Gard Byin

Bann Prezantasyon Ki Kapav Servi dan Predikasyon

Kuma pu Servi Sa Sipleman La

Laplipar sa bann prezantasyon la finn paret dan bann ansyin nimero Nu Minister DiRwayom. Sey kantite prezantasyon ki u anvi dan u minister, ek gete ki bann rezilta u gayne. Gard sa sipleman la byin, ek zet enn kudey lor la kan u prepar u pu al prese.

U kapav pik lintere enn dimunn pu Parol Bondye si u mesaz kurt. Sulev enn kestyon byin presi, lerla lir enn repons kurt dan Labib. U kapav sey sa bann sigzesyon la:

“Kan u get lavenir, eski u ena lespwar uswa bann dut? [Les dimunn la reponn.] Labib ti anons an avans bann levennman ki nu pe truve zordi ek ki bulvers nu; li ti anonse usi kuma tusala pu fini.”—2 Tim. 3:1, 2, 5; Prov. 2:21, 22.

“Zordi buku dimunn trakase pu zot lasante. Eski u kone ki Bondye finn promet ki Li pu regle tu bann problem lasante pu tuletan?”—Izai 33:24; Rev. 21:3, 4.

“Eski u kone ki Labib ti anonse ki pu ena enn sel guvernman ki pu diriz lemond antye?”—Dan. 2:44; Mat. 6:9, 10.

“Dapre u, kuma bann kondisyon ti pu ete si Zezi Kris ti diriz later?”—Psom 72:7, 8.

“Buku dimunn sufer diskriminasyon akoz zot ras, relizyon uswa sex. Dapre u ki Bondye panse lor sa kalite latitid la anver lezot dimunn?”—Akt 10:34, 35.

“Nu kone ki Zezi Kris ti fer buku mirak dan so lepok. Si u ti kapav demann li fer enn mirak ankor, ki mirak u ti pu demann li fer?”—Psom 72:12-14, 16.

“Buku dimunn fatige nek tann problem. Zot ule tann bann solisyon ki ena. Me kot sa nu kapav truv bann vre solisyon pu nu bann problem?”—2 Tim. 3:16, 17.

“Eski u kone ki sa Rwayom ki u priye dan lapriyer ‘Notre Père’ la?”—Rev. 11:15.

Bann Kestyon pu Kumans Konversasyon

Lalis sa bann kestyon la, ki sorti dan bann size ki dan liv Comment raisonner, montre nimero paz kot sak repons truve:

Eski tu bon dimunn al dan lesyel? (61)

Eski bizin al dan lesyel pu konn vre boner? (62)

Eski ena bann bon rezon pu krwar dan Bondye? (106)

Eski vremem Bondye pran kont seki pe ariv nu? (107)

Eski Bondye Li enn kikenn reel? (108)

Kifer eski li inportan konn non personel Bondye ek servi li? (200)

Eski vremem Zezi Kris Bondye? (205)

Ki kapav fer pu rann enn maryaz pli ere? (229)

Kifer eski ena sa kantite mesanste la? (237)

Kisannla ki pe diriz sa lemond la—Bondye uswa Satan? (250)

Kifer eski nu vinn vye ek nu mor? (253)

Dan ki kondisyon bann dimunn mor ete? (255)

Eski Bondye aksepte tu relizyon? (310)

Kuma eski enn dimunn kapav rekonet vre relizyon? (316)

Ki Rwayom Bondye pu fer? (336)

Eski Satan ena enn gran puvwar lor lemond zordi? (368)

Kifer eski Bondye permet sufrans? (375)

Pu ki rezon dimunn pe viv? (434)

Bann Sigzesyon pu Prezant Brosir Ki Bondye Pe Demann Nu

“Sirman u pu dakor ki buku dimunn krwar dan Bondye. Tu bann ki krwar dan Bondye rekonet ki Li demann nu kitsoz. Me ena enn kitsoz lor ki bann dimunn pa dakor: Ki Bondye pe demann nu?” Lerla, prezant brosir Ki Bondye Pe Demann Nu, uver leson 1, ek egzaminn sa.

“Akoz tu bann problem ki lafami pe bizin fer fas zordi, eski u finn deza demann u ki sekre boner enn fami?” Apre ki dimunn la fini reponn, explike ki dan Labib, Bondye fer nu konn vre sekre pu konn boner dan fami. Lir Izai 48:17. Lerla uver brosir Ki Bondye Pe Demann Nu dan leson 8 ek montre detrwa tex Labib site ki donn enn direksyon sir pu sak manb enn fami. Lir bann kestyon ki ena dan kumansman leson la. Demann dimunn la si li ti pu kontan lir bann repons la.

