Garde Bien
Bann l’etude biblik ki faire nou etudiant progressé
Ou pou trouvé ki finn compile bann point clé enn serie lartik ki finn ena lor bann l’etude biblik ki faire nou etudiant progressé, ki finn parette dan Ministère du Royaume. Garde sa supplement-la bien ek ou kapav guette li kan ou dirige bann l’etude la Bible. Kapav aussi attire l’attention lor bann sa point-la dan bann reunion ki faire avant predication, ek bann surveillant service kapav servi sa couma enn base pou zot discours ki zot faire, kan zot visite bann l’etude de livre.
1er partie: Ki été enn l’etude biblik?
Si ou ena bann discussion organisé regulierement lor la Bible ek dan enn bann publication ki servi pou l’etude, mem si li dure zis dé-trois minute, ou pé conduire enn l’etude la Bible. Si, apré ki ou’nn montré enn dimoune couma enn l’etude deroulé, ou’nn faire l’etude encore deux fois avek li, ek ou pensé ki l’etude-la pou contigné, ou kapav remette enn rapport l’etude.—kmCE 7/04 p. 1.
Bann publication ki servi pou faire l’etude
◼ Ki Bondye Pe Demann Nu?
◼ Konesans Ki Amenn ver Lavi pu Tuletan
◼ Ador Sel Vre Bondye
◼ Nou kapav servi brochure U Kapav Vinn Kamarad Bondye! avek bann dimoune ki pa trop konn lire.
2eme partie: Preparation avant nou dirige enn l’etude biblik
Nou bizin faire l’etude-la dan enn fason ki pou touche leker nou etudiant. Nou kapav faire sa grace a enn bon preparation ki adapté avek besoin nou etudiant.—kmCE 8/04 p. 1.
Couma faire sa preparation-la
◼ Prend le temps pou examine titre, bann sous-titre, ek bann zimage ki trouve dan chapitre ou-soit leson ki ou pou etudié-la.
◼ Rod reponse bann question ki’nn posé. Souligne zis bann mot ek bann expression important.
◼ Decidé ki bann verset ou pou lire pendant l’etude. Ecrire bann ti note dan la marge ou livre ou-soit ou brochure.
◼ Prepare enn ti revision bann point important.
Adapté leson-la dapré besoin ou etudiant
◼ Prié pou ou etudiant ek pou so bann besoin.
◼ Essaye pense bann point ki etudiant-la kapav gagne difficulté pou comprend ou-soit pou accepté.
◼ Demann ou-mem: Ki kitsoz li bizin comprend ou-soit li bizin amelioré pou li kapav progressé lor plan spirituel? Couma eski mo kapav touche so leker?
◼ Si necessaire, prepare enn illustration, enn l’explication, ou-soit enn serie question ki pou aide etudiant-la pou comprend enn point ou-soit enn verset.
3eme partie: Servi bann verset biblik enn fason efficace
Kan nou conduire bann l’etude biblik, nou l’objectif c’est pou faire “bann disciple.” Nou faire sa kan nou aide bann dimoune pou comprend, pou accepté ek pou applik l’enseignement biblik dan zot la-vie. (Mat. 28:19, 20; 1 Thess. 2:13) Alors, l’etude-la bizin centré lor la Bible.—kmCE 11/04 p. 4.
Tire bann l’enseignement dan Parole Bondié
◼ Montré etudiant-la couma rod bann verset biblik dan so prop la-Bible.
◼ Lire bann verset ki montré fondement biblik nou bann croyance.
◼ Servi bann question. Au lieu ki ou explik ou etudiant bann verset la Bible, demann li explik ou seki li’nn comprend.
◼ Reste simple. Evite essaye explik tou detail dan enn verset. Explik zis bann detail ki bizin pou faire ressorti point ki ou pé examiné.
◼ Faire bann application pratik. Aide etudiant-la pou trouvé couma bann verset biblik concerne li personnellement.
4eme partie: Forme bann etudiant pou prepare zot l’etude
Enn etudiant ki lire a l’avance chapitre ki li pou etudié, ki souligne bann reponse ek reflechi couma li kapav reponn dan so prop mot, li progressé rapidement lor plan spirituel. Alors, enn fois ki nou’nn etabli enn l’etude, nou kapav prepare enn leson ensam avek nou etudiant pou montré li couma faire sa preparation-la. Avek la majorité bann etudiant, li pou bon ki nou prepare enn chapitre ou-soit enn leson en entier.—kmCE 12/04 p. 1.
Souligne bann reponse ek ecrire bann note dan la marge
◼ Explik etudiant-la couma trouve bann reponse direct pou bann question ki’nn imprimé.
◼ Montré li ou brochure kot ou finn souligne zis bann mot ou-soit bann expression important.
◼ Aide li comprend ki chaque verset ki donné en reference appuye enn l’idée ki ena dan paragraphe-la. Montré li couma prend bann ti note dan la marge so livre ou-soit so brochure.
Guette lartik-la avant ek faire revision apré
◼ Montré etudiant-la couma examine titre enn chapitre, bann sous-titre ek bann zimage, avant ki li commence prepare so l’etude a fond.
