Offert bann periodik ki rann temoignage lor la verité
1. Ki role La Tour de Garde ek Réveillez-vous ! ena?
1 La Tour de Garde pé annonce Royaume Jéhovah ek Réveillez-vous !, ena enn role bien important dan nou predication concernant Royaume Bondié ek pou faire bann disciple. (Mat. 24:14; 28:19, 20) Nou gagne beaucoup la-joie pou presente sa deux magazine ki vinn dan l’heure ki bizin-la regulierement kan nou participe dan different l’aspect nou ministere.
2. Ki bann changement finn ena dan La Tour de Garde ek Réveillez-vous !, ek kifer?
2 Dan bann l’année ki’nn passé, nou finn trouve bann changement dan sa bann periodik-la, dan zot grandeur ek bann sujet ki ena ladan, ek aussi dan bann methode ki nou servi pou presente zot. Finn faire sa bann changement-la pou kapav faire sa bann periodik-la vinn pli attirant ek pli efficace pou ki message lor Royaume Bondié kapav touche leker ‘tou sorte qualité dimoune, ek coumsa zot kapav sauvé ek gagne enn connaissance exact lor la verité.’—1 Tim. 2:4.
3. Couma pou servi bann magazine dan predication?
3 Depuis janvier 2006, nou finn bien habitué servi different presentation pou Réveillez-vous !, magazine ki parette enn fois par mois. Aster nou pou faire pareil avek La Tour de Garde français. Nou pou servi different presentation pou offert zis enn sel parmi sa deux Tour de Garde ki nou pou gagné toulé-mois-la. Ena bann modele pou presente sa bann periodik-la lor dernier page Ministère du Royaume. Normalement, sa bann modele-la mette l’accent lor bann lartik ki trouve dan commencement enn periodik, mais parfois zot basé lor lezot lartik ki beaucoup dimoune trouve interessant. Sa bann presentation-la pou pli efficace si nou konn bien seki ena dan sa bann lartik-la ek si nou servi nou prop mot pou adapté sa bann presentation-la dan nou territoire.
4. Kifer li kapav utile pou servi lezot presentation a part bann presentation ki ena dan Ministère du Royaume?
4 Mem si dan Ministère du Royaume ena deux qualité presentation pou chaque periodik, senti-ou libre pou servi n’importe ki lot presentation. Kifer? Parski enn lot lartik kapav interesse pli beaucoup dimoune dan ou territoire. Ou-soit, ou senti ki ou kapav faire enn presentation pli efficace parski sujet-la koz lor enn kitsoz ki interesse ou plus.
5. Avant ou prepare enn presentation periodik, ki ou bizin faire?
5 Couma pou prepare ou presentation: D’abord ou bizin bien konn lartik ki ou’nn choisir pou presenté. Pa touletan ki ou pou kapav konn bien tou bann lartik dan enn magazine avant ou commence presente li dan predication. Mais, ou bizin enthousiaste ek sincere en rapport avek bann lartik ki ou finn choisir pou presenté. Ou kapav faire sa zis si ou konn bien lartik ki ou presenté-la.
6. Couma nou kapav prepare nou prop presentation?
6 Apré, ou bizin souple kan ou prepare bann premier parole ki ou pou dire enn dimoune. Pou commence enn conversation, ou kapav servi enn question interessant ki pou faire dimoune-la envie konn plus lor enn sujet ki ena dan periodik-la. Touletan compte lor la force Parole Bondié pou touche leker bann dimoune. (Héb. 4:12) Choisir enn verset approprié ki concerne sujet ki ou pé presenté. Li preferable servi enn verset ki’nn cité ou-soit ki’nn zis mentionné dan lartik ki ou pé presenté. Guetté couma ou kapav associé sa verset-la avek lartik ki ou pé presenté.
7. Couma nou kapav contigne ameliore nou bann presentation?
7 Saisi chaque l’occasion: Pou ki enn presentation vrai-mem vinn efficace, nou bizin servi li. Preche ensam avek la congregation pou presente bann periodik dan samedi. Offert bann periodik avek bann dimoune ki finn deja accepté lezot publication dan le passé. Touletan offert bann periodik avek ou bann etudiant la Bible, ek bann lezot dimoune ki là kan ou pé faire enn visite. Ou kapav place bann periodik avek bann dimoune avek ki ou kozé kan ou faire shopping, kan ou voyagé, ou-soit kan ou attann kot docteur. Ameliore ou bann presentation a mesure ki ou servi zot pendant le mois.
8. Kifer nou kapav dire ki pena okenn periodik ki couma La Tour de Garde ek Réveillez-vous !?
8 Pena okenn periodik ki couma La Tour de Garde ek Réveillez-vous ! Zot glorifié Jéhovah en tant ki Souverain l’univers. (Actes 4:24) Zot reconforte bann dimoune avek la bonne nouvelle concernant Royaume Bondié, ek zot encourage bann dimoune pou ena la foi en Jésus Christ. (Mat. 24:14; Actes 10:43) En plus, zot suive bann evenement ki pé passé dan le monde a mesure ki zot pé realise bann prophetie ki ena dan la Bible. (Mat. 25:13) Aide bann dimoune dan ou territoire pou tire profit ar sa bann periodik-la kan ou prepare-ou pou offert zot chaque fois ki ou gagne l’occasion.
9. Couma nou kapav jette base pou enn nouvelle visite?
9 Kan ou reussi place enn periodik avek enn dimoune, ou-soit mem si ou’nn zis gagne enn ti conversation amical lor bann kitsoz spirituel, fini prepare enn question ou-soit enn kitsoz ki pou faire dimoune-la reflechi. Sa kapav ouvert la porte pou enn nouvelle visite ek enn lot conversation spirituel. Si nou zelé pou seme bann la-grain la verité, nou kapav sur ki Jéhovah pou ouvert leker bann dimoune ki ena desir sincere pou konn Li ek pou servi Li.—1 Cor. 3:6.