“Koz parole Bondié avek courage”

“Zot . . . ti rempli avek l’esprit saint ek zot ti pé koz parole Bondié avek courage.”—ACTES 4:31.

1, 2. Kifer nou bizin faire zeffort pou vinn efficace dan nou ministere?

TROIS jour avant so la mort, Jésus ti dire so bann disciple: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” Apré so resurrection ek avant li ti monte dan le ciel, Jésus ti donne so bann disciple enn mission. Li ti dire zot ‘faire bann disciple parmi bann dimoune dan tou bann nation, enseigne zot pou suive tou bann commandement ki li ti donne zot.’ Li ti promette zot ki li ti pou avek zot “toulé-jour ziska la fin sa systeme-la.”—Mat. 24:14; 26:1, 2; 28:19, 20.

² En tant ki Témoins de Jéhovah, nou participe avek zele dan enn travail ki finn commencé dan premier siecle. Pena enn lot l’activité ki ena mem l’importance ki predication Royaume Bondié ek faire bann disciple, enn l’activité ki sauve la vie bann dimoune. Alors, li bien important ki nou efficace dan nou ministere! Dan sa lartik-la, nou pou trouvé couma, kan l’esprit saint dirige nou, sa aide nou pou koz avek courage dan nou ministere. Deux lartik ki suive pou montré couma l’esprit Jéhovah kapav dirige nou pou enseigne dan enn fason efficace ek pou preche avek perseverance.

Nou bizin courage

3. Kifer nou bizin courage pou preche Royaume Bondié?

³ C’est enn grand privilege ki nou ena pou faire sa travail ki Bondié inn donne nou pou preche so Royaume-la. Mais parfois li difficile. Alors ki certain dimoune bien disposé pou accepté la bonne nouvelle lor Royaume Bondié, ena beaucoup ki ressemblé bann dimoune ki ti vive dan lepok Noé. Jésus ti dire ki zot “pa ti prend compte, ziska ki deluge ti vini ek ti balié zot tou.” (Mat. 24:38, 39) Ena aussi ki bouffonne nou ou-soit ki opposé ar nou. (2 Pierre 3:3) Nou kapav gagne l’opposition ar gouvernement, ar nou bann camarade lekol ou-soit travail, ou-soit-mem ar bann membre nou famille. Avek tousala, nou ena aussi nou prop faiblesse, kitfois nou timide ou-soit nou peur ki dimoune rejette nou. Beaucoup kitsoz kapav faire nou trouve sa difficile pou koz “avek franchise” ek pou dire parole Bondié avek “courage.” (Éph. 6:19, 20) Pou nou kapav perseveré dan predication, nou bizin courage. Ki kapav aide nou pou gagne sa courage-la?

4. (a) Ki vedir courage? (b) Couma l’apotre Paul ti prend beaucoup courage pou koz avek bann Thessalonicien?

⁴ Mot grec ki finn traduire par “courage” vedir “franchise ek dire bann kitsoz dan enn fason clair sans passe par quatre chemin.” Sa mot-la donne l’idée “[enn dimoune ki ena] l’assurance ek ki pa peur nanyin.” Koz avek courage pa vedir mank tact ou-soit koz brite. (Col. 4:6) En mem temps ki nou koz avek courage, nou envie aussi vive en paix avek tou dimoune. (Rom. 12:18) En plus, kan nou preche la bonne nouvelle lor Royaume Bondié, nou bizin koz avek courage mais en mem temps avek tact pou ki nou pa offense bann dimoune sans faire expré. Oui, pou nou ena courage, nou bizin ena bann lezot qualité ek nou bizin faire zeffort pou developpe sa bann qualité-la. Nou pa gagne sa qualité courage-la par nou prop la force, ni kan nou compte lor nou-mem. Apré ki l’apotre Paul ek so bann compagnon ti ‘ bien gagne maltraité dan la ville Philippes,’ couma eski zot ti “prend beaucoup courage” pou koz avek bann Thessalonicien? Paul ti ecrire: “Grace a nou Bondié.” (Lire 1 Thessaloniciens 2:2.) Jéhovah kapav tire la peur ki nou ena ek donne nou courage pareil couma Li ti donne Paul.

