Eski U Pe Travay U Minister Afon?
1 Dan liv Akt, nu lir ki bann disip Zezi ti travay zot minister kan zot ti rann bann dimunn “temwaynaz afon.” (Akt 2:40; 8:25; 28:23) Sa ti sirman lobzektif lapot Pol. (Akt 20:24) Eski u’si u pena sa mem lobzektif la antan ki minis bon nuvel? Kuma eski u kapav arive fer sa?
2 Prepar U Prezantasyon: Pu u kapav rann enn temwaynaz ki donn bann bon rezilta dan u minister, preparasyon byin inportan. Sa li sirtu vre kan pe prezant bann magazinn, pwiski bann size la tuletan sanze. Pu ekip nu pli byin, sa nimero Nu Minister Rwayom la pe lans enn nuvo lartik. Li truv dan sa kolonn ki agos la ek li donn enn lalis bann legzanp prezantasyon pu bann dernye nimero magazinn La Tour de Garde ek Réveillez-vous ! Sak magazinn pu fer resorti enn size ki atir buku dimunn. Kuma eski u kapav devlop sa bann ti prezantasyon la?
3 Swazir enn lide ki u panse pu donn pli bon rezilta dan u teritwar. Lir lartik la avek buku latansyon, ek not bann pwin ki dapre u, kapav sirtu pik lintere bann dimunn. Swazir enn pasaz Labib dan magazinn la ki ena enn rapor avek size ki u pe koze ek ki u kapav lir avek dimunn la. Azut enn ti konklizyon ki pu ankuraz dimunn la pu lir magazinn la ek si posib, dir li an detrwa mo ki li kapav fer enn ti donasyon pu travay ki bann Temwin Zeova pe fer dan lemond antye. Asterla, repet u prezantasyon.
4 Pans Pu Servi Labib: Avek enn bon preparasyon, suvan u kapav mem montre enn pasaz dan Labib kan u fer u prezantasyon. Par egzanp, dan buku landrwa bann proklamater ki ena lexperyans gayn bon rezilta kan zot prese avek Labib dan lamin. Apre ki zot finn dir dimunn la bonzur, zot servi sa prezantasyon la:
◼ “Nu pe demann bann dimunn si zot krwar ladan . . . “ Lir Zenez 1:1, ek apre demande: “Eski u dakor avek sa pasaz la?” Si dimunn la dakor, lerla dir: “Mwa usi mo dakor avek sa.” Me, eski u panse ki si Bondye finn kre tu kitsoz, sa vedir Li mem ki responsab mesanste usi?” Apre ki u finn remersye dimunn la pu so repons, lir Eklezyast 7:29. Uver liv Konesans paz 71, ek lir paragraf 2. Ankuraz dimunn la pu lir liv la. Si dimunn la pa dakor avek seki Zenez 1:1 dir, ankuraz li pu lir liv Création.
5 Swiv Tu Lintere: U pa pu kapav travay net u minister si u pa swiv lintere ki u truve. Kan u gayn enn bon konversasyon, mem si u pa finn plas magazinn uswa enn lot piblikasyon, not non dimunn la ek so ladres. Return vit pu vizit li pu ki kumsa u pa tarde pu devlop so lintere. Byinsir, propoz li enn letid Labib.
6 Dan premye syek, bann disip ti kone ki Zezi ti donn zot lord pu “donn temwynaz afon.” (Akt 10:42) Sa komannman la aplik ar nu’si, parski sa mem sel mwayin ki nu pu kapav fer bann disip. (Mat. 28:19, 20) Alor, anu fer tu nu posib pu travay nu minister afon.—2 Tim. 4:5.