◼ Encourage etudiant-la pou prend enn ti lé-temps pou revise bann point important kan li pré pou fini so preparation.
5eme partie: Ki quantité paragraphe nou bizin faire?
Quantité paragraphe ki bizin faire, pou depann lor capacité ek situation, enseignant ek etudiant-la toulé-deux.—kmCE 1/05 p. 1.
Batir enn la-foi solid
◼ Li beaucoup pli important ki nou aide etudiant-la comprend bien bann paragraphe, au lieu ki nou faire enn quantité paragraphe dan enn tigit lé-temps.
◼ Prend quantité lé-temps ki bizin pou aide etudiant-la comprend ek accepté seki li pé aprann.
◼ Prend assez lé-temps pou examine bann verset important ki appuye bann l’enseignement.
Evite al en dehors sujet
◼ Si enn etudiant ena tendance koz beaucoup lor bann zaffaire personnel, kitfois li pou necessaire ki ou faire enn l’arrangement pou discute sa apré l’etude.
◼ Pa koz beaucoup pendant l’etude. Enn fois lé-temps, ou kapav koz lor enn kitsoz, ou-soit raconte enn l’experience, coumsa ou pa pou empeche ou etudiant gagne la connaissance exact lor bann l’enseignement de base ki ena dan la Bible.
6eme partie: Kan enn etudiant pose enn question
Enn fois ki enn l’etude la Bible inn bien etabli, normalement li pli bon ki nou examine bann l’enseignement biblik en ordre au lieu ki nou change-change sujet. Sa aide etudiant-la pou gagne enn bon base connaissance exact ek pou progressé lor plan spirituel.—kmCE 2/05 p. 6.
Servi discernement
◼ Normalement, kapav reponn dé-suite bann question ki ena enn rapport avek seki nou pé etudié.
◼ Li preferable ki nou examine bann question ki pena okenn rapport avek nou l’etude ou-soit ki demann plus recherche, dan enn lot moment. Kitfois li pou bon si note sa bann question-la lor enn papier.
◼ Si enn etudiant gagne difficulté pou accepté enn certain l’enseignement, examine sa sujet-la avek l’aide bann lezot publication ki examine en detail seki la Bible dire lor la.
◼ Si la aussi etudiant-la pa trop croire, laisse sujet-la pou enn lot fois ek contigne avek so l’etude.
Reconette ou limit
◼ Si ou pa sur ki reponse pou donné pou enn question, pa tenté pou donne ou l’opinion personnel.
◼ Tigit par tigit montré etudiant-la couma faire bann recherche.
7eme partie: Faire la priere kan ou dirige enn l’etude la Bible
Li bien important ki enn etudiant la Bible gagne benediction Jéhovah pou li faire bann progré. A cause sa, kan nou finn bien etabli enn l’etude la Bible, li approprié ki nou faire la-priere avant ek apré l’etude.—kmCE 3/05 p. 4.
Couma pou commence faire la priere dan enn l’etude
◼ Souvent nou kapav faire sa premier fois mem, si nou faire l’etude avek enn kikenn ki content bann kitsoz spirituel.
◼ Avek lezot, kitfois nou pou bizin discernement pou trouve enn bon moment pou commence faire la priere.
◼ Kapav servi Psaume 25:4, 5 ek 1 Jean 5:14 pou aide enn etudiant trouvé kifer bizin faire la priere.
◼ Kapav servi Jean 15:16 pou explik li kifer li important ki nou prié Jéhovah a travers Jésus Christ.
Ki nou kapav demandé dan la priere?
◼ Li bon ki nou donne Jéhovah louange, parski c’est Li-mem ki la Source tou bann l’enseignement.
◼ Par ou parole, montré ki ou interessé sincerement ar ou etudiant.
◼ Par ou parole, montré ki ou apprecié l’organisation ki Jéhovah pé servi.
◼ Demann Jéhovah pou beni bann zeffort ki etudiant-la faire pou mette en pratik seki li pé aprann.
8eme partie: Amenn etudiant-la vers l’organisation
Kan nou dirige enn l’etude la Bible, nou but c’est pa zis pou enseigne dimoune-la bann doctrine, mais aussi pou aide li pou faire partie dan congregation chrétien. Prend dé-trois minute chaque semaine kan ou al faire l’etude, pou partage enn point lor l’organisation Jéhovah avek li.—kmCE 4/05 p. 8.
Bann reunion congregation
◼ Explik zot lor chaque reunion, enn par enn. Invite zot pou assisté bann reunion premier jour mem ou faire l’etude.
◼ Partage bann point important ki finn dire dan bann reunion.
◼ Kan ena Mémorial, l’assemblée, ek visite surveillant circonscription, prend dé-trois minute pou explik zot seki passé, ek faire zot envie assisté, zot aussi.
◼ Servi bann photo ki ena dan nou bann publication pou aide zot comprend couma bann reunion deroulé.
◼ Encourage zot pou lire brochure Les Témoins de Jéhovah : Qui sont-ils ? Quelles sont leurs croyances ?