5. Couma Jéhovah ti donne Pierre, Jean ek lezot disciple, courage?

⁵ Kan ‘bann chef [le peuple], bann ancien ek bann scribe’ ti menace l’apotre Pierre ek Jean, sa bann zapotre-la ti dire: “Si devant Bondié li bon ki nou ecoute zot plutot ki nou ecoute Bondié, jugé zot-mem. Mais nou, nou pa kapav arrete koz lor bann kitsoz ki nou finn trouvé ek tendé.” Au lieu ki zot ti prié pou demann Bondié arrete sa persecution ki zot ti pé gagné-la, zot ek bann lezot chretien ti faire sa supplication-la: “Jéhovah, prend compte zot menace, ek permette ki to bann esclave contigne annonce to parole avek courage.” (Actes 4:5, 19, 20, 29) Couma eski Jéhovah ti reponn zot la priere? (Lire Actes 4:31.) Jéhovah ti aide zot pou prend courage grace a so l’esprit saint. L’esprit saint Bondié kapav faire pareil pou nou. Alors, couma eski nou kapav gagne l’esprit saint Bondié ek laisse sa l’esprit-la dirige nou dan nou ministere?

Couma nou pou gagne courage?

6, 7. Par ki fason pli direct nou kapav gagne l’esprit saint Bondié? Donne bann l’exemple.

⁶ Fason pli direct pou gagne l’esprit saint c’est demann sa Bondié. Jésus ti dire bann dimoune ki ti pé ecoute li: “Mem si zot, mauvais couma zot été, zot konn donne zot zenfant seki bon, kifer nou Papa ki dan le ciel pa pou donne encore plus l’esprit saint bann ki demann Li?” (Luc 11:13) Oui, nou bizin touletan prié pou gagne l’esprit saint. Si, certain l’aspect nou ministere, par exemple predication lor chemin, rann temoignage informel, ou-soit predication dan bann territoire commercial, faire nou peur, nou kapav prié Jéhovah pou gagne so l’esprit saint ek demann Li pou aide nou pou gagne courage necessaire.—1 Thess. 5:17.

⁷ C’est seki enn soeur ki appel Rosa ti faire.a Enn jour, kan Rosa ti dan so travail, enn professeur avek ki li travail ti pé lire enn rapport ki sorti dan enn lot lekol concernant bann zenfant ki gagne maltraité. Sa professeur-la ti tellement bouleversé par seki li ti pé lire, ki li ti criyé: “Kot sa le monde-la pé allé?” Rosa pa ti kapav laisse sa l’occasion-la passé sans ki li rann li temoignage. Ki li ti faire pou gagne courage pou koz avek li? Rosa dire: “Mo ti prié Jéhovah ek mo ti demann Li so l’esprit saint pou aide moi.” Rosa ti’nn kapav donne enn bon temoignage ek prend enn rendez-vous pou koz plus lor sa sujet-la. Anou prend aussi l’exemple enn tifi cinq an ki appel Milane, ki reste dan la ville New York. Milane dire: “Avant mo al lekol, mo mama ek moi touletan nou prié Jéhovah.” Pou ki kitsoz zot prié? Pou ki Milane gagne courage pou prend position pou so Bondié ek pou koz lor Li! So mama dire: “Sa finn aide Milane pou explik so position en rapport avek l’anniversaire ek bann lezot fête, ek pou pa participe dan sa bann fête-la.” Eski sa bann l’exemple-la pa montré ki la priere kapav aide nou pou ena courage?

8. Ki nou kapav aprann ar prophete Jérémie concernant courage?

⁸ Reflechi aussi lor seki ti aide prophete Jérémie pou gagne courage. Kan Jéhovah ti faire li vinn prophete pou bann nation, Jérémie ti reponn: “Mo pa mem koné couma pou kozé, parski mo encore enn jeune garson.” (Jér. 1:4-6) Mais avek le temps, Jérémie ti vinn enn kikenn ki ti tellement perseveré ek ti zelé dan so l’activité predication, ki beaucoup ti considere li couma enn prophete malheur. (Jér. 38:4) Pou environ 65 an, li ti annonce avek courage bann jugement Jéhovah. Bann Israélite ti tellement konn li pou predication ki li ti faire sans okenn la peur ek avek courage—ki apepré 600 an plitar, kan Jésus ti koz avek courage, certain ti croire ki c’est Jérémie ki ti’nn ressuscité. (Mat. 16:13, 14) Couma prophete Jérémie, ki avant ti hesité pou preché, ti surmonte so timidité? Li dire: “Dan mo leker, [parole Bondié] ti couma enn difé ki ti bloké dan mo bann lezo; ek mo ti fatigué tini li.” (Jér. 20:9) Oui, parole Jéhovah ki ti ena enn grand pouvoir, ti pousse Jérémie pou kozé.

