Anou prepare-nou bien avant nou enseigne lezot
1. Kifer nou bizin faire zeffort pou aide nou etudiant apprecié seki li aprann kan nou conduire enn l’etude la Bible?
1 Avant nou conduire enn l’etude la Bible, nou bizin prepare-nou bien pou motive nou etudiant pou servi Jéhovah. Nou bann zeffort pou produire bann bon resultat si nou aide enn etudiant pou apprecié encore plus seki li aprann dan la Bible. Lerla, sa pou motive etudiant-la. (Deut. 6:5; Prov. 4:23; 1 Cor. 9:26) Mais couma nou kapav faire sa?
2. Couma la priere kapav aide nou pou prepare enn l’etude?
2 Prié avant ki ou prepare-ou: Parski c’est Jéhovah ki faire la verité poussé dan leker enn etudiant, li bon ki nou prié pou etudiant-la ek pou so bann besoin avant nou prepare-nou pou so l’etude. (1 Cor. 3:6; Jacq. 1:5) La priere kapav aide nou aussi pou koné couma nou kapav aide li encore plus pou rempli so leker “ar connaissance exact” lor volonté Jéhovah.—Col. 1:9, 10.
3. Couma nou kapav pense nou etudiant kan nou prepare-nou?
3 Pense etudiant-la: Jésus ti koné ki nou bizin pense nou l’auditoire pou nou kapav donne enn l’enseignement efficace. Dan au moins deux l’occasion, deux dimoune ti pose Jésus mem question: “Ki mo bizin faire pou gagne la vie eternel?” Chaque fois, li ti reponn dan enn fason different. (Luc 10:25-28; 18:18-20) Nou bizin pense nou etudiant kan nou prepare-nou. Ki texte la Bible nou pou lire avek li? Ki quantité paragraphe nou pou etudié? Ki point dan l’etude kapav difficile pou li comprend ou-soit pou accepté? Si nou fini mazinn bann question ki enn etudiant kapav posé, nou pou pli bien preparé pou donne li enn bon reponse.
4. Ki nou bizin pou faire enn bon preparation?
4 Faire enn revision: Mem si nou, nou finn etudié enn sujet plusieurs fois avant, mais avek sa etudiant-la c’est premier fois ki nou pou etudié sa avek li. Si nou envie touche so leker, li bien important ki nou pense nou etudiant kan nou prepare nou bien. Sa vedir ki nou-mem nou bizin faire seki nou dire etudiant-la faire: nou revise sujet-la, avek bann verset ki’nn cité ek kitfois nou kapav souligne bann point important.—Rom. 2:21, 22.
5. Couma nou kapav imite Jéhovah?
5 Jéhovah bien interessé dan progré ki chaque etudiant la Bible faire. (2 Pierre 3:9) Kan nou prend le temps pou prepare chaque l’etude biblik, nou montré ki nou ena mem l’interet ki Jéhovah.