Eski ou defann Parole Bondié?
1 Bann vrai chrétien defann Parole Bondié avek zèle dan enn lé-monde ki souvent pa donne la Bible valeur ki li merité. Parski nou sur ki “tou l’Ecriture finn inspiré par Bondié,” nou d’accord avek Jésus Christ, ki ti reconette dan enn la-priere ar Jéhovah: “To parole li la verité.” (2 Tim. 3:16; Jean 17:17) Couma nou kapav defann Parole Bondié dan enn fason efficace?
2 Aprann bann verset la Bible: Pena okenn doute ki Jésus ti serieux dan so l’etude Parole Bondié. Sa ti permette li pou enseigné dapré la Bible toute longue so ministere. (Luc 4:16-21; 24:44-46) Couma nou kapav faire pou rappel enn bon quantité verset biblik? C’est kan nou lire la Bible chaque jour ek kan nou medite lor enn verset ki nou trouve bien encourageant ou-soit ki pou utile dan nou ministere. Kan nou prepare nou bann reunion, nou bizin rod bann verset ki mentionné ek lire zot direct dan la Bible. Nou kapav aussi prepare enn commentaire lor sa bann verset-la. Pendant bann reunion, nou bizin suive dan nou la-Bible kan enn orateur lire enn verset. Kan nou aprann bann text la Bible, sa pou aide nou “konn servi parole la verité couma bizin.”—2 Tim. 2:15.
3 Laisse la Bible kozé: Kan nou preché nou bizin laisse la Bible donne bann reponse. Par exemple, nou bizin faire zeffort pou partage enn verset la Bible avek dimoune ki nou joinde, si li possible. Si li pose enn question ou-soit li pa d’accord lor enn kitsoz, li preferable servi la Bible pou donne enn reponse. Mem kan enn dimoune occupé, nou toujours kapav partage enn pensée la Bible. Nou kapav dire: “Avant mo allé, permette moi montré ou zis ki enn verset dire.” Si possible, lire enn passage directement dan la Bible ek laisse dimoune-la suive avek ou.
4 Kan ti montré enn dimoune ki la Bible dire lor la Trinité, li ti dire: “Mo finn al l’eglise toute longue mo la-vie, ek mo pa ti mem koné ki la Bible dire sa!” Li’nn accepté enn l’etude la Bible dé-suite. Jésus ti dire ki so bann brebis pou ecoute so la-voix. (Jean 10:16, 27) Pli bon fason pou bann ki ena leker sincere reconette la verité, c’est kan zot trouve li direct dan la Bible. Alors anou defann Parole Bondié, parole la verité!