9. Kifer parole Bondié kapav ena mem l’effet lor nou couma li ti ena lor Jérémie?

⁹ Dan lettre ki l’apotre Paul ti ecrire bann chretien hébreu, li ti dire zot: “Parole Bondié, li vivant ek li puissant, li pli fité ki enn l’epée ki coupe deux coté, ek li percé ziska li separe nâme ek l’esprit, bann joint ek zot la moelle, ek li kapav decouvert bann pensée ek bann l’intention ki ena dan leker.” (Héb. 4:12) Message, ou-soit parole Bondié, kapav ena mem l’effet lor nou pareil couma li ti ena lor Jérémie. Nou bizin rappel ki mem si finn servi bann zom pou ecrire la Bible, pena sagesse humain ladan, parski c’est enn livre ki finn inspiré par Bondié. Dan 2 Pierre 1:21, nou lire: “Jamais bann prophetie finn annoncé par volonté bann dimoune, mais c’est grace a l’esprit saint ki’nn pousse zot, ki bann dimoune inn dire seki Bondié ti ena pou dire.” Kan nou prend le temps pou faire nou l’etude personnel la Bible en profondeur, nou l’esprit rempli ar message ki l’esprit saint finn inspire bann dimoune pou ecrire. (Lire 1 Corinthiens 2:10.) Sa message-la kapav vinn pareil “couma enn difé” dan nou ek nou pa pou kapav garde li pou nou.

10, 11. (a) Couma nou bizin etudié la Bible si nou envie gagne courage pou kozé? (b) Cite au moins enn kitsoz ki ou finn decidé pou faire pou ameliore qualité ou l’etude personnel.

¹⁰ Pou ki nou l’etude personnel la Bible ena enn grand l’influence lor nou, nou bizin faire li dan enn fason ki message ki trouve dan la Bible touche nou leker ek ena enn l’effet lor seki nou été au fond nou-mem. Par exemple, dan enn vision ki prophete Ézékiel ti gagné, Bondié ti donne li l’ordre pou mange rouleau enn livre kot ti ena enn message bien severe ki li ti bizin annonce enn peuple ki pa ti’lé ecouté. Ézékiel ti bizin absorbe sa message-la net ek faire sa vinn enn partie dan li-mem. Lerla, li ti pou trouvé ki sa travail pou annonce sa message-la, li enn bon kitsoz; bon pareil couma gout di-miel.—Lire Ézékiel 2:8–3:4, 7-9.

¹¹ Nou dan mem situation ki Ézékiel. Zordi, beaucoup dimoune zot pa envie ditou tann seki la Bible dire. Si nou envie perseveré dan predication, li important ki nou etudié la Bible dan enn fason ki pou permette nou bien comprend so message ek croire seki li dire. Nou bizin faire nou l’etude personnel regulierement, pa zis kan nou gagne le temps. Nou bizin ena mem desir ki enn psalmiste ki ti chanté: “Laisse bann parole ki sorti dan mo la bouche ek meditation mo leker faire toi plaisir. Ah Jéhovah toi ki mo grand Roche ek mo Sauveur.” (Ps. 19:14) Alors li bien important ki nou prend le temps pou medite lor seki nou lire, pou ki bann verité ki trouve dan la Bible rente dan pli profond nou leker! Oui, nou bizin faire zeffort pou ameliore qualité nou l’etude personnel.b

12. Kifer bann reunion aide nou ek permette l’esprit saint dirige nou?

¹² Enn lot fason pou nou gagne l’esprit saint Jéhovah c’est kan nou “interesse-nou sakenn ar nou camarade, pou encourage sakenn parmi nou pou montré l’amour, ek faire bann bon action, sans ki nou neglige nou bann rassemblement.” (Héb. 10:24, 25) Kan nou faire zeffort pou assisté reunion regulierement, pou ecoute bien, ek pou applik seki nou aprann, c’est bann bon fason pou laisse l’esprit saint guide nou. Apré tou, eski c’est pa l’esprit saint Jéhovah ki donne direction a travers la congregation?—Lire Révélation 3:6.

Bann bienfait ki nou gagné kan nou ena courage

13. Ki nou kapav aprann ar seki bann chretien premier siecle ti faire?

¹³ L’esprit saint c’est la force pli puissant ki ena dan l’univers, ek li kapav donne bann dimoune la force pou faire volonté Jéhovah. Grace a so l’influence, bann chretien premier siecle ti faire enn travail extraordinaire dan predication. Zot ti preche la bonne nouvelle “dan tou creation ki trouve enba le ciel.” (Col. 1:23) Kan nou reflechi ki la plupart parmi zot ti bann dimoune “ordinaire ki pa ti ena enn grand l’instruction,” li clair ki ti ena enn la force pli superieur ki seki zot ti ena, ki ti pé motive zot.—Actes 4:13.

