberté-la couma enn l’occasion pou vive dapré desir zot lekor; mais pou montré zot l’amour, travail couma bann esclave sakenn pou so camarade.” Lor ki liberté Paul ti pé kozé ici? Eski li ti pé koz lor liberté ar peché ek la mort, ar l’esclavage bann fausse croyance, ou-soit ar enn lot kitsoz? Contexte sa verset-la montré ki Paul ti pé koz lor liberté ki bann Juif ti gagné kan zot ‘ti liberé ar malediction la Loi.’ (Gal. 3:13, 19-24; 4:1-5) Li ti pé koz lor enn nouveau qualité liberté, enn liberté ki zot ti gagné kan zot ti commence suive Christ. Bann ki ti apprecié sa liberté-la ti travail avek amour couma bann esclave sakenn pou so camarade. Mais bann ki pa ti ena l’amour ti morde ek ti devore zot camarade.—Gal. 5:15.

10. Pou nou comprend signification bann verset la Bible bien, ki bann renseignement nou bizin examiné ek couma nou kapav gagne sa bann renseignement-la?

¹⁰ Mot “contexte” ena enn lot signification. Parmi bann lezot mot ki kapav servi dan so place ena bann mot couma “circonstance, . . . situation.” Pou nou comprend bien signification enn verset, nou bizin examine bann renseignement ki ena lor sa verset-la, par exemple, kisannla ki ti ecrire livre kot sa verset-la trouvé, kan ek dan ki situation li ti ecrire sa. Li aussi utile pou koné pou ki raison ti’nn ecrire sa livre-la, ek si possible, ki condition social ek moral ti ena dan sa lepok-la ek ki religion bann dimoune ti pratiké.a

11. Ki nou bizin veille bien kan nou explik bann verset?

¹¹ Pou nou kapav “servi parole la verité couma bizin” nou bizin faire plus ki zis explik bann verité biblik dan enn fason exact. Nou bizin faire attention pou nou pa servi la Bible pou mette cracking lor bann dimoune pou faire zot ecoute nou. Mem si nou kapav servi la Bible pou defann la verité, pareil couma Jésus ti faire kan Satan ti tente li, la Bible li pa couma enn gros baton ki nou kapav servi pou menace bann dimoune ek force zot pou ecoute nou. (Deut. 6:16; 8:3; 10:20; Mat. 4:4, 7, 10) Nou bizin suive conseil ki l’apotre Pierre ti donné: “Dan zot leker, donne Christ la gloire couma zot Seigneur, toujours pré pou defann-zot devant tou dimoune ki demann zot kifer zot ena sa l’esperance-la, mais faire li avek douceur ek enn grand respé.”—1 Pierre 3:15.

12, 13. Ki “bann kitsoz ki’nn bien enraciné,” la verité ki ena dan Parole Bondié kapav detruire? Donne enn l’exemple.

¹² Kan nou servi la Bible couma bizin, ki la verité ki ena ladan kapav faire? (Lire 2 Corinthiens 10:4, 5.) La verité ki sorti dan la Bible kapav detruire “bann kitsoz ki’nn bien enraciné,” setadir, demaské bann fausse l’enseignement, bann pratik ki faire di-tort, ek bann philosophie ki reflete sagesse ki bann dimoune imparfait ena. Nou kapav servi la Bible pou detruire n’importe ki pensée ki “dresse-li kont connaissance Bondié.” Nou kapav servi bann l’enseignement biblik pou aide bann dimoune corrige zot fason pensé pou ki li en accord avek la verité.

¹³ Anou prend par exemple cas enn madame ki ena 93 an ek ki vive en Inde. Depuis li tipti, finn enseigne li pou croire dan reincarnation. Kan li ti commence etudié la Bible par lettre avek so garson ki vive dan enn lot pays, desuite li ti accepté seki li ti pé aprann lor Jéhovah ek lor So bann promesse. Selman, doctrine lor reincarnation ti tellement enraciné dan so l’esprit ki li pa ti d’accord ditou kan so garson ti ecrire li lor condition bann dimoune mort. Li ti dire: “Mo pa kapav comprend la verité ki ena dan to la Bible. Tou religion enseigné ki ena enn kitsoz dan nou ki jamais pa mort. Mo finn toujours croire ki nou lekor mort ek ki enn partie invisible contigne prend naissance dan enn lot lekor grace a reincarnation, apepré 8,400,000 fois. Couma sa kapav fausse? Eski la plupart religion dan l’erreur?” Eski “l’epée l’esprit” kapav detruire sa qualité croyance ki’nn bien enraciné-la? Apré lezot discussion biblik lor sa sujet-la, deux-trois semaine apré, li ti ecrire: “Finalement, mo pé commence comprend la verité concernant la mort. Mo extra content pou aprann ki kan pou ena resurrection, nou pou kapav joinde bann dimoune ki nou content, ki finn mort. Mo esperé ki Royaume Bondié pa tardé pou vini.”

Servi la Bible dan enn fason ki convaink bann dimoune

14. Ki sa vedir convaink bann dimoune ki pé ecoute nou?

¹⁴ Pou nou servi la Bible dan enn fason efficace dan nou ministere, li pa assez ki nou zis cite bann verset. Paul ti “convaink” bann dimoune kan li ti koz avek zot, ek nou aussi nou bizin faire pareil. (Lire Actes 19:8, 9; 28:23.) “Convaink” vedir “faire enn kikenn accepté enn l’opinion.” Sa dimoune ki nou finn reussi convaink-la li “tellement sur, ki [li] mette so confiance dan enn [kitsoz].” Kan nou convaink enn dimoune pou accepté enn l’enseignement la Bible, nou faire li mette so confiance dan sa l’enseignement-la. Pou nou kapav faire sa, nou bizin convaink sa dimoune ki pé ecoute nou-la ki seki nou pé dire, li vrai. Anou guetté dan ki fason nou kapav faire sa.

