Couma pou Servi: Enn bon nouvelle ki sorti kot Bondié!
Enn Nouveau Brochure ki Finn Faire pou Aide Nou Faire Bann Nouvelle Visite ek Commence Bann l’Etude la Bible
1. Ki nouveau brochure nou ti gagné dan l’Assemblée District “Protege to leker!” ki pou aide nou faire bann nouvelle visite ek commence bann l’etude la Bible?
1 Pendant l’Assemblée District “Protege to leker!,” nou ti bien content pou gagne enn nouveau brochure pou aide nou faire bann nouvelle visite ek commence bann l’etude la Bible. Brochure Enn bon nouvelle ki sorti kot Bondié! remplace brochure Ki Bondié pé demann nou faire?, ek so bann leson bien precis pareil couma sa brochure-la. Sa pou aide nou pou commence bann l’etude dan enn fason efficace devant la porte bann dimoune. Brochure Ki Bondié pé demann nou faire? ti koz surtout lor bann principe Chretien ek pou bann nouveau etudiant la Bible kitfois sa bann principe-la assez difficile pou accepté. Mais sa nouveau brochure-la mette plus l’accent lor bann bon nouvelle ki ena dan la Bible.—Actes 15:35.
2. Kifer inn faire brochure Bon nouvelle?
2 Kifer inn faire sa brochure-la? Nou bann frere a travers le monde finn demann enn publication pli simple ki pou attire bann dimoune vers la verité ek dirige zot vers livre Ki la Bible enseigné vrai-mem?, livre principal ki nou servi pou conduire bann l’etude la Bible. Bann dimoune ki hesité pou etudié dan enn livre, souvent pli disposé pou etudié dan enn brochure. En plus, li pli facile pou traduire enn brochure dan pli beaucoup langue.
3. Couma sa brochure-la different ar bann lezot publication ki servi pou faire l’etude?
3 So Bann Caracteristik: Beaucoup bann publication ki nou servi pou faire l’etude finn ecrire dan enn fason pou ki bann dimoune kapav lire zot ek comprend la verité, sans ki enn kikenn explik zot. Sa publication-la li different. Li’nn faire dan enn fason pou aide bann dimoune etudié la Bible avek l’aide enn enseignant. Alors, kan ou pé propose sa brochure-la enn dimoune, li pli bon ki ou lire ek discute lor enn ou-soit deux paragraphe avek li. Bann paragraphe-la courte, alors ou kapav mem examine zot devant la porte dimoune-la ou-soit kot li travail. Mem si leson 1 li enn bon place pou commence l’etude dan sa brochure-la, nou kapav aussi commencé avek n’importe ki lezot leson.
4. Couma sa brochure-la aide nou pou enseigne bann etudiant direct dan la Bible?
4 Dan beaucoup nou bann publication, nou trouve reponse bann question dan bann paragraphe. Parkont dan sa publication-la, nou gagne bann reponse surtout dan la Bible. La plupart bann dimoune envie gagne reponse dan la Bible plutot ki dan nou bann publication. A cause sa, dan sa brochure-la inn zis cite la plupart bann verset. Alors, bizin lire zot direct dan la Bible. Sa aide bann etudiant pou trouvé ki seki zot pé aprann sorti kot Bondié.—Is. 54:13.
5. Kifer li important ki sa dimoune ki pé conduire l’etude-la bien prepare-li pou chaque l’etude?
5 Sa brochure-la pa explik tou bann verset. Kifer? Sa encourage etudiant-la pou pose bann question ek permette enseignant-la servi so bann capacité pou enseigné. Alors, li bien important ki enseignant-la bien prepare-li pou chaque l’etude. Selman faire attention: Pa koz trop beaucoup. Nou content pou explik bann verset. Mais souvent, nou pou gagne bann pli bon resultat si nou demann etudiant-la pou explik seki li’nn comprend dan verset-la. Kan nou servi bann question avek tact, nou kapav aide li pou comprend seki chaque verset pé rod dire.—Actes 17:2.
6. Couma nou kapav servi sa brochure-la kan: (a) bann dimoune pa trop croire dan Bondié ek dan la Bible? (b) nou pé preché lakaz-lakaz? (c) nou pé commence bann l’etude la Bible dan enn fason direct? (d) nou pé faire bann nouvelle visite?
6 Pareil couma bann lezot publication ki servi pou conduire l’etude, nou kapav place sa brochure-la n’importe kan, mem si pé offert enn lot publication sa mois-la. Beaucoup pou content servi sa brochure-la pou commence bann l’etude dan enn fason direct devant la porte bann dimoune. En plus, pareil couma ti dire dan l’assemblée district, kan nou servi sa brochure-la pou al visite bann dimoune ki’nn montré l’interet, sa “kapav vrai-mem rann nou bann visite interessant!”—Guette bann l’encadré lor page 5-7.