14. Ki kapav aide nou pou vinn “bien zelé grace a l’esprit saint”?

¹⁴ Kan nou vive en accord avek direction ki l’esprit saint donne nou, sa aussi kapav motive nou pou accompli nou ministere avek courage. Kan nou prié touletan pou gagne l’esprit saint, kan nou etudié avek serieux ek en profondeur, kan nou medite lor seki nou lire avek l’aide la priere, ek kan nou assisté reunion regulierement, tousala faire nou gagne bann bienfait ki kapav aide nou pou vinn “bien zelé grace a l’esprit saint.” (Rom. 12:11) Concernant “enn certain Juif ki ti appel Apollos, ki ti né dan la ville Alexandrie, enn bon orateur, ki ti vinn Éphèse,” la Bible dire: “Parski li ti bien zelé grace a l’esprit saint, li ti koz ek li ti enseigne dan enn fason exact bann kitsoz ki ti concerne Jésus.” (Actes 18:24, 25) Kan nou “bien zelé grace a l’esprit saint,” nou kapav ena plus courage dan predication porte en porte ek kan nou rann temoignage informel.—Rom. 12:11.

15. Ki bienfait nou gagné kan nou preche avek plus courage?

¹⁵ Kan nou ena plus courage pou rann temoignage, sa ena enn bon l’effet lor nou. Nou ena enn pli bon l’attitude parski nou comprend pli bien l’importance nou l’activité ek bann bienfait ki li amené. Nou l’enthousiasme vinn pli grand parski nou gagne plus la joie kan nou efficace dan nou ministere. Nou ena plus zele parski nou plus conscient ki pa reste beaucoup le temps pou preché zordi.

16. Ki nou bizin faire si nou zele pou nou ministere finn diminué?

¹⁶ Ki nou kapav faire si nou finn perdi zele ki nou ti ena avant pou nou ministere? Nou pou bizin examine nou-mem dan enn fason honnete. Paul ti ecrire: “Contigne testé zot-mem pou guetté si zot dan la foi, ek contigne examiné seki zot-mem zot été.” (2 Cor. 13:5) Demann ou-mem: ‘Eski mo encore toujours bien zelé grace a l’esprit saint? Eski mo prié Jéhovah pou gagne so l’esprit saint? Eski mo bann la priere montré ki mo compte lor Li pou aide moi pou faire so volonté? Eski dan mo bann la priere mo dire Jéhovah ki mo apprecié sa ministere ki Li finn confié nou-la? Ki bann l’habitude mo ena en rapport avek mo l’etude personnel? Ki quantité le temps mo prend pou medite lor seki mo lire ek ecouté? Eski mo implik-moi a fond dan bann reunion?’ Si nou medite lor bann question coumsa, sa kapav aide nou pou trouve nou bann faiblesse ek pou prend bann disposition pou corrige sa bann faiblesse-la.

Laisse l’esprit saint Bondié faire ou vinn enn kikenn ki ena courage

17, 18. (a) Ki nou kapav dire lor travail predication ki pé faire zordi? (b) Couma nou kapav ena “enn grand franchise” kan nou annonce la bonne nouvelle lor Royaume Bondié?

¹⁷ Apré so resurrection, Jésus ti dire so bann disciple: “Zot pou gagne pouvoir kan l’esprit saint pou vinn lor zot, ek zot pou vinn mo bann temoin dan Jérusalem, partout dan Judée ek Samarie, ek ziska dan region pli loin lor la terre.” (Actes 1:8) Sa travail ki ti’nn commencé dan sa lepok-la, encore pé faire zordi couma jamais pa finn faire avant. Preské sept million Témoins de Jéhovah pé annonce message lor Royaume Bondié dan plus ki 230 pays, zot passe apepré 1,5 milliard l’heure par an dan zot ministere. Li vrai-mem enn grand privilege pou participe avek zele dan sa travail ki jamais pa pou ena encore!

¹⁸ Pareil couma dan premier siecle, c’est l’esprit saint Bondié ki pé dirige l’activité predication ki pé faire lor la terre zordi. Si nou laisse l’esprit saint dirige nou, nou pou ena “enn grand franchise” dan nou ministere. (Actes 28:31) Alors, anou faire tou seki nou kapav pou laisse l’esprit saint dirige nou a mesure ki nou annonce la bonne nouvelle lor Royaume Bondié!

[Notes]

Ki ou finn aprann?

• Kifer nou bizin ena courage pou preche parole Bondié?

• Ki ti aide bann premier chretien pou koz avek courage?

• Couma nou kapav gagne courage?

• Ki bienfait nou gagné kan nou ena courage?

[Zimage page 16]

Couma bann parent kapav aide zot zenfant pou gagne courage?

[Zimage page 17]

Enn la priere courte kapav aide ou pou prend courage dan ou ministere