Servi bann video pou augmente l’appreciation pou l’organisation
◼ Les Témoins de Jéhovah : un nom, une organisation
◼ Toute la communauté des frères
◼ Unis grâce à l’enseignement divin
◼ Jusqu’aux extrémités de la terre
9eme partie: Prepare bann etudiant pou donne temoignage informel
Kan bann etudiant la Bible commence ena la foi, sa pousse zot pou koz avek lezot lor seki zot pé aprann.—kmCE 5/05 p. 1.
Encourage zot pou rann temoignage
◼ Eski ou etudiant kapav invite certain camarade ek bann membre la famille pou assisté so l’etude?
◼ Eski ena certain camarade dan travail, dan lekol, ou-soit bann dimoune ki li koné, ki interessé pou konn plus lor la Bible?
Forme zot pou partage zot croyance
◼ Choisir bann point pendant l’etude, ek demann ou etudiant: “Couma ou pou servi la Bible pou explik ou famille sa l’enseignement-la?”
◼ Aide etudiant-la pou comprend ki li bizin montré respé ek bonté kan li pé koz avek lezot lor Bondié ek so bann projet.
◼ Bann etudiant kapav servi brochure Les Témoins de Jéhovah : Qui sont-ils ? Quelles sont leurs croyances ? pou aide zot famille ek zot camarade, pou comprend nou bann croyance ek nou bann activité ki basé lor la Bible.
10eme partie: Forme bann etudiant pou preché porte-en-porte
Kan bann ancien finn trouvé ki enn etudiant la Bible rempli bann condition pou vinn enn proclamateur, etudiant-la kapav sorti dan predication, avek la congregation.—kmCE 6/05 p. 1.
Prepare bann presentation ensam
◼ Montré etudiant-la kot-sa li kapav trouve bann model presentation.
◼ Aide li pou choisir enn introduction simple ki adapté ar territoire ou congregation.
◼ Encourage etudiant-la pou servi la Bible dan so ministere.
◼ Faire bann repetition ensam. Montré li couma li kapav surmonte bann objection ki souvent ena dan territoire, ek aussi couma li kapav faire sa sans offense lezot.
Preché ensam
◼ Laisse ou etudiant observé couma ou faire pou servi presentation ki zot toulé-deux finn preparé ensam.
◼ Li important ki ou prend compte personnalité ek capacité ou etudiant. Dan certain cas, kitfois li pou pli bon si li faire zis enn partie presentation-la.
◼ Aide sa nouveau proclamateur-la pou faire enn program pou sorti en predication regulierement.
11eme partie: Aide bann etudiant pou faire bann nouvelle visite
Preparation enn nouvelle visite commencé pendant nou premier conversation-mem avek dimoune-la. Encourage etudiant-la pou montré enn l’interet sincere envers bann dimoune avek ki li kozé. Tigit par tigit, forme li pou invite bann dimoune exprime-zot, pou ecoute seki zot dire, ek pou note bann kitsoz ki tracasse zot.—kmCE 7/05 p. 1.
Couma prepare enn visite
◼ Ré-guette ensam conversation ki etudiant-la ti gagné premier fois avek dimoune-la, ek montré li couma li kapav choisir enn point dan nou message ki pou interesse li.
◼ Prepare ensam enn presentation simple, avek enn verset la Bible ek aussi enn paragraphe dan enn publication ki kapav servi pou commence enn l’etude.
◼ Prepare enn question ki etudiant-la kapav soulevé vers la fin so conversation.
Suive l’interet sans tardé
◼ Encourage etudiant-la pou prend enn bon l’habitude al revisite bann dimoune ki’nn montré l’interet, sans tardé.
◼ Aide ou etudiant pou comprend kifer li important pou contigne al visite bann dimoune ki li pa reussi joinde.
◼ Montré li couma prend rendez-vous pou revisite dimoune-la, ek aide li pou comprend l’importance pou respecté sa rendez-vous-la.
12eme partie: Aide bann etudiant pou commence ek dirige bann l’etude la Bible
Li bien important ki ou suive l’exemple Jésus, ek ou donne enn bon l’exemple dan ou ministere. Kan ou etudiant pou trouve ou l’exemple dan ministere, li pou comprend ki l’objectif bann nouvelle visite, c’est pou commence bann l’etude la Bible.—kmCE 8/05 p. 1.
Propose enn l’etude la Bible
◼ Explik ou etudiant ki li pa necessaire explik en detail fason ki enn l’etude la Bible deroulé.
◼ Souvent, li pli bon ki nou servi enn ou deux paragraphe dan enn publication ki nou servi pou faire l’etude, pou montré couma sa deroulé.
◼ Ré-guette ek repete enn parmi bann suggestion ki ena pou commence bann l’etude la Bible.—kmCE 8/05 p. 8; kmCE 1/02 p. 6.
Forme bann etudiant pou vinn bann enseignant
◼ Encourage ou etudiant pou donne so nom dan Lekol ministere theocratik.
◼ Invite ou etudiant pou accompagne ou dan bann lezot l’etude, kot zot kapav participe enn tipé zot aussi.