“Sa brosir la donn enn kur konple lor bann lanseynman debaz ki ena dan Labib. Dan sak paz, u pu truv repons bann kestyon ki bann dimunn finn poz zot pandan plizir syek. Par egzanp, Ki lintansyon Bondye pu later?” Uver leson 5, ek lir bann kestyon ki ena dan kumansman leson la. Demann dimunn la ki kestyon interes li plis, ek lerla lir paragraf (uswa bann paragraf) la, ek get bann tex Labib ki apropriye. Explik dimunn la ki li kapav truv fasilman repons bann lezot kestyon, parey kuma sa kestyon ki fek gete la. Propoz pu returne pu egzaminn enn lot kestyon.

“Dapre u, kifer eski parfwa ena vyolans dan bann lekol? Eski u panse sa egziste akoz bann paran pa finn ase byin elve zot zanfan? Uswa kapav ena enn lot rezon, par egzanp linflyans Dyab?” Les dimunn la reponn. Si dimunn la dir ki sa egziste akoz linflyans Dyab, lir Revelasyon 12:9, 12. Montre kuma Dyab pe pus dimunn pu fer dezord dan lemond. Lerla uver leson 4 dan brosir Ki Bondye Pe Demann Nu ek demann dimunn la si li finn deza demann li kot Dyab sorti. Lir ek egzaminn de premye paragraf. Asterla, si dimunn la finn dir ki akoz “paran pa finn ase byin elve zot zanfan” ki ena vyolans dan bann lekol, lir 2 Timote 3:1-3 ek montre bann tre karakter ki favoriz sa problem la. Lerla uver leson 8 dan brosir Ki Bondye Pe Demann Nu, lir paragraf 5, ek kontiyn diskisyon la.

“Eski u panse li rezonab pu atann ki Kreater donn nu konesans nu bizin pu batir enn bon lavi fami?” Apre ki dimunn la fini reponn, tir brosir Ki Bondye Pe Demann Nu. Uver leson 8, ek explike ki dan sa brosir la ena bann prinsip ki tire dan Labib pu sak manb lafami. Propoz pu fer enn demonstrasyon pu montre kuma servi sa brosir la ansam avek Labib pu tir plis profi.

“Avek tu bann problem ki nu pe bizin fer fas dan lavi modern, eski u panse ki lapriyer kapav vremem ed nu? [Les dimunn la reponn.] Buku dir ki lapriyer donn zot enn lafors andan zot. [Lir Filipyin 4:6, 7.] Mem sa, enn dimunn kapav ena linpresyon ki Bondye pa reponn so bann lapriyer. [Uver leson 7 dan brosir Ki Bondye Pe Demann Nu.] Sa brosir la explike ki manyer lapriyer kapav byin profitab pu nu.”

“Nu pe demann nu bann vwazin kifer ena enn kantite relizyon dan lemond. Purtan, ena enn sel Labib. Dapre u, kifer ena sa konfizyon relizyon la? [Les dimunn la reponn. Uver leson 13 dan brosir Ki Bondye Pe Demann Nu, ek lir bann kestyon dan kumansman leson la.] Si u lir sa leson la, u pu gayn repons sa bann kestyon la.”

Apre ki u finn plas Latur Degard ek Réveillez-vous ! avek enn dimunn, demann li si u kapav lir enn ti paragraf pu li. Si li dakor, uver leson 5 dan brosir Ki Bondye Pe Demann Nu. Atir so latansyon lor bann kestyon ki ena dan kumansman leson la, ek dir li ekut repons sa premye kestyon la pandan ki u pe lir premye paragraf. Kan fini lir paragraf la, poz kestyon la ek les li reponn. Ofer li brosir la, ek si li aksepte, pran bann dispozisyon pu returne pu gayn so bann repons pu sa de lezot kestyon la.