15. Couma ou kapav dirige l’attention lor la Bible dan enn fason ki pousse bann dimoune ena respé pou li?

¹⁵ Dirige l’attention lor Parole Bondié dan enn fason ki pousse bann dimoune pou ena respé pou li. Zis avant ou montré enn verset, attire l’attention dimoune-la lor l’importance pou koné ki Bondié pensé lor sa sujet-la. Apré ki ou finn pose enn question ek konn l’opinion dimoune-la, kitfois ou kapav dire: ‘Anou guetté couma nou kapav koné ki Bondié pensé lor sa sujet-la.’ Ou-soit ou kapav demandé: ‘Ki Bondié ena pou dire lor sa situation-la?’ Kan ou faire sa avant ou montré enn verset, sa pou montré dimoune-la ki la Bible c’est enn livre ki Bondié inn faire ecrire ek lerla sa pou aide li ena enn grand respé pou la Bible. Li surtout bien important ki nou faire sa kan nou pé rann temoignage ar enn kikenn ki croire dan Bondié mais ki pa trop koné ki la Bible enseigné.—Ps. 19:7-10.

16. Ki pou aide ou pou explik bann verset couma bizin?

¹⁶ Faire plus ki zis lire bann verset; explik zot. Paul ti ena l’habitude pou ‘cite bann passage pou explik ek pou prouve’ bann kitsoz ki li ti pé enseigné. (Actes 17:3) Souvent dan enn verset la Bible ena plus ki enn sel point, ek kitfois ou bizin mette l’accent lor bann expression ki applik ar seki ou pé dire. Ou kapav faire sa kan ou repete bann mot ki koz lor bann point principal, ou-soit kan ou pose bann question ki pou aide dimoune-la pou trouve sa bann point-la. Lerla, explik signification partie sa verset-la. Apré sa, aide dimoune-la pou trouvé couma sa verset-la applik ar li personnellement.

17. Couma ou kapav raisonne lor la Bible dan enn fason pou convaink lezot?

¹⁷ Raisonne lor la Bible dan enn fason ki pou convaink bann dimoune. Avek conviction, Paul ti “raisonne avek [bann dimoune] lor bann l’Ecriture” ek li ti servi bann supplication sincere ek enn raisonnement logik pou faire sa. (Actes 17:2, 4) Pareil couma li, faire tou seki ou kapav pou touche leker sa dimoune ki pé ecoute ou-la. “Tire” seki ena dan so leker par bann question ki montré enn l’interet personnel pou li. (Prov. 20:5) Evité pou montré-ou trop direct. Presente ou bann argument dan enn fason clair ek logik. Ou bizin appuye zot par bann preuve ki donne satisfaction dimoune-la. Seki ou dire bizin basé dan enn fason solide lor Parole Bondié. Au lieu ki ou lire deux ou-soit trois verset la Bible vite-vite, li pli bon ki ou servi enn sel verset bien, kan ou explik ek donne bann l’exemple pou faire bien comprend enn point. Si ou servi bann renseignement ki confirme seki ou pé dire, sa aussi kapav ‘ajoute lor ou la levre capacité pou convaink lezot.’ (Prov. 16:23) Parfois, li kapav necessaire ki ou faire bann recherche ek ou donne plus renseignement. Sa madame 93 an ki nou ti mentionné avant-la, ti envie koné kifer l’enseignement lor enn nâme (ou-soit enn l’esprit) immortel, ti tellement populaire. Pou convaink li pou accepté seki la Bible enseigné lor sa sujet-la, li ti bien important pou explik li ki coté sa l’enseignement-la sorti ek couma sa finn rente dan la plupart religion ki ena dan le monde.b

Contigne servi li dan enn fason efficace

18, 19. Kifer nou bizin contigne manié “l’epée l’esprit” dan enn fason efficace?

¹⁸ La Bible dire: “Scene sa le monde-la pé changé.” Bann mauvais dimoune pé vinn pli pire. (1 Cor. 7:31; 2 Tim. 3:13) Alors, li bien important ki nou contigne detruire “bann kitsoz ki’nn bien enraciné” kan nou servi “l’epée l’esprit, setadir, parole Bondié.”

¹⁹ Nou bien content ki nou ena Parole Bondié, la Bible, ek pou servi so message bien puissant pou deracine bann fausse l’enseignement ek pou touche leker bann dimoune sincere! Pena okenn kitsoz ki bien enraciné, ki pli puissant ki sa message-la. Alors, anou faire bann zeffort sincere pou manié “l’epée l’esprit” dan enn fason efficace dan travail ki Bondié inn donne nou pou faire, setadir, pou preche so Royaume.

[Notes]

Ki ou finn aprann?

• Ki pouvoir Parole Bondié ena?

• Couma nou kapav “servi parole la verité couma bizin”?

• Ki l’effet message ki trouve dan la Bible kapav ena lor “bann kitsoz ki’nn bien enraciné”?

• Couma ou kapav ameliore ou capacité pou convaink bann dimoune dan ou ministere?

[L’encadré page 12]

Bondié dan enn fason ki convaink bann dimoune

▪ Faire tou pou ki bann dimoune respecté la Bible

▪ Explik bann verset

▪ Raisonne dan enn fason ki convaink bann dimoune pou ki ou kapav touche zot leker

[Zimage page 20]

Ou bizin aprann pou servi “l’epée l’esprit” dan enn fason efficace