Ansegn Avek Brosir Bon Nouvel
1. Kouma bizin etidie brosir Bon Nouvel?
1 Parey kouma ti examine dan Nou Minister Ziliet, enn parmi bann zouti inportan ki nou servi pou ansegne, se brosir Enn Bon Nouvel Ki Sorti Kot Bondie! Dan bann paragraf ena zis bann verse an referans, me pa finn sit zot. Alor, sa pou ed bann dimounn aprann direk dan Labib. Boukou parmi nou bann piblikasion ki nou servi pou fer letid, finn ekrir dan enn fason ki enn dimounn kapav aprann par limem. Me sa brosir-la, li diferan. Bizin enn ansegnan pou explik sa enn dimounn. Akoz sa, kan nou ofer sa brosir-la, nou bizin montre dimounn-la kouma enn letid deroule, ek koumsa li pou trouve ki kantite li interesan pou aprann bann bon nouvel dan Labib.—Mat. 13:44.
2. Kouma to kapav servi brosir Bon Nouvel premie fwa to zwenn enn dimounn?
2 Premie Fwa To Zwenn enn Dimounn: To kapav dir: “Mo devan ou laport parski bann dimounn bien trakase pou lavenir limanite. Eski ou panse ki bann kondision pou ameliore enn zour? [Les dimounn-la reponn.] Dan Labib, ena bann bon nouvel ki kapav donn nou lespwar. Les mo montre ou bann kestion ki Labib reponn.” Donn dimounn-la enn brosir, ek invit li pou swazir enn kestion lor dernie paz. Servi premie paragraf dan leson ki li finn swazir pou montre li kouma enn letid deroule. To kapav osi poz dimounn-la enn kestion ki pou interes li ek ki baze lor enn leson ki twa to finn swazire. Lerla to pou kapav montre li kouma sa brosir-la kapav ed li pou trouv repons ki Labib done. Si sa leson-la ena enn rapor avek enn video lor jw.org, to kapav zwe sa dan to prezantasion.
3. Explike kouma pou kondir enn letid avek brosir Bon Nouvel.
3 Kouma pou Kondir enn Letid? (1) Lir kestion ki ena enn nimero ek ki an karakter gra pou ed dimounn-la konsantre lor pwin ki pli inportan. (2) Lir paragraf ki swiv. (3) Lir bann verse ki an italik, ek poz bann kestion apropriye pou ed dimounn-la trouve kouma Labib reponn sa bann kestion-la. (4) Si ena enn lot paragraf apre enn kestion, refer letap 2 ek 3. Si ena enn video ki ena enn lien avek kestion-la ek ki to pankor montre li sa, rod enn moman pandan zot konversasion pou zwe video-la. (5) Alafin, demann dimounn-la reponn bann kestion an karakter gra pou fer sir ki li’nn konpran.
4. Kouma nou kapav servi sa zouti inportan la dan enn fason efikas?
4 Li bon ki to abitie avek sa zouti inportan la. Servi li sak fwa ki lokazion permet. Avan sak letid, pans etidian-la ek reflesi ki pli bon fason to kapav fer li rezone. To pou kapav fer sa kan to servi bann verse ki ena dan sak leson. (Prov. 15:28; Zist. 17:2, 3) Amezir ki to gagn lexperyans ek to gagn plis kapasite, kitfwa to pou trouve kouma sa brosir-la pou vinn enn parmi to bann zouti prefere pou ansegn bann dimounn laverite!