Tus Leker U Etidyan
1 Avan ki li ti mont dan lesyel, Zezi ti dir so bann disip anseyn lezot pu “pratik” tu bann kitsoz ki li finn komann zot. (Matye 28:19, 20) Pu ki enn dimunn arive “pratik” bann komannman Kris, sa lanseynman la bizin tus so leker. (Psom 119:112) Kuma eski u kapav tus leker enn kikenn avek ki u pe fer letid?
2 Priye pu Gayn Direksyon Zeova: Fer bann disip, sa li travay Bondye. Pa nu kapasite personel ki fer nu reysi, me benediksyon Bondye. (Akt 16:14; 1 Korintyin 3:7) Donk, li inportan priye Zeova pu ed nu pu anseyn lezot laverite.—Izai 50:4.
3 Disern Seki Etidyan la Krwar: Kan nu kone seki bann dimunn krwar ek kifer zot krwar ladan, sa kapav ed nu pu kone ki pu dir pu tus zot leker. Kifer eski enn lanseynman an partikilye kapav atir enn dimunn? Ki finn konvink li pu krwar ladan? Si nu gayn sa bann ranseyman la, nu pu kapav koz avek disernman.—Akt 17:22, 23.
4 Devlop enn Rezonnman Lozik ki Baze lor Labib: Laverite bizin paret lozik pu etidyan la. (Akt 17:24-31) Nu bizin donn enn rezon solid pu nu lesperans. (1 Pyer 3:15) Me selman, nu bizin tuletan fer li dan enn bon manyer, ek avek pasyans.
5 Servi Bann Legzanp pu Donn Nu Lanseynman Plis Pwa: Bann legzanp pa zis fer etidyan la konpran pli fasilman, me zot tus usi so bann santiman. Zot inflyans so lespri ek so leker. Suvan Zezi ti servi bann legzanp. (Mark 4:33, 34) Byinsir, pu ki enn legzanp li efikas, li bizin adapte avek size ki nu pe egzamine, ek li bizin ena enn rapor avek lavi etidyan la.
6 Montre Ki Profi Gayne Kan Aksepte Laverite: Bann dimunn anvi kone ki profi zot pu gayne kan zot met an pratik seki zot aprann. Ed u etidyan pu truv sazes ki ena dan bann parol ki Pol finn ekrir dan 2 Timote 3:14-17.
7 Fode pa u dekuraze si ena ki pa aksepte u lanseynman. Pa tu leker ki pu aksepte laverite. (Matye 13:15) Kan mem sa, sertin vinn krwayan. (Akt 17:32-34) Alor, anu fer tu nu zefor pu tus leker bann dimunn avek bon nuvel ek pu ed ankor plis dimunn pu aksepte ek pu “pratik” seki Zezi finn komann nu.