Couma pou prepare enn presentation periodik
1. Kifer li pli bon ki nou prepare nou prop presentation periodik au lieu ki nou zis aprann par coeur enn model presentation ki trouve dan Ministère du Royaume?
1 Kitfois ou pé demann ou, ‘Kifer nou bizin prepare bann presentation periodik alors ki nou kapav trouve sa dan chaque Ministère du Royaume?’ Mem si beaucoup proclamateur finn trouve sa bien utile, mais li toujours important ki nou faire nou prop preparation. Enn presentation ki bien efficace dan enn territoire kitfois pa pou efficace dan enn lot territoire. Alors, ou pa obligé presente bann magazine exact pou exact couma ena dan bann model presentation dan Ministère du Royaume. Mem si nou decide pou servi sa bann model presentation-la, li pli bon ki nou dire bann l’idée-la dan nou prop mot.
2. Ki ou bizin faire pou decidé ki lartik ou pou presente enn dimoune?
2 Choisir enn lartik: Apré ki ou’nn fini lire periodik-la, choisir enn lartik ki pou bien adapté avek ou territoire ek ki ou’nn trouve interessant. Ou conviction ek ou l’enthousiasme kan ou pé presente sa lartik-la, pou pousse sa dimoune ki pé ecouté-la pou envie lire sa lartik-la li aussi. Mem si ou pé attire l’attention zis lor enn sel lartik ki pou interesse bann dimoune dan ou territoire, li bon ki ou konn bann lezot lartik ki ena dan periodik-la aussi. Sa pou permette ou adapté ou presentation si ou arrivé joinde enn dimoune ki pli interessé avek enn lot sujet.
3. Ki qualité introduction ou servi pou ki ou gagne bann pli bon resultat?
3 Pose enn question: Apré sa reflechi bien lor ou bann premier parole. Ou l’introduction li important. Defois li bon ki nou pose dimoune-la enn question ki pou faire li reflechi. Sa pou augmente so l’interet pou sa lartik ki nou pé pense pou presente li-la. Souvent, si nou demann zot ki zot pensé lor tel ou tel kitsoz, nou gagne bann pli bon resultat. Mais evite pose bann question ki pou mette dimoune-la mal a l’aise ou-soit ki pou provok li.
4. Ki bienfait nou pou gagné kan nou lire enn verset la Bible avek enn dimoune, si situation permette?
4 Lire enn verset la Bible: Enn dernier kitsoz, choisir enn verset ki ou pou lire avek sa dimoune-la, si situation permette. Ou kapav choisir enn verset ki trouve dan lartik ki ou pou presenté-la. Kan nou lire enn verset la Bible avek enn dimoune, sa permette li trouvé ki nou message sorti dan Parole Bondié. (1 Thess. 2:13) Sa pou permette li gagne enn temoignage mem si li refuse pou prend bann periodik. Certain finn augmente l’interet bann dimoune kan zot inn lire enn verset la Bible avant ki zot pose enn question precis. Kitfois ou kapav introduire ou verset coumsa: “Mo ti pou content koné ki ou pensé lor sa verset la Bible-la.” Apré sa, attire l’attention dimoune-la lor enn point dan periodik-la ki ena enn rapport avek verset-la. Faire bann ti commentaire pou augmente l’interet dimoune-la avant mem ki ou presente li periodik-la.
5. Ki bann kitsoz ou bizin rappel bien kan ou pé prepare enn presentation periodik?
5 Pena okenn regle concernant ki pou dire kan nou pé offert bann periodik. En general, li pli bon ki nou faire enn ti presentation bien simple. Servi enn presentation ki ou habitué servi ek ki faire ou gagne bann bon resultat. Mette l’accent lor grand valeur nou bann periodik ek montré ou l’enthousiasme. Si ou’nn bien preparé, ou pou kapav place La Tour de Garde ek Réveillez-vous ! dan enn fason efficace avek bann dimoune ki ‘zot leker bien disposé pou la vie eternel.’—Actes 13:48.