Bann Sigzesyon pu Prezant Liv Konesans

Avek Labib dan lamin, kumans kumsa: “Zordi nu pe partaz enn pasaz Labib avek tu bann dimunn ki dan u semin. Li dir . . . ” Lir Zan 17:3, ek lerla demann li: “Eski u finn remarke ki finn promet nu si nu ena enn bon kalite konesans? [Les dimunn la reponn.] Kot sa nu kapav gayn sa konesans la?” Apre ki li fini reponn, montre li liv Konesans, ek dir: “Sa liv la montre konesans ki amenn ver lavi pu tuletan. Li reponn bann kestyon ki bann dimunn poze pli suvan lor Labib.” Montre lalis bann sapit, ek demann dimunn la si li finn deza poz limem kestyon lor enn sa bann size la.

“Eski u finn deza demann u mem si vremem Bondye konserne ar linzistis ek sufrans ki nu truve otur nu uswa ki nu viktim nu mem? [Les dimunn la reponn.] Labib donn nu lasirans ki Bondye kontan nu ek ki Li pu ed nu dan bann moman difisil.” Lir sertin porsyon dan Psom 72:12-17. Uver liv Konesans dan sapit 8, ek montre ki li donn enn repons ankurazan pu enn kestyon ki plizir milyon dimunn finn poze, Kifer eski Bondye permet sufrans? Si posib, egzaminn detrwa bann panse Labib ki ena dan paragraf 3 ziska 5, uswa fer sa dan enn prosin vizit.

“Laplipar parmi nu, nu ena bann pros ki’nn mor. Eski u finn deza demann u mem si nu pu retruv zot enn zur? [Les dimunn la reponn.] Zezi finn pruve ki nu bann pros kapav regayn lavi. [Lir Zan 11:11, 25, 44.] Mem si sa ti arive plizir syek avan, seki Zezi ti fer montre seki Bondye finn promet pu fer pu nu.” Uver liv Konesans ek montre zimaz ki ena dan paz 85 ek lir komanter ki akonpayn zimaz la. Lerla montre zimaz lor paz 86, ek fer enn komanter. Pu zet baz pu enn prosin vizit, poz sa kestyon la: “Eski u ti pu kontan kone kifer bann dimunn vinn vye ek kifer zot mor?” Returne pu egzaminn sapit 6.

“Eski u finn deza reflesi kifer bann dimunn ti pu kontan viv pli lontan?” Apre ki dimunn la fini reponn, uver liv Konesans dan sapit 6, ek lir paragraf 3. Rezonn lor bann tex Labib ki finn site. Poz sa de kestyon ki ena alafin paragraf la, ek demann dimunn la si li ti pu kontan konn zot repons. Si li dir wi, egzaminn detrwa prosin paragraf.

“Nu pe demann bann dimunn si zot krwar ladan . . . ” Lir Zenez 1:1, ek apre demande: “Eski u dakor ar sa pasaz la?” Si dimunn la dakor, dir: “Mwa usi mo dakor avek sa. Me, eski u panse ki si Bondye finn kre tu kitsoz, Limem ki responsab mesanste usi?” Apre ki u finn remersye dimunn la pu so repons, lir Eklezyast 7:29. Uver liv Konesans dan sapit 8, ek lir paragraf 2. Si li pa dakor avek Zenez 1:1, ankuraz li pu egzaminn prev ki Kreater egziste.—Get liv Comment raisonner, paz 72-5.

“Pwiski zordi bann valer moral pe sanze telman vit, eski u pa dakor ki nu bizin enn direksyon sir dan lavi? [Les dimunn la reponn.] Mem si Labib li parmi bann pli ansyin liv ki ena, li donn bann konsey pratik pu lavi modern ek pu enn lavi fami ere.” Lerla uver liv Konesans dan sapit 2, ek lir paragraf 10 ek premye fraz paragraf 11, ek usi 2 Timote 3:16, 17.

“Eski u ti pu kontan kone ki lavenir rezerve pu nu ek pu later? [Les dimunn la reponn.] Labib rezim lavenir an enn sel mo—Paradi! Ala kot Bondye ti met premye kup imin kan Li ti kre zot. Pu gayn enn lide kuma sa paradi la ti ete, not sa deskripsyon la.” Uver liv Konesans, paz 8, ek lir paragraf 9, anba sutit “Lavi dan Paradi.” Lerla egzaminn bann pwin ki mansyone dan paragraf 10, ek lir tex ki finn site, Izai 55:10, 11. Propoz pu egzaminn usi paragraf 11-16 pu gete kuma lavi pu ete kan Paradi pu retabli lor later.