7. Couma ou kapav conduire enn l’etude la Bible a travers sa brochure-la?
7 Couma pou Faire l’Etude: Pou commencé, nou kapav lire question ki ena enn numero ek ki en caractere gras. Apré, lire paragraphe-la ek bann verset ki en italik. Avek tact, servi bann question pou aide dimoune-la comprend signification bann verset-la. Apré sa, avant ki nou al lor prochain section, demann dimoune-la pou reponn question ki en caractere gras pou guetté si li’nn bien comprend. Pendant bann premier visite, kitfois li pli bon ki nou examine zis enn parmi bann question ki en caractere gras. Avek le temps, nou kapav gagne bann pli longue conversation ek etudié leson-la en entier.
8. Ki nou kapav dire kan nou pé cite enn verset, ek kifer?
8 Bann verset ki commence avek mot “lire” reponn dan enn fason pli direct question ki en caractere gras. Kan nou pé cite enn verset, evite dire: “L’apotre Paul ti ecrire” ou-soit, “Guette seki Jérémie ti annoncé.” Dimoune-la kapav pensé ki nou pé zis lire seki bann simple humain inn ecrire. Li pli bon nou dire: “Parole Bondié dire” ou-soit, “Guette seki la Bible ti annoncé.”
9. Eski pendant l’etude nou bizin lire tou bann verset ki’nn cité?
9 Eski nou bizin lire tou bann verset ki’nn cité ou-soit zis bann verset ki commence avek “lire”? Tou pou depann lor situation dimoune-la. Tou bann verset ki’nn cité ena zot l’importance. Dan chaque verset ena bann l’information ki vaut la peine nou discuté. Mais dan certain cas, a cause etudiant-la pena assez le temps, pa trop interessé, ou-soit gagne difficulté pou lire, kitfois li pli bon nou guette zis bann verset ki commence avek “lire”.
10. Kan eski nou kapav change publication ek commence l’etude dan livre Ki la Bible enseigné?
10 Kan Eski Nou Bizin Commence dan Livre Ki la Bible enseigné?: Apré ki nou’nn gagne plusieurs conversation avek dimoune-la ek ki l’etude inn bien etabli, nou kapav soit change publication ek commence l’etude dan livre Ki la Bible enseigné? soit contigne dan brochure Bon nouvelle ziska ki li fini. Bann proclamateur kapav servi zot bon jugement pou decidé kan pou change publication. Si nou changé, eski nou bizin commence livre Ki la Bible enseigné? depuis commencement? Pena okenn regle pou sa parski chaque dimoune different. Selman, la plupart bann etudiant pou tire profit si zot ré-guette bann mem sujet plus en detail dan livre Ki la Bible enseigné?
11. Kifer nou bizin bien servi sa nouveau brochure-la?
11 Dan enn le monde kot bien rare nou tann bann bon nouvelle, nou ena enn grand privilege pou annonce pli bon nouvelle ki kapav ena—ki Royaume Bondié pé regné ek ki bientot li pou guide nou dan le monde nouveau kot pou ena la justice! (Mat. 24:14; 2 Pierre 3:13) Nou sur ki bann ki tann sa message-la pou d’accord avek sa bann parole inspiré-la: “Ala zot joli lor montagne, lipié enn kikenn ki amenn enn bon nouvelle, enn kikenn ki annonce la paix, enn kikenn ki amenn enn bon nouvelle lor enn kitsoz ki pli bon, ki annonce la delivrance, ki dire Sion: ‘To Bondié finn vinn le roi!’” (Is. 52:7) Anou servi sa nouveau brochure-la pou faire bann dimoune ki soif lor plan spirituel konn bann bon nouvelle ki sorti kot Bondié!
[L’encadré page 5]
Kan Bann Dimoune Pa Trop Croire dan Bondié ek dan la Bible:
● Dan certain l’endroit, bann proclamateur inn trouvé ki bann mot couma “Bondié” ek “la Bible” kapav souleve bann objection. Dan sa cas-la, kan nou zwenn enn dimoune pou premier fois, li pli bon ki nou koz lor bann sujet ki interesse bann dimoune dan nou territoire, couma par exemple, l’importance pou gagne enn bon gouvernement, kot-sa pou gagne bann l’aide pratik pou la famille, ek seki nou pé attann pou l’avenir. Kitfois, apré ki nou’nn gagne plusieurs conversation avek dimoune-la kot nou’nn examine couma nou koné Bondié existé ek kifer nou kapav faire la Bible confiance, nou kapav presente li brochure Bon nouvelle.