Kan u vizit bann dimunn avek ki u finn plas Latur Degard ek Réveillez-vous !, u kapav dir:

“Dernye fwa kan mo ti pase, mo ti les u enn kopi Latur Degard. Kitfwa u finn remarke ki tit sa magazinn la an antye li Latur Degard Pe Anons Rwayom Zeova. Zordi mo ti pu kontan explik u ki ete sa Rwayom la ek ki li kapav vedir pu u ek pu u fami.” Apre sa, uver brosir Ki Bondye Pe Demann Nu dan leson 6, lir leson la ek egzaminn sa avek dimunn la dapre letan ki li ena.

“Fek la mo ti vizit u ek mo ti les bann magazinn Latur Degard ek Réveillez-vous ! avek u. Sa bann magazinn la fer dimunn gayn plis respe pu Labib ek pu direksyon moral ki li done. Parski mo panse ki li inportan ki sak dimunn konpran Parol Bondye, mo’nn returne pu montre u enn kitsoz ki pu ed u fer sa.” Prezant brosir Ki Bondye Pe Demann Nu uswa liv Konesans, ek propoz li enn letid Labib.

Kan prezant ninport ki liv 192-paz, u kapav sey sa prezantasyon la:

“Finn koz buku lor linportans gayn enn bon ledikasyon. Dapre u, ki kalite ledikasyon enn dimunn bizin rode pu gayn pli gran boner ek reysi dan lavi? [Les dimunn la reponn. Apre sa, lir Proverb 9:10, 11.] Sa liv la [donn tit liv ki u pe prezante la] baze lor Labib. Li atir latansyon lor sel lasurs konesans ki kapav amenn ver lavi pu tuletan.” Montre enn legzanp presi dan liv la, ek ankuraz dimunn la pu lir li.

Bann Lezot Piblikasyon

Kapav truv bann sigzesyon pu prezant bann lezot piblikasyon dan L’Index des publications anba tit:

Présentation

Liste par publication

Enn Lapros Direk

Pu kumans enn letid Labib, sey servi enn sa bann lapros direk la:

“Eski u kone ki dan zis detrwa minit, u kapav truv repons lor enn kestyon inportan lor Labib? Par egzanp, . . . ” Lerla, poz enn parmi bann kestyon ki paret dan kumansman enn leson dan brosir Ki Bondye Pe Demann Nu ki u panse kapav interes dimunn la.

“Mo pe pas kot u pu montre u ki manyer nu leson gratis lor Labib li derule. Li pu pran mwa apepre sink minit pu montre u sa. Eski u ena sink minit?” Si li dir wi, servi leson 1 dan brosir Ki Bondye Pe Demann Nu pu montre kuma letid la derule. Lir zis enn uswa de tex Labib ki u finn swazire. Apre sa, demann li: “Kan eski u pu ena 15 minit ankor pu ki nu kapav fer prosin leson?”

“Buku dimunn ena enn Labib, me zot pa realize ki li ena repons bann kestyon inportan ki nu poze konsernan nu lavenir. Si u servi sa mwayin la pu etidye [brosir Ki Bondye Pe Demann Nu uswa liv Konesans] anviron enertan, enn fwa par semenn, u kapav gayn enn konesans debaz lor Labib dan zis detrwa mwa. Mo ti pu kontan montre u ki manyer fer sa.”

“Mo’nn vinn kot u pu propoz u enn kur gratis lor Labib. Si u permet mwa, mo ti pu kontan montre u dan zis detrwa minit ki manyer dan preske 200 peyi bann dimunn egzaminn Labib kot zot avek zot fami. Nu kapav egzaminn ninport ki size. [Montre lalis bann sapit dan liv Konesans.] Lekel interes u plis ladan?” Atann dimunn la swazire. Uver sapit ki li swazire, ek kumans etidye premye paragraf.

“Mo donn bann leson gratis lor Labib ek mo program permet mwa pu pran ankor lezot zelev. Nu servi sa liv la pu etidye Labib. [Montre liv Konesans.] Kur la pu dir zis detrwa mwa ek li reponn bann kestyon kuma: Kifer eski Bondye permet sufrans? Kifer nu vinn vye ek kifer nu mor? Ki ariv nu bann pros ki finn mor? Kuma eski u kapav vinn pros ar Bondye?” Apre sa, demann dimunn la: “Eski mo kapav fer enn demonstrasyon pu montre u kuma nu fer sa?”

Si u finn truv enn prezantasyon efikas ki pik lintere bann dimunn, abe kontiyn servi li! U ena zis pu adapte li ar piblikasyon ki pe ofer sa mwa la.