[L’encadré page 6]
Kan Nou Pé Preché Lakaz-Lakaz:
● “Mo pé rann ou visite pou montré ou couma li bien facile pou koné seki Bondié ena l’intention faire pou bann dimoune dan l’avenir. Eski ou finn deja demann-ou-mem si enn jour Bondié pou tire tou nou bann souffrance? [Laisse dimoune-la reponn.] Sa brochure-la montré kot-sa ou kapav trouve reponse sa question-la dan la Bible. [Donne dimoune-la enn brochure, ek lire premier paragraphe dan leson 1, ek lire aussi Jérémie 29:11.] Dapré seki nou lire ici, eski ou croire ki Bondié envie ki nou ena enn pli bon l’avenir? [Laisse dimoune-la reponn.] Si ou envie, ou kapav garde sa copie-la. Prochaine fois, nou kapav examine deuxieme paragraphe pou guette reponse ki la Bible donné pou sa question-la: ‘Couma Bondié pou tire tou kitsoz ki faire bann dimoune souffert?’” (Si dimoune-la parette ena le temps premier fois ki ou zwenn li, ou kapav lire ek explik deuxieme paragraphe ek trois verset ki ena dan paragraphe-la. Faire l’arrangement pou retourné ek pou discute lor deuxieme question).
● “Beaucoup dimoune content prié, surtout kan zot dan probleme. Eski parfois ou prié? [Laisse dimoune-la reponn.] Eski ou pensé ki Bondié ecoute tou bann la priere, ou-soit kapav ena certain la priere ki pa faire Li plaisir? [Laisse dimoune-la reponn.] Avek moi, ena enn brochure ki montré reponse ki la Bible donné pou sa bann question-la. [Donne li enn copie brochure-la, ek examine ensam premier paragraphe dan leson 12 ek bann verset ki bizin “lire”.] Eski sa pa extraordinaire ki Bondié envie ecoute nou? Mais, pou profite bann bienfait ki nou gagné grace a la priere, nou bizin bien konn Bondié. [Al dan leson 2 ek attire so l’attention lor bann sous-titre.] Si ou ti pou content, mo kapav quitte sa brochure-la avek ou, ek enn lot jour, nou kapav lire bann reponse ki la Bible donné pou sa bann question bien interessant-la.”
● “Mo devant ou la porte zordi, parski beaucoup dimoune tracassé ek demann-zot-mem kot-sa le monde-la pé allé. Eski ou pensé ki enn jour bann condition pou amelioré? [Laisse dimoune-la reponn.] Beaucoup dimoune etonné pou aprann ki dan la Bible ena bann bon nouvelle ki kapav donne nou l’espoir. Ici ena certain bann question ki la Bible reponn.” Donne li enn brochure, ek invite li pou choisir enn question ki pli interesse li lor dernier page sa brochure-la. Apré al dan leson-la, ek montré couma l’etude deroulé. Faire bann l’arrangement pou retourné ek pou examine prochain question dan leson-la.
[L’encadré page 7]
Essaye Commence l’Etude dan enn Fason Direct:
● “Mo pé rann ou enn ti visite pou faire ou konn enn nouveau cours ki nou pé offert bann dimoune lor la Bible. Dan sa brochure-la ena 15 leson ki montré kot-sa dan la Bible ou kapav gagne reponse bann question bien important. [Montré li premier ek dernier page.] Eski ou finn deja essaye comprend la Bible? [Laisse dimoune-la reponn.] Permette moi montré ou couma sa bann leson bien facile. [Dan leson 3, examine premier paragraphe question 3 ek lire Révélation 21:4, 5. Si situation permette, examine prochain paragraphe ek bann verset ki bizin “lire”.] Si ou ti pou content, mo kapav quitte sa brochure-la avek ou. Nou encourage ou pou essaye etudié la Bible au moins enn fois. Si ou content, ou kapav contigne l’etude-la. Prochaine fois, nou kapav examine premier leson. Remarké ki li zis enn page.”
[L’encadré page 7]
Presente Brochure-la kan Ou Pé Faire enn Nouvelle Visite:
● Kan nou pé visite enn dimoune ki’nn montré l’interet, nou kapav dire: “Mo bien content pou ré-trouve ou. Mo finn amenn sa brochure-la pou ou. Li montré reponse ki la Bible donné pou plusieurs question bien interessant. [Donne li enn brochure, ek demann li pou guette dernier page.] Lekel parmi sa bann sujet-la pli interesse ou? [Laisse dimoune-la reponn. Apré al dan leson ki li’nn choisir.] Permette moi montré ou couma kapav servi sa brochure-la pou rod bann reponse dan la Bible.” Servi enn ou-soit deux paragraphe ek bann verset ki bizin “lire” pou montré couma l’etude deroulé. Ou’nn fini commence enn l’etude la Bible! Quitte brochure-la avek dimoune-la, ek faire bann l’arrangement pou retourné. Kan ou fini sa leson-la, ou kapav faire enn lot leson ki dimoune-la inn choisir ou-soit commence depuis commencement.